Jueces

13 Naainjakalaka nachikuaʼa na israelitakana tü kasa mojukat nümüin Jehová, niyüülajüinjeseʼe naya Jehová napüla na filisteokana soʼu pienchi shikii juya.

2 Eejachikalaka soʼunnaa tia wanee wayuu kanüliashi Manóah, chejeʼewai nia suluʼu tü mmakat Zorá, nülüin nia Dan, wayuu marat tü nuʼwayuusekat. 3 Shiasaʼa soʼu wanee kaʼi niiʼiyalaakalaka chi aapiee nümaʼanajeejachikai Jehová sümüin nuʼwayuuse Manóah jee nümakalaka sümüin: «Ipuoleerü pia mayaainjeʼe maralüin pia otta toolochonjeechi püchon. 4 Piisalajüinjatpejeʼe pukuwaʼipa, nnojotsü pia asüinjatüin wiino, yootshi jee nnojotsü eküinjatüin pia wanee kasa yarüttaka noʼuluʼu Maleiwa. 5 Ipuoleerü pia otta jemeyuleerü pia nümaa wanee joʼuu toolo, nnojotsü aüjünajatüin nuʼwala, jama nüneekatüjülin nia Maleiwa süpülapünaa jemelin nia süpüla nazareoinjachin nia. Aneekünüshi nia süpüla niʼyataainjachin nümüin Maleiwa otta niainjachi oʼtteʼeraka na israelitakana noulia na filisteokana».

6 Anuukalaka sünüiki tia wayuukat nümüin chi suʼwayuusekai: «Antüshi tamaʼanamüin wanee wayuu nüjünalakai Maleiwa, müshi nia aka naaʼin wanee aapiee nümaʼanajeejachi Maleiwa, anasü maʼin niyolojo. Nnojoishi tasakirüin jalejeʼewalin nia jee nnojotsü nüküjain tamüin kasaichin nünülia. 7 ‹Ipuoleerü pia otta toolochonjeechi püchon, nnojotsü pia asüinjatüin wiino, yootshi jee nnojotsü eküinjatüin pia wanee kasa yarüttaka noʼuluʼu Maleiwa, jama nüneekatüjülin Maleiwa chi joʼuukai süpülapünaa jemelin nia süpüla nazareoinjachin nia outaleepaʼaya nia›», nümakalaka tamüin chia wayuukai.

8 Nuchuntakalaka maʼin Manóah nümüin Jehová sünain maa: «Jehovákalee, eesü wanee kasa tachunteeka pümüin. Anashi püjütüle nüchikuaʼa chi wayuu antakai paala sümaʼanamüin taʼwayuuse, nüküjeetkalaka wamüin jamüinjatüin nipijia watuma chi joʼuukai». 9 Naapakalaka Maleiwa nünüiki Manóah, nüjütüinjeseʼe sümaʼanamüin tü nuʼwayuusekat Manóah chi aapiee nüjütakai paala wanaa sümaa chajatüin shia joyotuin anuuipaʼa sünain tü pueulokot, nnojoipejeʼe eejachin Manóah sümaa. 10 Suwatiraleeja tia wayuukat sünain aapiraa chi suʼwayuusekai. «Isaa eeʼiyalaain nüchikuaʼa chi wayuu eeʼiyalaakai paala tamüin», sümakalaka nümüin.

11 Nuʼunakalaka Manóah sümaa tü nuʼwayuusekat eejachire chia wayuukai. «¿Pia chi wayuu yootushinkakai sümaa taʼwayuuse?», nümakalaka nümüin. «Tayaʼayan», nümakalaka chia wayuukai nümüin Manóah. 12 Anuujeseʼe nünüiki Manóah nümüin: «Kasataalejeseʼe shikeraajüin tü pümakat. Püküja maa wamüin jamüinjatüin nipijia watuma chi joʼuukai otta jamüinjatüin nukuwaʼipa miyoʼupeena nia». 13 Anuukalaka nünüiki chi aapiee nümaʼanajeejachikai Jehová nümüin Manóah: «Anasü saaʼinrüle tü puʼwayuusekat süpüshuaʼa tü taluwataakalü anain shia. 14 Nnojotsü shiküinjatüin wanee kasa aainjünaka süka uuwa, nnojoluinjatü asüin wiino, yootshi otta nnojoluinjatü shiküin wanee kasa yarüttaka noʼuluʼu Maleiwa. Saaʼinrüinjatü tü puʼwayuusekat süpüshuaʼa tü kasa taluwataakalü anain shia».

