Jueces

11 Jefté nia wanee wayuu chejeʼewai Galaad, yalayala aaʼinchi nia sünain atkawaa. Süchon nia wanee jierü maaʼinsat, Galaad nünülia chi nüshikai. 2 Kachonpejeʼeya Galaad sümüin tü nuʼwayuusekat, shiasaʼa nemiyoʼulaapa na nüchooinkana, najünajaaka Jefté sünain maa: «Nnojoishisa pia apaajaanajachin apüla wanaa wamaa nutuma chi washikai, jama süchooin pia wanee jiet naata». 3 Nuʼluwataakalaka Jefté noulia na nuwalayuukana suluʼumüin tü mmakat Tob, oʼunushiʼiya nümaa waneinnua wayuu maʼyataalasalii.

4 Natkaaka mapa na ammonitakana namaa na israelitakana. 5 Noʼunamaataka na laülaashiikana saaʼu tü mmakat Galaad suluʼumüin tü mmakat Tob sünain asaajaa Jefté neʼrapa nashutunuin aaʼu na israelitakana natuma na ammonitakana. 6 Anuujeseʼe nanüiki nümüin Jefté: «Anashi wamaale pia, piaiwa wekiipüʼüin sünain atkawaa namaa na ammonitakana». 7 Anuukalaka nünüiki Jefté neʼipajee naya laülaashiikana: «¿Aashin jiayaain ajünajaain taya nipialuʼujee chi tashikai süka jüʼürülain taya? ¿Jamakaʼa joo jüchajaaka tachiki soʼunnaa müliaa?». 8 «Shiajaʼa wantaka aalin tia süka müliain waya. Puʼunule wamaa jee pütkaale namaa na ammonitakana, pieechi nekiipüʼüka napüshuaʼa na wayuu kepiakana suluʼu tü mmakat Galaad», namakalaka na laülaashiikana nümüin Jefté. 9 «Jümaalejeʼeya taya süpüla atkawaa namaa na ammonitakana jee takanajüleʼeya naya süka nükaalinjain taya Jehová, tayeechijaʼamata jikiipüʼüka», nümakalaka Jefté namüin na laülaashiikana saaʼu tü mmakat Galaad. 10 «Naapajüitpa Jehová tü yootokolü achiki waya pümaa, kasalajaneetka wamüin nutuma nnojorüle wekeraajüin tü puchuntakat wamüin», namakalaka na laülaashiikana saaʼu tü mmakat Galaad nümüin Jefté. 11 Nuʼunakalaka Jefté namaa naya laülaashiikana, naneekaka nia süpüla nekiipüʼüinjachin nia jee süpüla shikiipüʼüinjachin nia surulaat. Chapa Jefté Mizpá, nüküjain süchikuaʼa tü nüküjakat paala nuʼupala Jehová namüin na laülaashiikana.

12 Nuluwataakalaka Jefté nünüiki nümüin chi laülaashikai saaʼu tü mmakat Ammón sünain maa: «¿Kasakai taainjalaka puulia süpüla püntajachin sünain ashutaa saaʼu toumain?». 13 Anuujeseʼe nünüiki chi aluwataashikai saaʼu tü mmakat Ammón namüin na nünüikeʼejanakana Jefté: «Soʼu nojuʼitüin na israelitakana Egiptojee naapaain süpüshi toumain, naapaain tü mmakat Arnón sünainmüin Jaboc sünainmüinreʼeya tü süchikat Jordán. Anasü piiteʼerüle neʼe tamüin tia mmakat», nümakalaka. 14 Nuluwataakalaka Jefté nünüiki nüchikuaʼa nümüin chi aluwataashikai saaʼu tü mmakat Ammón 15 sünain maa:

