Chiiruaajatka karaloʼuta Samuel

13 Eejatü wanee nushunuu Absalón, anasüchon maʼin, Tamar sünülia. Müliaka Amnón shiiʼiree, nüchon David Amnón. 2 Ayuuishi Amnón saalinjee shapaain naaʼin sutuma Tamar. Nnojotsü süpüla naaʼinrüin tü naaʼinreekat sümüin tü nushunuukat süka majayülüin shia. 3 Eejachi wanee naʼaleewain Amnón, Jehonadab nünülia, nüchon nia Simeá, chi nuwalakai David. Atüjashi maʼin Jehonadab süpüleerua tü nümaʼülakat. 4 Anuukalaka nünüiki Jehonadab nümüin Amnón: «¿Jamüsü mojuwaikaʼa paaʼin wattaʼawai maalü? Nüchonpejeʼe pia chi aluwataashikai. Püküja tamüin kasain alatüin pümüin». «Müliashireʼe taya shiiʼiree Tamar, tü nushunuukat Absalón, chi tawalakai», nümakalaka Amnón nümüin. 5 Anuukalaka nünüiki Jehonadab nümüin: «Anashi pujuleraale saaʼu tü pücamainkat, ayuuiyaajeechi pia. Anuu tü püküjainjatkat nümüin chi püshikai nüntapa sünain anaʼlawaa pümüin: ‹Puluwataa maa Tamar süntiraiwa teküin. Süʼlakajaale toʼupala tü aʼlakajaanawaikat nayaaluʼu na wayuu ayuuikana, tekeerü shia shikirüle taya›».

6 Nujuleraakalaka Amnón saaʼu tü camakat jee ayuuiyaakalaka nia. Nüntakalaka chi aluwataashikai sünain anaʼlawaa nümüin. Anuujeseʼe nünüiki Amnón nümüin chi laülaashikai: «Püma sümüin Tamar süntaiwa yaamüin, saainjaiwa toʼupala piamasü pan teküin, müinjatü shia maʼaka saaʼin wanee corazón. Shikireechikalaka taya». 7 «Puʼuna nipialuʼumüin Amnón, chi puwalakai. Püʼlakajaajeetkalaka wanee kasa niyaaluʼu», nümakalaka David sümüin Tamar soʼu chajatüin shia shipialuʼu. 8 Suʼunakalaka Tamar nipialuʼumüin Amnón eejachire juʼletüin nia saaʼu tü nücamainkat. Sümaasajaakalaka tü ariinakat, saainjakalaka waneirua pan niyaaluʼu. 9 Süshakatirakalaka tü siʼwaraikat, shiyuʼlaka tü pankat suluʼujee tü siʼwaraikat nuʼupala Amnón. Nnojotpejeʼe nikeein shia, anuu nünüiki: «Jujuʼita jüpüshuaʼaleʼeya». Nojuʼitakalaka napüshuaʼa na wayuu yalajanakana.

10 Anuukalaka nünüiki Amnón sümüin Tamar: «Icheʼera yaamüin tü pankat suluʼumüin tü kuattakat, pikireechikalaka taya». Saapaainjeseʼe Tamar tü pankat, tü makalü aka saaʼin wanee corazón. Shiʼikajaakalaka shia nümüin Amnón suluʼumüin tü kuattakat. 11 Shiʼikajaapa tü pankat nümüin, nütaʼülakalaka shia. Anuu nünüiki sümüin: «Püinkaa tamaa tashunuwaa». 12 Anuukalaka sünüiki nümüin: «Tepayachee, nnojo paainjain tamüin wanee kasa mojusü makalü aka saaʼin tüü. Ayoutüna achikirü tia yaa Israel. Nnojo paaʼinrüin wanee kasa eekai mojuin maʼin maʼaka saaʼin tü paaʼinreekalü amüin. 13 Japüijeerü maʼin taya paaʼinrüle tia tamüin jee mojuteechi pia sümüin wayuu yaa Israel. Puchunta taya nümüin chi aluwataashikai, nnojoleerü taya naʼalijirüin puulia süpüla puʼwayuuseinjatüin taya». 14 Nnojotpejeʼe kasajatüin nümüin Amnón sünüiki Tamar. Nütaüjaakalaka shia, jama katchin maʼin nia suulia. 15 Üttakalaka maʼin naaʼin Amnón sünain Tamar. Alanaʼaleesia tü nüʼürülakat sünain suulialeʼeya tü saalinkat paala nüpüla. «Puʼuna yaajee yaa», nümakalaka sümüin. 16 Anuukalaka sünüiki nümüin: «Tepayachee, nnojo püjünajaain taya. Mojuleejeeria maʼin paaʼinrüle tia suulialeʼeya tü paaʼinrüitpakat tamüin». Nnojotpejeʼe kasajatüin nümüin sünüiki.

