Éxodo

28 »Püneeküinjachi Aarón chi puwalakai namaʼaleeya na nüchonniikana naʼakajee na israelitakana süpüla sacerdoteinjachin nia tamüin. Nianjachiaʼaya püneekaka Aarón namaʼaleeya na nüchonniikana, püneeküinjachi Nadab, Abihú, Eleazar jee müshia Itamar. 2 Aainjainjachi pia nüsheʼin Aarón chi puwalakai, shiainjatü wanee kuluulu eekai anain maʼin, kojuteechika nia suluʼujee tia jee aneerü niyolojo. 3 Aashajaainjachi pia namaa napüshuaʼa na wayuu eekai natüjain, na wayuu kekiikana tatuma, pümeechikalaka namüin naainjainjanain nüsheʼin Aarón tü kojutuinjachikalü aluʼujee nia, sacerdoteechikalaka nia tamüin.

4 »Anuu tü kuluulu naainjainjatkat: wanee eʼitaanajatka naaʼintoʼupünaa chi laülaashikai napüleerua na sacerdotekana, wanee kuluulu kanüliaka efod, wanee kuluulu eekai matünain, wanee kuluulu eʼinuushi kanaka cuadro, wanee ekiaalaja eekai anain maʼin jee müsia wanee kuluulu ayatapünaajanainjatka. Paainjainjatü tia kuluulu anakat maʼin süpüla nüsheʼinjatüin shia Aarón namaa na nüchonniikana, tia makat süpülajatü sacerdoteinjachin nia tamüin. 5 Naainjainjatü tü kuluutkat naya wayuu atüjakana maʼin süka ooro, jiirü wüittüsü, laana jepisiiyaa, jiirü ishotot maʼin jee müsia lino anaka maʼin.

6 »Naainjeerü tü kuluulu kanüliakalü efod süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin, asonuushinjatü tia kuluutkat. 7 Piamainjatü süʼülia tia kuluutkat süntiraajeetkalaka iipünaa nunutpünaa chi kasheʼinjachikai shia. 8 Eʼinuushinjatü tü kuluulu niyatapünaainjatkat chi laülaashikai napüleerua na sacerdotekana, aʼyapüjünajatü shia sünain tü kuluulu kanüliakalü efod, ayateetkalaka shia eere shiʼitaanüin, aainjünajatü shia süka tü aainjünakalü aka tü kanüliakalü efod, aainjünajatü süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin.

9 »Aapaainjachi pia piamasü ipa kanüliaka ónice, pushoʼojeetkalaka sünain nanülia na nüchonniikana Israel. 10 Pushoʼojeerü aipiruasü nanülia sünain wanee ipa jee sünain tü wane ipakat pushoʼojeerü nanülia na wane aipiruashiikana, pushoʼojeerü tia wanaapünaa sümaa jaralin joʼuuin palajana. 11 Nushoʼojüinjatü wanee wayuu eekai nütüjain sünain tü piamasükalü ipa nanülia na nüchonniikana Israel, müinjatü sukuwaʼipa maʼaka sukuwaʼipa tü shipekiakat wanee kasa. Piʼiteʼereetkalaka tü ipakat suluʼu wanee süta aainjuushika süka ooro. 12 Piʼitaainjatü tü piamasükalü ipa sunuloʼu tü kuluulu kanüliakalü efod süpüla sotuinjachin taya naaʼin na nüchonniikana Israel. Müinjatü nülüʼüjakai saaʼin nunuloʼu Aarón toʼupala tayakai Jehová nanülia na nüchonniikana Israel suluʼu süshajuushin süpüla sotuinjachin taya naaʼin. 13 Akumajüinjachi pia süka ooro tü sütainjatkat tü ipacheinkat. 14 Aainjainjachia pia piamasü jiirü outtajuushika süka ooro anaka maʼin, kaülajeetka tü jiitkat sünain süta tü ipacheinkat.

