Karaloʼuta namüinjatka na chajanakana Galacia
1 Karaloʼutakat tüü, tashajala tayakai Pablo, nnojoishi süneekalain taya wayuu süpüla taluwataaushinjachin jee nnojoishi taya süjünalain wayuu. Aneekuushi taya nutuma Jesucristo jee nutuma Maleiwa, chi Nüshikai, chi asoʼireʼerakai naaʼin süchikijee outaa. 2 Tayakai namaa na wawalayuu yaakana tamaa, wasaküin na wawalayuu chakana Galacia:
3 Kasataalejeseʼe kamaneein jia jee jimatüin jaaʼin nutuma chi Washikai Maleiwa jee nutuma chi Señotkai Jesucristo. 4 Aapajiraashi nia nikii saaʼu waainjala süpüla taashinjanain waya suulia tü kasa alatakat sainküin mma,* wanaapünaa sümaa tü nüchekakat chi Washikai Maleiwa. 5 Kasataalejeseʼe kojutuin nia atumawaa süpüla kaʼikat süpüshuaʼa. Amén.*
6 Ponusü maʼin taaʼin süka jükayalaamaatüin nuulia chi Maleiwakai, chi aneekakai jia sünainjee kamaneein Cristo jümüin otta ponusü taaʼin süka anain jümüin wanee pütchi nnojotka shiain tü pütchi anakat maʼin.* 7 Nnojotsü piamain tü pütchi anakat maʼin, waneesia neʼe, shiajaʼa neʼe eein waneinnua wayuu mojulaajakana jee namojujeein sukuwaʼipa tü pütchi anakat maʼin nüchiki Cristo. 8 Eere wanee wayuu, (jaʼitashi niain wanee waʼakajee jee niale wanee aapiee nümaʼanajeejachikai Maleiwa) nüküjataarale jümüin wanee pütchi naata maʼin suulia tü pütchi anasü waküjakat jümüin, anasü kasalajanale tia nümüin. 9 Taküjain jümüin süchikuaʼa tü taküjakat jümüin paala: jaʼitashi jaralin aküjain pütchi jümüin, nüküjale jümüin wanee pütchi naata maʼin suulia tü pütchi anakat maʼin jaapaaka amaa paala, anasü kasalajanale tia nümüin.
10 Nnojoishii nayain talateein na wayuukana tatuma, nia talateeka tatuma Maleiwa. Nnojoishii nayain aneein aaʼin na wayuukana tatuma, talateerejeʼe na wayuukana tatuma, nnojoishije nüchepchiain taya Cristo. 11 Tawalayuu, shia tachekaka jütüjaain saaʼu nnojoluin sümaʼanajeejatüin wayuu tü pütchi anakat maʼin tü taküjakat jümüin. 12 Nnojotsü nüküjalain shia wanee wayuu tamüin jee nnojoishi ekirajünüin taya sünain, nia kaküjalaka shia tamüin Jesucristo.
13 Jaapa achikit tü takuwaʼipapuʼukat tanoujaiwaʼaya sünain tü nanoujakalü anain na judíokana. Jaapa achikichii müliapuʼuin maʼin tatuma na anoujashiikana nünain Maleiwa jee tajaʼttireepuʼuin naya. 14 Alanaʼaleesia maʼin tü taaʼinrapuʼukat noulialeʼeya waneinnua judío anoujiraapuʼukana tamaa sünain tü nanoujakalü anain na judíokana, eerejeʼe wanaawapuʼuin nouyase tamaa, jama shiain kapülaleeinña taaʼin tü nanoujapuʼukalü anain na wayuu kachooinkana taya. 15 (Aneekuushi taya nutuma chi Maleiwakai saaʼujee kamaneein nia tamüin, jama joʼuuin taya nutuma). Anashiisü nümüin chi Maleiwakai 16 nüneeküin taya süpüla taküjainjachin sümüin wayuu maʼleekalia tü pütchi anakat maʼin nüchiki chi Nüchonkai. Nnojoipejeʼe taya oʼunamaatüin sünain asakiraa wayuu. 17 Jee nnojoishi oʼunuin taya Jerusalénmüin namaʼanamüin na aluwataaushi aneekuushikana tapülapünaa. Oʼunushi taya Arabiamüin jee taleʼejaka Damascomüin tachikuaʼa.
18 Apünüin juya süchikijee tia, toʼunakalaka Jerusalénmüin nümaʼanamüin Cefas, chajachika taya poloo jaʼralimüin kaʼi nümaʼana. 19 Nnojoipejeʼe jaralin teʼrüin naʼakajee na aluwataaushikana, niaʼala neʼe Santiago teʼraka, chi nimüliakai chi Señotkai. 20 Taküjaleeinña jümüin nuʼupala chi Señotkai, nnojoluin alawaain tü tashajakat jümüin.
21 Toʼunaka mapa suluʼumüin tü mma chakat Siria jee tü chakat Cilicia. 22 Nnojoipejeʼe neʼraajüin taya na anoujashii chajanakana Judea, na paaʼinwakana nümaa Cristo. 23 Shia neʼe naapapuʼuka sünüiki wayuu sünain maa: «Chi wayuu müliapuʼukai atuma waya jee chi ajaʼttireepuʼukai na anoujashiikana, nüküjaitpa neʼe tü pütchi anakat maʼin». 24 Naʼwaajakalaka chi Maleiwakai naapapa süchiki tü takuwaʼipakat.