Génesis
Judá ooʼulaka Tamar
38 Soʼu wane kaʼi, oʼunüshi Judá noulia na nuwalayuukana süpüla niʼiyouin wane nütünajut kanüliashi Hira kepiashi chaʼaya suluʼu tü pueulokat Adulam. 2 Eejattaajaʼa nüpüla wane jierü yaajeʼewat suluʼu tü mmakat Canaán, nüchon wane wayuu Súa anüliachi. Nuʼwayuusekalaka shia. 3 Kachonkalaka shia nümüin je niʼitaakalaka nünülia chi nüchonkai Er nümünüin. 4 Kachonkalaka shia süchikuaʼaya je niʼitaakalaka nünülia chi nüchonkai Onán nümünüin. 5 Kachontaaja shia süchikuaʼaya je niʼitaakalaka nünülia chi nüchonkai Sela nümünüin. Otta müshia Judá, nnojoishi wanaa sümaa jemelin Sela. Chajachi nia chaʼaya suluʼu tü pueulokat Quezib.
6 Je miyoʼupa Er, chi epayaakai nüchon Judá, achajaanasü wane jierü nütüma chi nüshikai süpüla nuʼwayuuseinjatüin shia. Nüntakalaka sünain. Tamar sünülia. 7 Otta müshia Er, eʼrüi wayumüin nia noʼuluʼu Jehová. Je sükajee tia, oʼutüna aaʼinchi nütüma chi Maleiwakai. 8 Nümakalaka Judá nümüin Onán chi nimüliakai Er:
—Anakaja müleka piisarüle sümüin nuʼwayuuse müliashii maa aka wakuaippa süka shiain pülüinyuuin. Kasataalejese kachoinjatüin shia pütüma süpüla eeinjatüin nuuʼuliwoʼu chi pipayakai —müshi.
9 Niisatkalaka Onán sümüin tü nülüinyuukot. Otta nütüjaa aaʼulu sünain nnojolüinjatüin nuuʼuliwoʼuin süchonyuu tü nülüinyuukot. Sükajee tia, wanaa sümaa nüinkaapüʼüin sümaa, aaʼinmajiraapüʼüshi nükuaippa suulia ipuolüin shia nütüma. 10 Otta Jehová, jashichishi nümüin Onán saaliijee tü naaʼinrapüʼükat. Je sükajee tia, nuʼuta aaʼinchi.
11 Nümakalaka Judá sümüin Tamar tü naʼüikat:
—Anakaja müleka jooluʼu puʼunüle nipialuʼumüin chi püshikai. Makateerü pia chaʼaya. Nnojoleerü kaʼwayuusein pia waneʼereʼeya miyoʼupa Sela chi tachonkai —müshi sümüin.
Müsü nünüiki sümüin süka mmolüin seema ouktajaa Sela maa aka naaʼin na nipayakana. Aleʼejasüjeseʼe Tamar shipialuʼumüin.
12 Shiasa mapa kojuya juya, ouktüsü tü nuʼwayuusekat Judá. Je süchikijee niʼyalajüin saaʼu, nuʼunakalaka eemüin tü pueulokat Timnat eere süüjünüin soi tü naʼanneetsekalüirua. Je nümaashi Hira chi nütünajut kepiakai chaʼaya suluʼu tü pueulokat Adulam. 13 Aapinnüsü Tamar nüchiki chi saʼüikai sünain nüntajachin Timnatmüin süpüla süüjünüinjatüin soi tü naʼanneetsekalüirua. 14 Sütüjaa aaʼuchi sünain miyoʼuichipain Sela chi nüshaleinkai Judá je sünain nnojoyüliain saapünüin nümüin süpüla nuʼwayuuseinjatüin shia. Müsüjeseʼe saakatüin tü süsheʼin sünainpüʼükat shiyaawase wayuu oukta eechinrü. Saʼatakalaka wane süsheʼin naata sümüin suulia. Shiʼitaakalaka wane kuluulu suʼupünaanain suulia shiyaawatünüin nütüma chi saʼüikai. Süikkalaakalaka sotpaʼa tü wopu chawatkat Timnatmüin yaa soʼuluʼu tü pueulokat Enaim.
15 Shiasaʼa nülatapa Judá yalapünaa eere joyotüin Tamar tü naʼüikat, wayuuyaa maaʼinsat shia naaʼinruʼu süka koʼupünaajanain kuluulu shia. 16 Sünain nnojolüin nütüjaain saaʼu sünain shiain tü naʼüikat, nürütkaakalaka sünainmüin sünain maa sümüin:
—Anakaja müleka tainkaale pümaa —müshi.
Süsouktakalaka nümüin:
—¿Kaseerü paapaka tamüin saaʼu? —müsü.
17 Nüsouktakalaka sümüin:
—Taluwataajeerü pümüin wane kaaʼulachon saʼakajee tü tamüʼünüinkalüirua —müshi.
Sümakalaka nümüin:
—Anakajaʼa. Otta, anasü müleka paapüle jooluʼu tamüin wane kasa shiyaawaseinjatü tamüin sünain pansaain pünüiki —müsü.
18 Nümakalaka:
—¿Kasa wayuu taapeetka pümüin shiyaawaseinjatkat tanüiki? —müshi.
