Tü nüshajalakat Lucas
13 Wanaa sümaa tia, eejana waneinnua wayuu aküjakana nümüin Jesús nuʼutirüin aaʼin Pilato waneinnua wayuu chejeʼewalii Galilea eejanakana sünain asülajaa mürüt nümüin Maleiwa. 2 Naapaiwaʼaya Jesús tü namakat naya wayuukana, nümakalaka namüin: «¿Oʼutuna aaʼinchiiche naya galileokana saaʼin jümüin saaʼujee kaainjaraliʼireein naya noulia na wane galileokana? 3 Nnojotsü shiain saaʼujee tia, nnojoliire jiyaawajaain suulia jaainjala, outeena jiaya. 4 Jamüshiijaʼa na polookana mekiisatmüin wayuu ojuttakana aaʼu tü torre chajatkat Siloam, ¿kaainjaraliiche maʼin naya saaʼin jümüin noulia na wayuu chajanakana Jerusalén? 5 Nnojotsü süsirüin tia, nnojoliire jiyaawajaain suulia jaainjala, outeena jiaya».
6 Anuu nünüiki Jesús sümaa kayaawasein nutuma tü nikirajakalü anain: «Eejaittaa wanee wayuu kamaʼanakai uuwoʼulia, eejatka wanee higuera suluʼu tü niyüüjainkat. Nuʼunakalaka sünain asüʼütaa süchon, machonpejeʼe neʼe shia nüpüla. 7 Anuujeseʼe nünüiki chi wayuukai nümüin chi aaʼinmajüikai tü uuwoʼuliakat: ‹Apünüinchi maʼin taya juya shiiʼiree süchon tü higuerakat, machonpejeʼe neʼe shia, pushoʼlojoopan, yalasü neʼe›. 8 Nümakalaka chi aaʼinmajüshikai uuwoʼulia: ‹Señotkalee, puuʼulaa yalaiwa shia wanee juya, tapoteerü ekiiruʼu jee tejiteerü süchaʼa mürüt shikiiruʼu. 9 Kachonlejeʼe shia, anasüjaʼamata, nnojorüle kachooin shia, pushoʼlojoojeerü›».
10 Soʼu tü sükaliakalü eemerawaa chajachi Jesús sünain ekirajaa suluʼu tü ekirajüleekat nüchiki Maleiwa. 11 Eejatkalaka yala wanee wayuu polooirü mekiisatmüin juya kaleʼeruʼuin yolujaa. Ayuuisü maʼin shia sutuma, jokotusü tia wayuukat jee isasü süchiki püchiratüin shia. 12 Wanaa sümaa niʼrüin Jesús tia wayuukat, nürütkaaka sünainmüin jee nümaka sümüin: «Nii waaʼiraa, awatüitpa puulia tia ayuuliikat». 13 Niʼitaainjeseʼe Jesús najapü saaʼu tü wayuukat jee püchiratalaa sümaka, suʼwaajakalaka Maleiwa. 14 Naashichijaakalaka chi sülaülashikai tü ekirajüleekat nüchiki Maleiwa, saalinjee anain nutuma Jesús tia wayuukat sükalioʼu eemerawaa. Nümakalaka namüin na wayuu wattakana naalii: «Aipirua kaʼi shiʼyataainjatkalü oʼu wayuu, shiakalaka anain jüntüle soʼu kaʼikat tia süpüla jaawaleʼennajanain, nnojo jüntüin sükalioʼu eemerawaa». 15 Anuujeseʼe nünüiki chi Señotkai nümüin chi wayuukai: «Wayuu piama oʼupünaachii jia, ¿aashin jüsiʼwatüin jüpaaʼase sümaa jüpüliise sükalioʼu eemerawaa süpüla jajattüin shia sünain asaa wüin? 16 Shialeekajaʼa wayuukat tüü nüchon shia Abrahán jee polooirü mekiisat juya najapuluʼuin shia Satanás, ¿aashin anain saawaleʼennüle, jaʼitairü sükalioʼuin eemerawaa?». 17 Wanaa sümaa nüküjain Jesús tia, japüliwaaka naaʼin na wayuu peʼipaakana nümaa. Eekajasaʼa na wayuu wattakana naalii, talatüsü maʼin naaʼin süka anain maʼin tü kasa naaʼinrakat Jesús.
