Génesis

9 Nüchekaka Maleiwa anain nukuwaʼipa Noé otta na nüchooinkana, müshijeseʼe nümüin namüin: «Anakajaʼa wainmale jüchonnii, watteenakalaka jaalii, pirateetkalaka tü mmakat jutuma. 2 Mmoleerü jeema tü katakalü oʼu süpaʼa tü mmakat, tü wüchii waawatakalü iipünaapünaa, süpüshuaʼa tü kasa eekat süpaʼa tü mmakat otta müsia tü jime shirokujatkat palaa, taapüin shikii jümüin. 3 Eesü süpüla jiküin süpüshuaʼa tü eekat süpaʼa tü mmakat jee tü eekai katüin soʼu. Maʼaka taapüinkain jümüin tü wunuʼuliakat süpüla jiküinjatüin shia, taapüinña jümüin tü wüchiikat. 4 Aluʼu shiainjaʼa nnojoluinjatüin jiküin shiʼiruku wanee kasa eekai nnojoluin shiyuʼluushin süsha, jama shiain katüin atuma soʼu tü süshakat. 5 Kasalajaneechi pia tatuma amülale püsha sutuma wanee kasa. Toʼuteerü aaʼin wanee wüchii amülale püsha sutuma otta kasalajaneerü tatuma nümüin wanee wayuu nuʼutule naaʼin wanee nuwala. 6 Nuʼutule wanee wayuu naaʼin wane, oʼutuneechiaʼaya aaʼin nia, jama nukumajalain Maleiwa wanee wayuu suluʼu müin nia maʼaka saaʼin nukuwaʼipa. 7 Anakajaʼa wainmale jüchonnii, watteenakalaka jaalii, kojuyaiwa jia, pirateetkalaka tü mmakat jutuma».

8 Anuujeseʼe nünüiki Maleiwa nümüin Noé jee namüin na nüchonniikana: 9 «Tapansaajüin joo jümaa wanee pütchi, tapansaajüinjatü shia namaa jüchonnii, 10 tapansaajüinña tia pütchikat sümaa süpüshuaʼa tü kasa eekat jümaa, sümaa tü wüchiikat, sümaa tü mürütkat, sümaa tü wüchii wünaʼapüjatkat, sümaa tü wüchii lemütüsükat otta sümaa süpüshuaʼa tü kasa eekai katüin oʼu süpaʼa tü mmakat, tü ojuʼitakat wanaa jümaa suluʼujee tü anuwakat. 11 Anuu tü pütchi tapansaajüinjatkat jümaa: Müiria nnojoluin taʼitirüin wanee juya eekai miyoʼu maʼin ajaʼttireetka süpüshuaʼa tü kasa eekai katüin oʼu süpaʼa tü mmakat, amojujeʼereetka tü mmapaʼakat».

12 Ayatakaʼaya naashajaain Maleiwa namaa sünain maa: «Anuu shiyaawase tü pütchi tapansaajakat joo jümaa jee sümaa tü kasa eekai katüin oʼu süpaʼa tü mmakat, napülajatiaʼaya tia pütchikat na wayuu eejeenakana jüchikumüin. 13 Eeʼiyalaajeerü tatuma tü kasüpolüinkat saʼakapünaa tü sirumakat, shiyaawaseerü tia tü pütchi tapansaajüitpakat sümaa süpüshuaʼa tü kasa eekat süpaʼa tü mmakat. 14 Eeʼiyalaajeerü tü kasüpolüinkat saʼaka tü sirumakat shiʼitapa juya tatuma yaa süpaʼa tü mmakat. 15 Soteetkalaka taaʼin tü pütchi tapansaajüitpakat jümüin jee sümüin süpüshuaʼa tü kasa eekat süpaʼa tü mmakat. Müiria nnojoluin eein wanee juya eekai miyoʼuin maʼin ajaʼttireetka wanee kasa süpaʼa tü mmakat. 16 Teʼrapeena shiiʼiyalaain tü kasüpolüinkat saʼaka tü sirumakat soteerü taaʼin tü pütchi tapansaajüitpakat jümüin, tü pütchi süpülajatkat kaʼi süpüshuaʼa otta tü tapansaajakaliaʼaya sümüin süpüshuaʼa tü eekat süpaʼa tü mmakat».

17 Anuujeseʼe nünüiki Maleiwa nüchikuaʼa nümüin Noé: «Anuu shiyaawase tü pütchi tapansaajakat sümaa süpüshuaʼa tü eekai katüin soʼu süpaʼa tü mmakat».

18 Anuukalaka nanülia na nüchonniikana Noé ojuʼitakana suluʼujee tü anuwakat: Sem, Cam otta Jafet. Canaánkalaka nünülia nüchon Cam. 19 Nayainnakalaka sutuuushin wayuu maʼleekalia naya apünüinshiikana nüchooin Noé.

20 Najaratkalaka Noé, nüpünajakalaka wanee uuwoʼulia. 21 Nipeʼtkalaka maʼin Noé sutuma nüsüin wiino, amaichejaashijeseʼe nia suluʼu tü nipiakat. 22 Niʼnnakalaka Noé nutuma Cam, chi nüshikai Canaán, oʼunushijeseʼe nia anooipaʼamüin süpüla nüküjainjachin nüchiki chi nüshikai nümüin Sem otta Jafet. 23 Naapaainjeseʼe Sem otta Jafet wanee kuluulu, nawaʼütkalaka shia natünakiipünaa, nasapükaka naya sünain ekeroloo eemüin chi nashikai, nakoʼoloko nia süka tü kuluutkat sümaa nnojoliin neirakaain nümüin.

24 Nüchijiraaka Noé sootopa naaʼin süchikijee epeʼruwaa, süküjünaka nümüin süchiki tü kasa mojusü aaʼinnakat nümüin nutuma chi nüchon emülieekai. 25 Anuujeseʼe nünüiki Noé:

«Kasalajaneerü tia nümüin Canaán.

Nepiuunaseinjachi nia na nuwalayuukana».

26 Ayatakalaka naashajaain Noé sünain maa:

Piuuneechiaʼaya Canaán nutuma».

28 Trescientos cincuenta nuuyase Noé süchikijee tü Juya Miyoʼukat maʼin. 29 Novecientos cincuenta nuuyase Noé soʼu nünaajaain.