Éxodo

21 »Püküjaleʼeya namüin tü taluwataakalü anain, tü makat mayaa:

2 »Piyaʼlajüle wanee wayuu hebreo süpüla püchepchiainjachin nia, püchepchiainjachi nia soʼu aipirua juya, shiasaʼa soʼu tü akaratshikat juya taashinjachi nia putuma sümaa nnojoluin kasain nuwalaajüin pümüin. 3 Maʼwayuusere nia soʼu piyaʼlajüin nia, oʼuneechi nümüiwaʼa, eekajasaʼa kaʼwayuusere nia oʼuneerü tü nuʼwayuusekat nümaa. 4 Kaʼwayuusere nia nutuma chi nülaamainkai jee kachonle nia sümüin tü nuʼwayuusekat, niainjachi laülaaka chi nülaamainkai saaʼu nuʼwayuuse chi nüchepchiakai jee naaʼu na nüchonniikana, nnojoleena nümaain naya nuʼunule. 5 ‹Nnojoishi taya taasheein, aishi tapüla chi talaamainkai, aisü tapüla taʼwayuuse jee aishii tapüla na tachonniikana›, nümüle kojuyatua chi achepchieekai, 6 nülaʼinreechi nia chi nülaamainkai sünain puettoʼu jee shiale sünain sot puettoʼu, noototeetka tü nücheʼekat süka oʼojia nuʼupala chi shiimainshikai suluʼu Maleiwain, niʼyataajeechika waneepia nümüin chi nülaamainkai.

7 »Nuiküle nüchon wanee wayuu süpüla achepchieeinjatüin shia, nnojoleerü taashin shia maʼaka taashin wanee achepchiee eekai tooloin. 8 Nnojorüle suwalaʼatain shia tü nuʼwayuusekat chi sülaamainkai süka nnojoluin nücheküin shia jee nuikeere shia nümüin wanee wayuu, nnojotsü süpüla nuikajatüin shia nümüin wanee wayuu nnojoikai israelitain süka nnojoluin lotuin sukuwaʼipa tü naaʼinrakat chi sülaamainkai sümüin. 9 Naapüinjatüle tü nüchepchiakat süpüla nuʼwayuuseinjatüin shia chi nüchonkai, müinjatü sujutu nümüin maʼaka saaʼin sujutu wanee nüchon. 10 Kawalaʼatale shia nutuma,* nnojotsü apaliʼirajüinjatüin shiküin tü palajatkat nuʼwayuuse, ayatajatia naapüin süsheʼin jee ayatüinjachia nia ainkaain sümaa. 11 Nnojorüle naaʼinrüin tia apünüinsükat kasa süpüleerua, taasheerü shia sümaa nnojoluin suwalaajüin nneerü nümüin.

12 »Outajachi wanee wayuu eekai jamajüin atuma wane sümaa nuʼutuin naaʼin. 13 Nuʼutule naaʼin sümaa nnojoluin naaʼinjeein shia jee tooʼulaale sülatüin tia tayakai chi shiimainshikai suluʼu Maleiwain, eeshi süpüla nuʼluwataain suluʼumüin wanee mma taküjeetka achiki nümüin. 14 Naashichijaale wanee wayuu nooʼomüin wane jee nuʼutule naaʼin sümaa naaʼinjeein shia, juʼutajachi aaʼin chi wayuu uwomuyuushikai jaʼitashi ounjulaain nia eere saʼajünüin wanee kasa tamüin. 15 Outajachi wanee wayuu aʼyaatakai nüshi jee aʼyaatakai nii.

16 »Nütaʼünüle wanee wayuu nutuma wane otta nuiküle nia jee nüntünüle aaʼu sünain oikaa nia, oʼutunajachi aaʼin chi makai aainjala.

17 »Outajachi chi eekai nuʼulejüin nüshi sümaa nii.

18 »Natkaale piamashii wayuu jee niʼitünüle wanee nutuma chi wane süka ipa otta nüsheʼetünüle sümaa juʼletaleein nia saaʼu cama saaʼujee mayein nia nutuma, 19 naawalaale mapa chi eʼikaashikai jee nukoyorüle sümaa kapüjiain nia, nnojoleerü kasalajanain tia nümüin chi makai aainjala nümüin. Shiajaʼa neʼe nuwalaajüinjachin nümüin saaʼujee maʼyataain nia, naaʼinrajatü tia waneʼereeya naawalaapa.

20 »Pasalaainjachi atumawaa wanee achepchiee niʼyaajünüle süka wunuʼu sümaa nuʼutunuin aaʼin nutuma nülaamain. 21 Nnojoleechipejeʼe pasalaain atumawaa chi achepchieekai outule nia waneemüin kaʼi jee shiale piama kaʼi süchikijee niʼyaajünüin, jama niyaʼlajuushin nutuma chi nülaamainkai saaʼu nneerü.

