Chiiruaajatka karaloʼuta Samuel
23 Anuu nünüiki David süpülapünaa outaa:
«Anuu nünüiki David, chi nüchonkai Jesé,
nünüiki chi wayuu kojutukai atumawaa,
chi aneekünakai nutuma chi Nümaleiwasekai Jacob,
chi eeʼirajünakai achiki sutuma wayuu, chi anakai ashoʼu sümüin wayuu.
2 Naapüin tamüin Jehová tü nüpülainkat süpüla taküjainjachin nünüiki.
Nüküjain tamüin tü tanüikinjatkat.
3 Anuu nünüiki tamüin chi Namaleiwasekai na israelitakana,
chi makai aka saaʼin Wutai namüin na israelitakana:
‹Lotule nukuwaʼipa wanee wayuu aluwataakai saaʼu wayuu
jee kojutule Maleiwa nümüin,
4 müshi nia maʼaka saaʼin nuwarala chi kaʼikai wattaʼa maalü
jutatuuire tü sirumatuʼukat.
Müshi nia maʼaka saaʼin nuwarala chi kaʼikai süchikijee süʼitüin juya, susotokolo atuma wüitshii.
Müsü nukuwaʼipa wanee wayuu lotokoi akuwaʼipa sünain aluwatawaa›.
5 Müsü nakuwaʼipa na tapüshikana nümüin Maleiwa.
Nüpansaajüin Maleiwa tamaa wanee pütchi süpülajatkat kaʼi süpüshuaʼa,
yaawasü maʼin nutuma tia pütchikat otta nikeraajeerü shia.
Oʼttaajeechi taya sutuma tia pütchikat otta talateerü maʼin taaʼin sutuma,
müshiijeseʼe anakuwaʼipalin na tapüshikana nutuma Maleiwa.
6 Eekajasaʼa na wayuu nnojoliikana kasain anain apüla, meena nojunaanakai aaʼin maʼaka sujunaanüin wanee wunuʼu eekai keipüsein,
tü nnojotkat saapaain wayuu süka sajapü.
7 Süpüla naapaainjatüin wanee wayuu tia wunuʼu keipüsesükat,
eeinjatü wanee kachueera najapuluʼu otta wanee shipi lanza,
saʼajüneetkalaka süpüshuaʼa tü wunuʼu keipüsesükat yala eere shia».
8 Anuu nanülia na wayuu nümaajanakana David, na yalayalakana maʼin aaʼin sünain atkawaa: Joseb-Basébet, wanee wayuu tahkemonita, nekiipüʼü nia na apünüinshii wayuu yalayalakana maʼin aaʼin sünain atkawaa. Nuʼuta aaʼinchinka 800 wayuu süka tü nülanzainkat. 9 Chi wane wayuu yalayalakai maʼin aaʼin sünain atkawaa nia Eleazar, Dodó nünülia chi nüshikai, Ahohí nünülia chi nutuushikai. Soʼu wanee kaʼi noutkajaakalü oʼu na filisteokana süpüla atkawaa namaa na israelitakana, ojuyaajünüshii na filisteokana natuma na apünüinshii wayuu yalayalakana aaʼin sünain atkawaa nümaajanakana David, eejachiaʼaya Eleazar namaa naya wayuukana. Apantajaapejeʼe na israelitakana napüleerua na filisteokana soʼu tia kaʼikat, 10 nnojoipejeʼe apantajaain Eleazar, nuʼutakalaka naaʼin watta naalii filisteo mapüsaleepaʼaya tü nütünakat jee süchechejaapa najapü sünain tü chajaruuta najapulujutkat. Akanajüshii naya nutuma Jehová soʼu tia kaʼikat. Oʼunushii nüchiiruajee Eleazar na surulaatkana süpüla nashanüin tü kasa eejatkat namaʼana na outushiikana.
11 Chi wane wayuu yalayalakai maʼin aaʼin sünain atkawaa nia Samá, chi nüchonkai Agué, chi hararitakai. Apantajaayaa müshii na surulaat israelitakana napüleerua na filisteokana wanaa sümaa noutkajaain na filisteokana suluʼu tü mmakat Lehí. Eejatü wanee yüüja suluʼu tia mmakat apünajünaka aluʼu lenteja. 12 Nnojoipejeʼe apantajaain Samá, ayatüshia nia pasanain sünain tü yüüjakat jee naaʼinmajüin shia noulia na filisteokana, nuʼuta aaʼinchii naya saaʼujee, nükanajakalaka Jehová soʼu kaʼikat tia.
13 Noʼunakalaka apünüinshii wayuu naʼakajee na apünüinkana nekii shikiipüʼü surulaat sünain anaʼlawaa nümüin David suluʼumüin tü koʼushii chajatkat suluʼu tü mmakat Adulam. Oʼunushii naya sünain anaʼlawaa nümüin wanaa sümaa süshannüin aʼttiee. Noʼonookalaka waneinnua surulaat filisteo süpaʼa tü patajatshii chajatkat Refaím. 14 Yalajachikalaka David suluʼu tü koʼushiikat otta eejana waneinnua surulaat filisteo chaa Belén. 15 Anuujeseʼe nünüiki David: «Kasataalejeseʼe tasüin yootchonyaakaijeʼe wüin suluʼujeejatü tü ishi chakat süʼütpaʼa soʼu Belén». 16 Oʼunushiijeseʼe na apünüinshii wayuu yalayalakana aaʼin sünain atkawaa sünain ashutaa naaʼu na filisteokana. Najaʼitaka wüin suluʼujee tü ishi eejatkat süʼütpaʼa soʼu Belén, nalüʼüjaka shia nümüin David. Nnojotpejeʼe nüseein David tia wüinkat, niʼyotoko shia mmoluʼu nuʼupala Jehová. 17 «Jehovákalee, nnojorüleejaʼa tasüinjatüin wüinkat tüü, jama noʼutunataainnainje aaʼin na wayuu antirakana shia. Tasüle wüinkat tüü müshijaʼa tasakaijaʼa saaʼin nasha wayuukana naainnua», nümakalaka David. Nnojotkalaka nüsüin shia David. Tia shia tü naaʼinrakat na apünüinshii wayuu yalayalakana maʼin aaʼin sünain atkawaa.