15 «Jiatta paala, waüjaainjachi wanee kaaʼulachon piyaaluʼu», nümakalaka Manóah nümüin chi aapiee nümaʼanajeejachikai Jehová. 16 Anuukalaka nünüiki chi aapiee nümaʼanajeejachikai Jehová nümüin Manóah: «Makatüle taya nnojoleerü teküin tü püʼlakajaainjatkat tayaaluʼu, eepejeʼe süpüla puʼutuin saaʼin jee paʼajüin shia nümüin Jehová». Nnojotsü nütüjaain aaʼu Manóah niain wanee aapiee nümaʼanajeejachikai Jehová chi wayuu antakai nümaʼanamüin. 17 «Püküja maa wamüin kasaichin pünülia süpüla kojutuinjachin pia watuma shikeraajapa tü pümakat», nümakalaka Manóah nümüin chi aapiee nümaʼanajeejachikai Jehová. 18 Anuujeseʼe nünüiki chi aapiee nümaʼanajeejachikai Jehová nümüin Manóah: «¿Jamüinjatü tanülia pümüin? Poneerü paaʼin taküjale shia pümüin».

19 Niʼitaakalaka Manóah saaʼu wanee ipa miyoʼu chi kaaʼulachon nuʼutakai aaʼin otta tü eküütkat,* naʼajakalaka shia nümüin Jehová. Naainjakalaka Maleiwa kasa pülasü nuʼupala Manóah otta suʼupala tü nuʼwayuusekat. 20 Sümaʼainruʼu chuwatüin maʼin tü sikikat, niʼraka Manóah sümaa tü nuʼwayuusekat niyaleraain chi aapiee nümaʼanajeejachikai Jehová saʼakapünaa tü suwaralakat siki. Nasapainkakalaka naya neʼraiwaʼaya tia. 21 Niʼraiwaʼaya tia Manóah niyaawatakalaka saaʼu niain wanee aapiee nümaʼanajeejachikai Jehová chi wayuu antakai nümaʼanamüin. Nnojoikalaka niiʼiyataain piantua chi aapiee nümaʼanajeejachikai Jehová nümüin Manóah otta sümüin tü nuʼwayuusekat. 22 «Outataainjaʼa joo waya, jama weʼrüichipain chi Maleiwakai», nümakalaka Manóah sümüin tü nuʼwayuusekat. 23 Anuujeseʼe sünüiki tü nuʼwayuusekat Manóah nümüin: «Nuʼuteerejeʼeya waaʼin Jehová nnojoishijeʼe naapaain chi kaaʼulachon woʼutakai aaʼin nümüin sümaa tü eküülü wasülajakat nümüin, nnojotsüje weʼrüin tü kasa pülasü niiʼiyatakat wamüin otta nnojotsüje nüküjain wamüin tü waaʼinrajatkat».

24 Jemeyutkalaka tü nuʼwayuusekat Manóah, Sansón nünülia chi joʼuukai sutuma. Anakalaka nukuwaʼipa chi joʼuukai nutuma Jehová sümaʼainruʼu nimiyoʼulaain. 25 Shiasaʼa mapa, naapakalaka Jehová tü nüpülainkat nümüin Sansón süpüla naaʼinrüinjatüin wanee kasa suluʼu tü mmakat Mahané-Dan, tü mma pasanainkat sünain Zorá otta Estaol.