Palajatka karaloʼuta Samuel
24 «Ichaa David ounjulaain eere tü isashii chakat suluʼu tü mmakat En-Guedí», nümünakalaka Saúl nülenapa süchikijee nuushikajaain nachiirua na filisteokana.
2 Nümaakalaka Saúl 3.000 surulaat atüjakana maʼin atkawaa naʼakajee na surulaat chajanakana Israel, nachajaakalaka nüchiki David namaa na nusurulaatsekana saaʼupünaa tü wutai süpüleekat tü kaaʼula uuchoʼujatkat. 3 Nüntakalaka Saúl eemüin wanee sukulaatse* anneerü sotpaʼajatka wopu, eejatü wanee koʼushii süʼütpaʼa tia kulaalakat. Nikerotkalaka Saúl süpüla nuunaʼapajüinjachin, chajachipejeʼe David namaa na nusurulaatsekana shiinaluʼu tia koʼushiikat. 4 Anuukalaka nanüiki na nusurulaatsekana nümüin David: «‹Taapa ekiichi pümüin chi püʼünüükai. Paaʼinra tü paaʼinreekat nüka›, müshisa Jehová pümüin soʼu kaʼikat tüü». Nuroloiraakalaka David nünainmüin Saúl, nuchotookoloko sot saajuna tü nüsheʼinkat* Saúl. 5 Mojukalaka maʼin naaʼin David sutuma nuchotooin tü sotkat saajuna nüsheʼin Saúl. 6 Anuujeseʼe nünüiki David namüin na nusurulaatsekana: «Nnojotsü süpüla taaʼinrajatüin tia nümüin chi laülaashikai, jama niain nüneeküin Jehová süpüla aluwatawaa, niyouteerü achiki Jehová toʼutüle naaʼin chi wayuu nüneekajalakai Jehová süpüla aluwatawaa». 7 Sükajee tü nümakat David namüin na nusurulaatsekana, nütaʼülakalaka nakuwaʼipa suulia jamajüin Saúl natuma. Nujuʼitakalaka Saúl suluʼujee tü koʼushiikat süchikijee ounaʼapajaa.
8 Nütamaaka David sümaa nujuʼituin suluʼujee tü koʼushiikat jee nuʼwaatakalaka nüchiiruajee Saúl sünain maa: «¡Laülaashikalee!». Niirakaapa Saúl nüchiiruajee niʼrakalaka David nüsapainkain mmoluʼu sümaa nejepülaain. 9 Anuujeseʼe nünüiki David nümüin Saúl: «‹Aaʼinreeshi kasa mojusü pümüin David›, eeshii na wayuu makana anüiki pümüin. ¿Jamüshi poonookaʼa sümaa nanüiki? 10 Naapa ekiichi pia tamüin Jehová soʼu chajachin pia suluʼu tü koʼushiikat. Nootuin taya na tasurulaatsekana süpüla toʼutüinjatüin paaʼin, amülialaapejeʼe taaʼin paalin, ‹nnojoleechi toʼutüin aaʼin chi laülaashikai, jama nüneekajalain nia Jehová süpüla aluwatawaa›, tamakalaka suluʼu taaʼin. 11 Taata, anuu tajapuluʼu saʼata tü püsheʼin tachotookat, toʼutüinje paaʼin wanaa sümaa tachotooin saʼata tü püsheʼinkat, nnojotpejeʼe taaʼinrüin tia. Pütüjaaitpa aaʼu nnojolin jamajeein pia tatuma jee nnojolin teʼreein wayumüin pümüin. Nnojoishi taya kaainjalain puulia, eekajasaʼa piakai, püchajaakuʼu püma achikichi taya süpüla puʼutajatüin taaʼin. 12 Anashi niale Jehová aküjain anale tü taaʼinrakat jee piale anain atuma wanee kasa. Anashi süsalale pia nutuma Jehová saaʼujee tü paaʼinrakat tamüin, nnojolinjachipejeʼe pia toʼutüin aaʼin. 13 ‹Naya aainjaka kasa mojusü na mojulaashiikana›, mataasü sümakai wanee pütchi. Müshijeseʼe nnojolinjachin tayain oʼutuin paaʼin. 14 ¿Jaraikai pütaʼüleeka amüin laülaashikalee? ¿Taya pütaʼüleeka amüin tayakai makai aka saaʼin wanee erü eekai outuin jee makai aka saaʼin wanee jayapa? 15 Anashi niale Jehová aküjain anale tü taaʼinrakat jee piale anain atuma wanee kasa. Jülüjeerü naaʼin tü kasa alatakat tamüin jee asouteechi nia taaʼu. Aneerü tü kasa naainjakat tapüleerua jee nükaalinjeechi taya puulia».
16 Anuujeseʼe nünüiki Saúl kettaapa nünüiki David: «David, ¿pia kanüikika tia tachonchee?». Niʼyalajakalaka maʼin Saúl. 17 Anuukalaka nünüiki Saúl nümüin David: «Lotoleesia pukuwaʼipa toulia jee kamaneeshi pia tamüin, eʼrapejeʼe neʼe pia müliaa tatuma. 18 Shiimaintaajaʼa kamaneein pia tamüin sükajee tü kasa paaʼinrakat tapüleerua. Anuʼusa nnojoluin puʼutuin taaʼin mayaainjeʼe naapüin Jehová tekii pümüin. 19 Nnojoishi eeichin wanee wayuu antiraakai nümaa nüʼünüü sümaa nnojoluin jamajüin nia nutuma. Kasataalejeseʼe anain pukuwaʼipa nutuma Jehová saaʼujee tü kasa paainjakat tapüleerua. 20 Pansaaitpa tekiiruʼu piainjachin aluwataain jee ayateechi piain aluwataain naaʼu na israelitakana. 21 Püpansaaja pünüiki tamüin nuʼupala Jehová nnojoleenain puʼutuin naaʼin na taikeyuukana outapeena taya. Nnojo paainjain wanee kasa namüin na kasayuukana tanain suulia motojuin taya saaʼin wayuu». 22 Nüpansaajakalaka nünüiki David nümüin Saúl. Süchikijee tia nuʼunakalaka Saúl nipialuʼumüin, eekajasaʼa David namaa na nusurulaatsekana oʼunushii naya eejanale nounjulaain.