Piamaka karaloʼuta nüshajalaka Juan
1 Pütchikat tüü tashajala tayakai laülaashikai, pümüinjatü pia wayuu aneekuushikat nutuma Maleiwa jee namüinjatü shia na püchonniikana. Aishii maʼin naya tapüla, nnojoipejeʼe tayain neʼe alin apüla naya, aishiʼiya naya napüla napüshuaʼa na wayuu atüjaakana saaʼu tü pütchi shiimainkat. 2 Aishiʼiya jia wapüla saaʼujee ayatüinña suluʼuin waaʼin tü pütchi shiimainkat jee ayateeriaʼaya shia suluʼu waaʼin süpüla kaʼikat süpüshuaʼa. 3 Nikirajeena waya chi Washikai Maleiwa sünain tü pütchi shiimainkat jee nikirajeenaʼaya waya Jesucristo, chi Nüchonkai. Aijeena maʼin waya napüla, kamaneejeena maʼin naya wamüin, amülialaajeerü naaʼin waalin jee jimateerü waaʼin natuma.
4 Talatüshi maʼin taya taapapa nachiki waneinnua püchonnii ayatakaʼaya aapaain sümaa tü pütchi shiimainkat wanaapünaa sümaa tü aluwataanakalü anain waya nutuma chi Washikai Maleiwa. 5 Tawalachee, nnojotsü tachuntuin pümüin poonooinjatüin sümaa wanee pütchi jeketü aluwataanakalü anain. Shia tachuntaka pümüin poonooinjatüin sümaa tü pütchi aluwataanakalü anain waya soʼujeʼereeya wekirajaain nüchiki Cristo. Saashin tia pütchikat aijiraainjana waya. 6 Woonoole sümaa tü nuluwataakalü anain chi Washikai Maleiwa atüjaaneerü aaʼu aipüraliin waya. Anuu tü pütchi aluwataanakalü anain, tü jaapakalü achiki juʼttaiwaʼaya sünain ekirajawaa nüchiki Cristo, tü makat mayaa: ayataʼaya aipüraliin jia. 7 Wattainnapa maʼin naalii na wayuu emeejüliikana sainküin tü mmakat, naashin naya wayuukana nnojoishi antüin Jesucristo suluʼu wayuuin nia. Na makana anüiki, emeejülii neʼe otta niʼipolo naya Cristo.
8 Eeja jaaʼin sünain tü kasa jaaʼinrakat suulia amülouijüin neʼe jutuma tü kasa waʼyataakalü maʼin apüleerua. Suluʼujee tia, naapeerü Maleiwa jümüin süpüshuaʼa tü kasa anasü yapajakat nutuma. 9 Nnojoishi paaʼinwain nümaa Maleiwa chi wayuu ekirajakai sünain wanee kasa naata suulia tü nikirajakalü anain Cristo jee nnojoire noonooin sümaa. Eekajasaʼa, chi wayuu oonookai sümaa tü nikirajakalü anain Cristo paaʼinwashi nümaa chi Washikai Maleiwa jee paaʼinwashi nia nümaa chi Nüchonkai Maleiwa. 10 Nüntataarüle wanee wayuu jümaʼanamüin sümaa nnojoluin wanaawain tü nikirajakalü anain sümaa tü nikirajakalü anain Cristo, anakajaʼa nnojoliire kamaneein jia nümüin nüntüle jipialuʼumüin jee nnojo jüsaküin nia. 11 Chi wayuu asakakai nia wanaawasü naaʼin nümaa sünain aaʼinraa kasa mojusü.
12 Mayaainjeʼe wattain saalii tü kasa tashajüinjatkalü achiki jümüin, nnojoleerü karaloʼutaluʼuin shia tatuma, oʼuneechi taya jümaʼanamüin süpüla teʼrüinjanain jia, taashajaweechikalaka jümaa jee suluʼujee tia talateena maʼin jia.
13 Nasaküin pia na süchonniikana tü puwala aneekuushikat nutuma Maleiwa.