Levítico

23 Ayatakalaka naashajaain Jehová nümaa Moisés sümaa nümüin nümüin: 2 «Paashajaa namaa na israelitakana jee püma namüin: ‹Kojutuinjatü jümüin tü miʼiraa jaainjawaikat süpüla juʼwaajüin tayakai Jehová. Anuu tü miʼiraa jaaʼinrawalinjatkat süpüla juʼwaajüin taya:

3 »›Aʼyataainjana jia soʼu aipirua kaʼi, eemeraainjanapejeʼe jia soʼu tü akaratshikat kaʼi, kojutuinjatü tia kaʼikat jümüin. Nnojoishii jia aʼyataainjanain sünain wanee kasa, eemeraainjana jia soʼu kaʼikat tia süka kojutuin tayakai Jehová jümüin jaʼitashii jalain kepiain jia.

4 »›Anuusa tü miʼiraa kojutusü jaaʼinrawalinjatkat süpüla juʼwaajüin tayakai Jehová, jaaʼinrajatü shia soʼu tü kaʼi eʼitaanakat süpüla. 5 Jaaʼinrajatü tü miʼiraa kanüliakat Pascua süpüla kojutuinjachin tayakai Jehová jümüin, jaaʼinrajatü shia shipiʼyuushijaapa soʼu tü palajatkat kashi, poloopa pienchimüin sükalia tia kashikat.

6 »›Jaainjainjatü tamüin tayakai Jehová tü Miʼiraa Saainjünakalü oʼu tü Pan Maʼakasatkat Soolojia soʼu tü polookot jaʼralimüin kaʼi soʼu tia kashikat. Eküinjana jia pan maʼakakat soolojia soʼu akaratshi kaʼi. 7 Outkajaainjana jia soʼu tü palajatkat kaʼi süpüla juʼwaajüin taya. Nnojoishii jia aʼyataainjanain soʼu kaʼikat tia. 8 Aluʼu shiainjaʼa anain juʼutule saaʼin mürüt süpüla jaʼajüin shia tamüin tayakai Jehová soʼu akaratshi kaʼi. Juutkajaweenaka soʼu tü akaratshikat kaʼi süpüla juʼwaajüin taya. Nnojoishii jia aʼyataainjanain›».

9 Ayatakalaka naashajaain Jehová nümaa Moisés sünain maa nümüin: 10 «Paashajaa namaa na israelitakana jee püma namüin: ‹Jüntapa suluʼumüin tü mma taapajatkat jümüin jee jükotchojopa tü jüʼttiakat, jijinnajüinjatü tü palajatkat süchon jüʼttia kanüliaka cebada, jiʼikajaajeetka shia nümüin chi sacerdotekai. 11 Niʼyuunalüinjatü chi sacerdotekai toʼupala tayakai Jehová tü cebada ejinnajuushikat süpüla talatüinjachin taya jümaa. Niʼyuunalüinjatü shia chi sacerdotekai waneemüin kaʼi süchikijee tü kaʼi jeemeraakalü oʼu. 12 Soʼu tü kaʼi jiʼyuunatkalü oʼu tü cebada ejinnajuushikat, aapüinjana jia wanee anneetchon nnojoikai ayuulin, waneeichikai juya süpüla nuʼutunuin aaʼin jee naʼajünüin tamüin tayakai Jehová. 13 Aapüinjana jia piama kilo* ariina yütchonka ojuruttuushika sümaa seita nümaʼaleeya chi anneerü jüsülajakai, aʼajünajatü tia tamüin tayakai Jehová süpüla jemetüin maʼin seejuu tamüin. Asülajüinjanaʼaya jia tamüin wanee litro wiino.* 14 Nnojoishii jia eküinjanain eküülü, nnojoishii jia eküinjanain süchon jüʼttia eʼitujuushika jee süchon jüʼttia irotka, waneʼereeya jiküin jiʼikajaapa tü jüsülajüinjatkat tamüin tayakai chi Jümaleiwasekai. Naaʼinrajatü tia na jüikeyuu eejeenakana jüchikumüin jaʼitashii jalain kepiain naya.