Süsouktakalaka nümüin:
—Anakaja paapüle tamüin tü ejeerüjiakat karaloukta kachetakat punutpünaa ooʼulaka tü puwaraaratsekat —müsü.
Naapa nümüsia sümüin tü süchuntakat. Nüinkaakalaka sümaa. Ipuotkalaka shia. 19 Aleʼejüsü Tamar shipialuʼumüin sünain saakajaain tü kuluulu suʼupünaanainjatkat. Saʼatüin süsheʼin süchikua shiyaawasekat wayuu oukta eechinrü.
20 Nüjütünakalaka joo Hira nütüma Judá sünain niʼikajaain wane kaaʼulachon sümüin tü jietkat je süpüla süleʼejirüinjatüin tü nükorolo naapakat paala sümüin. Otta Hira, nnojotsü nüntüin anain tü jietkat. 21 Nüsakirakalaka wane wayuuirua kepiasü suluʼu tü pueulokat Enaim:
—¿Jalasü jiʼrüin tü wayuu maaʼinsat joyotapüʼükat sotpaʼa wopu? —müshi.
—Nnojotsü eepüʼüin wane wayuu maaʼinsat yaapünaa yaa, nnojotpüʼüsü paalainka ooʼulaka nnojotsü maaʼunnaa yaa —müshii naya nümüin.
22 Nüleʼejakalaka nünainmüin Judá sünain maa nümüin:
—Nnojotsü tantüin anain tia jietkat. Na wayuu kepiakana chaʼaya naküjain tamüin sünain nnojolüin wane wayuu maaʼinsat chaʼaya, nnojotpüʼüsü paala je nnojotsü maaʼunnaa yaa naashin —müshi nümüin Judá.
23 Nümakalaka Judá:
—Saaʼu nnojolüin püntüin sünain, tooʼulaajeerü tü takorolokot sümaʼana. Alüʼüjüichipa pia tü kaaʼulakat sümüin, otta nnojotsü shia püpüla. Müleka püleʼejüle püchikuaʼaya sümaa tü kaaʼulakat chamüin chaʼaya, asirajeena na wayuukana waka —müshi.
24 Shiasa mapa apünüin kashi, aküjünüsü nümüin Judá sütüma wayuu: “Ipuotsü Tamar, tü paʼüikat, sünainjee wayuuin maaʼinsat shia saashin wayuu”, münüsü. Otta Judá, süpüla kasalajanainjatüin nütüma sümüin tü saainjalakat, nüjütakalaka na wayuu nümaajanakana sünainmüin tü naʼüikat sünain maa namüin:
—Jütaʼülaa shia. Joto jütüma süpüla ouktaa saaʼu saainjala —müshi.
25 Shiasaʼa nantapa chamüin chaʼaya, najuittirakalaka shia anooipaʼamüin. Otta shiakat, suluwataakalaka wane pütchi nümüin Judá chi saʼüikai sünain maa: “Ipuotsü taya nütüma chi wayuu kakorolokai tü kasa tajapuluʼukat. Anuu tamaʼana tü ashajiakat nejeetse ooʼulaka tü nuwaraaratsekat. Anashi püntüle yaamüin, pütüjaaiwa saaʼu jaralin kakoroloin shia”, müsü.
26 Naapapa Judá tü pütchikat sümakat tü naʼüikat nümüin, nütüjaaitpa aaʼu sünain shiain nükorolo niakai tü sümaʼanakat. Naashajeʼetkalaka naaʼin nüleʼeruʼu sünain maa: “Atak. Tatüjaaitpa aaʼu sünain eʼrülin wayumüin taya sümüin tü taʼüikat sünain nnojolüin taapüin shia nümüin Sela, chi tachon emülieekai, süpüla nuʼwayuuseinjatüin shia. Otta shiakat, saaʼinrüin tü anasükat sünain saʼatapajüin nia wainma juya”, müsü naaʼin nüleʼeruʼu Judá. Aluwataashijeseʼe nia nünüiki süpüla süjütünüinjatüin achiki. Shiasa süchikijee tia, müichimaaleʼejaʼa nnojolüin nia sünainpünaain.
27 Shiasaʼa kettaapa Tamar süpüla kachonwaa, atüjaanüitpa aaʼu sünain senkeyuuinjatüin süchonnii. 28 Je wanaa sümaa suʼttüin sünain jemeyulaa namaa na süchonniikana, chi waneʼe, nujuittirüin nütünachon palajana. Saapaakalaka tü nütünachonkot tü wayuu eemeijütkat sünain shijittaain wane jiitpai ishosü sünain tü nütünachonkot sünain maa: “Nia eʼirumaaka chii”. 29 Otta chi joʼuukai, nikerojeʼetkalaka tü nütünachonkot süchikua. Niakaʼa ojuittüin chi wane nuwalachonkai palajana. Sümakalaka joo tü eemeijütkat: “Nia chi eirujuikai wopu”. Je sükajee tia, eʼitaanüsü nünülia Fares nümünüin. 30 Nujuittakalaka joo chi nuwalakai sünain eein tü jiitpai ishokot yaa sünain tü nütünachonkot. Eʼitaanüsü nünülia Zara nümünüin.