Génesis
44 Mapa maʼin, nuluwataakalaka José chi wayuu laülaashikai saaʼu tü nipiakat sümaa nümüin nümüin: «Anakajaʼa pipirajüle sümaa eküülü natoleekase nala wayuukana, piratajatü maʼin shia putuma. Piʼitaʼaleeya maa tü nanneetsekat waneʼewai nakua suluʼu tü natoleekasekat. 2 Piʼitaainjatpejeʼe suluʼu nutoleekase chi emülieekai tü nneerü süliakat tü eküütkat sümaʼaleeya tü iita tasia aainjuushikat süka pülaata». Naaʼinrakalaka chi wayuukai tü nuluwataakalü anain nia José.
3 Noʼunakalaka na nuwalayuukana José sümaa napüliiküse suwasajaapa aikat. 4 Nüjütakalaka José chi wayuu laülaashikai saaʼu tü nipiakat nnojoliiwaʼaya wattain na nuwalayuukana suulia tü pueulokot, anuuka nünüiki nümüin: «Puushikajaa nachiirua. Anuuka tü pünüikinjatkat namüin püsaʼwajaapa naya: ‹¿Jamüinjatü makaʼa jaaʼinrala tamüin shiiʼirakaluʼu kamaneein taya jümüin? 5 ¿Aashin shiain tü iita nüsiakat chi talaamainkai, tü nuuʼulakiakat süpüla nütüjaain saaʼu tü kasa alatajatkat? Mojukatche maʼin tü kasa jaaʼinrakat›».
6 Nüsaʼwajaakalaka naya chi wayuukai, nüküjakalaka namüin tü pütchi ajütünakalü amaa nia. 7 Asoutapejeʼe naya nümüin sünain maa: «Laülaashikalee, ¿jamüsü makaʼa pünüiki wachiki? Püchepchia waya, nnojorüleejaʼa süpüla müinjatüin waainjala. 8 Mataasü weiteʼerakai Canaánjee tü nneerü wantakalü anain suluʼu watoleekase. ¿Jamataalainjatka süpüla waʼluwajüinjanain ooro jee shiale pülaata suluʼujee nipia chi pülaamainkai? 9 Laülaashikalee, püntülejeʼeya sünain tü püchajaakalü achiki, anakajaʼa outule chi antünakai amaʼana shia, nüchepchieenaka chi pülaamainkai* na apütaakana». 10 Anuukalaka nünüiki chi wayuukai namüin: «Anakajaʼa waaʼinrüle tü jümakat, nieechi neʼe achepchieeka* chi antünakai amaʼana tü tachajaakalü achiki. Eekajasaʼa na waneinnua nnojoleerü kasain kasalajanain namüin». 11 Nashakatiramaataka tü natoleekasekat jee najutatka shia waneʼewai nakua. 12 Nüsaijakalaka chi wayuukai süpüshuaʼa tü natoleekasekat, nia nüsaijaka atoleekase palajana chi epayaakai, niaka nüsaijüin atoleekase chiiruaa chi emülieekai. Süntünaka anain tü iita nüsiakat José suluʼu nutoleekase Benjamín.
13 Nachatajaakalaka nasheʼin na nuwalayuukana José, noʼotokoloko süchikuaʼa tü nachisekat saaʼu tü napüliiküsekat jee naleʼejaakalaka suluʼumüin nupueulose José. 14 Eejachika José nüpüla Judá jee napüla na nuwalayuukana nantapa nipialuʼumüin. Aʼwachiraashiijeseʼe naya nümülatuʼu. 15 Anuukalaka nünüiki José namüin: «¿Jamüsükai makaʼa jaaʼinrala? ¿Nnojotsüjasaʼa jütüjaain saaʼu tatüjain süpüleerua ayaawataa tü kasa alatajatkat?». 16 Nusoutakalaka Judá nümüin: «Nnaale joo jamüinjatüin wanüiki pümüin laülaashikalee, isasü wachiki tü sukuwaʼipainjatkat wanüiki. Nnojoishii süpüla waküjainjanain maainjalain waya, niiʼiyatüin chi shiimainshikai suluʼu Maleiwain kaainjalain waya, püchepchieenaka waya wapüshuaʼa. Püchepchieena waya nümaʼaleeya joo chira antüna amaʼanachikai tü iita asiakat». 17 Anuukalaka nünüiki José: «Nnojorüleejaʼa süpüla taaʼinrajatüin tia. Nieechi tachepchiaka chi wayuu antünakai amaʼana tü iita tasiakat, eekajasaʼa na waneinnua aleʼejeena süka anaka akuwaʼipa nümaʼanamüin chi jüshikai».
