Rut
2 Eejachi wanee wayuu nüpüshi Elimélec, chi suʼwayuusekai Noemí, washirü maʼin nia, Boaz nünülia.
2 Anuukalaka sünüiki Rut tü chejeʼewatkat Moab sümüin Noemí: «Anasü püjütüle taya eere süshannüin aʼttiee, tantataajeetka nümaʼanamüin wanee wayuu eekai kamaneein süpüla takotchojüin tü ojutuukat sünainjee tü nüshanüinkat». «Puʼuna maala tachonchee», sümakalaka Noemí sümüin. 3 Suʼunakalaka yüüjapaʼamüin süpüla sükotchojüin tü ojutuukat natuma na ashanüshiikana. Süntaka suluʼumüin niyüüjase Boaz, wanee nüpüshi Elimélec. 4 Wanaa maʼin sümaa tia antüshi Boaz, sejechi nia Belénjee. «Kasataalejeseʼe anain jukuwaʼipa nutuma Jehová», nümaka namüin na aʼyataashiikana. «Kasataalejeseʼe anain pukuwaʼipa piakaiyaa nutuma Jehová», namayaa namaka nümüin.
5 «¿Jaratsaʼa türa wayuukot? ¿Jara kapüshika shia?», nümaka Boaz nümüin nalaülajana na aʼyataashiikana. 6 Anuujeseʼe nünüiki nalaülajana na aʼyataashiikana: «Türa wayuukot chejeʼewat shia Moab, antüsü sümaa Noemí. 7 Suchuntuin tamüin eereje süpüla sükotchojüin tü apütaakat süchikijee nashanüin na aʼyataashiikana. Oʼttatüjülia shia wattaʼapa sünain aʼyatawaa, eiwaʼalia neʼe aikalaain suupünaa lumakat süpüla seemeraain».
8 Anuukalaka nünüiki Boaz sümüin Rut: «Tachee, nnojo puʼunuin sünain akotchojaa tü aʼttiee apütaakat suluʼu wanee yüüja naatajatü. Yaasia pia namaa na jieyuu aʼyataakana tamüin. 9 Jülüja paaʼin jalain ashannüin tü aʼttieekat, puʼuneetkalaka namaa na jieyuukana. Tamüinnapasa amüin na aʼyataashiikana tamüin nnojoluinjatüin nekeʼejüin paaʼin. Wüinñaasüpa pia, oʼuneerü pia eere tü amüchi kaluʼukat wüin püseetka tü wüin nalaʼalakat na aʼyataashiikana tamüin».
10 Süsapainkaka shia nümülatuʼu Boaz saapaiwaʼaya tia süka kojutuin nia sümüin sümaa süsakirüin nia: «¿Jamüsü pükaalinjakaʼa taya? ¿Jamüsü kapülakaʼa paaʼin takuwaʼipa mayaainjeʼe nnojoluin yaajeʼewalüin taya?». 11 Anuukalaka nünüiki Boaz sümüin: «Aküjünüsü tamüin tü paaʼinrakat shiyaaluʼu tü paʼütkat soʼujeʼereeya outuin chi puʼwayuusekai. Aküjünüsiaʼaya tamüin püpütüin püshi jee püi sümaa puʼunuin puumainpaʼajee süpüla kepiainjatüin pia naʼaka wayuu nnojoliikana piʼraajüin. 12 Kasataalejeseʼe anain pukuwaʼipa nutuma Jehová saaʼujee tü kasa paaʼinrakat jee piʼrüin kasa anasü nutuma Jehová chi Maleiwa aʼwaajünakai Israel, jama puchuntuin kaalinwaa nümüin». 13 Susoutakalaka sünain maa: «Anasiaʼaya müin pükaalinjain taya taʼlaüla otta pümüliajüin taaʼin, anasü taaʼin putuma saaʼujee tü pümakat tamüin, mayaainjeʼe nnojoluin napüshin taya na aʼyataakana pümüin».
14 Anuu nünüiki Boaz sümüin Rut neküinjanapa na wayuukana: «Jalairü pikai wamaa, paapaa wanee pan, püchütta shia saʼaka tü wiino jashüʼüsükat». Süikalaaka Rut naʼatoʼu na aʼyataashiikana, naapaka Boaz cebada eʼitujuushi sümüin, shikaka jee emiraka shia, süpütaaka süpüshi tü shiküinkat. 15 Anuuka joo nünüiki Boaz namüin na aʼyataashiikana sükotchojüinjatpa Rut tü aʼttiee apütaasükat: «Anasü juuʼulaale shia sükotchojaiwa sünainjee tü ashanuushitpakat otta nnojo jikeʼejüin saaʼin. 16 Anashii jijitirüle süpüshi tü jüshanüinkat süpüla sükotchajüinjatüin shia, nnojo jüchiaain shia suulia akotchojaa».
17 Ayatsüjaʼa joo Rut sünain akotchojaa, ojoʼlooleesia shia motsopa kaʼikat. Shiʼyaajapa tü sükotchojüinkat, eetaasü maʼaka poloo apünüinmüin kilo* shipesain tü cebada sükotchojakat. 18 Sülüʼüjakalaka shia shipialuʼumüin, saapakalaka tü sükotchojüinkat sümüin tü saʼütkat otta müsia tü eküülü sünaajaakat.
19 Anuujeseʼe sünüiki Noemí sümüin Rut: «¿Jalajatü pia akotchojüin aʼttiee soʼukaitpa? ¿Jalajatü pia aʼyataain? Kasataalejeseʼe anain nukuwaʼipa nutuma Maleiwa chi wayuu kamaneekai pümüin». Süküjakalaka Rut sümüin jalajatüin shiʼyataain. «Chajatüle taya aʼyataain soʼukaitpa suluʼu niyüüjase wanee wayuu kanüliakai Boaz», sümakalaka Rut sümüin. 20 Anuujeseʼe sünüiki Noemí saapaiwaʼaya tia: «Kasataalejeseʼe anain nukuwaʼipa chia wayuukai nutuma Jehová, chi amüliajakai waya jaʼitashii outuin waya jee katüin woʼu. Chia wayuukai nüpüshi chi taʼwayuusekai, nia anaka süpüla amüliajüin waya, jama weʼrüin wamüliala». 21 «‹Ayataʼaya yaain pia namaa na aʼyataashiikana tamüin keraʼaleepaʼaya nashanüin tü aʼttieekat›, müshisa tamüin chia wayuukai», sümakalaka Rut tü chejeʼewatkat Moab sümüin Noemí. 22 Anuujeseʼe sünüiki Noemí sümüin tü saʼütkat: «Tachee, anasiaʼaya puʼunule namaa na jieyuu aʼyataakana nümüin, nnojoleetka mojulaain pümüin wayuu suluʼu wanee yüüja naatajatü».
23 Ayatüsüjaʼa Rut sünain akotchojaa namaa na jieyuu aʼyataakana nümüin Boaz sajaʼttaleepaʼaya sükalia süshannakalü oʼu tü aʼttiee kanüliakat cebada otta trigo. Ayatakaʼaya shia sümaa tü saʼütkat.