Génesis
Nanülia na nuuʼuliwoʼukana Esaú
36 Edom nanülia na nuuʼuliwoʼukana Esaú yaa. 2 Kaʼwayuuseshi Esaú apünüinsü jieyuu chajeʼewalüirua Canaán. Anuu nanülia: Ada, nüchonkot Elón chi wayuu heteokai; Aholibama, nüchonkot Aná chi nüchonkai Zibeón chi wayuu heveokai; 3 ooʼulaka Basemat, nüchonkot Ismael, nushunuukat Nebaiot. 4 Je na nüchooinkana Esaú, naya naa: Chi süchonkai Ada: nia Elifaz; chi süchonkai Basemat: nia Reuel; 5 na süchonkana Aholibama: naya Jeús, Jaalam ooʼulaka Coré. Jaʼraishii napüshua na nüchooinkana Esaú, süchonyuukana tü apünüinsükat nuʼwayuuse. Jemeishii naya napüshua suluʼu tü mmakat Canaán.
6 36:6-7 Sajaʼttakalaka joo shiküle mma je süpana wunuʼu süpüleerua tü namüʼünüinkalüirua Esaú je Jacob chi nimüliakai yala suluʼu tü mmakat Canaán. Je achoʼujaasü wüin süsüinjatkat tü mürütkalüirua süpüshua. Soʼu wane kaʼi, nükolojookalaka Esaú suluʼujee tia mmakat Canaán. Oʼunüshi nia nümaʼanajee Jacob süka wainmain mürüt namaʼanaje süka mouliuulin tü mmakat napüleerua. Je nümaasü tü nuʼwayuusekalüirua, nüchonkalüirua, ooʼulaka süpüshua tü wayuu nümaajatkalüirua. Je oʼunüsü nümaa tü nümüʼünüinkalüirua je tü nükorolo aniʼiraasükat wanaa sümaa kepiain nia suluʼu tü mmakat Canaán. Oʼunüshii naya suluʼumüin wane mma wane sümüin, 7 — 8 36:8-9 eere kepiain naya saʼaka wane uuchiirua kanüliasü Seir. Je maaʼulu yaa, Edom sünülia tü mmakat sümaa nanülia na nuuʼuliwoʼukana Esaú. Nia Esaú natuushikaʼaya napüshua na wayuu Edomkanairua. 9 —
10 36:10-13 Otta Elinaz, chi süchonkai Ada tü nuʼwayuusekat Esaú, piamasü nuʼwayuuse. Jaʼraishii süchonnii wane nuʼwayuuse, naya naa: Temán, Omar, Zefo, Gatam ooʼulaka Cenaz. Otta süchon Timna, tü suwalaʼatakat nuʼwayuuse Elifaz, nia Amalec. Otta Reuel, chi süchonkai Basemat tü nuʼwayuusekat Esaú, pienchishii nüchonnii, naya naa: Nahat, Zera, Sama ooʼulaka Miza. 11 — 12 — 13 — 14 Otta Jeús, Jaalam ooʼulaka Coré, naya na süchonniikana Aholibama tü nuʼwayuusekat Esaú, tü nüchonkot Aná chi nüchonkai Zibeón.
15 36:15-16 Anuu neʼiruku na nuuʼuliwoʼukana Esaú maaʼulu yaa suluʼu tü mmakat Edom. Neʼiruku na nuuʼuliwoʼukana Elifaz, naya naa: Temányuukana, Omaryuukana, Zefoyuukana, Cenazyuukana, Gatamyuukana, ooʼulaka na Amalecyuukana. Shia neʼirukukaʼaya tüü, na suuʼuliwoʼukana Ada nuʼwayuusekat Esaú. 16 —
17 Neʼiruku na nuuʼuliwoʼukana Reuel, naya naa: Nahatyuukana, Zerayuukana, Samayuukana ooʼulaka na Mizayuukana. Shia neʼirukukaʼaya tüü, na suuʼuliwoʼukana Basemat nuʼwayuuse Esaú.
