Éxodo

10 Anuukalaka nünüiki Jehová nümüin Moisés: «Anakajaʼa puʼunule nümaʼanamüin faraón, tooʼulaainsaʼa wayuuin iche aaʼinchi nia namaʼaleeya na nüchepchiakana, müsü sukuwaʼipa tia tatuma süpüla taaʼinrüin kasa pülasü nuʼupala. 2 Tooʼulaain müin sukuwaʼipa süpüla püküjain shia namüin püchonnii jee namüin püikeyuu süchiki jamüin sukuwaʼipa süpüla süsalainjanain naainjala na egipciokana tatuma jee süpüla püküjain süchiki tü kasa pülasü taaʼinrakat naʼaka. Jütüjaajeetkalaka saaʼu sükajee tia tayain chi kanüliakai Jehová».

3 Nuʼunakalaka Moisés nümaa Aarón nümaʼanamüin faraón sümaa namüin nümüin: «Anuusa nünüiki Jehová chi Namaleiwasekai na hebreokana: ‹¿Joujaleechikai ooʼulaain pia suulia achecheraa paaʼin süpüla poonooinjachin sümaa tanüiki? Anakajaʼa püjütüle na israelitakana süpüla naʼwaajüinjachin taya. 4 Ayatüleʼeya paʼalijirüin na israelitakana, antireechi taya kaashapa wattaʼa puumainpaʼamüin. 5 Watteerü saalii tü kaashapakat süpaʼapünaa tü mmakat, nnojoleerü jaʼyain tü mmapaʼakat sutuma. Ajaʼtteerü shiküin süpüshuaʼaya tü kasa apütaakat süchikijee tü shiʼichiisekat juya, ajaʼtteerü shiküin süpüshuaʼa tü wunuʼulia eekai iyotuin wünaʼapü. 6 Watteerü saalii tü kaashapakat pipialuʼu, nepialuʼu na püchepchiakana jee suluʼupünaa tü miichi eekalü Egipto. Nnojotsü neʼrüirüin tia na wayuu kachonkana pia jee na kaikeyuukana pia soʼujeʼereeya katüin noʼu suluʼu mmakat tüü›». Nujununtaakalaka Moisés nümaa Aarón sümaa noʼunuin nümaʼanajee faraón.

7 Süchikijee tia naashajaakalaka na nüchepchiakana faraón nümüin sümaa namüin nümüin: «¿Joujaleechikai maʼin ooʼulaain wayuukai chii suulia naaʼinrüin kasa mojusü wamüin? Anakajaʼa püjütüle nala wayuukana süpüla naʼwaajüinjachin Jehová chi Namaleiwasekai. ¿Nnojotsükai piʼrüin sajaʼttüin kasa süpüshuaʼa yaa Egipto?». 8 Nuunejinnakalaka nüchikuaʼa Moisés nümaa Aarón nümaʼanamüin faraón. Anuujeseʼe nünüiki faraón namüin: «Anakajaʼa juʼunule sünain aʼwaajaa Jehová chi Jümaleiwasekai. ¿Jaraliikaʼa maʼin na oʼunajanakana jümaa?». 9 Nusoutakalaka Moisés sünain maa: «Aainjainjana waya wanee miʼiraa nümüin Jehová, woʼuneenakalaka namaa na jimaʼaliikana jee na majayünnüükana, na wayuu miyoʼuyuukana, namaa wachonnii, wakoʼulireerü waʼanneetse jee müsia wapaaʼase». 10 Nusoutakalaka faraón sünain maa: «Jaʼyasü jaaʼu jaaʼinreein kasa mojusü. ¿Eejeechijasaʼaya Jehová jümaa jaaʼinruʼu tajütüle jia namaa jüchonnii? 11 ¡Nnojottaa! Naya neʼe oʼunajanakana sünain aʼwaajaa Jehová na tooloyuukana, jama shiain juchuntuin paala tia tamüin». Najünajaanakalaka nümaʼanajee faraón.

