Apocalipsis

11 Saapünakalaka tamüin wanee kainñaruushi, müsü aka saaʼin wanee wunuʼu süpülajatka emeriijia jee sümaʼainruʼu tia nümakalaka tamüin: «Anakajaʼa pütamaale, pimeriija tü aʼwaajüleekat Maleiwa, türa aʼajüleekat wanee kasa jee müshiʼiya na aʼwaajakana Maleiwa yala. 2 Nnojotpejeʼe kasajatüinjatüin pümüin süpaatiase tü aʼwaajüleekat Maleiwa, nnojo pimeriijain tia, aapünüsü shikii tia paatiakat namüin na wayuu sainküinjeejanakana tü mmakat, mülieenaka na wayuu sulujunakana Jerusalén natuma naya wayuukana soʼu pienchi shikii piamamüin kashi. 3 Tajüteena piamashii wayuu aküjainjanakana pütchi süchiki tü kasa alatajatkat, naaʼinreerü tia soʼu 1.260 kaʼi, naʼateerü nanain tü kuluulu shiyaawasekat mojuu aaʼin naaʼinrapa tia». 4 Naya piamashiikana aküjalii pütchi, nayaawasesü tü piamasükat olivo jee nayaawasesü tü piamasükat ranpara, shaʼwashawatshii naya nümülatuʼu chi Señot laülaashikai saaʼu tü mmakat.

5 Eere wayuu eekai naaʼinreein kasa mojusü namüin na nünüikimaajanakana Maleiwa, ojuʼiteerü sikoʼu naanüküluʼujee na nünüikimaajanakana süpüla najaʼttirüin naʼünüü. Meerü nakuwaʼipa na wayuu eekai müliain atuma na nünüikimaajanakana Maleiwa. 6 Aapünüsü laülawaa namüin süpüla nasürülüinjatüin soʼu tü sirumatuʼukat jee süpüla nnojoluinjatüin süʼitüin juya natuma soʼu tü kaʼi naküjakalü oʼu tü kasa alatajatkat. Aapünüsiaʼaya laülawaa namüin süpüla ishajaainjatüin natuma tü wüinkat jee süpüla namojujüinjatüin tü mmapaʼakat sükajee nantirüin kasa mojusü, eesü süpüla naaʼinrüin tia jaʼitasü kojuyatuain shia natuma.

7 Kettaapa napüleerua naküjain tü pütchikat, atkaajeerü namaa tü wüchii wünaʼapüjatü ojuʼitaakat suluʼujee tü ishi oʼutusükat, nakanujuweenaka sutuma jee suʼuteena aaʼin naya. 8 Yaleenaka naya palasütüin süpaʼa tü wopu jerutkat, tü chakat suluʼu tü pueulo miyoʼukat, chajachi oʼutunuin aaʼin chi Naseñotsekai wanaa sümaa nükachennüin sünain wanee wunuʼu* süpüla outaa. Tia pueulokot shiyaawase Sodoma jee shiyaawase shia Egipto. 9 Eʼnneena naya sünain outaa sutuma wayuu saʼakajeejatü tü eʼirukuukat süpüshuaʼa, naatayaa maka anüiki, sainküinjeejatü pueulo jee sainküinjeejatü tü mmakat, eʼnneena naya soʼu apünüin kaʼi shiatapünaamüin, tia wayuu eʼreenaka naya saʼalijireerü nakuwaʼipa süpüla nnojoliin nojoitünüin. 10 Talateena maʼin na wayuu kepiakana sainküinpünaa tü mmakat sutuma outuin naya nünüikimaajanakana Maleiwa. Aluwanaajiraajeena naya wanee kasa namüin, naaʼinreerü tia süka nekeʼejünapuʼuin maʼin aaʼin na wayuu kepiakana sainküinpünaa tü mmakat natuma naya piamashiikana nünüikimaajana Maleiwa.

11 Sülatapa apünüin kaʼi shiatapünaamüin, naapakalaka chi Maleiwakai sütsüin naaʼin nachikuaʼa na piamashiikana nünüikimaajana, natamaaka nachikuaʼa. Mmotka maʼin na wayuu eʼrakana naya. 12 Naapakalaka wanee pütchi emetutsü iipünaajee sünain maa: «Jüʼliikajaa yaamüin». Aʼliikajaashiijeseʼe naya saaʼumüin wanee siruma, eʼnnüshii naya sutuma naʼünüü. 13 Emetutkalaka maʼin sukutkujaain tü mmakat wanaa sümaa tia. Sujuichijaakalaka wanee saʼata tü pueulokot,* 7.000 wayuu outaka sutuma sukutkujaain tü mmakat. Neimmolojookoloko na wayuu apütaakana jee naʼwaajakalaka chi Maleiwa sirumatuʼujeʼewaikai.

14 Alatüitpa tü wane müliaakat. Eeja jaaʼin, alüʼütsü tü chiiruaajatkat müliaa.

15 Niʼyalajitkalaka tü konneetakat chi chiiruaajachikai aapiee. Saapünakalaka wanee pütchi emetutsü maʼin chaa sirumatuʼujee sünain maa: «Niaichipa aluwataaka Maleiwa nümaa chi nüneekajalakai süpüla Cristoin jee aluwataainjachi nia saaʼu wayuu süpüla kaʼikat süpüshuaʼa».

16 Nayasaʼa na piamakana shikii pieinchimüin laülaashii joyojoyotkana saaʼu tü einasee süpülajatkalü aluwatawaa yalajatka nümülatuʼu Maleiwa, nasapainkashii naya mmoluʼumüin jee naʼwaajakalaka chi Maleiwakai. 17 Anuu tü namakat: «Waapüin tü analuʼutkat pümüin Jehová,* pia chi Maleiwa Pülashikai maʼin, pia chi Maleiwa eekai maaʼulu jee chi eetüjüikai sümaiwa paala, waapüin analuʼutkat pümüin süka puʼttuitchipain sünain aluwatawaa sükajee pülashin maʼin pia. 18 Aashichijaapejeʼe na wayuu sainküinpünaakana tü mmakat, aashichijaashijeseʼe pia namüin, süntakalaka tü kaʼi süsalainjatkalü oʼu naainjala na outushiikana jee tü kaʼi eere saapünajatüin kasa anasü namüin na püchepchiakana namaʼaleeya na pünüikimaajanakana jee müshiʼiya na wayuu aneekuushikana otta na wayuu kojutukana amüin pia, jaʼitashii nala eekai tepichin jee eekai miyoʼuyuuin, antüsü tü kaʼi najaʼttinnajanakalü oʼu na wayuu amojujakana tü mmakat».

19 Sujutalaaka tü aʼwaajüleekat Maleiwa chaa sirumatuʼu, jaʼyaka tü kojon shiyaawasekat süpansaajünüin pütchi chaa suluʼu tü aʼwaajüleekat.* Kayaakalaka maʼin tü juyakat, saapünakalaka sünüiki wayuu, atüttüsü tü juyakat, akutkujaasü tü mmakat jee keʼichiisesü tü juyakat.