Palajatka karaloʼuta Samuel

14 Anuujeseʼe nünüiki Jonatán soʼu wanee kaʼi nümüin chi wayuu alüʼüjawaikai tü nütkaayakat: «Anashii woʼunule eere jutkatüin na filisteokana». Nnojotpejeʼe nüküjain Jonatán süchiki tia nümüin chi nüshikai. 2 Chajachi Saúl anooipaʼa sünain tü pueulokot Guibeá, chajachi nia suupünaa tü suuʼuliakat granada, tü chakat suluʼu tü mmakat Migrón. Eejana 600 surulaat nümaa. 3 Nünainjatü Ahíya tü kuluulu kanüliakat efod. Ahíya nüchon Ahitub, Ahitub nuwala Icabod, Icabod nüchon Finehás, Finehás nüchon Elí, chi sacerdote aʼyataakai nümüin Jehová chaa Siló. Nnojotpejeʼe natüjaain saaʼu na surulaat israelitakana nuʼunuin Jonatán namaʼanajee. 4 Tü wopu nülatakalü aluʼupünaa Jonatán, alatüsü pasanainpünaa sünain piamasü ipa miyoʼuyuu, müsü aka saaʼin sai wayuu tia ipakat. Bozez sünülia wanee otta Sené sünülia tü wane. Oʼunushi Jonatán suluʼupünaa tia wopukot süpüla nüntajachin eere jutkatüin na filisteokana. 5 Müsü aka saaʼin wanee suuʼui miichi tü ipa chajatkat palaajee, shiʼipoʼujeesü tü mmakat Micmash. Shiasaʼa tü wane ipakat uuchijeeruʼusü, shiʼipoʼujee tü mmakat Gueba.

6 Anuujeseʼe nünüiki Jonatán nümüin chi wayuu alüʼüjawaikai tü nütkaayakat: «Anashii woʼunule eere jutkatüin na filisteokana. Nükaalinjeena waya Jehová, wakanajeenajeʼeya na waʼünüükana, nnojoleerü eein wanee kasa ataʼülaka nukuwaʼipa Jehová suulia nükaalinjain waya, jaʼitashii wainmain waya jee paliʼirülejeʼeya waya». 7 Anuujeseʼe nünüiki chi wayuu alüʼüjawaikai tü nütkaayakat Jonatán: «Anashi paaʼinrüle tü suchuntaakat paaʼin. Oʼuneechi taya pümaa jalapünaale puʼunuin». 8 Anuujeseʼe nünüiki Jonatán nümüin: «Anashii woʼunule eemüin na filisteokana, neʼreenaka waya. 9 ‹Yalashiʼiya jia wapüla›, namüle wamüin, jimateena neʼe waya, nnojoleenaka woʼunuin nanainmüin. 10 Eekajasaʼa ‹jalainna jütkaaiwa wamaa›, namüle wamüin, oʼuneena waya nanainmüin. Wayaawateetkalaka sükajee tia naapüneenain ekii wamüin nutuma Jehová».

11 Eʼnnüshiijeseʼe naya piamaleʼeya natuma na surulaat filisteokana. Anuukalaka nanüiki naya surulaatkana: «Jiʼrayaainchejeʼe, ojuʼinnuwaainnapa na wayuu hebreokana suluʼujee tü koʼushii eejanale nounjulaain». 12 Anuujeseʼe nanüiki na surulaat filisteokana nümüin Jonatán jee nümüin chi wayuu alüʼüjakai tü nütkaayakat: «Jalainna yaamüin jiʼreetka joʼukajatü watuma». Anuujeseʼe nünüiki Jonatán nümüin chi wayuu alüʼüjawaikai tü nütkaayakat: «Jooʼuya, aapünajana ekii wayuukana naainnua nutuma Jehová namüin na israelitakana». 13 Nulemujakalaka Jonatán sooʼopünaa tü ipakat nümaʼaleeya chi wayuu nümaajachikai. Nuʼutapünaʼawai aaʼinchii Jonatán na filisteokana, naʼlakaanawaika nutuma chi wayuu nümaajachikai. 14 Eeshii maʼaka naaʼin piama nekii wayuu nuʼutakana aaʼin Jonatán nümaa chi wayuu eejachikai nümaa nashutapa naaʼu na filisteokana. Noʼuta aaʼinchii na surulaatkana mamüin aka saaʼin tia.