15 »Paainjirüinjachi wanee wayuu eʼinüi tü naaʼintoʼupünaainjatkat chi laülaashikai napüleerua na sacerdotekana, tü ayaawatünakalü akajee tü nüneekakat Maleiwa süchiki wanee kasa. Müinjatü saainjia maʼaka saainjia tü kuluulu kanüliakalü efod, aainjünajatü süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin. 16 Pienchinjatü shiʼichi tia kuluutkat süshataanapa, piamainjatü shikii piamamüin centímetro* sajaʼapüin jee piamainjatü shikii piamamüin centímetro seeruluin. 17 Pienchinjatü shiʼipa tü ipakat suluʼu pachiiruaain shia, sünain tü palajatkat shiʼipa eʼitaaneerü tü ipa kanüliakat rubí, topacio jee müsia esmeralda. 18 Sünain tü wane shiʼipakat eʼitaaneerü tü ipa kanüliakat turquesa, zafiro jee müsia jaspe. 19 Sünain tü apünüinkat shiʼipa eʼitaaneerü tü ipa kanüliakat léshem,* ágata jee müsia amatista. 20 Jee sünain tü chiiruaajatkat shiʼipa eʼitaaneerü tü ipa kanüliakat crisólito, ónice jee müsia jade. Aainjuushinjatü süka ooro süta süpüshuaʼa tü ipacheinkat. 21 Eʼitaanajatü sünain tü ipacheinkat nanülia na polookana piamamüin nüchonnii Israel. Tia nanüliakat shiyaawaseinjatü tü poloosükat piamamüin neʼiruku na israelitakana. Eʼitaanajatü sünain tü ipacheinkat waneʼewai sukua nanülia na nüchonniikana Israel, müinjatü tia maʼaka saaʼin shipekia wanee kasa.

22 »Aainjainjachiaʼaya pia jiirü outtajuushi süpüla tü naaʼintoʼupünaainjatkat chi laülaashikai napüleerua na sacerdotekana, aainjuushinjatü tia süka ooro anaka maʼin. 23 Aainjeechi pia piamasü süttiija süka ooro süpülajatka tü naaʼintoʼupünaainjatkat chi laülaashikai napüleerua na sacerdotekana, piʼitaajeetka tia süttiijakat sünain tü piamasükat sücheʼe tia kuluutkat. 24 Pülatireetka tü piamasükat jiirü aainjuushika süka ooro suluʼupünaa tü piamasükat süttiija sünainka sücheʼe tü naaʼintoʼupünaainjatkat chi laülaashikai napüleerua na sacerdotekana. 25 Pülatireerü tü piamasü jiirü outtajuushikat suluʼu soʼu tü piamasükat süta tü ipacheinkat jee piʼitaajeetka shia sunuloʼupünaa tü kuluulu kanüliakalü efod süpüleeruajee. 26 Paainjeerü piamasü süttiija süka ooro, piʼitaajeetka shia sünain tü piamasükat sücheʼe tü kuluulu naaʼintoʼupünaainjatkat chi laülaashikai napüleerua na sacerdotekana, süchiiruajeeinjatü shia wanaa maʼin sümaa tü kuluulu kanüliakalü efod yalaka sutuʼujee. 27 Aainjainjachiaʼaya pia piamasü süttiija süka ooro, piʼitaajeetka shia süpüleeruajee tü kuluulu kanüliakalü efod wanaa maʼin sümaa tü kuluulu piamakalü aaʼulia antiraaka nunutpünaa chi laülaashikai napüleerua na sacerdotekana, süʼütpaʼainjatü tia eere kaülajain tü kuluulu kanüliakalü efod iipünaa sünain tü kuluulu eʼinuushi niyatapünaajanainjatkat chi laülaashikai napüleerua na sacerdotekana. 28 Suulia sujutuuin tü naaʼintoʼupünaainjatkat chi laülaashikai napüleerua na sacerdotekana, kaülajainjatü tü süttiija sünainkat tü naaʼintoʼupünaakat sünain tü süttiija eʼitaanakat sünain tü kuluulu kanüliakalü efod, kaülajainjatü shia süka tü jiirü wüittakat. Ayateetkalakaʼaya tü naaʼintoʼupünaakat chi laülaashikai napüleerua na sacerdotekana saaʼu tü kuluulu kanüliakalü efod, iipünaainjatü shia sünain tü kuluulu eʼinuushi niyatapünaajanakat.

29 »Nikerotapa Aarón suluʼu tü Kuatta Wulekat, müinjatü nülüʼüjakai saaʼin nanülia na nüchonniikana Israel toʼupala tayakai Jehová, eʼitaanajatü tia nanüliakat sünain tü naaʼintoʼupünaakalü ayaawatünaka akajee tü taneekakat süchiki wanee kasa, soteechikalaka taya naaʼin waneepia. 30 Piʼitaainjatü tü kanüliakalü ‹Urim› jee tü kanüliakat ‹Tumim› suluʼu tü naaʼintoʼupünaainjatkalü Aarón ayaawatünaka akajee tü taneekakat süchiki wanee kasa. Nünainjatü Aarón tia nikerotapa suluʼu tü Kuatta Wulekat toʼupala tayakai Jehová, naaʼintoʼupünaainjatü Aarón waneepia tü kanüliakalü ‹Urim› jee müsia tü kanüliakat ‹Tumim› süpüla nüküjain namüin na israelitakana tü taneekakat süchiki wanee kasa nikerotapa toʼupala tayakai Jehová.

