Palajatka karaloʼuta namüinjatka na chajanakana Corinto
4 Sütüjaainjatü aaʼu wayuu waʼyataain niʼipajee Cristo jee eʼitaanüsü wajapuluʼu tü nütüjaakalü aaʼu Maleiwa. 2 Waneepiainjachikalaka wanee wayuu sünain tü aʼyatawaa eʼitaanakat najapuluʼu nutuma chi nülaamainkai. 3 Nnojotsü kasajatüin tamüin süsalale taya taainjala jutuma jee tamaanüle laülaapialuʼumüin süpüla süsalainjachin taya taainjala atumawaa. Jaʼitakajeʼe neʼe taya, nnojoiyüiya asakireʼerüin taaʼin süchiki anale jee mojule wanee kasa tatuma. 4 Wulesü taaʼin,* nnojotpejeʼe lotowalain takuwaʼipa suluʼujee tia. Nia Jehová* süsalaka atuma taya taainjala. 5 Nnojo süsalain saainjala wayuu jutuma süpülapünaa tü kaʼi aneekünakat süpüla tia. Nüntapeena chi Señotkai Jesús, meerü warattuuikai saaʼin nutuma saaʼu tü kasa kojokalü aaʼu piʼyuushi. Sütüjaaneetkalaka aaʼu nutuma kasain eein suluʼu saaʼin wayuu. Kojuteena nutuma Maleiwa naya wayuukana wanaapünaa sümaa tü naainjakat.
6 Tawalayuwaa, aashajaashi taya süchiki takuwaʼipa otta süchiki nukuwaʼipa Apolos süpüla jiyaawatüin saaʼu tü wekirajeekalü anain jia. Anuu tü wekirajeekalü anain jia: «Nnojo jaainjain wanee kasa naata suulia tü kasa ashajünakat suluʼu tü Karaloʼuta Nüchikimaajatkat Maleiwa». Nnojoleerü yaletüin jaaʼin jaainjale tia jee wanaaweerü sujutu wayuu jümüin. 7 ¿Kasa naataka aluʼu pukuwaʼipa noulia na waneinnua? Aapünüsü pümüin kasa süpüshuaʼa. Naapülejeʼeya Maleiwa pümüin kasa süpüshuaʼa, ¿jamakaʼa puʼwaataaka suluʼu sümaa nnojoluin pükajeejatüin shia?
8 ¿Nnojoluitpache kasain choʼujaain jümüin jüküjainruʼu? ¿Washinnuuinnapache jia? ¿Aluwataainjanache jia jaaʼinruʼu jümüiwaʼa sümaa nnojoliin eein waya jaʼaka? Kasataalejeseʼe juʼttuin sünain aluwatawaa, aluwataashiije waya wanaa jümaa. 9 Saaʼin tamüin waya aluwataaushikana, chiiruaashii waya nutuma Maleiwa süpüla shiʼrajüinjatüin wakua wayuu süpüshuaʼa, jama outajanain waya. Shiʼrajeerü wakua wayuu jee neʼrajeerü wakua na aapieekana. 10 Nnojoishii kasain anain apüla waya jaajüin, kekiipejeʼe jia jüküjainruʼu nünainjee Cristo. Wayuu matchin aaʼinchii waya jüküjainruʼu, katchinpejeʼe jia. Kojutushii jia atumawaa jaajüin, eekajaʼa wayakana mojutusalii atumawaa. 11 Maaʼulu yaa, alatitshii waya jamü, wüinñaasüshii waya jee nnojotsü wainmain maʼin washeʼin. Aʼyaajünüshii waya jee mepiasalii waya. 12 Aʼyataalii maʼin waya. Airuʼurule pütchi wamüin, kamaneeshii waya, müliapa waya atumawaa, achechetshii waya waaʼin. 13 Süküjünapa alawaa wachiki, anasü wanüiki shiʼipajee wayuu. Müshii waya maʼaka saaʼin wasuura sümüin wayuu maaʼutpünaa, müshii waya maʼaka saaʼin tü shiʼyarülakat mma.
14 Nnojotsü tashajüin jümüin tüü süpüla taapülijüinjanain jia, tashajüin shia jümüin süpüla tachiaainjanain jia süka anaka akuwaʼipa, jama jiain na tachonnii aikana maʼin tapüla. 15 Jaʼitashii eein 10.000 wayuu ekirajakana jia süpüla juushikajaainjanain süchiirua nukuwaʼipa Cristo, waneeshia neʼe jüshi, taya tayakai nükajee Cristo Jesús, jama taküjain jümüin tü pütchi anakat maʼin.* 16 Tachuntuin maʼin jümüin jüshatüinjatüin takuwaʼipa. 17 Anii jooluʼu taluwataain jümüin Timoteo, chi tachon aishikai maʼin tapüla jee waneepiakai nümaa chi Señotkai. Nüsoʼireerü jaaʼin sünain tü taaʼinrapuʼukat süpüla jaaʼinrüinjatüin tü nüchekakat Cristo Jesús. Nüsoʼireerü jaaʼin sünain tü tekirajakat naʼakapünaa na anoujashiikana sainküinpünaa mmakat.
18 Naashin waneinnua wayuu jaʼakajee, nnojolinjachi taya oʼunuin jaʼakamüin, müsüjeseʼe yaletüin naaʼin. 19 Chamaateechi taya jümaʼanamüin shialejeʼeya nücheküin Jehová* tapüleerua tia. Tatüjaajeetkalaka saaʼu shiimainrejeʼeya tü naʼwaataakalü aluʼu naya wayuukana naashajaapa. 20 ¿Kasa wayaawataka akajee woonooin sümaa nünüiki Maleiwa saaʼu niaichipain aluwataain waaʼu? Nnojotsü ayaawatünüin aaʼu sükajee tü kasa waküjakat neʼe, ayaawatüna aaʼulu sükajee tü kasa waaʼinrakat, sütüjaanakalaka aaʼu naapüin Maleiwa tü nüpülainkat wamüin. 21 ¿Kasajaʼa jüchekaka? ¿Shiache jüchekaka toʼunuinjachin jümaʼanamüin sümaa süsalainjanain jia jaainjala tatuma? ¿Shiataapa jücheküin alinjanain jia tapüla jee kamaneeinjachin taya jümüin?