Génesis
40 Shiasaʼa mapa chi nekiipüʼükai na eʼikajüliikana nüsüin chi süʼlaülakai Egipto jee müshia chi nekiipüʼükai na aainjaliikana pan, aainjashii naya wanee kasa nnojotka anain nümüin chi nalaamainkai, chi süʼlaülakai Egipto. 2 Jashichikalaka maʼin faraón namüin na piamashiikana aʼyataalii, nümüin chi nekiipüʼükai na eʼikajüliikana nüsüin jee müshia nümüin chi nekiipüʼükai na aainjaliikana pan. 3 Nüpüreesajitka naya suluʼu tü kaatset chakat süʼütpaʼa nipia chi naʼlaülajanakai na surulaat aaʼinmajakana faraón, eejachire püreesain José. 4 Neʼitaanaka najapuluʼu José nutuma chi naʼlaülajanakai na surulaat aaʼinmajakana faraón süpüla nükaalinjainjanain naya, ayatakalakaʼaya naya püreesain maʼaka jeʼra kaʼi.
5 Soʼu püreesain chi eʼikajüikai nüsüin faraón nümaʼaleeya chi aainjaitkai pan, aʼlapüjaashii naya soʼuleʼeya wanee ai jee müsia eesü tü kayaawasekat tü naʼlapüinkat. 6 Waneemüin kaʼi nüntapa José sünain eʼrajawaa naya, niʼrüin naya sünain mojujain naaʼin. 7 «¿Jamüshii mojujakaʼa jaaʼin?», nümakalaka José namüin na aʼyataaliikana nümüin faraón püreesakana wanaa nümaa suluʼu tü kaatset chakat süʼütpaʼa nipia chi nülaamainkai José. 8 Anuukalaka nanüiki nümüin: «Aʼlapüjaashiireʼe waya waneʼewai wakua, nnojoipejeʼe eein wanee wayuu aküjainjachikai wamüin jamaluʼuluin tü waʼlapüinkat». Anuukalaka nünüiki José namüin: «¿Aashin niain Maleiwa atüjaakai saaʼu tü süʼlapüjaakalü amaa wayuu? Jüküja maa tamüin tü jüʼlapüjaakalü amaa».
9 Niasaʼa chi nekiipüʼükai na eʼikajüliikana nüsüin faraón, nüküjain nümüin José süchiki tü nüʼlapüjaakalü amaa, anuukalaka nünüiki: «Teʼrataalain taʼlapüinruʼu suuʼulia wanee uuwa tamülatuʼu. 10 Apünüinshii neʼe sütünacheein, wüittakalaka shia, kasiisü, kachonsü sümaa jakütüin maʼin tü süchonkot. 11 Eejattaa saaʼin tamaʼana tü niitainkat faraón, tü iita nüsiakat. Taapaaka tü uuwakat, tachüittiraka shia suluʼu tü niitainkat, taapa tamüsia shia nümüin faraón». 12 Anuukalaka nünüiki José nümüin: «Anuusa kayaawaseka tü püʼlapüinkat, apünüin kaʼi tü apünüinsükat sütünachein uuwa. 13 Soʼu apünüin kaʼi, ajütinneechi achiki pia nutuma faraón, aʼyataajeechi pia püchikuaʼa nümüin. Ayateechia pia eʼikajüin nüsüin faraón maʼakaapuʼu paaʼinrüin shia. 14 Sotuinjachipejeʼe taya paaʼin anapa pukuwaʼipa, pümülialaai maa taalin jee püküjaiwa maa tachiki nümüin faraón, niyuʼliraiwa taya yaajee. 15 Ataʼünnüshisa taya noumainpaʼajee na hebreokana jee nnojotsü kasain taainjalain yaʼayaa».
16 Naapapa chi nekiipüʼükai na aainjaliikana pan anain tü kayaawasekat tü lapükat naashin José, asoutushi nia nümüin sünain maa: «Aʼlapüjaashi tayaya, eejattaa apünüinsü kanaasüta taraloʼu kalujutka pan kasuusü. 17 Shiasaʼa suluʼu tü kanaasüta iipünaakat maʼin, naatayaa müsü tü pan suluʼukat niküinjatka chi faraónkai. Süntakalaka wüchii sünain jee shikajakala tü pan sulujutkat tü kanaasütakat». 18 Anuukalaka nünüiki José nümüin: «Anuusa kayaawaseka tü püʼlapüinkat, apünüin kaʼi tü apünüinsükat kanaasüta. 19 Soʼu apünüin kaʼi, nüshoʼttireerü pikii faraón, nükacherireechi pia sünain wanee wunuʼu, sajaʼtteetkalaka piʼiruku shiküin wüchii».
20 Apünüin kaʼi süchikijee tia, ekeraajüsü nuuyase faraón, eesüjeseʼe ekawaa nutuma napüla napüshuaʼa na aʼyataashiikana nümüin. Nüsaajirakalaka chi nekiipüʼükai na eʼikajüliikana nüsüin jee müshia chi nekiipüʼükai na aainjaliikana pan süpüla neʼrüinjanain naya na aʼyataashiikana nümüin. 21 Niiteʼerakalaka faraón nüchikuaʼa sünain aʼyatawaa chi nekiipüʼükai na eʼikajüliikana nüsüin, ayatakalaka nia sünain eʼikajaa nüsüin faraón. 22 Niaka nükacherirüin chi nekiipüʼükai na aainjaliikana pan maʼaka nüküjatüjülin José paala nümüin süchiki kasain kayaawasein tü nüʼlapüinkat. 23 Motopejeʼe José naaʼin chi nekiipüʼükai na eʼikajüliikana nüsüin faraón, eetaayaai jülüjain nia naaʼin.