Palajatka karaloʼuta Samuel
11 Nuutkajaakalaka Nahás, wanee wayuu ammonita namaa waneinnua wayuu süpüla nashutajanain naaʼu na wayuu chajanakana suluʼu tü mmakat Jabés, tü chakat Galaad. Anuujeseʼe nanüiki napüshuaʼa na wayuu chajanakana Jabés nümüin Nahás: «Püküjaʼaya wamüin nnojoleenain jamajüin waya putuma, püchepchieenaka waya». 2 Anuujeseʼe nünüiki Nahás namüin: «Nnojoleena jamajüin jia tatuma tayuʼrule tü joʼu jikialuʼukat, taapülijeenaka napüshuaʼa na israelitakana sükajee tia». 3 Anuujeseʼe nanüiki na laülaashiikana suluʼu tü mmakat Jabés nümüin Nahás: «Anashii paawarüle waya soʼunnaa akaratshi kaʼi, wachuntaiwa kaalinwaa namüin napüshuaʼa na israelitakana. Shiasaʼa nnojorüle jaralüin antüin sünain akaalinjaa waya, püchepchieenajaʼamata waya». 4 Naʼyalajayaa namaka napüshuaʼa na wayuu chajanakana suluʼu tü mmakat Guibeá eere kepiain Saúl naapapa tü namakat na wayuu sejenakana Jabés.
5 Anuujeseʼe nünüiki Saúl nüleʼejapa süchikijee nikajeʼerüin tü nüsachiratkat: «¿Kasakai alataka namüin na wayuukana makaʼa naʼyalajayaa namüin?». Aküjünüsüjeseʼe nümüin tü namakat na wayuu antapaakana suluʼujee tü mmakat Jabés. 6 Süntakalaka tü nüpülainkat Maleiwa naaʼumüin Saúl naapaiwaʼaya tia. Naashichijaakalaka saalinjee tü aaʼinnajatkat namüin naya wayuukana. 7 Nuʼutakalaka Saúl naaʼin piamashii paaʼa tooloyuu, nuchonoojoko naya. Nuluwataainjeseʼe tü paaʼairukukat suluʼupünaa süpüshuaʼa noumain na israelitakana, nuluwataain tia namaa waneinnua wayuu. Anuu nanüiki naya wayuukana eepünaale nalatüin: «Shieerü alatakat tüü sümüin nüsachirat chi wayuu nnojoikai paaʼinwain nümaa Saúl otta nümaa Samuel». Nütanatkalaka Jehová naaʼin naya wayuukana süpüla naapaainjanain sümaa tia pütchikat, paaʼinwakalaka napüshuaʼa nümaa Saúl. 8 Niyaawajüinjeseʼe Saúl na wayuukana suluʼu tü mmakat Bézec, eejana 300.000 israelita otta 30.000 na nüikeyuukana Judá. 9 Anuujeseʼe pütchi namüin na antakana sünain achuntaa kaalinwaa: «Anuu tü jüküjainjatkat namüin na wayuu chakana suluʼu tü mmakat Jabés, tü chakat Galaad: ‹Akaalinjüneena jia wattaʼa kaleʼu›». Oʼunushiijeseʼe naya wayuukana, naküjakalaka tia pütchikat namüin na wayuu sulujunakana tü mmakat Jabés. Talatakalaka maʼin na wayuukana naapapa tia. 10 Anuujeseʼe nanüiki na wayuu chajanakana suluʼu tü mmakat Jabés namüin na ammonitakana: «Aluʼu jüchepchieenainjaʼa waya wattaʼa, jaaʼinreetkalaka waka tü jaaʼinreekalü amüin».
11 Shiasaʼa waneemüin kaʼi, nükatalaka Saúl na wayuu nümaajanakana, apünüin neʼipapaʼa nutuma. Nashutakalaka naaʼu na ammonitakana eeiwaʼaya aikat,* nantaka pasanainmüinreʼeya nanain. Kaleʼusü kaʼikat naaʼu sünain oʼutaa naaʼin na ammonitakana, walakataʼatshii neʼe atumawaa na eekai isajüin jee napantajaayaa namaka waneʼewai nakua. 12 «¿Jaraliikai na wayuu ayoutakana paala süchiki niainjachin Saúl aluwataain waaʼu? Anashii naapünüle ekii wamüin woʼutaiwa naaʼin», namakalaka na wayuukana nümüin Samuel. 13 Anuujeseʼe nünüiki Saúl: «Nnojoishi oʼutunajachin aaʼin wanee wayuu soʼukai, jama niain Jehová oʼtteʼerüin soʼukai na israelitakana».
14 Anuujeseʼe nünüiki mapa Samuel namüin na israelitakana: «Anashii woʼunule suluʼumüin tü mmakat Guilgal süpüla süküjünüin süchikuaʼa niain Saúl aneekünüin süpüla aluwatawaa». 15 Noʼunakalaka na israelitakana suluʼumüin tü mmakat Guilgal jee naneekakalaka Saúl nuʼupala Jehová süpüla nuluwataainjachin. Süchikijee tia nasülajakalaka wanee kasa nümüin Jehová anajiraainjanaka aaʼujee naya nümaa. Talatakalaka maʼin naaʼin Saúl namaa na israelitakana sünainjee tia.