Chiiruaajatka karaloʼuta namüinjatka na chajanakana Corinto
3 ¿Waküjainjatche jümüin süchikuaʼa jaraliin waya? ¿Ashajüinjanache waya wanee karaloʼuta waküjaka aluʼu jümüin waʼyataaliin nümüin Maleiwa maʼaka naaʼinrüin shia waneinnua wayuu? Nnojottaa. 2 Müshii jia maʼaka saaʼin wanee karaloʼuta eekai washajalain, suluʼushii jia waaʼin. Atüjaana aaʼuchii jia sutuma wayuu maʼleekalia jee müsü saashajeʼennakai aaʼin jüchiki natuma. 3 Müshii jia maʼaka saaʼin wanee karaloʼuta eekai nümaʼanajeejatüin Cristo, ashajuushikat watuma süka waʼyataaliin nümüin Maleiwa. Nnojotsü ashajuushin tia süka «tinta», müsü süshajuushikai aaʼin sükajee nüpülain chi Maleiwa matüjainkai outaa otta nnojotsü ashajuushin joo shia sünain ipa, ashajuushi shia suluʼu saaʼin wayuu.
4 Eesü süpüla waküjain tia nuʼupala chi Maleiwakai nükajee Cristo. 5 Nnojoliipejeʼe atüjain waya sükajee wakuwaʼipa wamüiwaʼa süpüla jülüjainjatüin waaʼin wakajeejatüin wanee kasa, atüjashii waya nutuma Maleiwa. 6 Nikirajüin waya Maleiwa süpüla waküjainjanain süchiki tü pütchi jeketükalü apansaajünüin. Nnojoishii waya aʼyataain nümüin Maleiwa sükajee woonooin sümaa tü Pütchi Aapünakat nümüin Moisés, wountuin waʼyataain nümüin Maleiwa sükajee tü nüpülainkat. Outusü wayuu sünainjee tü Pütchi Aapünakat nümüin Moisés, katapejeʼe soʼu wayuu nutuma Maleiwa sükajee tü nüpülainkat.
7 Tü pütchi outakalü anainjee wayuu, ashajünüsü sünain ipa, anasü maʼin tia pütchikat. Müshiijeseʼe nnojoliin süpüla neirakaain na israelitakana sümüin nuʼupünaa Moisés, jama jorottuin neʼe nuʼupünaa sutuma tia pütchikat. Ajaʼttinnajatpejeʼe tia makat. 8 Mülejeʼeya sukuwaʼipa tia, ¿aashin anaʼleejeerüin maʼin sukuwaʼipa süntapa tü nüpülainkat Maleiwa naaʼumüin wanee wayuu? 9 Analejeʼeya tü pütchi outakalü anainjee wanee wayuu, ¿aashin anaʼleejeerüin maʼin sukuwaʼipa süküjünapa süchiki lotuitpain sukuwaʼipa wayuu? 10 Tü kasa anapuʼukat maʼin sümaiwa, nnojoluitpa anain, jama eeitpain wanee kasa anaʼleeka maʼin suulia. 11 Analejeʼeya maʼin tü kasa ajaʼttinnajatkat, shieematataaka nnojoluin anain tü kasa eejeetkat süpüla kaʼikat süpüshuaʼa.
12 Nnojotkalaka mmoluwaain waaʼin sünain aashajawaa, jama watüjaain saaʼu meerüinña sukuwaʼipa tia. 13 Nnojotsü waaʼinrüin tü naaʼinrapuʼukat Moisés, jamüshijaʼa nia nukoʼolopuʼuin nuʼupünaa süpüla nnojoliinjanain neirakaain na israelitakana sümüin tü pütchi ajaʼttinnajatkat. 14 Süttüsü neʼe nekii, jamüsüjaʼa saashajeʼennüle namüin tü pütchi apansaajünatüjütkalia paala, müshii ayatakai naaʼin koʼuutajanain kuluulu, jama niain neʼe Cristo asünneʼennüin akajee tia kuluutkat. 15 Müsüjaʼaya ayatakai saaʼin koʼoyooin naaʼin na israelitakana süka wanee kuluulu, nnojotkalaka nayaawatüin saaʼu tü pütchi nüshajalakat Moisés, jaʼitayaain saashajeʼennüin namüin. 16 Mapajeʼe süsünneʼennakai aaʼin woulia tia kuluutkat waleʼejüle wachikuaʼa nünainmüin Jehová.* 17 Meʼrujusai Jehová* otta taashisü sukuwaʼipa wayuu eere tü nüpülainkat Jehová* saaʼu. 18 Müsü waakatakai saaʼin tü kuluut woʼuutajanakat paala, müshiijeseʼe müin waya maʼaka saaʼin wanee rouya jaʼyakalü aluʼu tü nuwaralakat Jehová.* Eeʼiratünüsü wakuwaʼipa süpüla müinjanain waya maʼaka naaʼin Maleiwa otta süpüla jaʼyaleeinjatüin maʼin saaʼu wakuwaʼipa tü nuwaralakat maʼaka nücheküin shia wapüleerua Jehová,* chi Meʼrujusaikai.