Génesis
Kepiashi Isaac chaʼaya Gerar
26 Wanaa sümaa kepiain Isaac chaʼaya peje sünain tü ishikat kanüliasü “Katoʼuchi Eʼrakai Taya”, antalaa müsüjaʼa wane jamü saaʼu tü mmakat, maa aka tü alatakat paala nümüin Abraham chi nüshikai. Jashichipa maʼi tü jamükat nümüin Isaac, noʼonookalaka süʼütpaʼamüin wane pueulo kanüliasü Gerar eere kepiain Abimelec chi laülaashikai saaʼu tü wayuu kanüliakalüirua filisteo.
2 Je chaʼaya, eweetüshi Jehová nümüin sünain maa nümüin: “Teeʼiyateerü joo pümüin jalainjachin poʼonooin. Makatüinjachi pia yaaya suluʼu tü mmakat. Nnojo poʼonooin chamüin Egiptomüin. 3 Jimateechi pia yaaya süpaʼapünaa tü mmakat. Anakuaippaleechi pia tatüma süka eejeechin taya pümaa waneepia. Je süpüshua mmakat tüü, taapeerü shia pümüin je namüin na puuʼuliwoʼukana süka pansaajeerüin tü tamakat paala nümüin Abraham chi püshikai süpüla teeʼiyatüinjatüin taʼanasia nümüin. 4 Pansaatüjülia tanüiki pümüin sünain watteerüin saalii puuʼuliwoʼu tatüma. Mayaawajuweerü shia maa aka tü shüliwalakalüirua chakat iipünaa. Je taapeerü namüin süpüshua tü mmakat. Otta tü wayuukolüirua sainküin mmakat süpüshua, süchunteerü tamüin shiiʼiree teeʼiyatüinjatüin taʼanasia namüin maa aka teeʼiyatüin shia namüin na puuʼuliwoʼukana. 5 Anakuaippaleechi pia tatüma naaʼujee Abraham, süka nünoujain tanüiki. Shiimüin sünain naaʼinrüin süpüshua tü taluwataakat anain je sünain jüüjüüin sümüin süpüshua tü tekirajakat anain”, müshi Jehová nümüin Isaac. 6 Jüüjüüshi Isaac sümüin tü nümakat Jehová nümüin sümaa nnojolüin noʼonooin Egiptomüin. Makatüshi nia chaʼaya Gerar.
7 Je nayasaʼa na wayuu tooloyuu kepiakana chaʼaya Gerar, neʼrapa Rebeca, nasakirüin Isaac müleka nuʼwayuusere shia nnojottaale nuʼwayuusein. Naattajaa achikit Rebeca sümaa nuʼwayuusein shia. “Pawalaawajiraashii waya”, mapüʼüshi nia namüin. Saaʼu anasüchoin maʼi shia, mmotshi nia sheema nuʼutinnüinjachin aaʼin saaʼujee shiain nuʼwayuusein. 8 Shiasaʼa süchikijee kojuya kashi wanaa sümaa kepiain Isaac chaʼaya Gerar, eirakaashi Abimelec suluʼujee wane shipentaanase nipia. Niʼrakalaka Isaac wanaa sümaa niiʼiyatüin tü naaliikat sümüin Rebeca maa aka wane wayuu sümüin nuʼwayuuse. 9 Neenajinnakalaka Isaac nütüma Abimelec süpüla nüsakirüinjachin nia:
—¿Jamüsü punujulajakaʼa süchiki woulia sünain puʼwayuusein shia? “Pawalaawajiraashii waya” ¿jamüsü pümakaʼa wamüin? —müshi nia nümüin.
Nüsouktakalaka Isaac:
—Müleka taküjüleje sünain taʼwayuusein shia, oʼutinnayaajeechi aaʼin taya taajüin —müshi.
10 Nümakalaka Abimelec:
—Eʼrüi wayumüin pia sükajee paaʼinrüin tia wamüin. Piaje kasitka müleka süsaajaanüleje nütüma wane wayuu yaajeʼewai süpüla nuʼwayuuseinjatüin shia —müshi.
