OBHEASACHO LEKH 37
GIT 114 Sodanch Pasiens Dakhoum-ia
Onʼneai-acho Fuddo Korunk Sogleam-von Bori Vatt Khoinchi?
“Neai mellttolo mhunn to ravlo, Punn polloi! tannim onʼneai kelo.”—IZ. 5:7, NW.
MUKHEL MUDʼDO
Dusream sangata onʼneai zata tem Jezun polloilem tednam tannem kitem kelem, ani ami tachi dekh koxi gheunk zata tem ami hea lekhant polloitolim.
1-2. Onʼneai zata tednam zaito lok kitem korta, ani amchea monant kosle prosn ieit?
AIZ sonvsarbhor aslolea lokam sangata onʼneai zata. Thoddea lokank tim gorib asat dekhun vo tanchi sonskruti, zat-kat, vo tim koxim distat vo her karonnank lagon tanchea sangata onʼneai zata. Toxench thodde girest veapar-dhondo korpi, vo sorkari odhikari poixeanche axeche astat dekhun zaitea lokank tras sosunk poddttat. Ghoddie amkam vo amchea mogacheank pasun, oxech toren vo her vattamnim onʼneai sosunk poddla zait.
2 Punn amkam sogleank, dusrim amchea sangata bore toren vaglolim ani xantin jielʼlim zai. Tea pasot, amcher vo dusreancher konnui onʼneai korta tednam amkam khub rag ieta. Hea karonnak lagon thoddo lok onʼneai-a add zhuzonk vavr kortat. Te sorkara add morcha kaddttat vo tancheo oddchonneo kaddun uddoitole mhunn sangtat toslea rajki fuddareank vote ghaltat. Punn khorim Kristanvam zalʼlean ami “hea sonvsarache nhoi” ani fokot Devachem Raj sogle toreche onʼneai kaddun uddoitolem mhunn visvas dovrunk ami xikleant. (Ju. 17:16) Torui, dusream sangata onʼneai zata to polloun amkam khub dukh bhogta ani thodde pavtti rag pasun ieta. Tednam ami oxem chintit: ‘Hanvem kitem korchem? Onʼneai-a add zhuzonk hanvem sodʼdheak kitem tori korunk zata?’ Hea prosnanche zobab zannam zaunk, lokam sangata onʼneai zata tednam Jehovak ani Jezuk koxem bhogta tem ami poilim polloum-ia.
JEHOVA ANI JEZU ONʼNEAI-ACHO DVES KORTAT
3. Onʼneai zata tednam amkam kiteak rag ieta? (Izaias 5:7, NW)
3 Jehova ‘nit ani promannikponnacho mog korta,’ ani ami tache gunn apnnaunk xoktat tea toren tannem amkam rochleant mhunn Bible sangta. (St. 33:5; Ut. 1:26) Tea pasot, amchea vo dusream sangata onʼneai zata tednam amkam tem avoddna! Jehova dusream sangata kednanch onʼneai korina. Ani khoinchea-i munxan dusream sangata onʼneai kelʼlo taka naka. (D.S. 32:3, 4; Mik. 6:8; Zek. 7:9) Hem ami koxem zannant? Provadi Izaiasachea kallar, Jehovan Izraelitkarancheo “hueli-bobo” aikoleo. Karonn dusrim Izraelitkaram tanchea sangata onʼneai kortalim. (Izaias 5:7, NW vachat.a) Tea pasot, porot-porot aplo kaido moddttalim ani dusream sangata onʼneai kortalim tankam tannem khast laili.—Iz. 5:5, 13.
4. Dusream sangata onʼneai zata tednam Jezuk koxem bhogta? Ek udharonn diat. (Chitr pasun polloiat.)
4 Jehova bhaxen, Jezu pasun onʼneai-acho dves korta. Ek dis Jezun eka munxak polloilo, zacho hat ar zaun dhorlolo. Taka polloun Jezuk churchure disle, ani tannem taka boro kelo. Punn hem polloun dhormik fuddari ragan bhorle ani Jezun Sabathacho kaido moddla oxem mhunnonk lagle. Tea munxak anik tras sosunk poddonant, hem tankam poddon vochonk na. Tancho sobhav polloun Jezuk koxem bhoglem? “Tanchem kalliz fatra sarkem zalam tem polloun Jezu khub dukhi zalo.”—Mk. 3:1-6.
