Jueces

6 Naainjakalaka süchikuaʼa na israelitakana tü kasa mojukat nümüin Jehová. Naapüinjeseʼe Jehová nekii na israelitakana namüin na madianitakana, müliashii naya atumawaa soʼu akaratshi juya. 2 Müliakalaka naaʼin na israelitakana natuma na madianitakana, müshiijeseʼe nounjulaain na israelitakana uuchoʼu, suluʼu koʼushii otta eere kapüleein sümüin wayuu ekeroloo. 3 Napünajawaipa na israelitakana, ashutuna aaʼuchii naya natuma na madianitakana, na amalequitakana otta natuma na wayuu wüinpüjeʼewaliikana. 4 Oʼonoʼowaishii naya wayuukana süpüla nashutuinjanain naaʼu na israelitakana, najaʼttirüin tü napünajüinkat na israelitakana, najaʼttiraleeinña shia suluʼumüinreʼeya tü mmakat Gaza, nnojotsü kasain napüteʼerüin napüla na israelitakana süpüla neküin, nalüʼüjain anneerü, paaʼa otta püliikü. 5 Antawaishii naya sümaa namüʼlüin, kepiayaashii naya miichi aainjuushikat süka loona, watta maʼin naalii maʼaka wattain maʼin saalii kaashapa. Watta maʼin saalii tü kameeya eejatkat namaʼana otta watta maʼin naalii naya wayuukana, isasü süchiki wayuu shiyaawajüinjanain naya. Antawaishii naya süpüla najaʼttirüinjatüin tü kasa eejatkat chaa Israel. 6 Nnojorüleesia kasain eejatüin namaʼana na israelitakana natuma na madianitakana. Nachuntakalaka maʼin na israelitakana kaalinwaa nümüin Jehová.

7 Wanaa sümaa nachuntuin maʼin na israelitakana nükaalinjain naya Jehová noulia na madianitakana, 8 nüjütaka Jehová nanainmüin wanee nünüikimaajachi sümaa nümüin namüin: «Anuu nünüiki Jehová, chi Namaleiwasekai na israelitakana: ‹Tayuʼluin jia suluʼujee tü mmakat Egipto eere achepchieepuʼuin jia. 9 Takaalinjain jia noulia na wayuu chajanakana Egipto otta noulia na wayuu müliakana atuma jia. Tayuʼluin na jüʼünüükana suluʼujee tü noumainkat, taapakalaka tü noumainkat jümüin. 10 Anuu tanüiki jümüin: «Tayakai Jehová taya chi Jümaleiwasekai. Nnojoluinjatü juʼwaajüin namaleiwase na amoreokana, na wayuu kottiraakana jümaa suluʼu mmakat tüü». Nnojoliipejeʼe jia oonooin sümaa tanüiki›».

11 Nüntakalaka mapa chi aapiee nümaʼanajeejachikai Jehová jee nüikalaaka suupünaa tü wunuʼu miyoʼu chajatkat suluʼu tü pueulokot Ofrá, nukorolo Joás tia wunuʼukot, chi nülüinkai Abí-Ézer. Chajachikalaka Gedeón chi nüchonkai Joás aʼyaajüin tü trigokalü eere süchüijünüin tü uuwakat, naaʼinrüin tia Gedeón süpüla nnojoluinjatüin neʼrüin na madianitakana tü trigokot. 12 Niiʼiyalaakalaka chi aapiee nümaʼanajeejachikai Jehová nümüin Gedeón sümaa nümüin nümüin: «Eeshi Jehová pümaa pia wayuu katchinkai maʼin». 13 Anuukalaka nünüiki Gedeón nümüin: «Jalia taya paaʼin taʼlaüla, shiimainrejeʼe eein Jehová wamaa, ¿jamakaʼa weʼraka wamüliala? ¿Jalayaai weʼrüin tü kasa pülasü naaʼinrapuʼukat Maleiwa napüleerua na watuushinuukana? ‹Nia Jehová ayuʼlaka waya Egiptojee›, mapuʼusü nanüiki wamüin. Niyüülajapejeʼe waya Jehová maaʼulu jee naapa ekiichii waya namüin na madianitakana». 14 Niirakaakalaka Jehová nümüin Gedeón sümaa nümüin nümüin: «Anii joo pia tajütüin, wayuu katchinshi maʼin pia, puʼuna sünain akaalinjaa na israelitakana noulia na madianitakana». 15 Anuujeseʼe nünüiki Gedeón nümüin: «Jalia taya paaʼin Jehová, ¿jamakuwaʼipaliinjana süpüla takaalinjain na israelitakana? Naya maawainreeka na tapüshikana* naʼakajee na nüikeyuukana Manasés otta taya maawainreeka naʼakajee na wayuu nipialujunakana chi tashikai». 16 Anuukalaka nünüiki Jehová nümüin: «Eejeechi taya pümaa, pükanajeenakalaka na madianitakana, meechi pütkaajiraakai aaʼin nümaa waneeshia wayuu».