22 »Amaliale wanee wayuu ipuolu natuma piamashii wayuu atkaakana jee jemeyurüle shia süpülapünaa tü kaʼi jemeyuluinjatkalü oʼu shia sümaa nnojoluin jaralüin outuin, awalaajüinjachi chi wayuu makai aainjala wanaapünaa sümaa tü nuchuntakat suʼwayuuse tü wayuukot, awalaajüinjachi nia wanaapünaa sümaa tü namakat na laülaashiikana. 23 Outule tü wayuukat jee niale outuin chi süchonkai, outajachi chi uwomuyuushikai saaʼu tia. 24 Shiyuʼnnule noʼu wanee wayuu, ayuʼnnajatü noʼu chi makai atuma nia. Sujuttinnüle nai wanee wayuu, ojuttinnajatü nai chi makai atuma nia. Süshataanüle najapü wanee wayuu ashataanajatü najapü chi makai atuma nia. Süshataanüle nuuʼui wanee wayuu, ashataanajatü nuuʼui chi makai atuma nia. 25 Ishale wanee wayuu nutuma wane, ishainjachi atumawaa chi makai atuma nia. Eʼikaale wanee wayuu nutuma wane, eʼikaainjachi atumawaa chi makai atuma nia. Niʼyaatünüle wanee wayuu nutuma wane, aʼyaatünajachi chi makai atuma nia.

26 »Eere wanee wayuu asheʼetakai noʼu nüchepchia jee moʼuleere nia nutuma, acheküshi taashin nutuma chi nüchepchiakai saaʼujee moʼuleein nia nutuma. 27 Sujutuʼuleere nai wanee achepchiee saaʼujee nüsheʼetüin nia chi nülaamainkai, taashinjachi nutuma chi nüchepchiakai saaʼujee sujutuuin tü naikat.

28 »Nusotunule wanee wayuu jee shiale wanee jierü nutuma wanee paaʼa jee outule naya nutuma, aʼinaʼannajachi chi paaʼakai süka ipa outaleepa nia otta nnojotsü ekünajatüin tü niʼirukukot. Nnojoleetpejeʼe kasalajanain tia nümüin chi kapaaʼaseshikai. 29 Wainmatuwairüle nusotuin wayuu chi paaʼakai sümaa nnojolin jülüjain nia naaʼin chi kapaaʼaseshikai mayaainjeʼe nüchiaanüin paala, nuʼutataarüle naaʼin chi paaʼakai wanee wayuu jee shiale wanee jierü, eʼinaʼannajachi chi paaʼakai süka ipa outaleepa nia jee outajachia chi kapaaʼaseshikai. 30 Suchuntunule nneerü nümüin chi kapaaʼaseshikai süpüla nnojolinjachin outuin nia, nuwalaajüinjatü tü nneerü achuntunakat nümüin. 31 Shiaʼaya aaʼinnajatka nümüin chi kapaaʼaseshikai tü taluwataakalü anain nusotule chi paaʼakai wanee jintüi jee shiale wanee jintut. 32 Nusotunule wanee achepchiee nutuma wanee paaʼa, awalaajüinjachi chi kapaaʼaseshikai apünüin shikii nneerü aainjuushika süka pülaata* nümüin nülaamain chi achepchieekai, aʼinaʼanna münüinjachia chi paaʼakai outaleepaʼaya nia.

33 »Naakatüle wanee wayuu shiʼrouse wanee ishi keʼrouseka paala nüpüla jee nupotule wanee jeketü, nnojorüle niʼitaain tü shiʼrousekat süchikuaʼa, nujutuule wanee paaʼa jee niale wanee püliikü suluʼu tü ishikat, 34 awalaajüinjachi chi kasülekai tü ishikat, awalaajüinjachi sülia nümüin chi kamüʼlüinshikai tü mürütkat, nieechi kamüinka tü mürüt outusükat chi kasülekai tü ishikat. 35 Nusotunule nüpaaʼase wanee wayuu nutuma nüpaaʼase wane, outule nia nutuma, noikajachi chi paaʼa katakai oʼu napaajiraa namüinjatia tü nüliakat. Napaajiraainjatia niʼiruku chi paaʼa outakai. 36 Sütüjaanüle aaʼu nusotuitchin chia paaʼakai waneirua mürüt sümaa nnojolin jülüjain nia naaʼin chi kapaaʼaseshikai, aapüinjachi wanee paaʼa chi kapaaʼaseshikai niiʼiraka chi paaʼa outakai, naapüneechika nümüin chi paaʼa outakai.