15 »›Ayaawajüinjana jia akaratshisü semaana soʼujee tü sükaliakalü eemerawaa, soʼujee tü kaʼi jiʼikajaakalü oʼu tü cebada ejinnajuushi aʼyuunannakat tamüin, yaawainjatü jutuma sükalia tü semaanakat. 16 Ayaawajüinjana jia jaʼrai shikii kaʼi süchikijee tü akaratshisükat semaana, jiʼikajaajeetka tü süchon jüʼttia irotkat jüsülajüinjatka tamüin tayakai Jehová. 17 Antirüinjana jia piamasü pan jipialuʼujee süpüla shiainjatüin tü asülajuushi aʼyuunannakat tamüin. Jaainjainjatü shia süka piama kilo ariina yütchonka maʼin, jüʼlakajaainjatü shia suluʼu «horno» sümaa kaʼakain shia soolojia. Tia shia tü palajatkat süchon jüʼttia jüsülajüinjatkat tamüin tayakai Jehová. 18 Aapüinjana jia akaratshishii anneetchein eekai waneeinnain juya, nnojoliinjana ayuulin naya, wanee paaʼachon jee müsia piamasü anneerü sümaʼaleeya tü pan jüsülajüinjatkat. Oʼutunajatü aaʼin tia mürütkalüirua süpüla saʼajünüin tamüin tayakai Jehová sümaa tü eküülü jüsülajüinjatkat tamüin sümaʼaleeya tü asülajuushi oʼyotunajatkat soʼu siki süpüla jemetüinjatüin maʼin seejuu tamüin tayakai Jehová. 19 Aapüinjana jia wanee kaaʼulachon saaʼu jaainjala otta piamashii anneetchein eekai waneeinnain juya süpüla anajiraainjanain jia tamaa. 20 Niʼyuunaleerü chi sacerdotekai shiʼiruku tü piamasükalü anneetchein sümaa tü pan aainjuushikat süka tü palajatkat süchon jüʼttia jeʼwekat süpüla shiainjatüin tü asülajuushi aʼyuunannakat tamüin tayakai Jehová. Shia wanee kasa kojutusü aapünajatkat tamüin tayakai Jehová, nümüinjatü shia chi sacerdotekai. 21 Puutkajeʼerüinjana na israelitakana soʼu kaʼikat tia süpüla naʼwaajüin taya, nnojoliinjana jia aʼyataain soʼu tia. Naaʼinrajatü tia waneepia na jüikeyuu eejeenakana jüchikumüin jaʼitashii jalain kepiain naya.

22 »›Jükotchojopa süchon jüʼttia nnojotsü jükotchojüinjatüin tü sotpünaakat jee nnojotsü jükotchojüinjatüin tü apütaakat sünainjee süchon tü jüʼttiakat. Juuʼulaainjatü shia napüla na maʼletsesaliikana jee na naatakana oumain. Tayasa Jehová chi Jümaleiwasekai›».

23 Ayatakalaka naashajaain Jehová nümaa Moisés sümaa nümüin nümüin: 24 «Püma namüin na israelitakana: ‹Siraainjatü kaʼi jaaʼu sünain eemerawaa soʼu tü palajatkat sükalia tü akaratshikat kashi. Outkajaainjana jia süpüla juʼwaajüin taya jaapapa shiʼira tü trompetakat. 25 Nnojoishii jia aʼyataainjanain soʼu tia kaʼikat. Jiʼikajaainjatü tü jüsülajüinjatkat tamüin tayakai Jehová süpüla saʼajünüin tamüin›».

26 Ayatakalaka naashajaain Jehová nümaa Moisés sümaa nümüin nümüin: 27 «Soʼu polooin sükalia tü akaratshikat kashi aainjünajatü tü miʼiraa kanüliakat tü Kaʼi Alatinnakalü oʼu Naainjala na Israelitakana. Outkajaainjana jia süpüla juʼwaajüin taya jee jaʼyainjatü jaaʼu mojuin jaaʼin* saalinjee tü jaainjalakat. Jaapeetka tü jüsülajüinjatkat süpüla saʼajünüin tamüin tayakai Jehová. 28 Nnojoishii jia aʼyataainjanain soʼu kaʼikat tia süka naapajatüin chi sacerdotekai tü jüsülajüinjatkat tamüin tayakai Jehová süpüla sülatinnüinjatüin jaainjala. 29 Oʼutunajachi aaʼin soʼu kaʼikat tia naʼakajee na israelitakana chi eekai nnojolin mojuin naaʼin saalinjee naainjala. 30 Toʼuteechi aaʼin naʼakajee na israelitakana chi eekai niʼyataain soʼu kaʼikat tia. 31 Nnojoliinjana jia aʼyataain. Naaʼinrajatü tia waneepia na jüikeyuu eejeenakana jüchikumüin, jaʼitashii jalain kepiain naya. 32 Siraainjatü tü kaʼikat jaaʼu jeemeraapa, jaʼyainjatü jaaʼu mojuin jaaʼin saalinjee tü jaainjalakalü aliikajee soʼu mekietsalüin sükalia tü kashikat. Eemeraainjana jia aliikajee waneemüinreʼeya kaʼi aliikapa kaʼikat».

