Éxodo
32 Neʼrakalaka na israelitakana nnojolin nüshakatamaatüin Moisés saaʼujee tü uuchikat, narütkaakalaka napüshuaʼa nünainmüin Aarón sümaa müin nanüiki nümüin: «Paainja wamüin shiyaakua kasa wamaleiwaseinjatka jee oʼunirajatka wakuwaʼipa, jama nnojoluin watüjaain saaʼu kasain alatüin nümüin Moisés chi wayuu ayuʼlakai waya Egiptojee». 2 Anuujeseʼe nünüiki Aarón namüin: «Jukotchojo süpüshuaʼa tü cheʼesaa aainjuushikat süka ooro sünainka nacheʼe na juʼwayuusekana, na jüchonnii tooloyuukana jee na jüchonnii jieyuukana, jüntireetkalaka shia tamüin». 3 Naakatakalaka napüshuaʼa sünainjee nacheʼe tü nacheʼese aainjuushikat süka ooro, neʼikajaakalaka shia nümüin Aarón. 4 Naapaakalaka Aarón tü oorokot, nüchinakalaka shia süka wanee cincel, nukumajakalaka niyaakua wanee paaʼachon süka tia oorokot. Anuujeseʼe nanüiki na israelitakana: «Anii chi Wamaleiwasekai, nia ayuʼlaka waya suluʼujee tü mmakalü Egipto».
5 Niʼrapa Aarón tia, nukumajakalaka wanee aʼajülee sümülatuʼu niyaakua chi paaʼachonkai. «Eejeerü watuma wanee miʼiraa wattaʼa süpüla waʼwaajüin Jehová», nümakalaka Aarón süchikijee tia. 6 Nütamaakalaka wattaʼa maalü waneemüin kaʼi, noʼutakalaka saaʼin mürüt süpüla naʼajüinjatüin shia nümüin Maleiwa, noʼuta aaʼinria tü anajiraainjatkalü aaʼujee naya nümaa. Naikalaaka na israelitakana sünain ekawaa jee sünain asawaa. Süchikijee tia, natamaaka sünain emiʼijaa.
7 Anuukalaka joo nünüiki Jehová nümüin Moisés: «Anakajaʼa püshakatüle, amojujaasü neʼe nakuwaʼipa na wayuu püpüshi piyuʼlakana suluʼujee tü mmakalü Egipto. 8 Eetaayaai kamaʼain naya sünain oonowaa sümaa tü pütchi taluwataakalü anain, nakumajüin niyaakua wanee paaʼachon, ichaaka naya sünain nasapainkain sümülatuʼu tia ayaakuaakat. Noʼuta aaʼinrü mürüt sümaa naʼajüin shia sümüin. ‹Anii chi Wamaleiwasekai, nia ayuʼlaka waya suluʼujee tü mmakalü Egipto›, mataalashii naya». 9 Ayataka naashajaain Jehová nümüin Moisés sünain maa: «Teʼrüin wayuuin macheʼesalii na israelitakana. 10 Anakajaʼa puuʼulaale tajaʼttiraiwa naya, jama jashichin maʼin taya namüin, pieechikalaka wattain maʼin aalii apüshii tatuma».
11 Nuchuntakalaka maʼin Moisés nümüin Jehová chi Nümaleiwasekai sümaa nümüin nümüin: «Jehovákalee, ¿jamüshi paashichijaakaʼa nooʼomüin na püpüshikana süchikijee piyuʼluin naya suluʼujee tü mmakalü Egipto sümaa paaʼinrüin kasa pülasü napüleerua? 12 ‹Niyuʼluin naya chi Namaleiwasekai süka naaʼinreein kasa mojusü namüin. Nuʼutee aaʼinchii naya chaa uuchoʼu jee najaʼttireein naya süpaʼajee tü mmakat›, meena na egipciokana püchiki paaʼinrüle tia. Nnojo jashichikuʼu pümüin, puuʼulaa suulia tü kasa mojusü paaʼinreekat namüin na israelitakana. 13 Soto paaʼin chi püchepchiakai Abrahán, Isaac jee müshia Israel. Anuu tü pütchi püpansaajakat namaa paaʼujiraa: ‹Wainmeena maʼin tatuma na jüikeyuukana maʼaka tü shüliwala chakalü iipünaa, taapeeriaʼaya namüin süpüshuaʼa tü mma taneekakat napüla jee noumainjeerü shia waneepia›».