18 Niakaʼa Abisái nekiipüʼüin apünüinshii wayuu atüjakana atkawaʼayaa. Abisái süchon nia Zeruyá, nuwala nia Joab. Nuʼuta aaʼinchinka Abisái 300 wayuu süka tü lanza eejatkat nümaʼana. Eʼnnaajünüshi maʼin Abisái maʼaka neʼnnaajünüin naya apünüinshii wayuu atüjakana maʼin atkawaa. 19 Mayaainjeʼe niʼnnaajünüin maʼin Abisái noulia na apünüinshii wayuu nümaajanakana otta nekiipüʼüin nia, nnojoishi nia alanaʼaleeinña maʼin noulia na apünüinshii wayuu atüjakana maʼin atkawaa.
20 Yalayala aaʼinchi maʼin Benaya, chi nüchonkai Jehoiadá, watta saalii kasa nuuntaka suluʼu tü mmakat Cabzeel. Nuʼuta aaʼinchii na piamashiikana nüchonnii Ariel, chi chejeʼewaikai Moab. Nikerotkalaka suluʼumüin wanee ishi soʼu wanee kaʼi eejatka oʼu nieve, nuʼutaka naaʼin wanee león. 21 Oʼutuna aaʼinchiaʼaya nutuma Benaya wanee wayuu Egiptojeʼewai, miyoʼusenuu maʼin chia wayuukai. Wunuʼu neʼe eejatka nümaʼana Benaya, eekajasaʼa chi wayuu Egiptojeʼewaikai eejatü nümaʼana wanee lanza, eejiraapejeʼe Benaya nümaa chia wayuukai. Nüsütüinjeseʼe tü lanzakat nuulia, nuʼutaka naaʼin süka. 22 Tia shia tü naaʼinrakat Benaya, chi nüchonkai Jehoiadá. Eʼnnaajünüshi maʼin nia maʼaka neʼnnaajünüin na apünüinshii wayuu yalayalakana maʼin aaʼin sünain atkawaa. 23 Mayaainjeʼe niʼnnaajünüin Benaya naʼakajee na apünüinkana nekii wayuu nekiipüʼükana surulaat, nnojoishi nia alanaʼaleeinña noulia na apünüinshii wayuu yalayalakana maʼin aaʼin sünain atkawaa, aneekünapejeʼe nia nutuma David süpüla nuwaariaseinjachin nia.
24 Asahel noʼutku na apünüinkana nekii süʼlaülajana surulaat, Asahel nuwala Joab. Eejachiaʼaya Elhanán naʼaka naya wayuukana, chi nüchonkai Dodó, chi chejeʼewaikai Belén, 25 eejachiaʼaya Samá otta Elicá, chejeʼewalii naya Arod, 26 Hélez, chi chejeʼewaikai Bet-Pélet,* Irá chi nüchonkai Iqués, chi chejeʼewaikai Tecoa, 27 Abí-Ézer, chi chejeʼewaikai Anatot, Mebunái, chi husatitakai, 28 Zalmón, chi ahohítakai, Maharái, chi chejeʼewaikai Netofá, 29 Héleb, chi nüchonkai Baaná, chi chejeʼewaikai Netofá, Ittái chi nüchonkai Ribái, chi chejeʼewaikai suluʼujee tü mmakat Guibeá, tü noumainkat na nüikeyuukana Benjamín, 30 Benaya, chi chejeʼewaikai Piratón, Hidái wanee wayuu kepiakai süʼütpünaa tü luwopu chakat Gaas, 31 Abí-Albón, chi chejeʼewaikai Bet-Arabá, Azmávet, chi chejeʼewaikai Bahurim, 32 Eliahbá, chi chejeʼewaikai Saalbim, na nüchonniikana Jasén, Jonatán, 33 Samá, chi hararitakai, Ahiam, chi nüchonkai Sarar, chi hararitakai, 34 Elifélet, chi nüchonkai Ahasbái, chi chejeʼewaikai Maacá, Eliam chi nüchonkai Ahitofel, chi chejeʼewaikai Guiló, 35 Hezró, chi chejeʼewaikai suluʼujee tü mmakat Carmelo, Paarái, chi chejeʼewaikai suluʼujee tü pueulokot Arab, 36 Igal, chi nüchonkai Natán, chi chejeʼewaikai Zobá, Baní, wanee nülüin Gad, 37 Zélec, chi ammonitakai, Naharái, chi beerotitakai, nia alüʼüjawaika Naharái tü nütkaayakat Joab, chi süchonkai Zeruyá, 38 Irá, chi itritakai, Gareb, chi itritakai 39 otta eejachi Urías, chi hititakai. Apünüin nekii akaratshimüin napüshuaʼa naya wayuukana.