18 Nürütkaakalaka Judá nünainmüin José sümaa nümüin nümüin: «Laülaashikalee, tachuntuinreʼeya pümüin puuʼulaainjachin taashajaain pümaa, jalia paashichijaajayaai tamüin, wayuu kojutushi pia maʼaka kojutuin faraón, aluʼusaʼa tayakai püchepchia neʼe taya. 19 ‹¿Kashiyüliʼiya jia? ¿Eeshii nooʼomüin juwalayuu?›, mataashi pümakai wamüin laülaashikalee soʼu püsakirüin waya. 20 Asoutushiijeseʼe waya pümüin sümaa müin wanüiki: ‹Kashiyüliʼiya waya shiajaʼa neʼe laülaaichin nia. Eeshisaʼaya wanee wawala nia chi emülieekai, nüchon nia chi washikai laülaapa nia, nia neʼe apütaaka nüpüla naʼakajee na nüchonniikana sümüin tü nuʼwayuusekat. Anaajaashi chi nuwala keijiraakai wanaa nümaa, aishaatashi maʼin chi wemüliakai nüpüla chi washikai›. 21 ‹Anakajaʼa jüntirüle nia tamüin teʼraiwa nia›, pümakalaka wamüin. 22 Wasoutakalaka pümüin laülaashikalee sümaa müin wanüiki: ‹Nnojoishi süpüla nükatalaainjachin chi wemüliakai nuulia chi washikai, outeechi chi washikai nüchiirua nükatalaale nuulia›. 23 ‹Nnojoishii jia antajanain yaamüin sümaa nnojolin jümaain chi jimüliakai›, müshinka pia wamüin.
24 »Shiasaʼa woʼunapa nümaʼanamüin chi washikai waküjain nümüin tü püküjakat wamüin laülaashikalee. 25 ‹Jüleʼejaa jüchikuaʼa jiyaʼlajaiwa sooʼomüin eküülü›, nümakalaka chi washikai wamüin mapa. 26 Anuujeseʼe tü wamakat nümüin: ‹Nnojoishiisa süpüla woʼunuin chamüin, nnojoishii süpüla wantajanain nümaʼanamüin chi wayuukai aluʼusaʼa wamaale chi wemüliakai. Shia neʼe woʼuneenaka aaʼujee püjütüle chi wemüliakai›. 27 Anuujeseʼe nünüiki chi washikai wamüin: ‹Jütüjaa aaʼu piamashiin neʼe tachonnii sümüin tü taʼwayuusekat. 28 Oʼunushi wanee tamaʼanajee. «Ajaʼttakajasaʼa nia sutuma wüchii jashichi», tamakalaka. Nnojoireeka teʼrüin nia soʼujeʼereeya tia. 29 Nümaanataarüle joo chi tachonkai tamaʼanajee, outeechi taya sutuma mojuin taaʼin nüchiirua jamataarüle nukuwaʼipa jee outule nia›.
30 »Aishi maʼin chi wemüliakai nüpüla chi washikai. Taleʼejataarüle jooluʼu nümaʼanamüin chi tashikai sümaa nnojolin chi wemüliakai wamaa, 31 anaajaajeechisa chi washikai nnojoire niʼrüin chi wemüliakai, wayeena kasitka outule chi washikai sutuma mojuin naaʼin. 32 Taapüin tanüiki nümüin chi tashikai taaʼinmajeechin chi temüliakai. ‹Nnojoire taleʼejirüin nia nüchikuaʼa pümüin, kaainjaleechi taya puulia süka taaʼinrüin wanee kasa nnojotka anain, müiria isain tachiki tawalaajüin shia pümüin›, müshi taya nümüin chi tashikai. 33 Anakajaʼa tayale makatüin süpüla püchepchiainjachin taya niiʼirakaluʼu chi temüliakai, püjüteechikalaka nia süpüla nüleʼejüinjachin namaa na tawalayuukana. 34 ¿Jamataalainjachika süpüla taleʼejüinjachin nümaʼanamüin chi tashikai sümaa nnojolin tamaain chi temüliakai? Nnojoireejaʼa teʼreein sülatüin wanee kasa mojusü nümüin chi tashikai».