15 Neimmolojooyoo namaka na surulaat yalajanakana jutkatüin eejanale noutkajaain na filisteokana. Eimmolojooshii na surulaat chajanakana sooʼopünaa tü ipakat otta eimmolojooshiʼiya na surulaat apünüinkana eʼipapaʼa, ojuʼitakana naʼakajee na filisteokana. Sukutkujaaka tü mmakat, mmotkalaka maʼin na surulaat filisteokana nutuma Maleiwa. 16 Nüneeküin Saúl waneinnua wayuu süpüla nanajüinjanain naaʼu na naʼünüükana, chajana naya wayuukana suluʼu tü mmakat Guibeá, tü noumainkat na nüikeyuukana Benjamín. Neʼrüinjeseʼe naya wayuukana müin jalapaʼakai naaʼin na filisteokana.

17 Anuujeseʼe nünüiki Saúl namüin na surulaat eejanakana nümaa: «Anashii jeenajüle waneʼewai nakua na surulaatkana süpüla watüjaain saaʼu jaralin choʼujaain waʼaka». Niakalaka nnojoluin eejachin Jonatán nümaʼaleeya chi wayuu alüʼüjawaikai tü kasa nütkaayakat. 18 Anuukalaka nünüiki Saúl nümüin Ahíya: «Anasü püntirüle tü kojon shiyaawasekat süpansaajünüin pütchi nümaa chi shiimainshikai suluʼu Maleiwain». Soʼu kaʼikat tia chajatü namaʼana na israelitakana tia kojonkot. 19 Sümaʼainruʼu yootuin Saúl nümaa chi sacerdotekai, maaʼatshii jalapaʼakai naaʼin na filisteokana. «Nnojo paaʼinrüin tü tamayütkat pümüin», nümakalaka Saúl nümüin chi sacerdotekai. 20 Nuʼunakalaka Saúl namaa na surulaat nümaajanakana sünain ashutaa naaʼu na filisteokana. Neʼrakalaka nasoniraain na filisteokana süka chajaruuta, maaʼatshii jamakai naaʼin. 21 Nayasaʼa na wayuu hebreo alataakana paala naʼakamüin na filisteokana sünain ashutaa naaʼu na israelitakana, alataashii joo nachikuaʼa naʼakamüin Saúl otta naʼakamüin Jonatán. 22 Nojuʼinuwaayaa namaka na israelita ounjulaakana saaʼu tü uuchi eejanale kepiain na nüikeyuukana Efraín, naapaiwaʼaya süchiki napantajaain na filisteokana napüleerua na israelitakana. Noʼunakalaka sünain atkawaa jee neipirakalaka na filisteokana. 23 Akaalinjünüshii na israelitakana soʼu kaʼikat tia nutuma Jehová. Wattakuwaishii na israelitakana sünain atkawaa, oʼotoleeshiʼiya naya suluʼumüin tü mmakat Bet-Aven.

24 Mapüsajüshii maʼin na israelitakana soʼu kaʼikat tia, jama nüpansaajüin Saúl wanee pütchi sünain maa: «Alateerü kasa mojusü nümüin chi wayuu ekakai wanee kasa süpülapünaa takanajüin na taʼünüükana, ekaleeinjachia nia aipaʼa». Nnojoika eein wanee wayuu ekakai süpülapünaa tia.

