Génesis

43 Aikalaka maʼin jamü suluʼu tü mmakat Canaán. 2 «Jüleʼeja jüchikuaʼa jiyaʼlajaiwa sooʼomüin eküülü», nümakalaka Jacob namüin na nüchonniikana sajaʼlajaapa tü eküülü nasaajakalü Egiptojee. 3 Anuukalaka nünüiki Judá nümüin: «Pansaapejeʼe nünüiki chi wayuukai sümaa nümüin wamüin: ‹Nnojoishii antajanain jia yaamüin sümaa nnojolin jümaain chi jimüliakai›. 4 Oʼuneenaʼaya waya sünain ayaʼlajaa eküülü püjütüle chi wemüliakai wamaa. 5 Nnojoleenapejeʼe waya oʼunuin nnojoire püjütüin nia wamaa. ‹Nnojoishii jia antajanain yaamüin sümaa nnojolin jümaain chi jimüliakai›, mataashi nümakai chi wayuukai wamüin». 6 Anuujeseʼe nünüiki Israel namüin: «¿Jamüshii makaʼa jaainjala tamüin? ¿Jamüshii jüküjakaʼa nümüin chi wayuukai eein wanee jimülia?». 7 Asoutushiijeseʼe naya nümüin sünain maa: «Pansaʼaleesia nünüiki chi wayuukai wamüin sünain nüsakirüin wachiki jee süchiki wapüshi. ‹¿Katayüʼiya oʼu chi jüshikai? ¿Eeshi wanee juwalaya?›, müshi nia wamüin. Wasoutakalaka shiʼipajee tü nüsakirakalü anain waya. Eetaayaai watüjaain saaʼu ‹jüntira yaamüin chi jimüliakai›, nümüinjachin wamüin».

8 Ayataka Judá sünain achuntaa maʼin nümüin Israel chi nüshikai, anuu nünüiki nümüin: «Püjüta tamaa chi jintüikai, oʼuneeshiireʼeya waya sünain ayaʼlajaa eküülü süpüla woʼttaainjanain süchikumüin tü jamükat, nnojoleenaka outuin waya, nnojoleechi outuin pia jee nnojoleena outuin na wachonniikana. 9 Taapüin tanüiki pümüin nnojoleerüin kasain alatüin nümüin chi wemüliakai, tayeechi kasitka kasale alatüin nümüin. Nnojoire taleʼejirüin nia nüchikuaʼa pümüin kaainjaleechi taya puulia süka taaʼinrüin wanee kasa nnojotka anain, müiria isain tachiki tawalaajüin shia pümüin. 10 Piantuairüje wakua chejee nnojoliire koulainkuʼu wamüin».

11 Anuukalaka nünüiki Israel nümüin: «Shialejeʼeya jaaʼinreein tia, anakajaʼa jaaʼinrüle tü tamüinjatkat jümüin. Jiʼitaa suluʼu jutoleekase kasa anasü eekat suluʼu mmakat tüü, jukolojeetka shia nümüin chi wayuukai. Alüʼüjeena jia seita shipinase ayuulii,* mapa, süjü wunuʼu jemetaka eejuu, süta wunuʼu,* ‹pistacho› sümaʼaleeya ‹almendra›. 12 Wainmaleʼeya jutuma tü nneerü jülüʼüjainjatkat, jüleʼejireetka süchikuaʼa tü nneerü eʼitaanakat suluʼu jutoleekase. Eeshijaʼa maaʼawale chi eʼitaakai shia. 13 Anakajaʼa jümaale chi jimüliakai, jüleʼejaiwa nümaʼanamüin chi wayuukai. 14 Kasataalejeseʼe nükaalinjain jia chi Maleiwa Pülashikai maʼin nümülialaaiwa aaʼin chi wayuukai jaalin, nüjütaiwa chi juwala chakai nümaʼana jee nüleʼejiraiwa Benjamín nüchikuaʼa. ¿Kasakainjatka joo tatuma amülouire na tachonniikana?».

15 Yapajaka natuma tü nakolojuinjatkat, wainmaleeka natuma tü nneerü nalüʼüjainjatkat, oʼunushiijeseʼe naya Egiptomüin nümaa Benjamín, nantakalaka eemüin José. 16 Niʼraiwaʼaya José nüntüin Benjamín namaa, nuluwataamaatüin chi wayuu süʼlaülajanakai tü nipiakat sümaa nümüin nümüin: «Pümaa wayuukana naainnua miichipaʼamüin, puʼutira saaʼin kasa nayaaluʼu jee püʼlakajeʼera neküin, ekaainjachi taya namaa kaleʼu». 17 Naaʼinramaatakalaka chi wayuukai tü nümakat José nümüin, nümaakalaka naya nipialuʼumüin José. 18 Sainkuukalaka naaʼin na wayuukana sutuma namaanüin nipialuʼumüin José, anuu nanüiki: «Antinnüshii waya yaamüin süpüla süsalain waya tü nneerü aleʼejinnakat suluʼu watoleekase, ataʼünneena waya, achepchieejeena waya jee napüliiküseerü tü wapüliiküsekat».

