Palajatka karaloʼuta Samuel
26 Mapa maʼin noʼunakalaka na wayuu chajanakana suluʼu tü mmakat Zif suluʼumüin tü mmakat Guibeá. Anuukalaka nanüiki nümüin Saúl: «Ichaasa ounjulaain David saaʼu tü namüna chakat Hakilá shiʼipoʼujee tü mmakat Jesimón». 2 Nuʼunakalaka Saúl sünain achajawaa nüchiki David süpaʼamüin tü isashii chajatkat Zif, oʼunushi nia namaa 3.000 surulaat atüjakana maʼin atkawaa naʼakajee na surulaat chajanakana Israel. 3 Noʼonookoloko Saúl sotpaʼa wanee wopu saaʼu tü namüna chakat Hakilá, shiʼipoʼujee tü mmakat Jesimón. Naapakalaka süchiki David nüchajaanüin achiki nutuma Saúl, chajachi David kepiain isashiipaʼa. 4 Nüjütüinjeseʼe David waneinnua wayuu süpüla nütüjaainjatüin saaʼu shiimainrejeʼeya nüchajaanüin achiki nutuma Saúl. 5 Nuʼunakalaka David eejachire noʼonooin Saúl, niʼrakalaka eejachire nutunkuin Saúl otta eejachire nutunkuin Abner, chi nüchonkai Ner. Abner nekiipüʼü na nusurulaatsekana Saúl. Atunkushi Saúl pasanain nanain na nusurulaatsekana. 6 Anuujeseʼe nünüiki David nümüin Ahimélec, chi hititakai otta nümüin Abisái chi süchonkai Zeruyá, Abisái nuwala Joab: «¿Jara oʼuneeka tamaa sünain anaʼlawaa eere noʼonooin Saúl?». «Tayeechi oʼunaka pümaa», nümakalaka Abisái nümüin David. 7 Nüntakalaka David nümaa Abisái saʼwai naʼakamüin na nusurulaatsekana Saúl. Neʼraka Saúl sümaa nutunkuin maʼin, ju’ttusü sünain tü mmakat tü nülanzainkat Saúl, süʼütpaʼa nikii. Pasanainshi Saúl nünain Abner jee nanain na nusurulaatsekana.
8 Anuujeseʼe nünüiki Abisái nümüin David: «Naapüin pümüin Maleiwa nikii chi püʼünüükai soʼu kaʼikat tüü. Puuʼulaa tatkaiwa nia süka tü lanzakat, juʼttaleejeeria shia sünain tü mmakat, nnojoleechi choʼujaain talakaain nia». 9 Anuujeseʼe nünüiki David nümüin Abisái: «Nnojo paainjain kasa mojusü nümüin. Kaainjaleechi wanee wayuu naaʼinrüle kasa mojusü nümüin chi nüneekajalakai Jehová süpüla aluwatawaa». 10 Anuujeseʼe sooʼomüin nünüiki David: «Oʼutuneechi aaʼin Saúl nutuma Jehová. Eeshi outeechire nia soʼu wanee kaʼi maʼaka outuin wayuu süpüshuaʼa jee nuʼutuneechire aaʼin sünain wanee atkawaa. Shiimain maʼin tia taküjakat pümüin nuʼupala Jehová, chi matüjainkai outaa. 11 Nnojorüleejaʼa süpüla taaʼinrajatüin wanee kasa mojusü nümüin chi wayuu nüneekajalakai Jehová süpüla aluwatawaa, niyouteerü achiki tia Jehová. Jooʼuya, anasü shiale neʼe paapaain türa lanza süʼütpaʼaka nikii Saúl jee pülüʼüjaleeya türa jaara kaluʼuka wüin». 12 Naapaainjeseʼe David tü lanzakat jee tü jaara kalujutkat wüin süʼütpaʼajatka nikii Saúl, oʼunushiijeseʼe naya süchikijee tia. Eetaayaai jaralüin eʼrüin naya, jama natunkajüin maʼin na surulaatkana. Nnojoishii naya achijiraain, jama kaʼlein maʼin lapü naaʼu nutuma Jehová. 13 Nülataka David waneemüin saʼata tü nasapüshiikat jee nüshaʼwalaakalaka süraloʼu wanee uuchi, watta nuulia Saúl.