11 Nachiajaanakalaka joo na wayuukana nütüma Abimelec sünain maa namüin:
—Chi eekai naaʼinrüin kasa mojusü nümüin wayuukai chii otta sümüin tü nuʼwayuusekat, shiimüin sünain toʼutireechin aaʼin.
12 Shiasa mapa tia, ayatüshi Isaac sünain kepiain süʼütpaʼa Gerar. Kapünajüinshi nia chaʼaya suluʼu naʼapainse. Je süka niiʼiyatüin Jehová naʼanasia nümüin, asotüsü tü pünajütkat, emiyoʼulaasü sünain sujüttirüin poloo shikii süchon sünainjee waneesia soʼu. 13 Ayatüshi nia sünain anakuaippalin sümaa washirüin maʼi nia. 14 Je saaʼujee wainmain anneerü ooʼulaka paaʼa ooʼulaka achepchieeirua nümaʼana Isaac, achunjasü saaʼin tü wayuu filisteokalüirua. 15 Eʼrüliishii wayumüin naya nümüin. Nejinain mma ooʼulaka ipa suluʼu tü ishikalüirua eere najaʼitüin Isaac, tü ishi apotuushikat paala natüma na nüchepchiakana Abraham kataiwaʼaya noʼu.
16 Soʼu wane kaʼi, nümakalaka Abimelec nümüin Isaac:
—Katsüinchipa pia woulia süka washirüichipain maʼi pia. Anakaja jooluʼu müleka piyakalaale yaajee woulia —müshi nia nümüin.
17 Oʼunüshijeseʼe Isaac mamüin aka tia sünain niʼitaain nejepüse süpaʼamüin wane nasapü Gerar sünüliaya eejachire kepiain nia kojuya kashi. 18 Je tü ishi apotuushikalüirua paala sütüma tü nüchepchiakalüirua Abraham kataiwaʼaya noʼu, tü ejinnüitpakat aluʼu mma sütüma tü filisteokalüirua, nipitirüin Isaac joo shia süchikua. Ayatüsia nütüma sünülia tü ishikalüirua aapuushikat paala nütüma chi nüshikai.
19 Shiasa mapa tia, napotüin na nüchepchiakana Isaac wane ishi jeket chaʼaya süpaʼa tü nasapükat. Nantakalaka sünain wane wüin anasü chaʼaya, aparatsü mmaapüjee. 20 Otta tü anneetpüʼükalüirua chajeʼewatkat Gerarjee, aʼülüjaashii namaa na naʼanneetsepüʼükana Isaac sünain maa namüin: “Tü wüinkat, wapülajatü wayakana, nnojotsü jüpülajatüin jiakana”. Shiasa sünainjee tia, niʼitaakalaka Isaac “Aʼülüjirawaa” sümünüin tia ishikat. 21 Opotüshiijeseʼe naya wane ishiya. Je süka ayatüin naʼülüjiraain saaʼujee tü ishi jeketkat, niʼitaakalaka Isaac “Paʼünüüwajirawaa” sümünüin. 22 Noʼonookalaka joo Isaac yalajee yala suluʼumüin wane mma. Je chamüin, nüpotirüin wane ishiya. Je süka nnojolüitpain aʼülüjirawaa saaʼujee tia ishikat, niʼitaain “Ejimalawaa” sümünüin sünain maa: “Ejimalaainapa joo waya nütüma Jehová süpüla kepiain suluʼu tü mmakat, je washireena waya yaaya”, sünain nümüin.
23 Je soʼu wane kaʼi, nüleʼejakalaka Isaac nüchikua palaamüin nükua Beersebamüin eere tü ishi kanüliakat “Katoʼuchi Eʼrakai Taya”. 24 Je aipaʼa soʼu tü kaʼi nüntakat oʼu Isaac chamüin, eeʼiyataashi Jehová nümüin sünain maa nümüin:
“Tayakai chi Nümaleiwasekai Abraham chi püshikai.