18 Anuuka nünüiki: «Aluwataajeechi Maleiwa saaʼu mmakat, ¿kasache maka aaʼin tia? ¿Kasache shiyaawaseyaajeetka paala tatuma? 19 Tia müsü aka saaʼin süʼü ‹mostaza› nüpünajaka wanee wayuu suluʼu niyüüjain. Emiyoʼulaasü tia nüpünajüinkat, kepiakalaka wüchii saaʼu tü sütünakat».
20 Anuuka nünüiki nüchikuaʼa namüin: «Aluwataajeechi Maleiwa saaʼu mmakat, ¿kasache shiyaawaseyaajeetka paala tatuma? 21 Tia müsü aka saaʼin soolojia pan süpalirajaaka wanee wayuu sümaa poloo kilo ariina. Soolojooko tü ariinakat sutuma».
22 Süpünaluʼupa Jesús Jerusalén, ekirajüshi nia wayuu sainküin pueulo eekai miyoʼuin jee eekai joʼuuchoin. 23 Anuujeseʼe nünüiki wanee wayuu nümüin Jesús: «Señotkalee, ¿paliʼireenaka na wayuu katüinjanakana oʼu?». Nusoutaka Jesús namüin: 24 «Jaaʼinmaa maʼin ekerotoo suluʼupünaa tü potton mouisükat süka wattain naalii na ekeroteekana, nnojoleenapejeʼe naya ekeroluin. 25 Nütamaapa chi kepiashikai tü miichikat sümaa nüsürülüin tü puettoʼukot, yaleena jia shaʼwaa müin anooipaʼa sünain talewatüin jia jee jümeenaka: ‹Pujutala maa wapüleerua Señotkalee›. Anuuweetkalaka nünüiki chi nipiajachikai: ‹Nnojotsü tatüjaain saaʼu jalejeʼewaliin jia›. 26 Jusouteenaka nümüin: ‹Mataashi pikapuʼukai jee püsapuʼukai wanee kasa wamaa, mataashi pikirajapuʼukai woumainpaʼa suluʼupünaa wopu›. 27 Nusouteechikalaka neʼipajee: ‹Nnojotsü tatüjaain aaʼu jalejeʼewaliin jia. Anashii juʼunule toulia jia aainjakana kasa mojusü›. 28 Nuluwataapeena Maleiwa saaʼu mmakat, jiʼreechi Abrahán, Isaac, Jacob otta na nünüikimaajanakana Maleiwa. Eekajasaʼa jiakana ojutunuinnapa anooipaʼamüin, eere jiʼyalajeenain jee kepisaneerüin tü jaikat. 29 Tamüshii paala jia, anteena wayuu wüinpüjee, wopujee, palaajee, uuchijee otta aikalaajeena naya sünain ekawaa* nuluwataapeena Maleiwa saaʼu mmakat. 30 Jülüja jaaʼin tü tamüinjatkat jümüin: Eeshii waneinnua wayuu chiiruaakana atumawaa, palajaneenapejeʼe naya. Eekajasaʼa na palajanakana atumawaa, chiiruaajeena naya».
31 Wanaa maʼin sümaa tia, narütkaakalaka waneinnua fariseo nünainmüin jee namakalaka nümüin: «Anashi puʼunule yaajee, nuʼutee aaʼinchisaʼa pia Herodes». 32 Nusoutakalaka namüin: «Juʼuna nümaʼanamüin chi makai aka saaʼin walirü* sümaa niʼrala wayumüin, müinjatü jünüiki nümüin: ‹Ayuʼluinjachi taya yolujaa süleʼeruʼujee wayuu soʼukai otta müsia wattaʼa jee anainjatü wayuu tatuma, shiasaʼa soʼu tü apünüinkat kaʼi keraajeerü taʼyataain›. 33 Oʼunajachi taya soʼukai, wattaʼa jee wattapiaʼa, jama nnojoluin süpüla nuʼutunuin aaʼin wanee nünüikimaajachi Maleiwa anooipaʼa sünain Jerusalén. 34 Aituashiʼiya maʼin jia wayuu yaakana Jerusalén, oʼunulii jia naaʼin na nünüikimaajanakana Maleiwa otta jüʼinaʼalüin süka ipa na wayuu aluwataanakana jünainmüin. Kotteeyaashiijeʼe jia paala tatuma maʼaka kottuin na kaliinacheinkana suupünaa tü neikat, nnojotpejeʼe jücheküin süchiki tia. 35 Suluʼujee tia, niyüülajüin Maleiwa jüpüla tü aʼwaajüleekat.* Müichimaʼaleeya nnojolin jiʼrüin taya waneʼereeya sümapa wayuu: ‹¡Anataʼaleeshijaʼa maʼin chi nüjünalakai Jehová!›».*