25 Eejatkalaka palatüin mapa napüla na surulaat israelitakana nekerotopa saʼakamüin tü mojuuikat. 26 Mayaainjeʼe neʼrüin shottuin tü mapakat, nnojoishi jaralin ooʼulaküin seʼejü saaʼujee tü pütchi nüpansaajakat paala Saúl noʼupala. 27 Nnojoishi eejachin Jonatán wanaa sümaa nüpansaajüin Saúl tü pütchikat noʼupala na surulaat nümaajanakana. Nüsaʼitakalaka Jonatán tü shipiakat joʼoma süka tü wunuʼu nümaʼanajatkat. Sükatchinraakalaka naaʼin nuuʼulakapa seʼejü tü mapakat. 28 Anuujeseʼe nünüiki wanee surulaat nümüin Jonatán: «Müliasü maʼin waaʼin sutuma wanee pütchi nüpansaajakat chi püshikai. ‹Alateerü kasa mojusü nümüin chi wayuu ekakai wanee kasa soʼukai›, müshisa nia wamüin, müshiijeseʼe mapüsain maʼin na surulaatkana». 29 Nusoutakalaka Jonatán nümüin: «Müliashii maʼin na israelitakana nutuma chi tashikai, anuʼusa akatchinraain taaʼin eerejeʼe yootchoin tü mapa tooʼulakakat eʼejü. 30 Neküleje soʼukai na israelitakana tü nasütakat noulia na neʼipolokona, wattaje naalii na filisteo noʼutakana aaʼin».

31 Nakanaluukalaka soʼu tia na filisteokana natuma na israelitakana, nakanajüin naya suluʼujee tü mmakat Micmash suluʼumüinreʼeya tü mmakat Ayalón. Mapüsashii maʼin na surulaat israelitakana süchikijee tia. 32 Nawanaajaayaa namaka na israelitakana sooʼomüin tü nasütakat noulia na neʼipolokona, noʼuta aaʼinrü paaʼa, anneerü otta paaʼachon. Nekakalaka tü asalaakat sümaa nnojoluin naʼamülatirüin tü süshakat. 33 Naapinnakalaka Saúl sünain maa: «Kaainjalashiisa nuulia Jehová na surulaat pümaakana, neküin tü asalaakat sümaa nnojoluin naʼamülatirüin süsha tü mürütkat». «Nnojoishii jia oonooin sümaa nünüiki Maleiwa, juuntawaataa jüpalapata yaamüin tamüin wanee ipa miyoʼu», nümakalaka Saúl. 34 Anuujeseʼe nünüiki Saúl: «Jaapira tamüin na surulaatkana jee jümeenaka namüin: ‹Jüntira tamüin waneʼewai jukua tü paaʼa jiküinjatkat otta tü anneerü jiküinjatkat, juʼuteetkalaka saaʼin toʼupala süpüla jiküinjatüin. Nnojo kaainjalain jia nuulia Jehová saaʼujee jiküin tü asalaakat sümaa nnojoluin saʼamülatinnüin süsha tü mürütkat›». Nantirakalaka na wayuukana soʼu aikat tia tü paaʼa neküinjatkat, naüjaakalaka shia yala. 35 Nukumajakalaka Saúl wanee aʼajülee nümüin Jehová, tia shia tü palajatkat aʼajülee nukumajaka nümüin Jehová.

36 Anuujeseʼe nünüiki Saúl: «Anashii weipiijüle saʼwai na filisteokana wasüteetkalaka noulia tü kasa namaʼanakat suwasajaaleepaʼaya aikat, wajaʼttireenaka naya napüshuaʼa». «Anashi paaʼinrüle tü paaʼinreekalü amüin», namakalaka na surulaatkana nümüin Saúl. «Anashi wasakirüle palajana chi shiimainshikai suluʼu Maleiwain», nümakalaka chi sacerdotekai. 37 Nüsakinnakalaka Maleiwa nutuma Saúl sünain maa: «¿Anasüche saaʼin pümüin weipiijüle na filisteokana? ¿Paapeenache ekii naya wamüin?». Masoutuinpejeʼe Maleiwa nümüin Saúl soʼu kaʼikat tia. 38 Anuujeseʼe nünüiki Saúl: «Anashii jiale asakirüin süchiirua jaralin kaainjalain waʼaka jia nekiipüʼükana na israelitakana. 39 Outajachi chi wayuu eekai kaainjalain, jaʼitakajeʼe niale kaainjalain Jonatán, chi tachonkai, outeechi nia saaʼu naainjala. Shiimain maʼin tanüiki jümüin nuʼupala Jehová, chi Maleiwa matüjainkai outaa otta chi akaalinjakai waya noulia na waʼünüükana», nümakalaka Saúl. Nnojotpejeʼe jaralüin asoutuin nümüin. 40 Anuuka nünüiki Saúl namüin napüshuaʼa na israelitakana: «Anashii yaajeeruʼule jia, cheechika taya chejeeruʼu nümaa Jonatán». «Anakajaʼa, waainjeeriaʼaya tü pümakat», namakalaka nümüin.

