Zannttea Bhav-bhoinnamno—Tumi Sobhe Pasot Khub Moladik Asat
“Poilim hanv kitlim kamam korunk xoktalem tem chintun hanv ojap zatam. Atam zannttem zalʼlean mhojean titlem korunk zaina.”—Connie, 83 vorsam.
Tumi tornattim astana jitlem korunk xoktalim titlem tumi atam korunk xokonant astolim. Ani tumi zaitea vorsam thaun visvaxiponnan Jehovachi seva kelea zalear pasun, tumi poilim kitem korunk xoktalim ani atam kitem korunk xoktat tem sor korun tumi niraxi zatat zait. Tor tumchi khuxalkai hogddaina zaunk tumi kitem korunk zata?
TUMI KITEM KEL’LEM JEHOVAK ZAI?
Tumkanch vicharat, ‘Hanvem kitem kelʼlem Jehovak zai?’ Hacho zobab tumkam Dusri Somurt 6:5-ant melltta. Thoim sanglam: “Sogllea tujea kallzan, sogllea tujea otmean, sogllea tujea bollan Sorvespora tujea Devacho tum mog kortoloi.” Him utram aikon tumkam bhuzvonn melltta nhoi!
Tor hea versa pormonnem, Jehovak zai ki tumi tumchea soglea kallzan, jivan ani bollan tacho mog kelolo. Hem motint dovrun tumi tumkam dusream sangata sor korinakat, nhoi mhunn tumi poilim kitlem kortalim ani atam kitlem kortat tachea-i modem sor korinakat.
Hea vixim chintat: Tumi tornattim aslim tednam tumi Jehovak kitem ditalim? Zaitim Jehovachim sevokam mhunnttolim, ki tim taka tanchem boreantlem-borem ditalim. Tednam tumi kitem kortalim tem tumchea poristhiti pormonnem tumchem boreantlem-borem aslem. Tumi sodʼdheak Jehovak kitem diunk xoktat? Tumi atam pasun tumchea poristhiti pormonnem tumchem boreantlem-borem ditat. Hea toren chintlear, tumi adim Jehovak jem ditalim, tench tumi atam ditat mhunn tumi chintunk zata. Tem mhunnttlear, tumi adim taka tumchem boreantlem-borem ditalim ani atam pasun tumchem boreantlem-borem ditat.
Tumi tornattponnar Jehovak tumchem boreantlem-borem dilem ani tumi zanntteponnar taka tumchem boreantlem-borem ditat
TUMI DUSREANK KHUB MODOT KORUNK XOKTAT
Tumi kitem korunk xokonant tacher dhean diunchea bodlek, tumkam atam kitem korchi sondhi asa tacher dhean diat. Zannttim zalʼlean tumi oslem kitem-i korunk xoktat, jem tumi tornattim aslim tednam korunk xokonaslim. Zoxem:
Dusreank tumcho onnbhov sangat. Bible-ant Jehovachea sevokamnim kitem sanglem tacher dhean diat.
Raza David: “Tornno aslom, atam zalam mhataro, punn borea monxak Devan sanddlolo hanvem kodinch polleunk na. Tachea bhurgeank bhik magunk poddlolem aiz porian hanvem polleunk na.”—St. 37:25.
Joshua: “Atam polleiat, hanv mornnank lagim pavlam; sogllea tumchea kallzan ani otmean Sorvespora tumchea Devan kelʼleo soglleo bhasavnneo pallon aileat mhonn zanno zaiat; tantli ek porian pallon ienastana urli na.”—Josh. 23:14.
Tumi tornattim astana dusreank urba diunk oslinch utram uzar kelʼlim astolim. Punn David ani Joshuan tim utram aplea onnbhovantlean sanglolim. Tannim zaitim vorsam visvaxiponnan Jehovachi seva kelʼli. Ani zaite pavtti svota polloilem ki him utram kitlim khorim zaun asat. Tor tannim jem sanglem tacho lokancher khub probhav poddlo.
Tumi khub tempa thaun Jehovachi seva korit asat zalear, toxem kelʼlean tumkam koxi modot zalea tem tumi onnbhovlam astolem. Tor hea vixim tumi dusreank sangonk zata. Jehovan eke khas toren aplea sevokank koxi modot keli tem tumi polloilam kai? Hoi zalear, dusreank tea vixim sangat. Oxem kelʼlean tumkam ji khuxalkai mellʼlli tich dusreankui mellttoli. Ani Jehovache sevent tumkam je bore onnbhov mellʼlleat te aikon tankam-i urba mellttoli.—Rom. 1:11, 12.