17 Neenajakalaka chi jimaʼai aʼyataakai nümüin jee nümakalaka nümüin: «Pujuʼitira wayuukat tüü yaajee jee pütürankajaa soʼu tü kuattakat». 18 Anasü maʼin tü kuluulu sünainjatkat Tamar, maʼwaisia nasheʼinpala na majayünnüü nüchooinkana chi aluwataashikai. Ojuʼitinnüsüjeseʼe shia anooipaʼamüin nutuma chi jimaʼaikai jee nütürankajaakalaka soʼu tü kuattakat. 19 Shijitaka Tamar paliʼi saaʼu shikii, süchatajaakalaka tü süsheʼinkat shiyaawase mojuin saaʼin. Suʼunakalaka sümaa suʼwaatüin jee shiʼitaain sajapü saaʼu shikii.

20 Anuukalaka nünüiki Absalón sümüin niʼraiwaʼaya shia: «¿Nia makaʼa atuma pia Amnón? Tashunuwaa, nnojo püküjain süchiki tüü, jama puwalain nia. Nnojo jülüjakuʼu müin paaʼin süchiki tü alatakat pümüin». Makatakalaka Tamar nipialuʼu Absalón süchikijee tü kasa alatakat sümüin, katatüsü shia sümüiwaʼa. 21 Jashichikalaka maʼin David naapapa süchiki süpüshuaʼa tü kasa alatakat, nnojotpejeʼe naaʼinreein wanee kasa mojeetka atuma naaʼin Amnón, jama niain chi nüchon miyoʼushikai jee aishi maʼin nia nüpüla. 22 Koʼutakalaka neʼe Absalón nuulia Amnón. Üttüsü maʼin naaʼin Absalón nünain Amnón süka mojutuin Tamar nümüin Amnón.

23 Piama juya süchikijee tia, chajana na wayuu aüjüliikana soi naʼanneetse Absalón, suluʼu tü mmakat Baal-Hazor süʼütpaʼa noumain na nüikeyuukana Efraín. Nuunejaakalaka Absalón sünain ekawaa napüshuaʼa na nüchooinkana chi aluwataashikai. 24 Nuʼunakalaka Absalón sünain aapiraa chi aluwataashikai jee nümakalaka nümüin: «Aüjitshisa taya soi taʼanneetse, anashi puʼunule tamaa namaʼaleeya na püchepchiakana». 25 Anuujeseʼe nünüiki chi aluwataashikai nümüin Absalón: «Nnojoleena waya oʼunuin tachonchee, kapüleejeerü pümüin paapüin wamüin tü kasa choʼujaakat wamüin». Nnojoipejeʼe oʼunuin chi aluwataashikai mayaainjeʼe nuchuntuin maʼin shia Absalón nümüin. Achuntapejeʼe chi aluwataashikai nüpüleerua Absalón süpüla anainjatüin nukuwaʼipa. 26 Anuukalaka nünüiki Absalón nümüin chi aluwataashikai: «Nnojoire puʼunajachin, anashijaʼa niale püjütüin Amnón piiʼiraka». «¿Jamüshi niainjachikaʼa oʼunuin Amnón?», nümakalaka chi aluwataashikai nümüin Absalón. 27 Nüjütakalaka chi aluwataashikai napüshuaʼa na nüchooinkana nümaʼaleeya Amnón, naaʼinrüin tia sutuma nuchuntuin maʼin shia Absalón nümüin.