19 Arütkaashiijeseʼe naya nünainmüin chi süʼlaülajanakai nipia José, naashajaakalaka nümaa soʼuluʼu tü miichikat. 20 Anuukalaka nanüiki nümüin: «Laülaashikalee, antüshiire waya soʼu tü palajatkat wakua süpüla wayaʼlajüinjanain eküülü yaamüin. 21 Wanaa sümaa waleʼejüin yaajee jee wantüin eepünaainjanale watunkaain, wasanaain watoleekase, wantaka sünain waneʼewai wakua tü nneerü süliakat tü kasa wayaʼlajakat, kottusü tü nneetkat süpüshuaʼa. Antüshiijeseʼe waya yaamüin shiiʼiree waleʼejirüin shia. 22 Wainmaleʼeya tü nneerü wantirakat süpüla wayaʼlajüinjanain eküülü. Nnojotsü watüjaain aaʼu jaralüin aleʼejirüin tü nneetkat suluʼu watoleekase». 23 Anuukalaka nünüiki chi wayuukai namüin: «Nnojo mmoluin jia, ana jaaʼin. Chi Jümaleiwasekai jee chi Nümaleiwasekai chi jüshikai niʼitaain tü nneetkat suluʼu tü jutoleekasekat. Walaatüjütsaʼaya tia nneetkat tamüin». Nüsaajitkalaka Simeón namüin.

24 Nikerotiraka naya chi wayuukai nipialuʼumüin José, naapakalaka wüin namüin süpüla noʼlojooinjatüin nooʼui jee naapüin tü shiküinjatkat napüliiküse. 25 Natüjaapa saaʼu nüntajachin José kaleʼu jee niküinjachin namaa, yapajakalaka natuma tü nasülajüinjatkat nümüin. 26 Nüntapa José nipialuʼumüin neʼikajaain tü nasülainkat nümüin, nasapainkakalaka naya sümaa nejepülaain nümülatuʼu. 27 Nüsakirakalaka naya José anale naya, anuujeseʼe nünüiki namüin: «¿Jama chi laülaa jüshikai chi jüküjakalinkai achiki tamüin? ¿Ichaayüiya nia?». 28 Anuukalaka nanüiki nümüin: «Ichaayüisaʼaya chi washi kojutukai atuma pia, anashi nia». Nejepülaakalaka sümaa nasapainkain naya nümülatuʼu.

29 Niʼrakalaka José Benjamín chi nuwala keijiraakai nümaa, anuukalaka nünüiki namüin: «¿Nia chii chi juwala jaashajaakai achiki tamüin, chi emülieekai jaashin?». Ayatakalakaʼaya nia sünain yootoo: «Kasataalejeseʼe anain pukuwaʼipa nutuma Maleiwa, tachee». 30 Isakalaka nüchiki José nüchecherüin naaʼin suulia aʼyalajaa sutuma niʼrüin chi nimüliakai, oʼunamaatüshijeseʼe nia sutuma niʼyalajeein aaʼin, nikerotakalaka suluʼu wanee kuatta nümüiwaʼa jee niʼyalajakalaka maʼin. 31 Nuʼlojookalaka nuʼupünaa, nujuʼitakalaka suluʼujee tü kuattakalü anapa naaʼin jee nümaka: «Jiitaja jümaa eküütkat». 32 Shiʼitaanakalaka niküin José nümüiwaʼa saaʼu wanee meesa, eʼitaanataasü neküin na nuwalayuukana namüiwaʼa saaʼu wane meesaya jee müshiʼiya na egipcio nümaajanakana José, ekaashii naya namüiwaʼa saaʼu wane meesa. Matüjainsalii ekawaa na egipciokana namaa na hebreokana süka nalerajüin tia na egipciokana.

33 Aikaleʼennüshii na nuwalayuukana José niʼipoʼujee, aikaleʼennüshi chi epayaakai eeinjachire nia saaʼujee epayaain nia, nüikaleʼennaka chi emülieekai eeinjachire nia saaʼujee emülieein nia. Eirakaajiraashiisejeʼe naya süka ponuin naaʼin tü kasa alatakat. 34 Niʼikajeʼerakalaka José süpüshi tü niküinkat saaʼu tü meesa eere na nuwalayuukana, alanaʼaleepejeʼe* tü eküülü niʼikajeʼerakat nümüin Benjamín suulia tü niʼikajeʼerakat namüin na waneinnua. Ayatakalakaʼaya nasaain sümaa nekaain emiraleepaʼaya naya.