41 Anuujeseʼe nünüiki Saúl nümüin Jehová: «Wamaleiwasekalee, püküja maa wamüin sükajee tü kanüliakat ‹Tumim› jaralin kaainjalain». Niakalaka kaainjalain Jonatán nümaa Saúl, maainjalapejeʼe na waneinnua. 42 Anuukalaka nünüiki Saúl: «Anashii jüshantanajüle, jütüjaajeetka saaʼu tayalejeʼeya kaainjalain jee niale kaainjalain Jonatán». Niakalaka kaainjalain Jonatán. 43 «Püküja tamüin kasain paainjalain», nümakalaka Saúl nümüin Jonatán. Anuujeseʼe nünüiki Jonatán nümüin: «Tasaʼitüin tü shipiakat joʼoma süka tü wunuʼu tamaʼanakat, tooʼulakaka seʼejü tü mapakat. Puʼutamata taaʼin saaʼu taainjala».

44 Anuujeseʼe nünüiki Saúl: «Anashi tayale süsalain nutuma Maleiwa nnojoire outuin pia». 45 Anuukalaka nanüiki na wayuukana nümüin Saúl: «¿Jamüshi nuʼutunajachikaʼa aaʼin Jonatán, chi akaalinjakai waya süpüla wakanajüinjanain na weʼipolokana? Nnojoishi oʼutunajachin aaʼin Jonatán, akanajüshii waya sutuma nükaalinjünüin nutuma chi Maleiwakai. Shiimain maʼin wanüiki pümüin nuʼupala Jehová, chi Maleiwa matüjainkai outaa». Shia naaʼinraka tia na wayuukana nüpüleerua Jonatán, müshijeseʼe nnojoluin nuʼutunuin aaʼin.

46 Nuuʼulaakalaka Saúl suulia eipiraa na filisteokana, noʼunakalaka na filisteokana noumainpaʼamüin.

47 Sütüjaanakalaka aaʼu niain Saúl aluwataain naaʼu na israelitakana. Nushutaka naaʼu na nüʼünüü kepiakana nüʼütpünaa, ashutushi nia naaʼu na moabitakana, naaʼu na ammonitakana, naaʼu na edomitakana, naaʼu na filisteokana otta naaʼu na aluwataakana saaʼu tü mmakat Zobá. Jaʼitashi jalapünaain nia sünain atkawaa, ayatüshia akanajüin nia. 48 Yalayala aaʼinchi Saúl sünain atkawaa jee nükanajüin na amalequitakana. Nükaalinjain na israelitakana noulia na naʼünüükana.

49 Anuu nanülia na nüchonniikana Saúl: Jonatán, Isví otta Malki-Súa. Eejana piamashii nüchonnii jieyuu, Merab sünülia tü miyoʼusükat otta Mical sünülia tü emiiruaakat. 50 Ahinoam sünülia tü nuʼwayuusekat Saúl, nüchon shia Ahimáaz. Nüʼlaüla Saúl na nekiipüʼükana na nusurulaatsekana, Abner nünülia. Abner nüchon Ner. 51 Quis nünülia chi nüshikai Saúl, Ner nünülia chi nüshikai Abner otta Abiel nünülia chi nüshikai Ner.

52 Outiraashi maʼin Saúl namaa na filisteokana soʼunnaa nuluwataain naaʼu na israelitakana. Müshijeseʼe nümaʼawalin wanee wayuu eekai katchin niʼrüin otta eekai yalayalain süpüla naʼakainjachin nia na nusurulaatsekana.