Levítico

19 Ayatakalaka naashajaain Jehová nümaa Moisés sümaa nümüin nümüin: 2 «Püma namüin na israelitakana: ‹Wuleinjatü jukuwaʼipa maʼaka wulein takuwaʼipa tayakai Jehová chi Jümaleiwasekai.

3 »›Kojutuinjatü jümüin waneʼewai jukua jii nümaa jüshi jee kojutuinjatü jümüin sükalia eemerawaa. Tayasa Jehová chi Jümaleiwasekai. 4 Nnojo juʼwaajüin maleiwayaasü nnojotka kasain anain apüla jee nnojo jaainjain shiyaakua maleiwayaasü. Tayasa Jehová chi Jümaleiwasekai.

5 »›Juʼutuinjatüle saaʼin wanee mürüt jüsülajüinjatka tamüin tayakai Jehová süpüla anajiraain jia tamaa, jaaʼinrajatü shia wanaapünaa sümaa tü tachekakat süpüla talatüinjachin taya jümaa. 6 Ekünajatü shia soʼu tü kaʼi suʼutunakalü oʼu aaʼin jee müsia waneemüin kaʼi. Eekajasaʼa tü apütaakat, aʼajünajatü soʼu tü apünüinkat kaʼi soʼu siki. 7 Alerajüneerü tü asülajuushikat shikünüle süpüshi soʼu tü apünüinkat kaʼi, tayouteerü shia tayakai Maleiwa. 8 Asoutajachi saaʼu naainjala chi wayuu ekakai shia süka mojutuin nümüin tü kasa kojutukat tamüin tayakai Jehová. Oʼutunajachi aaʼin chia wayuukai naʼakajee na israelitakana.

9 »›Pükotchojopa süchon püʼttia, nnojotsü pukotchojuinjatüin tü sotpünaakat jee nnojotsü pukotchojuinjatüin tü apütaasükat sünainjee süchon tü püʼttiakat. 10 Nnojotsü pütpajüinjatüin süpüshuaʼa süchon tü uuwakat jee müsia tü eekai sujutuuin mmoluʼu. Puuʼulaainjatü shia nayaaluʼu na maʼletsesaliikana jee na naatakana oumain. Tayasa Jehová chi Jümaleiwasekai.

11 »›Nnojo juʼluwajüin, nnojo jimeejüin jee nnojo jaapüin nikii wanee wayuu. 12 Nnojo jaapüin jünüiki tanülialuʼu sümaa jüküjain jaʼalain süka mojuteechin maʼin taya jutuma, chi Jümaleiwasekai.* Tayasa Jehová. 13 Nnojo paʼalainpalain wanee wayuu jee nnojo puʼluwajüin. Nnojo paʼalijirüin sünainmüin waneemüin kaʼi tü nükanainkat wanee wayuu sünainjee niʼyataain.

14 »›Nnojo puʼulejüin wanee wayuu eekai macheʼein, nnojo piʼitaain wanee kasa nüshanaajeetka atuma wanee wayuu moʼusai jee kojutuinjachi taya pümüin süka tayain Pümaleiwasein. Tayasa Jehová.

15 »›Lotuinjatü jutuma sukuwaʼipa wanee kasa junoutapa shia. Nnojo koʼuin jukuwaʼipa nümüin chi wayuu maʼletsekai jee nnojo sülanaain nujutu jutuma chi wayuu washitkai. Lotuinjatü sukuwaʼipa jutuma sunoutia wanee kasa süpüleerua wayuu.

16 »›Nnojo püküjakuʼu pümüin perulaa saʼaka wayuu. Nnojo paaʼinrüin wanee kasa jamajeechika anainjee wanee wayuu.* Tayasa Jehová.

17 »›Nnojo püʼürülain puwala. Püchiaa wanee wayuu suulia kaainjalajüin pia wanaa nümaa.

18 »›Nnojo pasalaaweein pia jee nnojo püʼürülain na israelitakana wanaa pümaa jee alinjatü püpüla wayuu maʼaka alin pia püpülajiraa. Tayasa Jehová.

19 »›Joonoo sümaa tü taluwataakalü anain: nnojo joʼoteʼerüin jümüʼlüin saaʼu wanee mürüt eekai naatain suulia, nnojo jüpalirajüin tü waüyeekat jüpünajapa shia jee nnojo jaʼatüin wanee kuluulu aainjuushika süka jiirü apalirajuushi.