Jezuchea disamnim dhormik fuddari lokam sangata onʼneai kortale. Punn Jezun lokancho mog kelo ani tankam modot keli (Peregraf 4 polloiat)
5. Onʼneai zata tednam ami kiteak rag dhorun ravcho nhoi?
5 Onʼneai zata tednam Jehovak ani Jezuk khub rag ieta. Tor onʼneai polloun amkam rag ieta zalear, tem chukichem nhoi. (Ef. 4:26 ani “Be wrathful” ho study note) Punn ragar zaunk karonn aslear pasun, ami onʼneai kaddun uddounk xokonant mhunn ami ugddas dovrunk zai. Khorem mhunnttlear, rag dhorun ravlear ami duent vo khub niraxi zaunk xoktat. (St. 37:1, 8; Jak. 1:20) Toxem zalear, onʼneai zata tednam ami kitem korchem? Hea vixim ami Jezu koddlean xikonk zata.
ONʼNEAI POLLOUN JEZUN KITEM KELEM?
6. Jezu hea prithumer aslo tednam lokank kosle onʼneai sosunk poddttale? (Chitr pasun polloiat.)
6 Jezu hea prithumer aslo tednam, zaitea lokank onʼneai sosunk poddtta tem tannem polloilʼlem. Dhormik fuddareamnim zaite kaide korun lokanchem jivit khub kotthin kelʼlem. (Mt. 23:2-4) Toxench, Romi sorkar Judevam sangata khub vaitt toren vagtalo ti-ui taka khobor asli. Ani zaite Judev Romi sorkara thaun suttka mellonk axeun asle. Tea pasot sorkara add zhuzonk tantuntlea thoddea zannamnim zome pasun kelʼle. Punn Jezun kednanch lokank toxem korunk sangonk na, nhoi mhunn toxem kortat tankam tenko pasun diunk na. Ani thoddo lok apleak raza korunk sodhtale mhunn Jezuk kollon ailem tednam, to tanchea thaun pollon gelo.—Ju. 6:15.
Lok Jezuk raza korunk sodhtale tednam to thoim thaun dusrea zagear gelo (Peregraf 6 polloiat)
7-8. Prithumer astana Jezun onʼneai kaddun uddounk kiteak proitn korunk na? (Juanv 18:36)
7 Tor prithumer astana onʼneai kaddun uddounk Jezun rajkaronnant bhag gheunk na. Karonn munxank, munxancher raz cholounk tank ani odhikarui na mhunn to zannam aslo. (St. 146:3; Jer. 10:23) Tea bhair onʼneai zaunk jim mull karonnam asat, tem mhunnttlear, Soitan ani amchi opurnntai, tachea add munis kainch korunk xokona mhunn Jezuk khobor asli. (Ju. 8:44; Ef. 2:2) Karonn hi prithum Soitanachea tabeant asa. Soitan ekdom krur asa ani aiz sonvsarantle zaite lok tachea sarke vagtat. Toxench munis opurnn aslolean kitlem-i borem korunk chintlear pasun, to kednam-na-kednam dusream sangata onʼneai kortach!—Up. 7:20.
8 Tor khoincheach munxancho sorkar nhoi, punn fokot Devachem Raj jem “hea sonvsarantlem nhoi,” tench purnn toren onʼneai kaddun uddoitolem mhunn Jezu zannam aslo. (Juanv 18:36 vachat.) Tea pasot tannem aplo vell ani takot ‘porgott korunk ani Devachea Rajeachi bori khobor sangonk’ uzar kelo. (Luk. 8:1) Oxem korun,“nitivontponna khatir jim bhukelʼlim ani tanelʼlim asat” tankam tannem bhuzvonn dili.—Mt. 5:6 ani study note; Luk. 18:7, 8.
ONʼNEAI ZATA TEDNAM JEZUCHI DEKH GHEIAT
9. Fokot Devachem Raj purnn toren onʼneai kaddun uddoitolem mhunn tumkam kiteak khatri asa?
9 Jezu prithumer aslo tea vella poros, aiz ami jietat tea “nimannea disamnim” chodd onʼneai zata. Ani aiz pasun Soitan ani tachea probhava khala aslole noxtte lok, hea onʼneai-acho mukhel karonn zaun asat. (2 Tim. 3:1-5, 13; Prok. 12:12) Punn Jezu bhaxen fokot Devachem Raj onʼneai kaddun uddoitolem mhunn ami zannant. Ani ami fokot Devachea Rajeak tenko ditat dekhun, ami sorkara add morcha kaddinant vo sorkar onʼneai kaddun uddoitolo mhunn visvas dovornant. Hea vixim amkam bhoinn Stacy-chob onnbhov asa. Sot xikchea poilim, onʼneai-a add zhuzonk tem zaite pavtti morchant bhag ghetalem. Punn uprant, tem jem korta tea vorvim khorench lokank modot zata kai na mhunn tem dubhavunk laglem. Tem sangta: “Morchant bhag ghetana, hanv sarkem asa tem kortam kai na mhunn mhojea monant dubhav asle. Punn atam hanv Devachea Rajeak tenko ditam. Ani Jehova tachea Rajea vorvim munxancheo sogleo oddchonneo kaddun uddoitolo ani tankam neai ditolo mhunn mhaka khatri asa. Hem mhojea lagim kednanch korunk zaunchem na.”—St. 72:1, 4.
