Palajatka karaloʼuta Samuel

15 Anuukalaka nünüiki Samuel nümüin Saúl: «Nuluwataain taya Jehová süpüla taneeküinjachin pia jee puluwataainjachin naaʼu na israelitakana. Jülüja jooluʼu paaʼin tü pütchi niʼikajeʼerakat Jehová pümüin. 2 Anuusa nünüiki pümüin Jehová, chi laülaashikai naaʼu na aapiee chakana iipünaa: ‹Süsaleena tatuma na amalequitakana saaʼujee nashutuin naaʼu na israelitakana wanaa sümaa nojuʼitüin suluʼujee tü mmakat Egipto. 3 Anashi pushutule naaʼu na amalequitakana, pajaʼttira naya sümaʼaleeya tü kasa eekat namaʼana. Puʼuta naaʼin napüshuaʼa, puʼuta naaʼin chira eekai tooloin, eekai jierüin, jintülin otta eekai joʼuuin, puʼuta naaʼin paaʼa eekai tooloin, anneerü, kameeya jee müsia püliikü›». 4 Nuutkajeʼerüinjeseʼe Saúl na surulaatkana jee niyaawajakalaka naya suluʼu tü mmakat Telaim. Eejana 200.000 surulaat otta 10.000 na surulaat naʼakajeejanakana na nüikeyuukana Judá.

5 Nüntakalaka Saúl suluʼumüin tü pueulo kanüliakat Amalec, nuukajakalaka napüla na neʼipolokana süʼütpaʼa wanee luwopu eejatka suluʼu tia mmakat. 6 Anuukalaka nünüiki Saúl namüin na quenitakana: «Anashii jükatalaale noulia na amalequitakana, nnojoleenaka jia toʼutüin aaʼin. Kamaneeshii jia namüin na israelitakana wanaa sümaa nojuʼitüin suluʼujee tü mmakat Egipto». Nakatalaaka na quenitakana noulia na amalequitakana. 7 Nükanajaka Saúl na amalequitakana, nükanajüin naya suluʼujee tü mmakat Havilá sünainmüinreʼeya tü mmakat Sur, tü chakat süʼütpaʼa Egipto. 8 Nuʼuta aaʼinchii Saúl süka chajaruuta napüshuaʼa naya wayuukana. Nütaʼülapejeʼe Agag chi aluwataakai naaʼu na amalequitakana. 9 Nnojoishi oʼutunuin aaʼin Agag nutuma Saúl jee natuma na nusurulaatsekana Saúl, nnojotsü noʼutuin aaʼin tü anneerü anapüijakat maʼin, nnojotsü noʼutuin aaʼin tü paaʼakat, tü mürüt eekat kaüsüin, nnojoishi noʼutuin aaʼin sütooloin tü anneetkalüirua jee nnojotsü najaʼttirüin korolo eekai kojutuin maʼin. Shiainjaʼa najaʼttirüin tü kasa eekai nnojoluin kasain anain apüla namüin jee tü nnojotkat kasajatüin namüin.

10 Anuukalaka nünüiki Jehová nümüin Samuel: 11 «Mojusü maʼin taaʼin sutuma taneeküin Saúl süpüla nuluwataainjachin. Akayalaashi nia toulia jee nnojoishi nia oonooin sümaa tanüiki». Shapaakalaka naaʼin Samuel suluʼujee tia, siraasü aikat naaʼu sümaa nuchuntuin maʼin nümüin Jehová. 12 Atamaatüjüiya Samuel eeiwaʼaya aikat süpüla nüntiraainjachin nümaa Saúl. Anuukalaka tü aküjünakat nümüin Samuel: «Chajachi Saúl suluʼu tü mmakat Carmelo jee nukumajirüin wanee niyaakua süpüla kojutuinjachin nia atumawaa. Nuʼunakalaka suluʼumüin tü mmakat Guilgal süchikijee tia». 13 Anuukalaka nünüiki Saúl nümüin Samuel nüntiraapa nümaa: «Kasataalejeseʼe anain pukuwaʼipa nutuma Jehová, taaʼinrüin süpüshuaʼa tü nuluwataakalü anain taya Jehová». 14 «Shiimainrejeʼeya paaʼinrüin süpüshuaʼa tü nuluwataakalü anain pia Maleiwa, ¿jamakaʼa taapaka shiʼira anneerü jee shiʼira paaʼa?», nümakalaka Samuel nümüin Saúl. 15 Anuukalaka nünüiki Saúl nümüin Samuel: «Namüʼlüinsa türa na amalequitakana, wajaʼttirüin kasa süpüshuaʼa. Napüteʼerapejeʼe na surulaat tamaajanakana tü anneerü jee tü paaʼa anapüijakat maʼin süpüla suʼutunajatüin aaʼin jee saʼajünüinjatüin nümüin Jehová, chi Pümaleiwasekai». 16 Anuukalaka nünüiki Samuel nümüin Saúl: «Keraasü pünüiki, taküjainjatü pümüin tü nüküjakat tamüin Jehová aipaʼainka». «Püküja maa tamüin», nümakalaka Saúl.

17 Anuukalaka nünüiki Samuel nümüin Saúl: «Nnojotpuʼusü yaletüin paaʼin wanaa sümaa püneekünüin süpüla nekiipüʼüinjachin pia na israelitakana jee wanaa sümaa nüneeküin pia Jehová süpüla puluwataainjachin naaʼu na israelitakana. 18 Nuluwataain pia Jehová sünain aaʼinraa wanee kasa sünain maa: ‹Puʼuta naaʼin na amalequitakana. Wayuu kaainjaralii naya, anashii pajaʼttirüle naya›. 19 ¿Jamüshi nnojoikaʼa poonooin sümaa nünüiki Jehová? Shia paaʼinmaaka neʼe tü kasa püsütakat noulia na piʼipolokono jee shia paaʼinraka tü kasa mojukat nümüin Jehová».