12 Naashajaakalaka Jehová nümaa Moisés sümaa nümüin nümüin: «Piyurula pütüna sooʼopünaa tü mmakalü Egipto süpüla süntajatüin tü kaashapakat sooʼopünaa süpüshuaʼaya tia mmakat, sajaʼttireetkalaka süpüshuaʼa tü pünajütkat, süpüshuaʼa tü apütaakat süchikijee tü shiʼichiisekat juya». 13 Niyaleramaatakalaka Moisés tü waraaratkat sooʼopünaa tü mmakalü Egipto. Suwawatkalaka wanee joutai wüinpüjeekuat nutuma Jehová, siraaka kaʼikat sümaa tü joutaikat jee siraasü aikat sümaa. Shiasaʼa waneemüin kaʼi, süntakalaka tü kaashapakat sutuma tü joutai wüinpüjeekuatkat. 14 Sushutakalaka tü kaashapakat saaʼu tü mmakalü Egipto, wattakalaka maʼin saalii suluʼupünaa tia mmakat. Keemasü maʼin tia makat. Nnojotsü maajüin wattain maʼin saalii tü kaashapakat jee nnojoleerü alatüin tia piantua. 15 Wattakalaka maʼin saalii kaashapa suluʼu Egipto jee shipiʼyuushijaakalaka tü mmapaʼakat sutuma. Ajaʼttaleesia tü pünajüt eejatkat suluʼu tia mmakat jee ajaʼttaleesia süpüshuaʼa tü süchon wunuʼulia apütaakat süchikijee tü shiʼichiisekat juya. Nnojotsü apütaain waneesiaakalüjeʼe süpana wunuʼu eekai wüittüin jee nnojotsü waneesiaakalüjeʼe alama apütaaka suluʼu tü mmakalü Egipto.

16 Nuunejinnamaatakalaka Moisés nümaa Aarón nutuma faraón sümaa nümüin namüin: «Kaainjalashi taya nuʼupalamüinreʼeya Jehová chi Jümaleiwasekai jee eesia tü kasa mojusü taainjakat jümüin. 17 Jülatiraʼaya maa sooʼopünaa jaaʼin tü taainjalakat uwatuayaakaijeʼe neʼe jee juchuntaʼaya maa nümüin Jehová chi Jümaleiwasekai nüshaʼleʼeraiwa toulia tü kasa keemasü ajaʼttakalü atuma kasa». 18 Nuʼunakalaka Moisés nümaʼanajee faraón jee nuchuntakalaka nümüin Jehová. 19 Nuʼwanajeʼerakalaka Jehová sukua tü joutaikat, suwawatkalaka nutuma wanee joutai katchinsü maʼin wopujeekuat, sülüʼüjakalaka tü kaashapakat, sujutuukalaka shirokumüin tü palaa Ishosükat. Nnojotsü apütaain waneesiaakaijeʼe kaashapa suluʼu tü mmakalü Egipto. 20 Nuuʼulaapejeʼe Jehová macheʼein faraón, nnojoliikalaka nüjütüin faraón na israelitakana.

21 Anuukalaka nünüiki Jehová mapa nümüin Moisés: «Piyurula pütüna iipünaamüin süpüla shipiʼyuushijaainjatüin tü mmakalü Egipto. Kojoinjatü maʼin piʼyuushi saaʼu tia mmakat». 22 Niyurulamaatakalaka Moisés tü nütünakat iipünaamüin, shipiʼyuushijaakalaka tü mmakalü Egipto, kojosü maʼin shia soʼu apünüin kaʼi. 23 Nnojoishii eʼrajiraain na egipciokana jee nnojoishii atamaain naya chaa eejanale naya soʼu apünüin kaʼi. Warattuuipejeʼe chaa eejanale kepiain na israelitakana. 24 Nuunejinnakalaka Moisés nutuma faraón sümaa nümüin nümüin: «Anakajaʼa juʼunule sünain aʼwaajaa Jehová. Eeshiʼiya süpüla juʼunuin namaa na jüchonniikana, shiapejeʼe jüpütajatüin tü jaʼanneetsekat sümaa tü jüpaaʼasekat». 25 Nusoutakalaka Moisés nümüin sünain maa: «Nnojottaa, piainjachijaʼamata aapaka wamüin tü mürüt woʼutajatkalü aaʼin süpüla waʼajüinjatüin shia nümüin Jehová chi Wamaleiwasekai. 26 Oʼunajatiaʼaya tü wamüʼlüinkat wamaa, nnojoleerü wapütüin waneesiaakaijeʼe mürüt süka waapaajeerüin süpüshi süpüla waʼwaajüinjachin Jehová chi Wamaleiwasekai, watüjaajeerü aaʼu chamüinreeya tü woʼutajatkalü aaʼin nümüin Jehová chi Wamaleiwasekai». 27 Nuuʼulaapejeʼe Jehová macheʼein faraón nüchikuaʼa, nnojoliikalaka nüjütüin na israelitakana. 28 Anuuka nünüiki faraón nümüin: «¡Puʼuna yaajee! Jalia püntajayaai püchikuaʼa tamaʼanamüin, toʼuteechi aaʼin pia paaʼinrüle tia». 29 Nusoutakalaka Moisés sünain maa: «Meerüjaʼaya, eejeerü taaʼin suulia taleʼejüin pümaʼanamüin».