Génesis
34 Shiasaʼa Dina tü süchonkot Lea nümüin Jacob, oʼunawaipuʼusü sünain anaʼlawaa namüin na jieyuu kepiakana suluʼu tia mmakat. 2 Eejachikalaka wanee wayuu kanüliakai Siquem, nüchon nia Hamor chi heveokai, shikiipüʼü nia wayuu. Soʼu wanee kaʼi, niʼrakalaka Siquem Dina, nümaasüjeseʼe shia jee nütaüjaaka shia. 3 Kamalainka nümüin Dina, tü nüchonkot Jacob, müliakalaka nia shiiʼiree jee nüsokujaka sümüin. 4 «Anasü puchuntule tapüleerua tü wayuukot süpüla taʼwayuuseinjatüin shia», nümaka Siquem nümüin Hamor chi nüshikai.
5 Chajana na nüchonniikana Jacob arüleejüin wanaa sümaa naapüin Jacob süchiki sütaüjaanüin Dina nutuma Siquem. Nnojotkalaka jamüin nünüiki süchiki tia, naʼatapajüin naleʼejüin nachikuaʼa na nüchonniikana süchikijee arüleejaa. 6 Naashajaanaka amaa mapa Jacob nutuma Hamor, chi nüshikai Siquem. 7 Naapapejeʼe na nüchonniikana Jacob süchiki tü alatakat, naleʼejamaatakalaka nachikuaʼa sünainjee arüleejaa. Aisü maʼin namüin tü alatakat jee jashichishii naya süka mojutuin Israel nutuma Siquem saaʼujee nütaüjaain tü nüchonkot Jacob, nnojotsü müinjatüin naaʼinrala.
8 Naashajaakalaka Hamor namaa sümaa nümüin namüin: «Eekajasaʼa Siquem chi tachonkai, müliashi nia shiiʼiree tü püchonkat, tachuntuin maʼin jümüin jaapüinjatüin shia nümüin süpüla nuʼwayuuseinjatüin shia. 9 Anakajaʼa paaʼinwajiraale waya, jaapa jüchonnii süpüla naʼwayuuseinjatüin shia nachonnii na wayuu suluʼukana tü pueulokot jee jaapa nachonnii na wayuu suluʼukana tü pueulokot süpüla naʼwayuuseinjatüin shia jüchonnii. 10 Anashii yaalejeʼeya kepiain jia wamaa, eeshii süpüla kepiain jia eere anain saaʼin jümüin, oikaajeena jee ayaʼlajeena jia kasa, yaainnamaʼaleejeena kepiain jia». 11 Anuujese nünüiki Siquem nümüin chi süshikai Dina jee namüin na suwalayuukana: «Anashiirejeʼeya pümüin püshimiain taya, taapeerü pümüin süpüshuaʼa tü kasa puchuntakat tamüin. 12 Jaapaʼaya shia tamüin süpüla taʼwayuuseinjatüin shia, jaʼitairü wainmain tü paʼünaa juchuntakat otta tü tasülajüinjatkat, taapeeria shia jümüin».
13 Nachajaakalaka sukuwaʼipa na nüchonniikana Jacob nemeejüinjachin Siquem jee müshia Hamor chi nüshikai, süka mojutuin nutuma Siquem Dina. 14 Anuukalaka nanüiki na nüchonniikana Jacob: «Nnojotsü süpüla waaʼinrüin tia, nnojotsü süpüla waapüin tü washunuukat nümüin wanee wayuu nnojoikai oʼyoteʼerüin süta nukorolo, mojuteena waya sünainjee tia. 15 Waaʼinreerü tü juchuntakat wamüin jaaʼinrülejeʼeya tü wachuntakat jümüin, müinjana jia maʼaka waaʼin jiʼyoteʼerüinjatü süta nakorolo na tooloyuu eekana jaʼaka. 16 Waapeetka wachonnii jümüin süpüla juʼwayuuseinjatüin shia jee waapaajeenakalaka jüchonnii süpüla waʼwayuuseinjatüin shiaʼaya, kepieenaka jia wamaa jee paaʼinwajiraajeena waya jümaa. 17 Eekajasaʼa nnojorüle jaaʼinrüin tü wamakat, nnojorüle jiʼyoteʼerüin süta jukorolo, wamaajeerü tü washunuukat jee woʼuneenakala».
