Génesis
11 Waneesüpuʼu paala sünüikipala wayuu sainküinpünaa mmakat. 2 Nantakalaka na wayuukana eemüin wanee patajatshii suluʼu tü mmakat Sinar wanaa sümaa noʼunuin wüinpümüin, kepiaka naya chayaa. 3 Naashajaajiraaka naya wayuukana sünain maa: «Anashii watüküle ladrillo, waʼlakajeetka shia soʼu siki». Nnojoliika nakumajüin kasa süka ipa, nakumajüin shia süka ladrillo, natüküin shia süka mena. 4 «Wakumaja wanee pueulo jee müsia wanee miichi aʼwaajülee, antaleejeetka sutuʼupaʼamüin tü sirumatuʼukat. Weʼnnaajüneenaka jee nnojoleena aʼwalakalaain waya sainküin mmakat», namajiraaka naya wayuukana.
5 Niirakaaka Jehová sümüin tü pueulokot jee sümüin tü miichi aʼwaajülee nakumajakat naya wayuukana. 6 Anuukalaka nünüiki Jehová: «Piirakaa sümüin tü naaʼinrakat sutuma kottuin naya jee waneesüin nanüikipala, nnojoleerü joo isain nachiki kasa eekai naaʼinreein amüin. 7 Anashii washakatüle eere naya süpüla waʼwanajaain tü nanüikipalakat, nnojoleetka nayaawatüin nanüiki naashajaajiraapa». 8 Naʼwalakalaaka nutuma Jehová sainküinpünaa mmakat jee nooʼulaakalaka shiʼipaʼaya suulia akumajaa tü pueulokot. 9 Babelkalaka sünülia tia pueulokot, jama chajatüin nuʼwanajaain Jehová sünüikipala wayuu jee chajana aʼwalakalaain na wayuukana nutuma Jehová sainküinpünaa mmakat.
10 Anuu nüchikimaajatü Sem.
Nüchonshi Arpaksad Sem piama juya süchikijee tü Juya Miyoʼukat maʼin. Poloo shikii nuuyase Sem soʼu tia. 11 Quinientos nuuyase Sem süchikijee nüchoin Arpaksad. Kachonshi nia tooloyuu jee müsia jieyuu.
12 Kachonkalaka Arpaksad apünüinpa shikii jaʼralimüin nuuyase, Selá nünülia chi nüchonkai. 13 Cuatrocientos tres nuuyase Arpaksad süchikijee nüchoin Selá. Kachonshi nia tooloyuu jee müsia jieyuu.
14 Kachonkalaka Selá apünüinpa shikii nuuyase, Éber nünülia chi nüchonkai. 15 Cuatrocientos tres nuuyase Selá süchikijee nüchoin Éber. Kachonshi nia tooloyuu jee müsia jieyuu.
16 Kachonkalaka Éber apünüinpa shikii pienchimüin nuuyase, Péleg nünülia chi nüchonkai. 17 Cuatrocientos treinta nuuyase Éber süchikijee nüchoin Péleg. Kachonshi nia tooloyuu jee müsia jieyuu.
18 Kachonkalaka Péleg apünüinpa shikii nuuyase, Reú nünülia chi nüchonkai. 19 Doscientos nueve nuuyase Péleg süchikijee nüchoin Reú. Kachonshi nia tooloyuu jee müsia jieyuu.
20 Kachonkalaka Reú apünüinpa shikii piamamüin nuuyase, Serug nünülia chi nüchonkai. 21 Doscientos siete nuuyase Reú süchikijee nüchoin Serug. Kachonshi nia tooloyuu jee müsia jieyuu.
22 Kachonkalaka Serug apünüinpa shikii nuuyase, Nacor nünülia chi nüchonkai. 23 Doscientos nuuyase Serug süchikijee nüchoin Nacor. Kachonshi nia tooloyuu jee müsia jieyuu.
24 Kachonkalaka Nacor piamapa shikii mekietsatmüin nuuyase, Taré nünülia chi nüchonkai. 25 Ciento diecinueve nuuyase Nacor süchikijee nüchoin Taré. Kachonshi nia tooloyuu jee müsia jieyuu.
26 Akaratshipa shikii nuuyase Taré, kachonshi nia sümüin tü nuʼwayuusekat. Abrán, Nacor otta Harán nanülia na nüchonniikana.
27 Anuu nüchikimaajatü Taré.
Niakalaka nüchooin Taré Abrán, Nacor jee müshia Harán. Niaka nüchoin Harán Lot. 28 Nünaajaaka Harán suluʼu tü mma joʼuukalü aluʼu nia, suluʼu tü mmakalü Ur, noumainka na caldeokana. Anaajaashi nia kataiwaʼaya noʼu Taré, chi nüshikai. 29 Kaʼwayuusekalaka Abrán nümaa Nacor, Sarái sünülia nuʼwayuuse Abrán otta Milcá sünülia nuʼwayuuse Nacor. Nia Harán süshika Milcá otta Iscá. 30 Machonpejeʼe Sarái, jama maralüin shia.
31 Nükolojookalaka Taré suluʼujee tü mmakalü Ur, noumainka na caldeokana, nümaakalaka Abrán, chi nüchonkai otta müshia Lot chi nüchonkai Harán sümaʼaleeya Sarái tü nuʼwayuusekalü Abrán. Akolojooshii naya chai nakua suluʼumüin tü mmakat Canaán, nantaka Haránmüin, kepiaka naya chayaa. 32 Doscientos cinco nuuyase Taré soʼu nünaajaain chaa Harán.