10. Ami kaide ani sorkar bodlunk kiteak proitn korinant? (Matev 5:43-48) (Chitr pasun polloiat.)
10 Aiz zaite lok sorkar bodoltat toslea zomeanche bhag zatat ani morcha kaddttat. Choddxe pavtti te ragan bhortat, kaide moddttat ani dusreank tras kortat. Punn Jezun amkam toxem korunk kednanch xikounk na! (Ef. 4:31) Jeffrey nanvacho ek bhav oxem sangta: “Zaite pavtti lok, xantin morcha kortole mhunn chintʼtat. Punn okosmat poristhiti bodolta ani lok ragan bhoron soglem nas korunk lagtat, chorio kortat ani eka-meka lagim zhogddim kortat.” Punn Jezun amkam sogleam lagim, tem mhunnttlear, jim amche vichar aikonant vo amkam dhumallo ditat tanchea sangata pasun doiallaien vagonk xikoilem. (Matev 5:43-48 vachat.) Ani khorim Kristanvam zalʼlean, Jezuchi dekh apnnaunk ami amchean zata tem soglem kortat.
Ami hea sonvsarantlim nhoi mhunn dakhounk dhirachi goroz asa (Peregraf 10 polloiat)
11. Jezuchi dekh gheunk amkam thodde pavtti kiteak kotthin zaunk xokta?
11 Fokot Devachem Raj purnn toren onʼneai kaddun uddoitolem mhunn khobor aslear pasun, amchea sangata onʼneai zata tednam Jezuchi dekh gheunk amkam kotthin zaunk xokta. Oxench bhoinn Janiya-k ghoddlem. Zati-katik lagon tachea sangata bhedbhav zatalo. Tem sangta: “Hanv khub dukhi zalem. Toxench mhaka ekdom rag ietalo ani hanv tea lokank dekh xikounk sodhtalem. Tea pasot hanvem oslea eka zomeak tenko diunk chintlem, zo zati-katik lagon bhedbhav zata mhunn morcha kaddttalo. Oxem kelear poristhiti bori zatoli oxem mhaka distalem.” Punn uprant bhoinnin tichem chintop bodlunk zai mhunn tika kollʼllem. Tem sangta: “Hanv lokanchem aikon tanchem chintop apnnaitalem ani Jehovacher nhoi, punn munxancher visvas dovortalem mhunn mhaka kollʼllem. Tor oslem chintop aslolea munxam sangata natem dovrop hanvem bond kelem.” Ami kitem xiktat? Onʼneai zata tednam amkam rag ieit. Punn ami ragacher tabo dovrun, ami hea sonvsarantlim nhoi mhunn soglea vellar dakhounk zai.—Ju. 15:19.
12. Ami jem kitem vachtat, polloitat ani aikotat tache vixim kiteak chotrai dovrunk zai?
12 Onʼneai zata tednam ragacher tabo dovrunk amkam koxi modot zaunk xokta? Ek vatt mhunnttlear, ami jem vachtat, polloitat, ani aikotat tachea vixim ami chotrai dovrunk zai. Social media-cher ietat teo zaiteo khobro lokank rag haddunk ani sorkara add vochonk uksaitat toxeo toiar kelʼleo astat. Toxench zaite news khoreaninch kitem ghoddlam tem sangchea bodlek aple vichar sangtat. Ani ti mahiti sarki asa zalear pasun ti vachit ravlear ami onʼneai kaddunk xokonant. Tachea bodlek, ami anikui niraxi, dukhi ani ragar zaunk xoktat. (Mho. 24:10) Ani dukhachem mhunnttlear Devachem Rajuch purnn toren onʼneai kaddun uddoitolem mhunn visvas dovrop ami bond korit.
13. Dor disak Bible vachunk sonvoim kelolean onʼneai-acho fuddo korunk amkam koxi modot zatoli?
13 Ami dor disak Bible vachunk ani tacher niall korunk sonvoim korunk zai. Oxem kelʼlean, amchea vo dusream sangata onʼneai zata tednam tacho fuddo korunk amkam modot zatoli. Bhoinn Alia-k oxich modot zali. Thodde lok dusream sangata onʼneai kortat tem polloun tika khub dukh zatalem. Ani tea lokank khast mellona tem polloun tika khub rag ietalo. Ti mhunntta: “Hem soglem polloun mhojea monant ho prosn ietalo, ‘Jehova onʼneai kaddun uddoitolo mhunn mhaka khatri asa kai?’ Hea vellar, Job 34:22-29 vachlolean mhaka modot zali. Hea versamnim Jehova soglem pollounk xokta mhunn mhojea ugddasak haddlem. Fokot Jehova neai haddunk xokta ani sogle onʼneai purnn toren kaddunk xokta.” Punn Devachem Raj sogleo oddchonneo kaddun uddoitolem tea mhunnosor ami kitem korunk zata?