18 Anashiikalaka nümüin Hamor jee nümüin Siquem tü achuntunakat namüin. 19 Naaʼinramaatakalaka Siquem tü achuntunakat nümüin süka müliain nia shiiʼiree tü nüchonkat Jacob, nia kojutuleeka Siquem naʼakajee na wayuu kepiakana nümaa chi nüshikai.
20 Nuʼunaka Siquem nümaa Hamor soʼuluʼumüin tü pueulokot, anuukalaka nanüiki namüin na wayuu tooloyuu kepiakana suluʼu tia pueulokot: 21 «Ayateeshiʼiya anajiraain wamaa wayuukana naainnua, eekalaka süpüla kepiain naya eepünaale nacheküin jee müsia nayaʼlajüin jee noiküin kasa. Eeshii süpüla kepiain naya wamaa, jama miyoʼuin mma eeka wamaʼana. Eekalaka süpüla waʼwayuusein nachonnii jee waapüin wachonnii namüin süpüla naʼwayuuseinjatüin shia. 22 Eepejeʼe wanee kasa nachuntaka wamüin süpüla kepiain naya wamaa jee paaʼinwain naya wamaa, süchoteʼennüinjatüin süta nakorolo na tooloyuu eekana wamaa maʼaka süchotoonüin süta nakorolo nayakana. 23 Wamüinjeetka süpüshuaʼa tü kasa eekat namaʼana, tü nawashirüinkat jee wamüʼlüinjeerüin tü namüʼlüinkat. Waaʼinra tü namakat wamüin süpüla kepiainjanain naya wamaa». 24 Noonoo amaalü tü nümakat Hamor jee tü nümakat Siquem napüshuaʼa na wayuu suluʼukana tia pueulokot, nachoteʼeraka süta nakorolo napüshuaʼa na tooloyuukana.
25 Apünüin kaʼi süchikijee tia yalaiwaʼaya na wayuukana sümaa saalin nalioʼu, naapaakalaka nüchajaruutse Simeón jee müshia Leví, na suwalayuukana Dina, noʼutakalaka naaʼin napüshuaʼa na tooloyuu sulujunakana tia pueulokot, nnojotsü eejüin saaʼin wayuu napüla. 26 Noʼuta aaʼinchi Hamor jee müshia Siquem süka chajaruuta, nayuʼlaka Dina suluʼujee nipia Siquem jee namaakalaka shia. 27 Nantakalaka na wane nüchonniikana Jacob suluʼumüin tia pueulokot, neʼrakalaka na wayuu oʼutunakana aaʼin, nalüʼüjaka korolo eekai kojutuin suluʼujee tü pueulokot saaʼujee mojutuin atumawaa tü nashunuukat. 28 Nasaajaaka süpüshuaʼa tü kasa eejatkat suluʼu tia pueulokot jee tü eejatkat wünaʼapü maʼaka saaʼin anneerü, kaaʼula, paaʼa jee müsia püliikü. 29 Nasütüin sukorolo wayuu, namaasü tepichi sümaʼaleeya jieyuu jee nasaijakalaka nepia na wayuukana.
30 Anuukalaka nünüiki Jacob nümüin Simeón jee nümüin Leví naapaiwaʼaya süchiki tü naainjalakat: «Mojutaʼaleesüjaʼa maʼin tü jaaʼinrakat, naʼürüleechi taya jutuma na wayuu kepiakana suluʼu mmakat tüü, na kananeokana jee müshiʼiya na perizitakana. Nnojoishii wainmain waya, paaʼinweena naya wooʼomüin süpüla nashutuin waaʼu, noʼuteechi aaʼin taya namaʼaleeya na wayuu kepiakana tamaa». 31 Anuupejeʼe nanüiki nümüin Jacob: «Nnojotsü wooʼulaainjatüin müinjatüin tü washunuukat natuma, wayuukaʼa joo maaʼinsat shia».