28 Anuukalaka nünüiki Absalón namüin na nüchepchiakana: «Eeja jaaʼin, ‹juʼuta naaʼin Amnón›, tameena amüin jia teʼrapa talatüin maʼin naaʼin sutuma nüsüin wiino. Juʼuteetkalaka naaʼin, nnojo mmoluin jia, jama tayain aluwataain jia, katsüin jaaʼin jee yalayala jaaʼin». 29 Nuʼutunaka aaʼin Amnón natuma na nüchepchiakana Absalón. Ayatüsüjaʼaya naaʼinrüin tü aluwataanakalü anain naya. Neʼraiwaʼaya tia na wane nüchooinkana chi aluwataashikai, naʼluwataayaa namaka waneʼewai nakua saaʼu tü namuulainkat. 30 «Laülaashikalee, oʼutuna aaʼinchii napüshuaʼa na püchooinkana, nnojoishi jaralin apütaain», nümünakalaka David seiwaʼaya wopuluʼu na nüchooinkana. 31 Naapapa tia chi aluwataashikai nüchatajaakalaka nüsheʼin, shiyaawase mojuin maʼin naaʼin. Nujuleraaka mmoluʼu, shaʼwashawatshii na nüchepchiakana nüʼütpaʼa sümaa nachatajaain nasheʼin.

32 Anuukalaka nünüiki Jehonadab nümüin David: «Laülaashikalee, nnojoishii oʼutunuin aaʼin napüshuaʼa na püchooinkana, niaʼala neʼe oʼutunaka aaʼin Amnón. Oʼutinna aaʼinchi nia nutuma Absalón, nukumajatüjülia akuwaʼipa tia soʼujeʼereeya tü kaʼi nütaüjaakalü oʼu Amnón Tamar, tü nushunuukat. 33 Laülaashikalee, nnojoishii oʼutunuin aaʼin napüshuaʼa na püchooinkana, jalia poonoʼolooyaai sümaa sünüiki wayuu, niaʼala neʼe oʼutunaka aaʼin Amnón».

34 Nuʼluwataakalaka Absalón süchikijee tia. Niʼrüinjeseʼe chi wayuu aapirawaikai na wayuu sulujunakana tü pueulokot, sejenain watta naalii wayuu suluʼupünaa tü wopu sejetkat nüsapoʼujee, tü wopu alatakat süʼütpünaa tü uuchikat. 35 «Laülaashikalee, nnaaʼasa antapaatüin na püchooinkana, shiimainjaʼamata tü tamakat pümüin», nümakalaka Jehonadab nümüin chi laülaashikai. 36 Keraapa nünüiki Jehonadab, nantayaa namaka na nüchooinkana chi laülaashikai sümaa naʼyalajüin maʼin. Aʼyalajüshiaʼaya maʼin chi laülaashikai namaʼaleeya na nüchepchiakana. 37 Eekajasaʼa Absalón aʼluwataashi nia nümaʼanamüin Talmái, chi nüchonkai Amihud, chi aluwataakai saaʼu tü mmakat Guesur. Kakalia niʼyalajüin David saalinjee outuin chi nüchonkai. 38 Sülatakalaka apünüin juya süchikijee nuʼluwataain Absalón suluʼumüin tü mmakat Guesur.

39 Nnojoluitpa mojuin maʼin naaʼin David saalinjee outuin Amnón, suchuntaakalaka naaʼin nuʼunajachin sünain anaʼlawaa nümüin Absalón.