Tumi Eke Nove Sobhent Koxim Adjust Zaunk Xoktat?

Toxench, Nicolas ani Celine nanvachea eka zoddpeak ek veglli oddchonn asli. Tim France xakhent seva kortalim. Punn uprant tankam eke nove sobhent seva korunk dhaddlim. Tim sangtat: “Survatek ami khub khuxal aslim. Punn uprant amkam amchea poilinchea ixttancho khub ugddas ieunk laglo. Toxench, nove sobhentlea bhav-bhoinnam sangata amchi ixttagot azunui titli ghott zaunk nasli.”a Tor oddchonneo aslear pasun, nove sobhent amchi khuxalkai samballunk ani Jehovachi seva korit ravonk amkam koxi modot zaunk xokta? Nove sobhent ailolea bhav-bhoinnank dusreamnim koxi modot korunk zata? Ani nove sobhent ami eka-mekak urba koxi diunk zata?

TUMKAM KHOINCHIM CHAR TOTVAM MODOT KORUNK XOKTAT?

1. Jehovacher patieun ravat. (St. 37:5) Japan-antlea Kazumi nanvachea bhoinnichea ghovak kamak transfer mellʼllem tednam, tim 20 vorsam poriant seva kortalim ti sobha soddun, tankam eke dusre sobhent vochonk poddlem. Tor bhoinnin aplem soglem ‘Jehovachea hatant koxem ghatlem’? Bhoinn mhunntta: “Hanv bhietalem, toxench mhaka eksurponn bhogtalem ani usko zatalo. Punn tea vellar hanv kallzant thaun Jehova lagim magnnem kortalem. Ani dor ek pavtt hanv oxem kortalem tednam, Jehovan mhaka goroz ti ghottai dili.”

Tor ami Jehovacher anik patieun ravonk kitem korunk zata? Ek zhadd vaddonk, taka udkachi ani borea matiechi goroz asta. Teach bhaxen, amcho bhavarth ghott korunk amkam pasun kiteachi tori goroz asa. Bhav Nicolas-an, Jehovachi khuxi korunk zaite teag kele toslea munxanchea udharonnancher niall kelo. Zoxem Abraham, Jezu ani Paulu. Oxem kelʼlean, Jehova taka modot kortolo mhunn tachi khatri vaddli. Ami sodanch svotacho Bible obheas kelo zalear amchea jivitant kosle-i bodlav zalear pasun, tancho fuddo korunk amkam modot zatoli. Toxench, nove sobhentlea bhav-bhoinnank ami urba diunk xoktat tosleo zaiteo vostu ami xiktolim.

2. Sor korinakat. (Up. 7:10) Jules nanvacho bhav Benin thaun Amerikent ailo tednam, taka eke nove sonskrutintlea lokam sangata ravonk xikonk poddlem. Bhav mhunntta: “Mhaka mellttalo to dor ek bhav vo bhoinn mhojea vixim soglem zannam zaunk sodhtalim, oxem mhaka distalem.” Kiteak? Karonn bhavachi sonskruti veglli asli. Tor hem soglem taka novem aslem dekhun, to bhav-bhoinnam thaun pois ravonk laglo. Punn bhav-bhoinnank anik bore toren vollkhon ghetlolean, tannem aplem chintop bodolʼlem. Bhav mhunntta: “Ami sonvsarachea khoinchea-i konnxeak asum, ami soglim ek-sarkinch asat. Punn ami veg-vegllea toren uloitat ani vagtat. Tor ami soglea lokank apnnavop gorjechem mhunn hanv xikonk pavlom.” Tea pasot, tumchea adlea ani nove sobhe modem sor korinakat. Hea vixim Anne-Lise nanvachi pioneer bhoinn mhunntta: “Hanv eke nove sobhent novem kitem xikonk ailʼlem. Mhojea adlea sobhent zoxem aslem, toxench mhojea novea sobhent astolem mhunn chintun hanv ieunk na.”