AMI ATAM KITEM KORUNK ZATA?
14. Onʼneai zata tednam ami kitem korunk zata? (Koloskarank 3:10, 11)
14 Dusrim kitem kortolim tacher amcho tabo asona. Punn ami kitem kortolim tem amchea hatant asa. Poilim polloilʼlem toxem, ami Jezuchi dekh gheun dusreank, tem mhunnttlear amkam dhumallo ditat vo amchea sangata onʼneai kortat tankam pasun mog dakhounk zai. (Mt. 7:12; Rom. 12:17) Ani ami sogleam sangata oxe toren vagtat tednam, Jehova khub khuxal zata.—Koloskarank 3:10, 11 vachat.
15. Lokank Bible-antlean sot xikoilʼlean kitem zata?
15 Ami lokank Jehova vixim xikounk zai. Tankam onʼneai-acho fuddo korunk modot korunk hi sogleam-von bori vatt zaun asa. Karonn “Sorvesporache vollkhin,” ek ragixtt munis pasun doiall ani mog dakhoupi zaunk xokta. (Iz. 11:6, 7, 9) Hea vixim amkam bhav Jemal-achem udharonn asa. Sot xikchea poilim, sorkar bodolcho proitn korta toslea eka zomeacho to bhag zalʼlo. Karonn tachea desacho sorkar lokam sangata onʼneai korta oxem taka distalem. Punn bhav fuddem sangta: “Zhuz korun tumi lokank bodlunk xokonant. Hanv zhuzam vorvim nhoi, punn Bible-antlea sotam vorvim bodolʼlom.” To Bible-antlean jem xiklo tea vorvim sorkara add zhuzop bond korunk taka modot zali. Tor Bible xikon jitle chodd lok aplem jivit bodoltole, titlech dusream sangata onʼneai korpi thodde lok hea sonvsarant astole.
16. Devachea Rajea vixim dusreank sangonk tumkam kiteak borem dista?
16 Jezu bhaxen fokot Devachem Raj hea prithumer aslole sogle onʼneai kaddun uddoitolem mhunn lokank sangonk amkam khub borem dista. Ho bhorvonso aslolean amkam onʼneai sosunk modot zata. (Jer. 29:11) Ami poilim uloilʼli bhoinn Stacy sangta: “Mhaka ani dusreank zaite onʼneai zaleat. Punn sot xiklolean onʼneai-acho fuddo korunk mhaka modot zalea. Jehovan Bible-a vorvim mhaka bhuzvonn dilea.” Tor onʼneai koxe kabar zatole hea vixim Bible kitem sangta tem dusreank sangonk ani tankam bhuzvonn diunk ami bori toiari korunk zai. Dukh-trasam vixim Bible kitem sangta tem ami jitlim bore toren zannam zatolim, titlich tea vixim amchi khatri anikui vaddttoli. Tea uprant ami kamachea zagear vo iskolant astat tednam tea vixim dusreank sangonk amkam anikui sompem zatolem.c
17. Onʼneai-acho fuddo korunk Jehova amkam koso modot korta?
17 Soitan ‘hea sonvsaracho odhikari‘ asosor onʼneai astoloch. Punn Jehova atam amkam onʼneai sosunk modot kortolo ani fuddarak to purnn toren ‘kaddun uddoitolo’ mhunn tannem bhas dilea. (Ju. 12:31) Amkam onʼneai kiteak sosunk poddtta, ani toxem zata tednam Jehovak koxem bhogta tem tannem amkam aplea Utra vorvim kolloilam. (St. 34:17-19) Tea bhair, onʼneai-acho fuddo korunk ami kitem korunk zata, ani tachi razvottki purnn toren onʼneai koso kaddun uddoitoli, tem Jehovan aplea Puta udexim amkam xikoilam. (2 Ped. 3:13) Tor ami urben tea razvottke vixim porgottit ravom-ia. Ani hi akʼkhi prithum “nitin ani promannikponnan” bhortoli tea vellachi axeun vatt polloum-ia.—Iz. 9:7.
GIT 158 Pasiens Di Bapa!
a Izaias 5:7 (NW): “Karonn Izraelachem ghorannem, fouzancho Dev Jehovacho drakxancho mollo zaun asa. Ani Judache munis, taka khub avoddttali ti drakxanchi val zaun asa. Neai mellttolo mhunn to ravlo, Punn polloi! tannim onʼneai kelo. To nitivontponnak ravlo, Punn polloi! taka sonkoxttachem roddnnem aikonk ailem.”
b Thoddim nanvam bodolʼleant.
c Mog Dakhoiat—Xis Korat pustikent, chodd mahiti A hantunt, mudʼde 24-27, hem pasun polloiat.