«Anuusa nünüiki Jefté pümüin: ‹Nnojoishiisa aapaain na israelitakana noumain na moabitakana jee noumain na ammonitakana. 16 Nojuʼitapa na israelitakana Egiptojee, alatüshii naya isashiipaʼapünaa sünainmüinreʼeya tü palaa ishosükat, nantakalaka suluʼumüin tü mmakat Cadés. 17 Naluwataakalaka nanüiki na israelitakana nümüin chi aluwataashikai saaʼu tü mmakat Edom sünain maa: «Puuʼulaa walataiwa süpaʼapünaa puumain», niyoutapejeʼe süchiki tia. Nachuntuinña tia na israelitakana nümüin chi aluwataashikai saaʼu tü mmakat Edom, niyoutapejeʼe süchiki nalatajanain süpaʼapünaa tia mmakat, müshiijeseʼe makatüin na israelitakana suluʼu tü mmakat Cadés. 18 Noʼunapa isashiipaʼapünaa, alatüshii naya süʼütpünaa tü mmakat Edom jee tü mmakat Moab, alatüshii naya wiinnaapünaa sünain tü mmakat Moab, noʼonooko suluʼumüin tü mmakat Arnón, nnojoliipejeʼe naya ekeroluin suluʼu tü mmakat Moab sutuma shiain Arnón süülein tü mmakat Moab.

19 »›Naluwataakalaka nanüiki na israelitakana nümüin Sehón, chi aluwataashikai naaʼu na amorreokana, chi aluwataakai saaʼu tü mmakat Hesbón sünain maa: «Puuʼulaa walataiwa süpaʼapünaa puumain süpüla wantajanain suluʼumüin tü mma eeʼewaliire waya». 20 Nüliraja aaʼinchii Sehón na israelitakana, nnojoliikalaka naya nülatirüin süpaʼapünaa nuumain, nuutkajeʼerüinjeseʼe napüshuaʼa na wayuu sulujunakana tia mmakat. Noutkajaakalaka napüla suluʼu tü mmakat Jáhaz jee nütkaakalaka namaa. 21 Naapünaka ekii Sehón namaʼaleeya napüshuaʼa na nümaajanakana namüin na israelitakana nutuma Jehová, chi Namaleiwasekai na israelitakana. Akanajuushii na amorreokana natuma, noumainkalaka tia mmakat. 22 Noumainkalaka tü noumainpuʼukat na amorreokana, noumainsü tü mmakat Arnón sünainmüin Jaboc otta isashiipaʼajee sünainmüinreʼeya tü süchikat Jordán.

23 »›Ajünajaanüshii na amorreokana napüleerua na israelitakana nutuma Jehová, chi Namaleiwasekai. ¿Püjünajaainjanakaʼa joo na israelitakana suluʼujee noumain? 24 ¿Nnojoleechijasa pia ichein süchiirua tü mma naapakat pümüin chi pümaleiwase kanüliakai Kemós? Icherejeʼeya pia süchiirua, icheenajaʼaya waya süchiirua tü mma naapakat wamüin Jehová, chi Wamaleiwasekai. 25 ¿Alanaʼaleesüche pukuwaʼipa nuulia Balac, chi nüchonkai Zipor, chi aluwataakai saaʼu tü mmakat Moab? Eetaayaai nütkaain jee nüʼülüjiraain chia wayuukai namaa na israelitakana. 26 Trescientos juya kepiaka oʼu na israelitakana suluʼu tü pueulokot Hesbón jee kepiaka oʼu naya pejepünaa sünain, suluʼu tü pueulokot Aroer jee kepiashii naya süʼütpünaʼaya jee suluʼupünaa süpüshuaʼa tü pueulo eekat süʼütpünaa tü luwopu kanüliakat Arnón. ¿Jamakaʼa nnojotka jusutatüjülüin tia mmakat woulia? 27 Nnojoishisa taya aaʼinrüin kasa mojusü pümüin, piapejeʼe aaʼinrüin kasa mojusü wamüin müshijeseʼe püntüin sünain ashutaa waaʼu. Anashi niale Jehová aküjain jaralin aküjain tü shiimainkat, nayale na israelitakana otta nayale na ammonitakana›».