33 Ayatakalaka naashajaain Jehová nümaa Moisés sümaa nümüin nümüin: 34 «Anuu pünüikinjatü namüin na israelitakana: ‹Jaaʼinrajatü tü Miʼiraa Kalumaseyaʼawaikalü oʼu na israelitakana soʼu polooin jaʼralimüin sükalia tü akaratshikat kashi süpüla taʼwaajünüin tayakai Jehová, akaratshinjatü kaʼi tia miʼiraakat. 35 Aaʼinrajana jia wanee miʼiraa kojutuka maʼin soʼu tü palajatkat kaʼi, nnojoishii jia aʼyataainjanain. 36 Jaʼajüinjatü soʼu siki tü jüsülajüinjatkat tamüin tayakai Jehová soʼunnaa tü akaratshikat kaʼi. Soʼu tü mekiisatkat kaʼi jaainjainjatü wanee miʼiraa kojutuka maʼin jee jaʼajüinjatü soʼu siki tü jüsülajüinjatkat tamüin tayakai Jehová. Kojutuinjatü maʼin jümüin tü outkajawaakat, nnojoishii jia aʼyataainjanain.

37 »›Shia jaaʼinrawalinjatka miʼiraakat tia tamüin tayakai Jehová, kojutuinjatü maʼin shia jümüin wanaa sümaa jaapüin tü jüsülajüinjatkat süpüla saʼajünüin soʼu siki tamüin tayakai Jehová, tü asülajuushi aʼajünajatkat, tü eküülü jüsülajüinjatkat jee müsia tü oʼyotunajatkat tamüin tayakai wanaapünaa sümaa sükalia tü süsülajünüinjatkalü oʼu. 38 Ayatajatiaʼaya jaapüin tia tamüin tayakai Jehová sümaʼaleeya tü jaapakat soʼu jeemeraain, tü jüsülajakat tamüin, tü jaapakat saaʼu jaapüin jünüiki jee tü jaapakat süka jaaʼin jümüiwaʼa. Jüsülajüinjatiaʼaya tia tamüin tayakai Jehová. 39 Jaainjainjatü wanee miʼiraa tamüin tayakai Jehová soʼu akaratshi kaʼi, soʼu polooin jaʼralimüin sükalia tü akaratshikat kashi, jaainjainjatü tia jükotchojopa süchon jüʼttia. Siraainjatü kaʼi jaaʼu sünain eemerawaa soʼu tü palajatkat kaʼi, siraainjatia kaʼi jaaʼu sünain eemerawaa soʼu tü mekiisatkat kaʼi. 40 Soʼu tü palajatkat kaʼi akotchojüinjana jia süchon wunuʼu anakat maʼin, alanatüna, sütüna wunuʼu küʼikat maʼin jee müsia sütüna tü wunuʼu kanüliakalü álamo chakat süpaʼa tü nasapüshiikat, talateenakalaka maʼin jia soʼu akaratshi kaʼi toʼupala tayakai Jehová chi Jümaleiwasekai. 41 Jaaʼinrajatü miʼiraakat tia süpüla juʼwaajüin tayakai Jehová soʼu akaratshi kaʼi süpüla juyakat. Jaaʼinrajatü shia soʼu tü akaratshikat kashi. Naaʼinrajatü shia waneepia na jüikeyuu eejeenakana jüchikumüin. 42 Kalumaseyaʼawaliinjana jia soʼu akaratshi kaʼi. Kalumaseyaʼawaliinjana napüshuaʼa na israelitakana 43 süpüla natüjaain saaʼu na jüikeyuu eejeenakana jüchikumüin kalumaseyaʼawaliin tatuma na israelitakana süchikijee tayuʼluin naya suluʼujee tü mmakalü Egipto. Tayasa Jehová chi Jümaleiwasekai›».

44 Naashajaakalaka Moisés namaa na israelitakana süchiki tü miʼiraa aainjünawalinjatkat süpüla nuʼwaajünüin Jehová.