17 Anuujeseʼe nünüiki Gedeón nümüin: «Shiimainrejeʼe eein pia tamaa, paainja wanee kasa tayaawateetka akajee piain yootuin tamaa. 18 Yaashia pia paala, oʼunaleejeechia pia tantirapa pümüin tü kasa taapeekat pümüin sümaa teʼitaain shia pümülatuʼu». «Yaajeechia taya püpüla», nümakalaka chi aapieekai nümüin. 19 Nikerotkalaka paülüʼümüin Gedeón, nuʼuta aaʼinchi wanee kaaʼulachon, nüʼlakajaaka nia, naainjakalaka pan maʼakasat soolojia süka poloo waneemüin kilo* ariina. Niʼitaaka tü asalaakat suluʼu wanee kanaasüta jee niʼyotoko tü shirakat suluʼu wanee wayeeta. Niʼikajaaka shia nümüin chi aapieekai sümaa niʼitaain shia nümülatuʼu suupünaa tü wunuʼu miyoʼukat.

20 Anuu tü aküjünakat nümüin Gedeón nutuma chi aapiee nümaʼanajeejachikai chi shiimainkai suluʼu Maleiwain: «Paapaa tü asalaakat sümaʼaleeya tü pan maʼakasatkat soolojia, piʼitaajeetkalaka shia saaʼu tüsa ipa miyoʼukat, piʼyoteetkalaka tü shirakat saaʼu». Ayatüsüjaʼa naaʼinrüin Gedeón tia. 21 Eejatkalaka wanee wunuʼu najapuluʼu chi aapiee nümaʼanajeejachikai Jehová. Nipettaka tü asalaakat sümaa tü pan maʼakakat soolojia süka shiʼichi tü wunuʼu nümaʼanajatkat. Suchuwanajaaka tü ipakat, ajaʼttaleesia tü asalaakat sümaa tü pan maʼakasatkat soolojia. Matüʼülaa nümaka chi aapiee nümaʼanajeejachikai Jehová. 22 Niyaawatakalaka saaʼu Gedeón yootuin nia nümaa wanee aapiee nümaʼanajeejachikai Jehová.

Anuukalaka nünüiki: «Aluʼuwatshia taya süka teʼrüin nuʼupünaa chi aapiee nümaʼanajeejachikai Jehová. Jehovákalee, pia Señotkai jee Laülaashikai saaʼu kasa süpüshuaʼa, teʼrüin chi aapiee pümaʼanajeejachikai». 23 Anuukalaka nünüiki Jehová nümüin: «Kasataalejeseʼe jimatüin paaʼin. Nnojo mmoluin pia, nnojoleechi pia outuin». 24 Nüpaʼawajaakalaka Gedeón ipa nümüin Jehová shiyaawase kojutuin nia nümüin, ayatüsüjaʼa Jehová-Salom* münüin tia ipakat maaʼulu yaa. Ayatayülia shia suluʼu tü pueulokot Ofrá, eejeʼewaliire na nüikeyuukana Abí-Ézer.

25 Anuukalaka nünüiki Jehová nümüin soʼu aikat tia: «Pümaa chi nüpaaʼasekai chi püshikai, chi paaʼa toolo* akaratshikai ouyase. Pujuttireetka tü aʼajüleekat kasa nümüin Baal eeka nümaʼana chi püshikai otta püshotteetka tü wunuʼu shiyaawasekat tü maleiwayaasü kanüliakat Aserá, tü süʼütpaʼakat tü aʼajüleekat. 26 Pukumaja wanee aʼajülee saaʼu uuchikat tüü süka ipa, anainjatü maʼin sukumajia putuma, jama tamüinjatüin tayakai Jehová, chi Pümaleiwasekai. Puʼuteetka naaʼin chi paaʼachonkai sümaa piʼitaain nia saaʼu tü siki piʼyutkat sünainjee tü wunuʼu püshottokot, tü wunuʼu shiyaawasekat tü maleiwayaasü kanüliakat Aserá, paʼajeechikalaka tamüin chi paaʼachonkai». 27 Nüneekalaka Gedeón polooshii wayuu naʼakajee na wayuu aʼyataakana nümüin jee naaʼinraka tü nuluwataakalü anain nia Jehová. Naaʼinrüin Gedeón tia saʼwai sutuma mmoluin nia neema na wayuu nipialujunakana chi nüshikai otta mmotshi nia neema na wayuu sulujunakana tia pueulokot.