Vhoddilamno, tumi pasun tumchea adle ani nove sobhe modem sor korinakat. Tumchea nove sobhent bhav ghoddie veglle toren kam kortat astole. Punn tem chukichem asa oxem chintinakat. Tumche vichar sangchea poilim, thoinchi sonskruti ani thoinchea bhav-bhoinnam vixim anik zannam zaun gheiat. (Up. 3:1, 7b) Oxem kelʼlean, bhav-bhoinnamnim tumi sangtat teach toren kam korunk zai mhunn tumi tancher dobhav ghalchenant. Punn tumchea borea udharonna vorvim tankam xikonk sompem zatolem.​—2 Kor. 1:24.

3. Tumche nove sobhent bizi ravat. (Filp. 1:27) Eka novea zagear vochon adjust zaunk khub vell ani vavr lagta tem khorem. Punn tumi survate thaunuch Raj-ghorant mittingek hajir zaunk, zata titlo vavr korunk zai. Tumi mittingek dixttich poddonant zalear, bhav-bhoinnam tumkam koxim vollkhonk ani modot korunk pavtolim? Lucinda nanvachi bhoinn, aplea don dhuvam sangata Dokxinn Afrikechea eka vhodd xarant vochon settle zali. Ti mhunntta: “Survate thaunuch, amchea novea sobhentlea bhav-bhoinnam sangata ixttagot korunk, tanchea sangata porgottnni korunk, toxench mittingent zobab diunk mhojea ixttamnim mhaka urba dili. Toxench, bhavamnim amchea ghorant porgottnnechi mitting korunk zata mhunn hanvem tankam sanglem.”

Nove sobhentlea bhav-bhoinnam borabor ami ‘sangata mellon vavr kortat’ tednam tankam, toxench amkam-i urba mellttoli. Bhoinn Anne-Lise-ak, vhoddilamnim veg-vegllea bhav-bhoinnam sangata porgottnni korunk urba dili. Hacho porinnam kitem zalo? Ti sangta: “Oxem kelʼlean hanv rokddench bhav-bhoinnam sangata adjust zaunk xiklem.” Toxench, ami Raj-ghor nitoll korchea ani samballchea kamant hat-bott ghaltat tednam, ami aileant ti novi sobha, atam amchi sobha zaun asa mhunn ami dakhoun ditat. Hea toren ami nove sobhent bizi ravtat ani bhav-bhoinnam sangata mellon vavr kortat tednam, tanchea modem ravonk amkam sonvoim zatoli, ani ami tankam amchi famil koxi lekhtolim.

4. Novim ixttam korat. (2 Kor. 6:11-13) Tumi dusreank kallji dakhoitat tem polloun, tim tumchim ixttam zaunk toiar astolim. Oxem korunk tumi Raj-ghorant mitting suru zaunchea thoddo vell poilim ieun, ani mitting somplea uprant thoddo vell ravon bhav-bhoinnam sangata vell sarunk zata. Toxench, bhav-bhoinnanchim nanvam ugddas dovrunk vavr korat. Tumi tanchim nanvam ugddas dovortat, tanchea sangata mogan vagtat ani dusrim tumchea lagim sompeponnim ieun ulounk xoktat tem polloun, tim tumkam anik bore toren zannam zaunk sodhtolim ani tumi borim ixttam zaunk pavtolim.

Amkam sogleank, dusrim amchim ixttam zalʼlim zai. Tor bhav-bhoinnank khuxal korunk, thodde pavtti ami osleo vostu korit, jeo ami amchea sodanchea jivitant korinant. Punn oxem korchea bodlek, ami khoreponnim koslim munxam asat tem vollkhon gheunk ami tankam sondhi diunk zata. Bhoinn Lucinda-n oxench kelem. Ti sangta: “Dusreank amchea ghora apounk ami poilem panvl ghetlem dekhun, ami eka-meka sangata bori ixttagot korunk pavlim, ani aiz poriant ghott ixttam asat.”

“EKA-MEKAK APNNAIAT”

Ami poilech pavtti eka Raj-ghorant voitat ani soglea onvollkhi bhav-bhoinnank mellttat tednam, tanchea lagim ulounk ami fatti-fuddem zatat nhoi? Tor tumchea sobhent konnui novim bhav-bhoinnam aileant zalear, tumi tankam koxi modot korunk zata? Apostl Paulun mhunnttlolem: “Kristan zoxim amkam apnnaileant toxench tumi eka-mekak apnnaiat.” (Rom. 15:7) Tor Kristachi dekh gheun, vhoddilamnim hea bhav-bhoinnank sobhent apnnaunk zata. (“Nove Sobhent Vochonk Bori Manddavoll Korat,” hem boks polloiat.) Toxench, sobhentlea soglea bhav-bhoinnamnim ani bhurgeamnim pasun, hea bhav-bhoinnam sangata ixttagot korunk fuddem soronk zata.

