Karaloʼuta nüshajalaka Santiago
3 Tawalayuwaa, nnojoishii ekirajüliinjanain jia jüpüshuaʼa, jama jülüjeerüin naaʼin Maleiwa anale watuma shikirajia wayuu otta nüsakireena waya süchiirua tia. 2 Wainmatuairü waaʼinrüin wanee kasa eekai mojuin, nnojotsü uwatuain neʼe. Chi wayuu nnojoikai ojuʼitirüin wanee pütchi eeka mojuluʼuluin, wayuu loto akuwaʼipachi nia jee nuuntuin nüchecherüin naaʼin. 3 Juleenaluʼupa watuma wanee ama süpüla jüüjüüin nia wamüin, woʼunirüin nia eepünaweere nia watuma. 4 Jülüjataa waaʼin wanee anuwa, mayaainjeʼe miyoʼuin maʼin shia jee suʼuninnüin sutuma joutai eekai katchin maʼin, joʼuuchon maʼin tü ojununtia apalaitakat shia jee nuʼunirüin shia chi süpüʼüyakai eepünaweere shia nutuma.
5 Akaʼaya tü wayeekat, mayaainjeʼe joʼuuchoin maʼin shia aʼwaataashi wanee wayuu sutuma. Jamüsüjaʼa wanee sikoʼuchon ajaʼttaleesia wunuʼulia wattapünaa sutuma. 6 Tü wayeekat müsü aka saaʼin wanee sikoʼu, nnojotsü anain nukuwaʼipa wanee wayuu sutuma jee yarüttüsü nukuwaʼipa sutuma. Eesü süpüla mojuʼleeinña maʼin nukuwaʼipa wayuu sutuma jee tü wayeekat müsü aka saaʼin tü Gehenakat süka sajaʼttaleeinña wanee kasa sutuma. 7 Sümaüsijain wayuu tü wüchii eekai jashichin, tü eekai lemütüin, tü eekai waawatüin iipünaapünaa jee tü eekai seʼein palaa. Sümaüsijain wayuu süpüshuaʼa tia. 8 Nnojoipejeʼe eein wanee wayuu eekai amaüsijain tü niyeekat. Isasü nüchiki nütaʼülüin sukuwaʼipa otta eesü kasa mojusü sutuma, müsüjaʼaya eekai saaʼin weneena sünain. 9 Süka tü wayeekat waʼwaajüin Jehová* chi Washikai, woʼulejapejeʼe wayuu süka eerejeʼe müin sukuwaʼipa wayuu «maʼaka nukuwaʼipa chi Maleiwakai». 10 Waʼwaajüin chi Maleiwakai süka wanüiki, woʼulejapejeʼe wayuu süka.
Tawalayuwaa, nnojotsü anain waainjale tia. 11 Jamüsüjaʼa chaa eejeere süparalüin tü wüinkat, nnojotsü süpüla sujuʼitüinjatüin wüin eekai jemetüin jee wüin eekai ishin, ¿aashi müin? 12 Tawalayuwaa, nnojotsü süpüla kachooinjatüin «aceituna» tü wunuʼu kanüliakat higuera otta tü suuʼuliakalü uuwa nnojotsü süpüla kachooin shia higo, ¿aashi müin? Akaataajaʼa neʼe sünainjee wüin eekai palaain, nnojotsü süpüla sujuʼitajatüin wüin eekai jemetüin.
13 ¿Eeshi wanee wayuu eekai kekiin jaʼaka? Mülejeʼeya nia jaʼyainjatü naaʼu anain nukuwaʼipa jee anamiain nia sünain aaʼinraa kasa süpüshuaʼa, jama kekiin nia. 14 Juchunjiraale suluʼu jaaʼin jee shiale keeʼireein jaaʼin jütkaajiraakuʼu jümüin, anakajaʼa nnojoliire juʼwaataain suluʼu kekiin maʼin jia, jaaʼinrüle tia, aküjashiijaʼamata jia jaʼalain. 15 Tia kekiwaakat nnojotsü iipünaajeejatüin, namaʼanajeejatü neʼe na wayuu manoujainkana, na aaʼinrakana tü suchuntaakat neʼe neʼiruku jee sümaʼanajeejatü shia tü yolujaakalüirua. 16 Eere achunjirawaa jee shiale neʼe keeʼireein saaʼin wayuu sütkaajiraakuʼu sümüin, meerü jamakai saaʼin wayuu jee watteerü saalii kasa eekai mojuin.
17 Tü kekiwaa iipünaajeejatkat wulesü nukuwaʼipa wayuu sutuma, anamiashi, nnojoishi ichein süchiirua nünüiki, oonooshi nia sümaa tü aluwataanakalü anain nia, amüliajüi maʼin, nnojotsü kojutaʼatain wayuu nümüin jee nnojotsü piamain nuʼupünaa, wayuu laülaa aaʼinchi nia jee naaʼinrüin tü kasa eekai anain. 18 Na wayuu nnojoliikana mojujiraain sümaa wayuu, eesü anajirawaa natuma jee suluʼujee tia naaʼinrüin tü kasa eekai lotuin akuwaʼipa.