Rut
4 Nuʼunakalaka Boaz soʼuluʼumüin tü pueulokot jee nüikalaaka chayaa. Niʼrakalaka nülatüin chi nüpüshikai Elimélec, chi nüküjakai achiki paala. «Waʼle* jalaichi paala, püikalaa yaʼaya», nümakalaka nümüin. Nürütkaaka chia wayuukai jee nüikalaaka. 2 Nuunejaakalaka Boaz polooshii laülaashii napüleerua na wayuu chajanakana suluʼu tia pueulokot. «Jüikalaa yaʼaya», nümakalaka namüin na laülaashiikana. Aikalaashiijeseʼe naya.
3 Anuukalaka nünüiki Boaz nümüin chi nüpüshikai Elimélec: «Aleʼejüsüsaʼa Noemí suluʼujee tü mmakat Moab, suiküinjatü tü mma nuumainpuʼukat Elimélec, chi wawalakai. 4 ‹Anainjaʼa nütüjaale saaʼu tia›, müshireʼe taya jee taküjeekalaka pümüin anain piyaʼlajüle tia mmakat noʼupala na wayuu kepiakana suluʼu tü pueulokot jee noʼupala na laülaashiikana napüleerua. Anasü piyaʼlajüle shia anashiire shia saaʼin pümüin, jama nüpüshin pia Elimélec. Nnojorüle piyaʼlajüin shia, anasü püküjale süchiki tamüin tatüjaaiwa saaʼu, jama tayain keraain püchikumüin süpüla tayaʼlajüinjatüin tia mmakat». Anuujeseʼe nünüiki chi nüpüshikai Elimélec nümüin Boaz: «Tayaʼlajeeriaʼaya tia mmakat». 5 Anuukalaka nünüiki Boaz nümüin: «Piyaʼlajapa tü mmakat suulia Noemí, piyaʼlajüinjatia shia suulia Rut tü chejeʼewatkat Moab, jama shiain nuʼwayuusein chi süchon Noemí anaajaakai, ayateetkalaka nuumain müliashii tia mmakat». 6 Anuujeseʼe nünüiki chi nüpüshikai Elimélec naapaiwaʼaya tia: «Isataajeerü tachiki tayaʼlajüin shia, jama maʼletseechin taya suluʼujee tia. Anashi piale ayaʼlajüin shia, jama isaitpain shia tachiki».
7 Sümaiwa paala chaa Israel, naakatüinjatü nukoʼusüin* wanee wayuu jee naapüinjatü shia nümüin chi eekai nuiküin amüin wanee kasa jee chi makatajachikai apüla wanee kasa, naaʼinrüin tia süpüla süpansaajünüin jaralin kamüinjatüin wanee kasa. Mapuʼusü sukuwaʼipa tia chaa Israel. 8 Müshijeseʼe naakatüin nukoʼusüin chi nüpüshikai Elimélec jee nümakalaka nümüin Boaz: «Anashi piale ayaʼlajüin tia». 9 Anuukalaka nünüiki Boaz namüin na laülaashiikana jee na wayuu eejanakana soʼu tia: «Tayaʼlajüin juʼupala soʼukai suulia Noemí süpüshuaʼa tü nümaʼanajatkat Elimélec jee süpüshuaʼa tü nümaʼanajatkat Kilión nümaa Mahlón. 10 Jee taʼwayuuseinjatü Rut tü chejeʼewatkat Moab, jama nuʼwayuusepuʼuin shia Mahlón, saapüneetkalaka sümüin nüikeyuu tü mma nuumainpuʼukat paala, nnojoleechika nia motuin naaʼin na nuwalayuukana jee na wayuu kepiakana suluʼu tü pueulokot. Jia koʼupalajanakana tia maaʼulu yaa».
11 Anuujeseʼe nanüiki napüshuaʼa na chajanakana soʼuluʼu tü pueulokot jee na laülaashiikana: «¡Woʼupalajatiaʼaya tia! Kasataalejeseʼe anain sukuwaʼipa nutuma Jehová tü wayuu puʼwayuuseinjatkat, maiwa sukuwaʼipa maʼaka sukuwaʼipa Raquel sümaa Lea, na soushinuukana wayuu yaa Israel. Kasataalejeseʼe anain pukuwaʼipa yaa Efrata jee kojutaiwa pia sutuma wayuu yaa Belén. 12 Kasataalejeseʼe wattain naalii püikeyuu nanainjee na püchonnii naapakana pümüin Jehová sükajee wayuukot tüü, maʼaka wattain saalii nüikeyuu Pérez, chi nüchonkai Judá sümüin Tamar».
13 Nümaasüjeseʼe Boaz Rut nipialuʼumüin jee nuʼwayuuseka shia. Nüinkaaka sümaa, nükaalinjainjeseʼe shia Jehová süpüla ipuoluinjatüin shia jee jemeyulüinjatüin shia. 14 Anuukalaka nanüiki na jieyuukana sümüin Noemí: «Kasataalejeseʼe nuʼwaajünüin Jehová, jama nüchajaain sukuwaʼipa süpüla nükaalinjain pia nüpüshi chi puʼwayuusekai. Kasataalejeseʼe shiʼraajüin wayuu nünülia chi joʼuukai yaa Israel. 15 Talateerü paaʼin püchikuaʼa nutuma chi joʼuukai jee naaʼinmajeerü pia süka laülaairüin pia, jama niain süchon tü paʼüt aikalü apüla pia jee alanaʼaleesia shia noulialeʼeya akaratshishii püchonnii». 16 Sutuʼushi Noemí chi joʼuukai jee shiakalaka epijain nia. 17 Kanüliaka chi joʼuukai natuma na jieyuu kepiakana naʼütpünaa. «Kachonsü Noemí», namakalaka. Neʼitaaka Obed nünülia chi joʼuukai. Nüshi nia Jesé, chi nüshikai David.
18 Anuu nanülia na nüikeyuukana Pérez: Pérez nüshi Hezrón, 19 Hezrón nüshi Ram, Ram nüshi Aminadab, 20 Aminadab nüshi Nahsón, Nahsón nüshi Salmón, 21 Salmón nüshi Boaz, Boaz nüshi Obed, 22 Obed nüshi Jesé otta müshia Jesé nüshi David.