Génesis
33 Niʼrakalaka Jacob sein Esaú namaa 400 wayuu. Nüküjaka sümüin Lea, Raquel otta tü piamasükat nüchepchia kachonka amüin nia namaainjanain nachonnii. 2 Nüjütaka palajana tü piamasükat nüchepchia namaʼaleeya süchonnii, nüjütaka süchiirua Lea namaʼaleeya süchonnii, shiakalaka chiiruaain nutuma Raquel nümaa José. 3 Nuʼunakalaka Jacob napüleerua, akaratshitua nia ejepülaain mmoluʼumüin nürütkaapa nünainmüin chi nipayakai.
4 Nuwataaka Esaú nüpanapa Jacob nukoʼojooko nünain jee nutuʼlaka nuwalapaʼa, aʼyalajüshii naya piamaleʼeya. 5 Niʼraka Esaú na jieyuukana jee na tepichikana, nüsakiraka Jacob sünain maa: «¿Jaralii na pümaakana?». «Naya na tachonnii naapajalakana tamüin Maleiwa», nümakalaka Jacob nümüin. 6 Sürütkaaka tü piamasükat nüchepchia Jacob namaʼaleeya süchonnii sümaa nejepülaain nümülatuʼu Esaú, 7 arütkaʼaleesia Lea namaʼaleeya na süchonniikana sümaa nejepülaain nümülatuʼu Esaú, müsia neʼe tü naainjakat José sümaa Raquel arütkaashii naya nünainmüin Esaú sümaa nejepülaain nümülatuʼu.
8 Nüsakiraka Jacob Esaú sünain maa: «¿Jamüshii puluwataakaʼa tapanapa na wayuukana sümaa tü mürütkalüirua?». «Tepayachee, süpülajatü kamaneein pia tamüin», nümakalaka Jacob nümüin Esaú. 9 Anuujese nünüiki Esaú nümüin: «Temüliee, wainmaitpa kasa tamaʼana, makata pia sümaa tü pümüʼlüinkalüirua». 10 Anuukalaka nünüiki Jacob niʼipajee: «Talatülejeʼeya pia tamaa makatüinjachiaʼaya pia sümaa tia tasülajakat pümüin. Tantirüin shia pümüin süpüla teʼrüinjachin pia. Müshijaʼa teʼrakai nuʼupünaa Maleiwa süka teʼrüichipain pia, jama kamaneein pia tamüin. 11 Paapaa maa tü tasülainkat pümüin süka wainmaitpain kasa naapaka Maleiwa tamüin, nnojotsü kasain choʼujaain tamüin». Wainmatua nüküjain Jacob tia nümüin Esaú, naapaainjeseʼe Esaú shia.
12 Anuu joo tü nümakalü Esaú mapa nümüin Jacob: «Anakajaʼa woʼunule, tayeechi oʼunaka püpüleerua». 13 Nusoutakalaka Jacob nümüin Esaú: «Pütüjaa aaʼu mainchoulein naaʼin na tepichikana, eesü anneerü tamaʼana jee paaʼa eekai kachooin, ajaʼlajaweerü outuin wakoʼulirüle shia soʼuleʼeya wanee kaʼi. 14 Anakajaʼa puʼunule tapüleerua tepayachee, jiatteerü takua süpüleerua tamüʼlüin jee napüleerua na tepichikana. Waneʼereeya tantiraain pümaa chaa Seír». 15 Anuuka nünüiki Esaú nümüin: «Anashii tapütüle püpüla napüshi na wayuu tamaakana». «¿Jamüsü paaʼinrajatkaʼa tia? Anaitpa taaʼin süka talatüichipain pia tamaa», nümakalaka Jacob nümüin. 16 Nüleʼejaka Esaú soʼuleʼeya kaʼikat tia chamüin Seír.
17 Nuʼunakalaka Jacob suluʼumüin tü mmakat Sucot, nukumajaka chayaa tü nipiayaainjatkat jee nukumajüin luma süpüla tü nümüʼlüinkat, müsüjeseʼe Sucot müin sünülia nutuma tia mmakat.
18 Ayatakalaka nuʼunuin chejee Padán-Aramjee suluʼumüin tü pueulokot Siquem, chasü tia suluʼu tü mmakat Canaán, antüshi nia süka anaka akuwaʼipa chamüin. Kepiakalaka nia peje sünain tü pueulokot. 19 Nuwalaajaka poloo shikii nneerü aainjuushi süka pülaata sülia tü mma eere niʼitaain tü nipia aainjuushikat süka loona, niyaʼlajüin tia noulia na nüchonniikana Hamor, chi nüshikai Siquem. 20 Nüpaʼawajaaka ipa chayaa süpüla aʼwaajaa Maleiwa, Maleiwakalaka sünülia nutuma, chi Nümaleiwasekai Israel.