Ami dusreank apnnavop mhunnttlear kitem? Ami tancho poramos korunk zata, toxench her vattamnim modot korunk zata. Udharonnak, eke bhoinnin aplo vell kaddun, tichea sobhent ailolea novea bhoinnik modot keli. Tem mhunnttlear, tinnem tika tea xarant khoim kitem asa tem dakhoilem. Ani tinnem bus ani train koxi dhorunk zata tem-ui dakhoilem. Bhoinnin jem kitem kelʼlem tem tea nove bhoinnichea kallzak laglem, ani tika tea xarant adjust zaunk modot zali.

VADDAVOLL KORUNK TUMKAM EK SONDHI ASA

Ek toll vaddtta toso, taka uddonk modot zaunk, to zaite pavtti apli kat soddtta. Teach toren, nove sobhent voitat tea bhav-bhoinnamnim, tea novea zagear adjust zaunk ani Jehovachi seva korit ravonk, tankam asloli bhirant ani uske fatti soddunk zai. Hea vixim Nicolas ani Celine sangtat: “Eke nove sobhent vochop sompem na. Punn ami eka novea zagear voitat ani eke veglle sonskrutint adjust zaunk xiktat tednam, ami anikui bore gunn vaddounk pavtat.” Toxench, ami poilim uloilʼlo bhav Jean-Charles, nove sobhent gelʼlean tachea familik koso faido zalo tea vixim to oxem sangta: “Amchea bhurgeank vaddavoll korunk modot zali. Thoddea mhoineam bhitor, amchi dhuv sumanache modle mittingek vidʼdheartheanche bhag korunk lagli. Toxench, amcho put bautizm gheunk naslolo porgottnnar zalo.”

Tumchea poristhitik lagon tumkam eke nove sobhent, zoxem porgottnnaranchi chodd goroz asa thoim vochon seva korunk mellona zalear kitem? Hea lekhant dilʼle solʼle, tumi atam asat tea sobhent uzar korunk zatat. Jehovacher patieun tumi veg-vegllea bhav-bhoinnam sangata porgottnni korunk vatto sodhunk zatat, sobhent novim ixttam korunk zatat, vo sodʼdheak tumkam aslolea ixttam sangata tumchi ixttagot anikui ghott korunk zata. Toxench, novim asat tankam vo gorjevontank modot korunk zata. Mog hea gunna vorvim khorim Kristanvam konn tim kollon ieta dekhun, tumi dusreank modot kortat tednam tumi Jehovak anikui lagim sortolim. (Ju. 13:35) Ani “Devak osle iodn khub manvotat” mhunn tumi khatri dovrunk zata.​—Heb. 13:16.

Nove sobhent vochop titlem sompem na tem khorem. Punn oxem kelʼlim zaitim bhav-bhoinnam, aiz khuxal asat ani tim anikui bore toren Jehovachi seva kortat. Ani tumi pasun oxem korunk pavtolim! Hea vixim bhoinn Anne-Lise sangta: “Nove sobhent gelʼlean, hanv eka orthan mhojem kalliz anikui uktem korunk pavlem. Mhunnche hanv zaitea bhav-bhoinnam sangata ixttagot korunk pavlem.” Toxench, bhoinn Kazumi-k khatri zalea ki ami nove sobhent voitat tednam, “ami poilim kednanch onnbhovunk na tea toren Jehova amkam modot korta mhunn ami onnbhovtat.” Tea bhair bhav Jules sangta: “Sobhentlea bhav-bhoinnam sangata ixttagot vaddoilʼlean, atam mhaka hi sobha mhojich koxi dista. Ani tim mhojim itlim lagxilʼlim ixttam zaleant ki hi sobha soddun mhaka dusrea zagear vochonk poddlear, mhaka khub dukh bhogtoli.”