20 Anuukalaka nünüiki Saúl nümüin Samuel: «Oonooshiaʼaya taya sümaa nünüiki Jehová, taaʼinrüin tü nümakat Jehová. Toʼuta aaʼinchii na amalequitakana jee tataʼülüin Agag süpüla püreesainjachin nia tatuma. Nia aluwataaka naaʼu na amalequitakana. 21 Naneeküin na tasurulaatsekana anneerü jee paaʼa saʼakajee tü kasa wajaʼttirüitpakat süpüla suʼutunuinjatüin aaʼin jee saʼajünüin nümüin Jehová chi Pümaleiwasekai, chaa suluʼu tü mmakat Guilgal».

22 Anuukalaka nünüiki Samuel nümüin Saúl: «¿Kasa nüchekaleekaʼaya achiki Jehová? ¿Nuʼutule wanee wayuu saaʼin mürüt jee naʼajüle shia nümüin Jehová? Shia nüchekaleeka achiki Maleiwa noonoole wanee wayuu sümaa nünüiki suulialeʼeya nuʼutuin saaʼin mürüt jee naʼajüin shia nümüin. Jaa nümüle wanee wayuu sümüin nünüiki Maleiwa, anaʼleesia suulia naʼajüin saüsü anneerü nümüin. 23 Mojuleesia maʼin nukuwaʼipa chi wayuu eekai niʼrülin wayumüin maʼaka mojuin nukuwaʼipa wanee wayuu ooʼulakirakai süchiirua wanee kasa. Yaletüle naaʼin* wanee wayuu müsia aka saaʼin nukuwaʼipa chi wayuu eeʼirajirakai ouutsü jee aʼwaajakai shiyaakua maleiwayaasü. Piyouta achikit nünüiki Jehová, niyoutakalaka süchiki puluwataainjachin».

24 Anuukalaka nünüiki Saúl nümüin Samuel: «Shiimain kaainjalain taya, nnojoishi taya oonooin sümaa nünüiki Jehová jee sümaa tü pümakat tamüin sutuma mmoluin taya neema na wayuukana. Shia neʼe toʼunaka achiirua tü namakat tamüin. 25 Moto paaʼin taainjala, anashi puʼunule tamaa süpüla tasapainkainjachin taya nümülatuʼu Jehová». 26 Anuukalaka nünüiki Samuel nümüin Saúl: «Nnojoleechi taya oʼunuin pümaa, jama piyoutuin süchiki nünüiki Jehová. Niyoutuitpakalaka Jehová süchiki ayatüinjachin puluwataain naaʼu na israelitakana». 27 Nujununtaapa Samuel, naaʼütüin Saúl tü sotkat saajuna nüsheʼin* Samuel, süsüküijaakalaka nüsheʼin Samuel. 28 Anuujeseʼe nünüiki Samuel nümüin Saúl: «Maʼaka süsüküijaain tü tasheʼinkat pajapuluʼu, meeriaʼaya pukuwaʼipa sünain aluwatawaa. Nuuʼuleʼerüin pia Jehová soʼukai suulia aluwatawaa naaʼu na israelitakana, nüneekeechikalaka wanee wayuu piiʼiraka, anaʼleekai akuwaʼipa puulia. 29 Ayateeria nikeraajüin waneepia nünüiki chi Maleiwa Kojutukai atumawaa yaa Israel, wayuuka joo nia süpüla niiʼiratüinjatüin nünüiki».

30 Anuukalaka nünüiki Saúl nümüin Samuel: «Kaainjalashiaʼaya taya, anapejeʼe kojutule taya pümüin noʼupala na laülaashii chejeʼewaliikana suluʼujee tü pueulo eejeʼewaire taya jee anashi kojutule taya putuma noʼupala na israelitakana. Anashi puʼunule tamaa süpüla tasapainkainjachin taya nümülatuʼu Jehová chi Pümaleiwasekai». 31 Oʼunushijeseʼe Samuel nümaa Saúl, nüsapainkaka Saúl nümülatuʼu Jehová. 32 Anuujeseʼe nünüiki Samuel: «Jüsaaja tamüin Agag, chi aluwataakai naaʼu na amalequitakana». Nürütkaakalaka Agag mojusheeka nünainmüin Samuel. «Nnojoleechi taya oʼutunuin aaʼin», nümakalaka Agag suluʼu naaʼin. 33 Anuukalaka nünüiki Samuel: «Watta naalii na jieyuu puʼutakana aaʼin achon, meeria joo tü alatakat sümüin tü piikat süka puʼutuneechin aaʼin». Ashoʼlojunushijeseʼe Agag nutuma Samuel nuʼupala Jehová chaa suluʼu tü mmakat Guilgal.

34 Nuʼunakalaka Samuel suluʼumüin tü mmakat Ramá, eekajasaʼa Saúl oʼunushi suluʼumüin tü mmakat Guibeá, eejachire kepiain nia. 35 Nnojoireeshia niʼrüin Samuel Saúl piantua, mojupejeʼe maʼin naaʼin nüchiirua. Mojusü maʼin naaʼin Jehová sutuma nüneeküin Saúl süpüla nuluwataainjachin naaʼu na israelitakana.