14 Nuʼwaatakalaka David namüin na nusurulaatsekana Saúl jee nümüin Abner, chi nüchonkai Ner, anuu nünüiki nümüin: «Abnerwaa». Anuujeseʼe nünüiki Abner nümüin David: «¿Jaraikai maʼin pia puʼwoolojokuʼu pümakaʼa nümüin chi laülaashikai?». 15 Anuujeseʼe nünüiki David nümüin Abner: «Nnojoishi eein wanee wayuu naʼaka na israelitakana makai aka paaʼin. ‹Wayuu yalayala aaʼinchi›, mataashi pümünakai. ¿Jamakaʼa nnojoika jülüjain paaʼin chi laülaashikai? Antüshisa saʼwaitpa wanee surulaat nünainmüin Saúl süpüla nuʼutajatüin naaʼin. 16 Nnojoishi jülüjain paaʼin chi laülaashikai, anashii juʼutunule aaʼin saaʼujee tia, jama nnojoluin jülüjain jaaʼin chi jüseñotsekai, chi nüneekajalakai Jehová süpüla aluwatawaa. Shiimain maʼin tanüiki pümüin nuʼupala Jehová chi matüjainkai outaa. ¿Jalapaʼa joo piʼrüin tü nülanzainkat chi laülaashikai jee tü jaara kaluʼukat wüin?».
17 Anuujeseʼe nünüiki Saúl niyaawatapa saaʼu niain aashajaain David: «David, ¿pia kanüikika tia tachonchee?». Anuujeseʼe nünüiki David nümüin Saúl: «Aa, tayaʼayan laülaashikalee». 18 Anuujeseʼe sooʼomüin nünüiki David: «¿Jamüshi püchajaakuʼu pümakaʼa tachiki laülaashikalee? ¿Kasakai taainjalaka puulia? 19 Laülaashikalee, jülüja paaʼin tanüiki tayakai chi püchepchiakai. Niale Jehová kaluwanaajalain pia süpüla peʼipaainjachin pia tamaa, anasüjaʼamata naapaai tü eküülü tasülajüinjatkat nümüin. Eekajasaʼa suluwanaajalale pia wayuu süpüla peʼipaainjachin pia tamaa, kasataalejeseʼe sülatüin kasa mojusü namüin nutuma Jehová. Nakatalüin taya noulia na nüpüshikana* Jehová, ‹puʼuna puʼwaajai maleiwayaasü› müshii namakai aaʼin tamüin sükajee tia. 20 Nnojo puuʼulaain toʼutunuin aaʼin watta suulia eere nuʼwaajünüin Jehová. Laülaashikalee, püchajaa achikichi taya eereje müin taya maʼaka saaʼin wanee jayapa, müshijaʼa pulojokoi taaʼin maʼaka pulojuin tü peet chakat uuchoʼu».
21 Anuujeseʼe nünüiki Saúl nümüin David: «Kaainjalashi taya puulia, David, tachonchee, anashi puʼunule tamaa. Nnojoleerü taainjain pümüin wanee kasa eekai mojuin, jama nnojoluin jamajüin taya putuma soʼu kaʼikat tüü. Malataʼaleeshijaʼa maʼin taya makaʼa taainjala pümüin». 22 Anuujeseʼe nünüiki David nümüin Saúl: «Laülaashikalee, anuu tü pülanzainkat, püsaajirapan. 23 Eʼreechi kasa anasü nutuma Jehová chi wayuu lotokoi akuwaʼipa jee chi waneepiakai nümaa. Mayaainjeʼe naapüin Jehová pikii tamüin soʼu kaʼikat tüü, nnojoishi pia jamajüin tatuma süka nüneeküin pia Jehová süpüla aluwatawaa. 24 Nnojoishi toʼutuin aaʼin pia soʼu kaʼikat tüü. Kasataalejeseʼe jülüjain taya naaʼin Jehová jee kasataalejeseʼe nükaalinjain taya suulia teʼrüin müliaa». 25 Anuujeseʼe nünüiki Saúl nümüin David: «David, tachonchee, kasataalejeseʼe anain pukuwaʼipa nutuma Maleiwa. Watteerü saalii tü kasa puuntakat jee aneerü sukuwaʼipa putuma». Nuʼunakalaka David nuulia Saúl, eekajasaʼa Saúl oʼunushi nipialuʼumüin.