Apocalipsis
3 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Sardis: Anuu nünüiki chi kamaʼanakai na akaratshishii meʼrujusalii nümaʼanajeejanakana Maleiwa otta chi kamaʼanakai tü akaratshisükat shüliwala: ‹Tatüjaa aaʼu tü kasa paaʼinrakat, taapüin tü sümakat wayuu süchiki katüin poʼu saashin, outapejeʼe pia. 2 Eeja paaʼin jee pükatchinra naaʼin na apütaakana, na ajachajakana sutuma outaa, nnojotsü pikeraajüin süpüshuaʼa tü piʼyataainkat nümüin chi Tamaleiwasekai. 3 Soto paaʼin waneepia tü kasa aapünakat pümüin jee tü pütchi paapajakat. Ayataʼaya poonooin sümaa jee piyaawajaa suulia paainjala. Nnojoire püchijiraain, anteechi taya maʼaka naaʼin wanee kaʼruwarai antakai sünain aʼluwajaa, nnojoleetkalaka pütüjaain saaʼu jalapüsheechin tantüin.
4 »›Nnojoishii aʼyarülajaain nasheʼin noʼutku na anoujashii chakana Sardis, waraiteenakalaka naya tamaa sümaa kasuuin maʼin nasheʼin, jama nayain anain süpüla aapünaa amüin tia makat. 5 Chi eekai nükanajüin kasuujeerü nüsheʼin jee nnojoleerü tasünneʼerüin nünülia suluʼujee tü karaloʼuta nanüliamaajatkat na wayuu katüinjanakana oʼu, «tatüjaa aaʼu kasaichin nünülia chira wayuukai», meechi taya nuʼupala chi Tashikai jee noʼupala na aapieekana. 6 Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana›.
7 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Filadelfia: Anuu nünüiki chi wulekai akuwaʼipa, chi shiimainshikai, chi kamaʼanakai tü niyaaweinkat David, chi ojutatkai wanee miichoʼu nnojotka süpüla süsürülüin wayuu jee chi asürütkai shia sümaa nnojoluin süpüla sujutalüin shia wayuu: 8 ‹Tatüjaa aaʼu tü paaʼinrüitkat. Tojutalüin püpüleerua wanee puettoʼu nnojotka süpüla süsürülüin wayuu. Tatüjaa aaʼulu matchin paaʼin, oonoopejeʼe pia sümaa tanüiki jee waneepiashi pia tamaa.* 9 Na wayuu nümaajanakana Satanás, wayuu judío naya naashin, nnojoliipejeʼe judíoin naya, alawaa neʼe tü namakat. Tantireena naya pünainmüin, nasapainkeenaka naya pümülatuʼu jee natüjaajeetkalaka saaʼu alin pia tapüla. 10 Sutuma püchecherüin paaʼin maʼaka tachecherüin taaʼin, taaʼinmajeechi pia soʼu tü oora suuʼulakünüinjatkalü oʼu saaʼin wayuu. Alateerü tia sainküinpünaa mmakat, ooʼulaküneerü naaʼin napüshuaʼa na wayuu yaakana kepiain saaʼu tü mmakat. 11 Antamaateechi taya. Ayataʼaya kapülain paaʼin tü kasa anasü paaʼinrakat, nnojoleetkalaka süsütünüin puulia tü kasa anasü aapüneetkat pümüin.*
12 »›Chi eekai nükanajüin meechi nia tatuma maʼaka saaʼin süsaʼa tü aʼwaajüleekat chi Tamaleiwasekai jee nnojoleechi asünneʼenüin nia yalejee. Meerü tashajakai saaʼin nünülia chi Tamaleiwasekai nünain chia wayuukai jee sünülia nupueulose chi Tamaleiwasekai. Tia shia tü Jerusalén Jeketükat, tü ashakatakalü iipünaajee eejee chi Tamaleiwasekai jee tashajeeriaʼaya nünain tü tanülia jeketükat. 13 Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana›.
14 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Laodicea: Anuu nünüiki chi kanüliakai Amén,* chi oonookai sümaa nünüiki Maleiwa jee chi aküjakai pütchi nüchiki, chi shiimainshikai jee chi nukumalakai Maleiwa süpülapünaa kasa süpüshuaʼa: 15 ‹Tatüjaa aaʼulu tü kasa paainjakat, tatüjaa aaʼuchi müin pia maʼaka saaʼin wüin eekai paʼyuluin, nnojoishi pia saamatüin jee nnojoishi pia jaʼin. Kasataalejeseʼe müin pia maʼaka saaʼin wüin eekai saamatüin jee shialejeʼeya wüin eekai jaʼin. 16 Teeteechi pia saaʼujee müin pia maʼaka saaʼin wüin eekai paʼyuluin, nnojoishi pia saamatüin jee nnojoishi pia jaʼin. 17 «Wayuu washirü taya, wainma tawashirüin, nnojotsü kasain choʼujaain tamüin» müshi pia. Nnojotpejeʼe piyaawatawalain saaʼu wayuuwaʼatain pia, alin sümüin wayuu pümüliala, maʼletsein pia, moʼupaʼain pia sümaa masheʼin pia. 18 Piyaʼlaja toulia ooro ojojuushikat süka siki, washireechikalaka pia, piyaʼlaja kuluulu eekai kasuuin maʼin süpüla püsheʼinjatüin shia. Nnojoleechikalaka piʼrüin japülii sutuma masheʼinkuʼu pümüin jee piyaʼlaja toulia shipinase poʼu, pushulereetka shia sünain, koʼupaʼajeechikalaka pia.
19 »›Tachiaain napüshuaʼa na wayuu aikana tapüla jee taküjain namüin mojule wanee kasa natuma. Yalayala paaʼin jee piyaawajaa suulia paainjala. 20 Tataletüin tü miichoʼukat. Chi wayuu aapakai tanüiki jee ojutatkai tamüin tü miichoʼukat, ekeroteechi taya nipialuʼumüin jee ekaajeechi taya nümaa aipaʼa. 21 Chi eekai nükanajüin aikalaajeechi saaʼu tü einasee teinasekat sünain aluwatawaa. Aniisaʼa taya aikalaain saaʼu tü einasee niinasekat chi Tashikai sünain aluwatawaa, jama takanajüin. 22 Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana›».