Dusreank urba diunk anik ek vatt mhunnttlear, tumi Raj-ghorant mittingek hajir zaunk zata titlo vavr korunk zata. Oxem kelear tumkam toxench dusreank urba mellttoli. Ami poilim uloilʼli bhoinn Connie sangta: “Raj-ghorant mittingek hajir zalʼlean mhaka niraxiponn pois korunk modot zata. Thoim bhav-bhoinnam mhaka khub mog dakhoitat. Tor hanv niraxi koxem zaunk xoktam? Tankam upkari asa mhunn dakhounk hanv tankam lhan-lhan gift ditam. Toxench tanchea sangata mellon Jehovache bhokte sombondit kamam korit ravonk hanv proitn kortam.”
TUMI JEM KITEM KORTAT TACHO JEHOVA VALOR KORTA
Bible-ant oslea zaitea lokam vixim sanglam, jim aple poristhitik lagon chodd korunk xokonaslim. Torui Jehova tancho khub mog kortalo. Zoxem zanntto Simeon. Jezu zolmolo tea vellar to jivo aslo. To Devmondirant voitalo tednam zaite tornatte mondirachem mhotvachem kam kortat tem polloitalo astolo ani ghoddie chintʼtalo, ‘Hanv tor tanchea bhaxen kainch korunk xokona. Jehova pasot hanv kainch upeogacho nhoi.’ Punn Jehova tachea vixim toxem chintinaslo. Tache nodren Simeon “nitivont ani bhoktivont” munis aslo dekhun, Jehovan taka ek khas sueog dilo. Tem mhunnttlear, ballok Jezuk pollounk. Tea bhair, Jezu fuddarak Mesias zatolo mhunn bhasaunni korunk pasun Jehovan taka uzar kelo. (Luk. 2:25-35) Tor hantuntlean kollon ieta ki Jehova Simeonachea oskot kuddik polloinaslo, punn to bhavarthant kitlo ghott asa tacher dhean ditalo. Ani “tacher povitr xokti asli.”
Jehovan Simeonak ballok Jezuk pollouncho ani to fuddaracho Mesias zauncho asa mhunn bhasaunni korcho sueog dilo
Tumi pasun Jehovak khub moladik asat mhunn tumi khatri dovrunk zata. Zannttim aslear pasun tumi visvaxiponnan tachi seva kortat dekhun to tumcho valor korta. Karonn, ‘tumchea lagim diunk jem kitem asa tem Dev manun gheta. Tumchea lagim na tem tumi diunchem mhunn Dev opekxa korina.’—2 Kor. 8:12.
Hem monant dovrun, tumi jem kitem korunk xoktat tacher dhean diat. Udharonnak, tumi khoinchea vattamnim porgottnni korunk zata? Tumi tem thoddea vella pasot kelearui kaim nozo. Toxench, tumi bhav-bhoinnank fon korun vo tanchea pasot kardd korun tankam urba diunk zata kai? Hea toren tumi, tem mhunnttlear khub tempa thaun visvaxiponnan Jehovachi seva korpi tachim sevokam, bhav-bhoinnam pasot oslim lhan-lhan kamam kortat tednam tancher khub boro probhav poddttolo.
Punn thoddea zannank cholonk-bhonvonk tras zatat. Tor tannim kitem korunk zata? Hea vixim zannam zaunk, sokol dilʼlem boks, “Ticho Jiv Salvar Zalo” hantunt, East Africa-ntle eke bhoinnichea onnbhovacher dhean diat.
Ugddas dovrat, tumi itlea vorsam thaun Jehovak visvaxiponn dakhoilam ani bhavarthant ghott ravleant tem polloun dusreank urba mellonk xokta. Toxench, thir ravon tumi dusreank ek bori dekh dovorlea. Tor tumi khatri dovrunk zata ki “Dev onʼneai korina. Tumi tachea nanva pasot zo vavr kela ani mog dakhoila, mhunnche, tumi Devachea lokanchi jea toren seva kelea ani atam pasun korit asat hem to visronk xokona.”—Heb. 6:10.
DUSREANK MODOT KORUNK BIZI RAVAT
Zannar sangtat ki zaitim zannttim munxam jim dusreank modot kortat tanchi bholaiki chodd bori asta, tim sarke toren chintunk xoktat, ani chodd temp jietat.
Hem khorem ki dusreank modot kelʼlean amchi bholaiki purnn toren bori urtoli oxem na. Karonn zanntteponn ani mornnachem mull karonn, tem mhunnttlear Adanva thaun mellʼllolem patok, fokot Devachem Raj kaddunk xokta.—Rom. 5:12.
Tori astana, atam pasun Jehova tumkam jem sangta tem tumi korit asat. Tem mhunnttlear, tache vixim zannam zaunk tumi dusreank modot kortat. Hea vorvim tumcho bhavarth ghott samballunk tumkam modot zata ani ghoddie tumchi bholaiki bori urta. Tor mogall zannttea bhav-bhoinnamno, tumi Jehova pasot jem kortat taka lagon tumi taka khub valorachim asat, ani tumi ghott bhavarth samballun bhav-bhoinnank ek bori dekh dovortat mhunn khatri dovrat.