Chiiruaajatka karaloʼuta Samuel
9 Anuukalaka nünüiki David: «¿Eeyüiche wanee nüpüshi Saúl eekai süpüla kamaneein amüin taya naaʼujee Jonatán?». 2 Eejachikalaka wanee nüchepchia Saúl kanüliashi Zibá, neenajinnakalaka nutuma David. Anuujeseʼe nünüiki David nümüin: «¿Piaʼaya chi kanüliakai Zibá?». «Aa, tayaʼayan, püchepchia taya», nümakalaka nümüin. 3 Anuukalaka nünüiki David nümüin Zibá: «¿Eeyüiche wanee nüpüshi Saúl eekai süpüla kamaneein amüin taya?». «Eeyüiya wanee nüchon Jonatán, masaʼasai», nümakalaka Zibá nümüin. 4 Anuujeseʼe nünüiki David nümüin: «¿Jalakaʼa nia?». «Ichaa nipialuʼu Makir, chi nüchonkai Amiel, suluʼu tü mmakat Lo-Debar», nümakalaka Zibá.
5 Asaajinnüshijeseʼe Mefibóset nutuma David nipialuʼujee Makir, chi nüchonkai Amiel, chajachi nia suluʼu tü mmakat Lo-Debar. 6 Antüshijeseʼe Mefibóset chi nüchonkai Jonatán nümaʼanamüin David. Nüsapainkaka nia sümaa nejepülaain nümülatuʼu David. Anuujeseʼe nünüiki David nümüin: «Piala chi kanüliakai Mefibóset». «Aa, tayaʼayan laülaashikalee», nümakalaka Mefibóset nümüin. 7 Anuukalaka nünüiki David nümüin: «Nnojo mmoluin pia, kamaneejeechi taya pümüin naaʼujee Jonatán, chi püshikai. Teiteʼereerü pümüin süpüshuaʼa nuumain Saúl, chi putuushikai otta ekawaijeechi pia tamaa».
8 Nejepülaaka Mefibóset nümülatuʼu David sünain maa: «Wayuuwaʼata neʼe taya süpüla kamaneeinjachin pia tamüin, müshi taya maʼaka naaʼin wanee erü eekai outuin». 9 Neenajinnaka Zibá nutuma David jee nümakalaka nümüin: «Teiteʼerüinjatü nümüin Mefibóset süpüshuaʼa tü kasa nümaʼanajatkat Saúl jee süpüshuaʼa tü kasa namaʼanajatkat na nüpüshikana Saúl. 10 Apünajüinjachi pia suluʼu tia mmakat namaa na püchonniikana jee namaa na wayuu aʼyataashiikana pümüin. Jükotchojeetka süchon tü aʼttieekat süpüla neküinjatüin shia na nüpüshikana Mefibóset. Eekajasaʼa Mefibóset, chi nülüinkai chi pülaamainkai ekawaijeechi nia tamaa».
Poloo jaʼralimüin nüchonnii Zibá otta piama nekii na wayuu aʼyataashiikana nümüin. 11 Anuukalaka nünüiki Zibá nümüin David: «Taaʼinreerü süpüshuaʼa tü puluwataakalü anain taya laülaashikalee». Nikawaikalaka Mefibóset nümaa David maʼaka neküin na nüchonniikana David nümaa. 12 Eejachi wanee nüchonchon Mefibóset kanüliashi Micá. Nüchepchiashii Mefibóset napüshuaʼa na wayuu nipialujunakana Zibá. 13 Niasaʼa Mefibóset, chi wayuu masaʼasaikai ekaʼawaishi nümaa David, kepiashijeseʼe nia Jerusalén.