Chiiruaajatka karaloʼuta Samuel
1 Outapa Saúl makatüshi David piama kaʼi suluʼu tü mmakat Ziclag, naaʼinrüin tia süchikijee nükanajüin na amalequitakana. 2 Soʼu tü apünüinkat kaʼi nüntakalaka wanee wayuu sejechikai naʼakajee na nusurulaatsekana Saúl, chatatuasü nüsheʼin jee mmasuasü nikiuuta. Pejepa nia nünain David nüsapainkaka nia jee nejepülaaka.
3 «¿Jalejeejachi pia?», nümakalaka David nümüin. «Aʼluwataashi taya naʼakajee na surulaat israelitakana», nümakalaka chia wayuukai nümüin David. 4 Anuukalaka nünüiki David nümüin: «Püküja maa tamüin kasain alatüin». Anuujeseʼe nünüiki chia wayuukai nümüin David: «Apantajaashii na surulaatkana napüleerua na filisteokana jee watta naalii na oʼutunakana aaʼin. Oʼutuna aaʼinchi Saúl otta oʼutuna aaʼinchi Jonatán, chi nüchonkai Saúl». 5 «¿Jamüsü pütüjaakaʼa saaʼu nuʼutunuin aaʼin Saúl nümaa Jonatán?», nümakalaka David nümüin chi jimaʼai eʼikajaakai tü pütchikat. 6 Anuujeseʼe nünüiki chi jimaʼaikai nümüin David: «Chajachi taya saaʼu tü namüna kanüliakat Guilboa soʼunnaa tia. Teʼrakalaka nüpüjüʼüyain Saúl tü lanza* nümaʼanajatkat, asaʼwajaanüshijeseʼe nia natuma na surulaat filisteokana süka tü neʼejena natkaayakat jee asaʼwajaanüshi nia natuma na amaajunakana. 7 Niʼrüinjeseʼe taya nujununtaapa, neenajaka taya: ‹Anii taya›, tamakalaka nümüin. 8 ‹¿Jarai pia?›, nümakalaka tamüin. ‹Nülüin taya Amalec›, tamakalaka nümüin. 9 Anuukalaka nünüiki tamüin: ‹Mayeinshi maʼin taya, katayütpejeʼeya toʼu, jalaichi puʼutai taaʼin›. 10 Arütkaashijeseʼe taya nünainmüin, toʼutaka naaʼin, jama tatüjaain saaʼu mayein maʼin nia sümaa nnojoleerüin katüin noʼu. Taakatüinjeseʼe tü coronakat suulia nikii jee taakatüinña nuulia tü kasa eejatkat sünain nütüna, anuukalaka tantirüin shia pümüin laülaashikalee».
11 Nüchatajaakalaka nüsheʼin David naapaiwaʼaya tia jee nachatajaayaa namaka nasheʼin na wayuu nümaajanakana. 12 Naʼwaataka, naʼyalajaka jee aliikaka naaʼu sünain aamajaa naalinjee Saúl, naalinjee Jonatán jee naalinjee na nüpüshikana Jehová süka wattain naalii na israelita oʼutunakana aaʼin soʼu tia süka chajaruuta.
13 Anuujeseʼe nünüiki David nümüin chi jimaʼai aküjakai tü pütchikat nümüin: «¿Jalejeʼewaisaʼa pia?». «Nüchon taya wanee wayuu nnojoikai israelitain, nülüin taya Amalec», nümakalaka chia jimaʼaikai nümüin David. 14 Anuujeseʼe nünüiki David nümüin: «Eʼrüikaiche pia wayumüin, ¿jamüshi puʼutakaʼa naaʼin chi wayuu nüneekakai Jehová süpüla aluwatawaa?». 15 Nuunejüinjeseʼe David wanee wayuu naʼakajee na nümaajanakana jee nümakalaka nümüin: «Jalaichi, puʼuta naaʼin», nuwataakalaka chia wayuukai nooʼomüin chi jimaʼaikai jee nuʼutakalaka naaʼin. 16 «Püchajaala pooʼomüin puʼutunuin aaʼin ‹taya oʼutaka naaʼin chi wayuu nüneekakai Jehová süpüla aluwatawaa›, mataashi pümakai», nümakalaka David nümüin chia jimaʼaikai.
17 Niiʼirajaka David naalin Saúl jee naalin Jonatán, niiʼirajüin tia jayeechikat süka mojuin maʼin naaʼin 18 jee nüküjainña David nekirajünüinjanain na wayuu chajanakana Judá sünain tia jayeechikat, «Jatü», münüsü tia jayeechikat, ashajünüsü shia suluʼu tü karaloʼuta kanüliakat Jasar jee müsü shia:
19 «Jaapaja teʼirain jia wayuu israelitakana, oʼuwoʼutshii na wayuu kojutukana sümüin wayuu, oʼutuna aaʼinchii naya saaʼu tü uuchi eekat juumainpaʼa.
Anashii jaapajüle süchiki tü aaʼinnakat namüin na wayuu yalayalakana aaʼin sünain atkawaa süpüla noʼutunajanain aaʼin.
20 Anasü nnojorüle süküjünüin tia suluʼupünaa tü mmakat Gat,
anasü nnojorüle süküjünüin suluʼupünaa tü kaaye chakat suluʼu tü mmakat Asquelón suulia talatüin naaʼin na jieyuu nachooinkana na filisteokana
jee suulia naʼwaataain suluʼu na jieyuu nachooinkana na wayuu manoujainkana nünain Maleiwa.
21 Jülüja paaʼin tanüiki pia namüna chakat Guilboa,
anasü nnojorüle eein joojotshi paaʼu jee anasü nnojorüle süʼitüin juya paaʼu.
Anasü nnojorüle kachooin tü aʼttiee apünajünakat paaʼu.
Ojutuusü saaʼu tü mmakat tü escudo namaʼanajatkat na wayuu yalayalakana aaʼin sünain atkawaa, yarüttaka shia.
Nnojoluitpa jaralin alaʼajüin süka seita tü escudo nümaʼanapüʼükat Saúl.
22 Matüjainpuʼusai oʼtchejaa Jonatán wanee kasa süka tü najatüinkat
jee akanajapuʼushi Saúl süka tü chajaruuta nümaʼanapuʼukat.
Watta naalii na naʼünüü noʼutapuʼukana aaʼin süka chajaruuta jee süka jatü, alanaʼaleesia shia süchikumüin naüsü na naʼünüükana.
23 Aipuʼushi maʼin apülaa Saúl nümaa Jonatán kataiwaʼaya noʼu, anasü nashoʼu sümüin wayuu.
Eetaayaai nakatajiraain outapa naya,
kawanüleshii maʼin naya suulia tü wüchii kanüliakat águila
jee katchinshii maʼin naya suulia león.
24 Jülüja jaaʼin tanüiki jia jieyuu israelitakana, jiʼyalaja naalin Saúl.
Nüsülaja asheʼinchii jia kuluulu ishokot maʼin, anasü maʼin sünoʼu jüsheʼin nutuma,
aainjuushi süka ooro.
25 Outushii na wayuu yalayalakana aaʼin sünain atkawaa,
outushi Jonatán saaʼu tü uuchi eekat puumainpaʼa.
26 Mojusü maʼin taaʼin püchiirua waʼle,
aipuʼushi maʼin pia tapüla Jonatán,
alanaʼaleesia tü taalinkat püpüla suulialeʼeya tü taalinkat süpüla jieyuu.
27 Oʼutuna aaʼinchii na wayuu yalayalakana aaʼin sünain atkawaa,
ajaʼttinnüsü tü kasa atkaayakat».