Jueces
10 Eejachikalaka wanee wayuu nüchikumüin Abimélec, Tolá nünülia, nükaalinjain na israelitakana noulia na naʼünüükana. Nüchon Pua, Dodó nünülia chi nutuushikai, nülüin nia Isacar. Kepiashi Tolá suluʼu tü mmakat Samir, saaʼu tü uuchi eejanale kepiain na nüikeyuukana Efraín. 2 Nekiipüʼüshi nia na israelitakana soʼunnaa piama shikii apünüinmüin juya. Nünaajaaka mapa, niʼikünaka suluʼu tü mmakat Samir.
3 Niakalaka Jaír niiʼirakain Tolá, chejeʼewai nia suluʼujee tü mmakat Galaad. Nekiipüʼüshi nia na israelitakana soʼunnaa piama shikii piamamüin juya. 4 Apünüinshii nekii nüchonnii, kapüliiküseyaa müshii naya waneʼewai nakua jee koumainñaa müshii naya waneʼewai nakua. Ayatüsüjaʼa Havot-Jaír münüin tia noumainkat maaʼulu yaa. Chasü shia suluʼu tü mmakat Galaad. 5 Nünaajaaka Jaír jee niʼikünaka suluʼu tü mmakat Camón.
6 Naaʼinrakalaka nachikuaʼa na israelitakana tü kasa mojukat nümüin Jehová jee naʼwaajakalaka niyaakuairua chi maleiwayaashi kanüliakai Baal, naʼwaajüinña shiyaakuairua Astoret, naʼwaajüin namaleiwase na chajanakana Aram, naʼwaajüin namaleiwase na chajanakana Sidón, naʼwaajüin namaleiwase na chajanakana Moab, naʼwaajüin namaleiwase na ammonitakana otta namaleiwase na filisteokana. Akayalaashii naya nuulia Jehová otta ooʼulaashii naya suulia aʼyatawaa nümüin. 7 Jashichikalaka maʼin Jehová namüin na israelitakana sünainjee tü naaʼinrakat. Niyüülajaka naya napüla na filisteokana otta napüla na ammonitakana. 8 Müliashii maʼin na israelitakana natuma soʼunnaa juyakat tia. Poloo mekiisatmüin juya müliaka oʼu atumawaa na israelita kepiakana wüinpüjeeruʼu sünain tü süchikat Jordán. Tü noumainpuʼukat na amorreokana, tü chakat suluʼu tü mmakat Galaad. 9 Nalataka na ammonitakana tü süchikat Jordán süpüla natkaainjanain namaa na nüikeyuukana Judá, namaa na nüikeyuukana Benjamín otta namaa na nüikeyuukana Efraín. 10 Nachuntakalaka maʼin kaalinwaa na israelitakana nümüin Jehová: «Mojusiaʼaya maʼin tü kasa waainjakat, shiaʼala neʼe waʼwaajaka puulia niyaakuairua chi maleiwayaashi kanüliakai Baal, piapejeʼe Wamaleiwasein», namakalaka na israelitakana nümüin Maleiwa.
11 Anuujeseʼe nünüiki Jehová namüin na israelitakana: «¿Aashin tayayaain oʼtteʼerüin jia noulia na chejeʼewaliikana Egipto, noulia na amorreokana, noulia na ammonitakana otta noulia na filisteokana? 12 ¿Aashin tayayaain oʼtteʼerüin jia noulia na sidoniokana, noulia na amalequitakana otta noulia na madianitakana? Takaalinjain jia noulia naya wayuukana wanaa sümaa juchuntuin maʼin kaalinwaa tamüin. 13 Akayalaapejeʼe jia toulia jee naata na maleiwa juʼwaajakana toulia. Nnojoleena jia takaalinjain piantua. 14 Anasü shiale juchuntuin amüin kaalinwaa tü maleiwa juʼwaajakat, shieetkalaka akaalinjain jia soʼunnaa jiʼrüin müliaa». 15 Anuukalaka nanüiki na israelitakana nümüin Jehová: «Mojusiaʼaya tü kasa waainjakat, paainja tü paainjeekat waka. Pükaalinja waya uwatuayaakaijeʼe neʼe». 16 Nojunaaka na israelita shiyaakua tü maleiwa suʼwaajakat wayuu, niakalaka naʼwaajüin Jehová nüchikuaʼa. Sümülialaaka naaʼin Maleiwa naalin, jama müliain maʼin naya niʼrüin.
17 Naapinnaka na ammonitakana süpüla atkawaa, chajanaka naya jutkatüin suluʼu tü mmakat Galaad. Noutkajaaka na israelitakana chaa Mizpá süpüla atkawaa. 18 «¿Jaraleechi wekiipüʼüka süpüla atkawaa namaa na ammonitakana? Chi eekai nüneekünüin süpüla wekiipüʼüin nieechi laülaaka naaʼu na wayuu suluʼukana tü mmakat Galaad», namajiraayaa namaka na wayuukana namaa na laülaakana saaʼu tü mmakat Galaad.