28 Nnojotpejeʼe kasajatüin nümüin chi aluwataashikai saaʼu tü mmakat Ammón tü nümakat Jefté.

29 Naapakalaka Jehová tü nüpülainkat nümüin Jefté, nülataka tü mmakat Galaad otta tü mma noumainkat na nüikeyuukana Manasés süpüla nüntajachin suluʼumüin tü mmakat Mizpé chaa Galaad. Nuʼunakalaka yalejee süpüla nushutuinjachin naaʼu na ammonitakana.

30 Nüpansaajaka nünüiki Jefté nümüin Jehová sünain maa: «Takanajüle putuma na ammonitakana, 31 taapeechi pümüin chi wayuu ojuʼitakai tapanapa taleʼejapa tepialuʼumüin süchikijee takanajüin na ammonitakana, meechi toʼutakai naaʼin jee meechi taʼajakai naaʼin chia wayuukai pümüin Jehová».

32 Nuʼunakalaka Jefté sünain atkawaa namaa na ammonitakana, saapünaka nekii nümüin nutuma Jehová. 33 Nuʼuta aaʼinchii naya suluʼujee tü mmakat Aroer sünainmüin Minit otta sünainmüinreʼeya tü mmakat Abel-Keramim, piama shikii pueulo nushutaka aaʼu. Watta saalii wayuu outaka soʼu tia. Nayainnaka laülaain na israelitakana naaʼu na wayuu chajanakana suluʼu tü mmakat Ammón.

34 Nüleʼejapa Jefté chaa nipialuʼumüin suluʼumüin tü mmakat Mizpá süpanapajaka nia tü nüchonkat, ayonnajüsü shia sümaa sütalejüin tü kanüliakat «pandereta». Waneesia neʼe tia nüchonkat nümüin, nnojoishi nia kachooin tooloyuu jee jieyuu, shiaʼala neʼe nüchonkat sümüiwaʼa. 35 Shiasaʼa niʼraiwaʼaya Jefté tü nüchonkat, nüchatajaaka nüsheʼin jee nümakalaka: «Mojusü maʼin taaʼin tachonchee, jama wattainjatüin pia toulia. Taapüin tanüiki nümüin Jehová otta tekeraajüinjatü tia tamakat nümüin».

36 Anuujeseʼe sünüiki tü nüchonkat nümüin: «Taata* paapülejeʼeya pünüiki nümüin Jehová paaʼinra pümata taka tü püküjakalü achiki nümüin, jama nükaalinjain pia Jehová süpüla pükanajüinjanain na püʼünüükana, na ammonitakana». 37 «Tachuntuin neʼe pümüin wanee kasa, puuʼulaa toʼunaiwa soʼunnaa piama kashi chaa uuchoʼumüin, toʼunaiwa sünain aʼyalajaa namaa na taʼaleewainyuukana, süpülajatka joo kaʼwayuusee taya», sümakalaka nümüin chi süshikai.

38 «Anasüjaʼamata puʼunule», nümakalaka chi süshikai sümüin. Nuuʼulaaka suʼunuin soʼunnaa piama kashi, suʼunaka namaa na saʼaleewainyuukana saaʼumüin tü uuchikat süpüla shiʼyalajüinjatüin saalinjee maʼwayuuseinjatüin shia. 39 Sülatapa tü piamakat kashi süleʼejakalaka nipialuʼumüin chi süshikai. Nikeraajakalaka chi süshikai tü nüküjakalü achiki paala nümüin Maleiwa. Nnojotsü ainkaain shia nümaa wayuu toolo otta anuu tü aaʼinnawaikat süpüleerua tü nüchonkat Jefté chaa Israel: 40 Oʼunawaishii juyawai na majayünnüü chajanakana Israel sünain anaʼlawaa sümüin tü nüchonkat Jefté, chi chejeʼewaikai Galaad. Natütüleʼerawalin saaʼin, chaʼwaishii naya sümaa soʼunnaa pienchi kaʼi süpüla juyakat.