18 Neʼiruku na suuʼuliwoʼukana Aholibama tü nuʼwayuusekat Esaú, tü nüchonkot Aná, naya naa: Jeúsyuukana, Jaalamyuukana, ooʼulaka na Coréyuukana. 19 Shia neʼirukukaʼaya tiairua, na nuuʼuliwoʼukana Esaú.
Na nuuʼuliwoʼukana Seir
20 36:20-21 Je paala sümaiwa nüntaiwaʼaya Esaú saʼakamüin tü uuchikalüirua kanüliakat Seir, kepiatüjülia chaʼaya wane wayuuirua nuuʼuliwoʼuirua Seir, wayuu Horeo nia. Na nuuʼuliwoʼukana Seir, naya naa: Lotán, Sobal, Zibeón, Aná, Disón, Ezer ooʼulaka Disán. 21 — 22 Je neʼiruku na nuuʼuliwoʼukana Lotán, naya naa: Horiyuukana ooʼulaka na Hemamyuukana. Je tü nushunuukat Lotán, Timna sünülia. 23 Je neʼiruku na nuuʼuliwoʼukana Sobal, naya naa: Alványuukana, Manahatyuukana, Ebalyuukana, Sefoyuukana ooʼulaka na Onamyuukana. 24 Otta Zibeón, piamashii nüchon tooloyuu: Aja ooʼulaka Aná. Eʼnnaajünüshi Aná sütüma wayuu süka nüntüin paala sünain wane wüin anasü wanaa sümaa nürüleejüin nüpüliise Zibeón chi nüshikai suluʼu wane mma maaʼinyatuuisü. 25 36:25-26 Otta chi nüchonkai Aná, nia Disón. Neʼiruku na nuuʼuliwoʼukana Disón, naya naa: Hemdányuukana, Esbányuukana, Itrányuukana ooʼulaka na Querányuukana. Otta nushunuu Disón, Aholibama sünülia. 26 —
27 Neʼiruku na nuuʼuliwoʼukana Ezer, naya naa: Bilhányuukana, Zaaványuukana ooʼulaka na Acányuukana.
28 Neʼiruku na nuuʼuliwoʼukana Disán, naya naa: Uzyuukana ooʼulaka na Arányuukana.
29 36:29-30 Wayuu Horeo napüshua na nünainjeejanakana Seir: Lotán, Sobal, Zibeón, Aná, Disón, Ezer ooʼulaka Disán. 30 —
Na laülaashiikana saaʼu tü mmakat Edom
31 Süpülapünaa neweetüin wane sülaülashi tü wayuu Israelkalüirua, eetüjülia wane sülaülaashi tü mmakat Edom. 32 Aluwataashi palajana Bela nüchon Beor, wayuu Dinabajeʼewai. 33 Ouktapa Bela, aluwataashi Jobab nüchon Zera, wayuu Bosrajeʼewai. 34 Ouktapa Jobab, aluwataashi Husam, chajeʼewaikai suluʼujee tü mmakat Temán. 35 Ouktapa Husam, aluwataashi Hadad nüchon Bedad, wayuu Avitjeʼewai. Otta Hadad, nia ayamülaka na wayuukana Madián suluʼu tü mmakat Moab. 36 Ouktapa Hadad, aluwataashi Samla, wayuu Masrecajeʼewai. 37 Ouktapa Samla, aluwataashi Saúl, wayuu Rehobotjeʼewai sotpaʼa tü süchikat Éufrates. 38 Ouktapa Saúl, aluwataashi Baal-hanán nüchon Acbor. 39 Ouktapa Baal-hanán, aluwataashi Hadar, wayuu Paujeʼewai. Otta tü nuʼwayuusekat Hadar, shia Mehetabel, süchon Matred, sülüin Mezaab.
40 36:40-43 Otta müshia Esaú, nia natuushika napüshua na wayuu suluʼukana tü mmakat Edom: Timnajanakana, Alvajanakana, Jetetjanakana, Aholibamajanakana, Elajanakana, Pinónjanakana, Cenazjanakana, Temánjanakana, Mibzarjanakana, Magdieljanakana ooʼulaka na Iramjanakana. Tü mmakat kepiakana aluʼu naya, nanüliasü nayakanaya. 41 — 42 — 43 —