31 »Paainjainjatü süka jiirü wüittüsü tü kuluulu matünasat sutujeekat tü kuluulu kanüliakalü efod. 32 Koʼuinjatü tü kuluutkalü iipünaa wanaa maʼin sümaa tü shiyatapünaakat, eʼinünüinjatü sotpünaa nutuma wanee wayuu eʼinüi. Soʼu tü kuluutkat müinjatü aka saaʼin soʼu tü kachueera naaʼintoʼupünaakat wanee surulaat, nnojoleetkalaka sütsajaain. 33 Aainjeechi pia shiyaakua süchon wunuʼu kanüliaka granada, paainjeerü shia süka jiirü wüittüsü, laana jepisiiyaa, jiirü ishotot maʼin jee piʼitaajeetkalaka shia sotpünaa tü kuluutkat. Piʼitaajeerü shiyaakua wanee campanachon aainjuushika süka ooro pasanain sünain shiyaakua süchon tü wunuʼu kanüliakat granada. 34 Sünain sot tü kuluulu matünasatkat, wünaapünaapünaa sünain, piʼitaainjatü shiyaakua wanee campanachon aainjuushika süka ooro jee süchikijee tia piʼitaajeerü shiyaakua süchon tü wunuʼu kanüliakat granada, pachikuatüinjatü tia putuma piʼitaapa shia. 35 Naʼatüinjatü Aarón nünain tia kuluutkat süpüla naaʼinrajatüin tü niʼyataakalü anain wanee sacerdote. Aapünajatü shipisana tü shiyaakuakat campanachein sümaa tü shiyaakuakat süchon wunuʼu kanüliaka granada nikerotapa suluʼu tü miichi aʼwaajüleekat toʼupala tayakai Jehová jee aapünajatü shipisana nujuʼitapa, müinjatü sukuwaʼipa tia suulia outajüin nia.

36 »Paainjainjatü wanee saʼata ooro anaka maʼin sümaa chinatüin maʼin shia, pushoʼojüinjatü shia maʼaka sushoʼojia shipekia wanee kasa, piʼitaajeetka pütchikat tüü sünain: ‹Nia Jehová chi wulekai maʼin akuwaʼipa›. 37 Pijiʼttaainjatü tia süka wanee jiirü wüittüsü sünain tü ekiaalaja anakat maʼin, ayatajatkalaka shia kaülajain süpüleerua tü ekiaalajakat. 38 Eʼitaanajatü tia niʼipoʼunain Aarón jee niainjachi asoutaka saaʼujee mojutuin nümüin wanee israelita tü kasa kojutukat tamüin tayakai Maleiwa, tü nasülajakat na israelitakana tamüin tayakai Maleiwa. Waneepiainjatü niʼipoʼunain Aarón tü aainjuushikat süka ooro süpüla talatüinjachin tayakai Jehová namaa na israelitakana.

39 »Aainjeechiaʼaya pia süka lino anaka maʼin wanee kuluulu eʼinuushi kanaka cuadro, paainjeetkalaka süka lino anaka maʼin wanee ekiaalaja anasü maʼin jee wanee kuluulu eʼinuushi ayatapünaajanainjatka.

40 »Aainjeechiaʼaya pia nasheʼin na nüchonniikana Aarón sümaa kuluulu nayatapünaajanainjatü jee müsia tü nekiaalajainjatkat, kojuteenaka naya suluʼujee tia jee aneerü nayolojo. 41 Paʼateetkalaka tia nünain Aarón chi puwalakai jee nanain na nüchonniikana, oʼyoteechi pia seita saaʼu nekii, püneekeena naya jee kojuteenakalaka naya putuma süpüla sacerdotein naya tamüin. 42 Aainjeechi pia süka lino tü naicheinjatkat suulia jaʼyajüin naya, yalejeeinjatü tü naichekat nayatapünaajee sünainmüinreʼeya tü napüʼükat. 43 Naʼatüinjatü Aarón nünain tia jee naʼatüinjatü shia nanain na nüchonniikana nekerotapa suluʼu tü miichi aʼwaajüleekat jee narütkaapa sünain tü aʼajüleekat süpüla naʼyataain tamüin tayakai Maleiwa suluʼu tü paatiakat, nnojoleenaka naya kaainjalain jee nnojoleenaka naya outuin. Naaʼinrajatü tia Aarón waneepia namaʼaleeya na nüikeyuukana.