28 Nachijiraakalaka eeiwa aikat na wayuu sulujunakana tia pueulokot, neʼraka sujuttinnüin tü aʼajüleekat wanee kasa nümüin Baal, neʼrüin süshottunuin tü wunuʼu shiyaawasekat tü maleiwayaasü kanüliakat Aserá, tü süʼütpaʼajatkat tü aʼajüleekat otta neʼrüinña naʼajünüin chi paaʼachonkai saaʼu tü aʼajülee akumajünakat. 29 Nasakiijiraayaa namaka sünain maa: «¿Jaratche maka aainjala?». «Nia kasitka Gedeón, chi nüchonkai Joás», namaka süchikijee nasakirüin süchiirua tia. 30 Anuukalaka nanüiki naya wayuu sulujunakana tia pueulokot nümüin Joás: «Paapa nikii wamüin chi püchonkai süpüla woʼutuin naaʼin, nujuttirüin tü aʼajüleekat kasa nümüin Baal jee nüshottirüin tü wunuʼu shiyaawasekat Aserá, tü süʼütpaʼajatkat tü aʼajüleekat». 31 Anuujeseʼe nünüiki Joás namüin na jashichikana nümüin: «¿Choʼujaashiche jusoutuinjanain naaʼu Baal? ¿Choʼujaashiche jükaalinjain nia? Chi eekai nusoutuin naaʼu Baal oʼutuneechi aaʼin müinmaʼa yaa. Shiimainrejeʼe maleiwain Baal asouteechi nia naaʼujiraa, jama shiain ojuttinnüin tü aʼajüleekat wanee kasa nümüin». 32 Jerubaal* nümakalaka Joás nümüin Gedeón soʼuleʼeya kaʼikat tia. Anuujeseʼe nünüiki Joás: «Anashi niale Baal asoutuin naaʼujiraa, jama shiain ojuttinnüin tü aʼajüleekat wanee kasa nümüin».

33 Paaʼinwakalaka na madianitakana namaa na amalequitakana otta namaa na wayuu wüinpüjeʼewaliikana. Nalataka tü süchikat Jordán jee noʼonookoloka süpaʼamüin tü patajatshii chakat Jezreel. 34 Süntakalaka tü nüpülainkat Jehová naaʼu Gedeón. Niʼyalajitkalaka Gedeón suʼuwa anneerü, noutkajaakalaka na nüikeyuukana Abí-Ézer jee noʼunakalaka nümaa Gedeón. 35 Nüjütakalaka Gedeón wayuu suluʼupünaa tü mma eejanale kepiain na nüikeyuukana Manasés, noutkajaakalaka na nüikeyuukana Manasés jee noʼunakalaka nümaa Gedeón. Nüjütüinña Gedeón wayuu suluʼupünaa tü mma eejanale kepiain na nüikeyuukana Aser, na nüikeyuukana Zabulón otta na nüikeyuukana Neftalí jee nantiraakalaka nümaa Gedeón.

36 Anuukalaka nünüiki Gedeón nümüin chi shiimainshikai suluʼu Maleiwain: «Pükaalinjainjanale na israelitakana takajee maʼaka püküjain shia tamüin, 37 anashi paainjale tüü: teʼitaajeerü wanee anneeruuta eere suwaajünüin süchon aʼttiee, chüʼrüle tü anneeruutakat sutuma tü joojotshikat sümaa josoin tü mmakat, tayaawateerü aaʼu püneeküin taya süpüla pükaalinjain na israelitakana maʼaka püküjain shia tamüin». 38 Ayatüsüjaʼa ekeraajüin tü nuchuntakat Gedeón. Nütamaakalaka wattachon jee nuʼuluuchajaakalaka tü anneeruutakat, miyoʼu maʼin wüin eejatkat sünain, pirataleesia sutuma wanee kuriia miyoʼu. 39 Anuujeseʼe nünüiki Gedeón nümüin chi shiimainshikai suluʼu Maleiwain: «Nnojo jashichin pia tamüin, tachuntuin paala pümüin wanee kasa. Paainja wanee kasa pülasü sükajee tü anneeruutakat süpüla tayaawatüin saaʼu eein pia tamaa. Anasü chüʼrüle tü mmakat sutuma tü joojotshikat, shiainjatpejeʼe josoin tü anneeruutakat». 40 Ayatüsüjaʼa müin sukuwaʼipa tia nutuma Maleiwa soʼuleʼeya aikat tia. Chüʼtsü tü mmakat sutuma tü joojotshikat, josopejeʼe tü anneeruutakat.