Nnojo mmolüin pia sheema tü alateetkat mapeena,
süka pümaajeechin taya waneepia.
Shiimüin sünain teeʼiyateechin taʼanasia pümüin.
Wainmeerü tü puuʼuliwoʼukalüirua,
maa aka tü tamakat nümüin Abraham chi tachepchiakai
sünain pansaain tanüiki nümüin”.
25 Je wattaʼa maalü, nüpaaʼuwajaakalaka ipa süpüla akumajaa wane aʼajüleepala süpüla naʼajüinjatüin kasa nümüin Maleiwa sünain niiʼiyatüinjatüin nujut nümüin. Nuʼwaajakalaka Jehová eere tü aʼajüleepalakat. Shiasa süchikijee tia, oʼttüshii naya sünain akumajawaa nejepüse chaʼaya Beerseba. Opotünüsü joo wane ishi jeketüya chaʼaya natüma na nüchepchiakana.
Aleewajiraashii Isaac nümaa Abimelec
26 Soʼu wane kaʼi, wanaa sümaa kepiain Isaac chaʼaya Beerseba, nüntakalaka Abimelec, chi sülaülashikai Gerar, süpüla naashajaain nümaa. Je antüshi Ahuzat nümaa, wane nütünajut kojutshi nütüma, ooʼulaka Ficol, chi sülaülashikai tü nusurulaatsekalüirua. 27 Nasakinnakalaka nütüma Isaac:
—¿Jamüshii jüntakaʼa jooluʼu tamaʼanamüin süka jujuittirüinkain paala taya jümaʼanajee?
28 Nüsouktakalaka Abimelec nümüin:
—Watüjaaitpa aaʼu sünain eein Jehová chi Pümaleiwasekai pümaa. Anasü saaʼin wamüin müleka pansaale pünüiki jooluʼu wamüin sooʼopünaa tü waashajaainjatkat achiki pümaa. 29 Maa aka nnojoliin weʼrülüin wayumüin paala pümüin, anakaja pansaale pünüiki jooluʼu süpüla nnojoleechin piʼrülüin wayumüin wamüʼinya. Pütüjaa aaʼulu sümaa kamaneein waya pümüin wanaa sümaa kepiapüʼüin pia waʼaka. Nnojotsü eein wane mojujirawaa watüma wanaa sümaa puʼunüin wamaʼanajee. Watüjaaitpa aaʼu jooluʼu sünain niiʼiyatüin naʼanasia chi Pümaleiwasekai pümüin —müshi Abimelec nümüin Isaac.
30 Nüʼlakajeʼerakalaka Isaac wane eküülü anasü maʼi napüla na niʼiyoukana. Ekaashii naya, asaashii naya. 31 Shiasa mapa wattaʼa, achijiraashii naya wattaʼa maalü. Pansaajiraakalaka nanüiki süpüla aleewajiraainjanain naya sünain maa: “Anasüjaʼa paajüin süka tia, aleewajiraajeena waya”, majiraashii. Shiasa süchikijee tia, apütaajiraashii naya nümaa Isaac.
32 Je soʼu tü kaʼi nuʼunakat oʼu Abimelec, nantakalaka na nüchepchiakana Isaac nünainmüin sünain maa nümüin: “Antüinapa waya sünain wüin suluʼu tü ishi wapotüitpakat”, müshii naya. 33 Niʼitaain “Seba” sümünüin tia ishikat. Je sünülia tü pueulokat maaʼulu yaa, Beerseba münüsü.
Naapaain Esaú wayuu naatajatü süpüla nuʼwayuusein
34 Shiasaʼa pienchipa shikii nuuyase Esaú, kaʼwayuuseshi piamasü wayuu, nuuʼuliwoʼukana Het. Wayuu naata sümüin nuulia. Tü wane, Judit sünülia, nüchon Beeri. Ooʼulaka wane, Basemat sünülia, nüchon Elón. 35 Je mojushaata maʼi naaʼin Isaac ooʼulaka Rebeca saaʼu kaʼwayuusein Esaú jieyuu naatajatü.