20 »›Nüinkaale wanee wayuu sümaa wanee jierü jee nuʼluwajiraale nukuwaʼipa sümaa, achuntuushitpale shia nutuma wanee wayuu sümaa nnojoluin saapünüin tü süpaʼünakat jee nnojoluin taashin sukuwaʼipa, süsalainjana naainjala naya piamaleʼeya, nnojoliinjanapejeʼe outuin naya süka nnojoyülüin taashin sukuwaʼipa tü wayuukot. 21 Nülüʼüjainjatü chi wayuukai tü nüsülajüinjatkat tamüin tayakai Jehová saaʼu naainjala soʼuluʼu tü miichi aʼwaajüleekat, aapüinjachi nia wanee anneerü saaʼu naainjala. 22 Nükajee chi anneerü nüsülajüinjachikai saaʼu naainjala, achunteechi chi sacerdotekai tamülatuʼu tayakai Jehová süpüla sülatinnüinjatüin naainjala chi wayuukai, sülatinneetka naainjala nuulia.

23 »›Jikerotopa suluʼumüin tü mmakat jee jüpünajüle wanee wunuʼulia jiküinjatka achon, nnojotsü anain süpüla jiküin tü süchonkat, apülajünajatü shia juulia soʼutpünaa apünüin juya. Nnojotsü jiküinjatüin shia. 24 Shiasaʼa soʼu tü pienchikat juya, wuleerü süpüshuaʼa süchon tü wunuʼu jüpünajakat, jaapajatü shia tamüin tayakai Jehová sümaa talatüin jaaʼin. 25 Shiasaʼa soʼu tü jaʼraikat juya jikeerü süchon, kachonjeetkalaka maʼin tü jüʼttiakat. Tayasa Jehová chi Jümaleiwasekai.

26 »›Nnojoishii eküinjanain jia wanee kasa kaʼakaka isha.

»›Nnojoishii jia ooʼulakirüinjanain süpüla jütüjaain saaʼu tü alateetkat mapeena.

27 »›Nnojotsü püüjainjatüin puʼwala suwalapaʼapünaa pikii jee nnojotsü pumojujuinjatüin püʼliima.

28 »›Nnojo pükashajüin püta naaʼujee wanee wayuu outushi jee nnojo püshoʼojüin püta. Tayasa Jehová.

29 »›Nnojo mojutuin pümüin püchon sümaa paapüin shikii sümüin wayuu süpüla maaʼinjatüin shia, suulia wainmajüin na wayuu maaʼinkana aaʼin jee yarüttüin tü mmakat.

30 »›Kojutuinjatü jutuma tü sükaliakalü eemerawaa jee kojutuinjatü maʼin jümüin tü miichi eere taʼwaajünüin. Tayasa Jehová.

31 »›Nnojo juchuntuin kaalinwaa namüin na ouutshiikana jee nnojo juuʼulakirüin süchiirua tü kasa alatajatkat süka yarütteerüin jukuwaʼipa natuma na ooʼulaküliikana. Tayasa Jehová chi Jümaleiwasekai.

32 »›Atamaainjachi pia nüpüleerua wanee wayuu eekai kasuuin nuʼwala sümaa püsaküin nia, kojutuinjachi putuma wanee wayuu eekai laülaaichin jee kojutuinjachi pümüin tayakai chi Pümaleiwasekai. Tayasa Jehová.

33 »›Nnojolinjachi müliain jutuma wanee wayuu eekai nüntüin jaʼakamüin nnojoikai israelitain. 34 Alinjana jüpüla na wayuu nnojoliikana israelitain maʼaka alin jüpüla na israelitajiraakana wanaa jümaa süka jooʼonoopünaainkain suluʼu tü mmakalü Egipto. Tayasa Jehová chi Jümaleiwasekai.

35 »›Lotuinjatü jukuwaʼipa jimeriijapa sajaʼapüin wanee kasa, saawain wanee kasa otta sülaʼalia wanee kasa. 36 Anainjatü maʼin tü pesa jümaʼanakat, yaawainjatü maʼin shimeriijia wanee kasa.* Tayasa Jehová chi Jümaleiwasekai, chi ayuʼlakai jia suluʼujee tü mmakalü Egipto. 37 Joonoo sümaa tü tamakat otta tü taluwataakalü anain jia jee jaaʼinra shia. Tayasa Jehová›».