14 Nuuʼulaakalaka Jehová suulia tü kasa mojusü nüküjakalü achiki paala naaʼinrüinjatiaaka namüin na israelitakana.
15 Nuuyantaka Moisés nüchikuaʼa, nüshakataka uuchoʼujee sümaa najapüipain tü piamasü ipa ashajuushikalü anain tü Pütchi Nuluwataakalü Anain Maleiwa. Ashajuushisü tü pütchikat sünain tia ipakalüirua süpüleeruajee jee süchiiruajee. 16 Nia kakumalaka Maleiwa tia piamasükalü ipa jee nia kashajalaka tü pütchi sünainkat. 17 Naapakalaka Josué shipisana wanee kasa jee naapüin nekiisa na israelitakana. «Ichaa taapüin shikiisa wayuu sünain atkawaa eere kepiain na israelitakana», nümakalaka nümüin Moisés. 18 Anuupejeʼe nünüiki Moisés nümüin:
«Nnojotsü shiiʼirain wayuu tia saaʼujee sükanajüin sünain atkawaa
jee nnojotsü shikiisain shia wayuu sünain aʼyalajaa sükajee sükanajuuin.
Eekajasaʼa tü taapakat, shiiʼirain wayuu shikiira wanee kasa naata».
19 Nürütkaapa Moisés eere kepiain na israelitakana, niʼraka tü niyaakuakat chi paaʼachonkai jee niʼrüin na israelitakana sünain oyonnojoo. Aashichijaashijeseʼe nia, nujutaka tü piamasükalü ipa najapuluʼujutka, yülaʼawaka shia nutuma süsaʼaluʼu tü uuchikat. 20 Naapaakalaka Moisés niyaakua chi paaʼachon nakumajirakai na israelitakana, naʼajakalaka tia ayaakuaakat soʼu siki, yütchonka shia nutuma maleepaʼaya shia saaʼin paliʼi. Nijitakalaka tia paliʼikat shiroku wüin jee nuluwataakalaka na israelitakana sünain asaa tia wüinkat. 21 Anuukalaka nünüiki Moisés nümüin Aarón: «¿Jamajüshi pia natuma na israelitakana süpüla paainjirüinjanain naya wanee kasa mojuka maʼin?». 22 Nusoutakalaka Aarón nümüin sünain maa: «Nnojo paashichijaain tamüin, pütüja aaʼulu kapülain naaʼin na israelitakana aainjaa kasa mojusü. 23 ‹Paainja wamüin shiyaakua kasa wamaleiwaseinjatka jee oʼunirajatka wakuwaʼipa, jama nnojoluin watüjaain saaʼu kasain alatüin nümüin Moisés, chi wayuu ayuʼlakai waya Egiptojee›, müshii naya tamüin. 24 Anuujeseʼe tanüiki namüin: ‹Na kanainkana kasa aainjuushika süka ooro anasü naakatüle shia jee nantirüle shia tamüin›. Tojutakalaka tü oorokot saʼaka tü sikikat, sukumajaakalaka niyaakua wanee paaʼachon».
25 Niʼrakalaka Moisés müin jamakai naaʼin na israelitakana süka nuuʼulaain Aarón müin nakuwaʼipa, müshiijeseʼe mojutuin naya sutuma naʼünüü. 26 Nüshaʼwalaakalaka Moisés eere kepiain na israelitakana sümaa nümüin: «¿Jara oonooka nümaa Jehová? Anashi nüntüle tamaʼanamüin». Noutkajaakalaka napüshuaʼa na levitakana nüʼütpünaa Moisés. 27 Anuu tü nümakat namüin: «Anuu tü nümakat Jehová chi Namaleiwasekai na israelitakana: ‹Anashii jaapaale jüchajaruutse waneʼewai jukua, jülateenaka pasanainpünaa sünain eere kepiain na israelitakana waneemüinreeya saʼata eere kepiain naya, juʼuteenaka naaʼin juwalayuu, na wayuu kepiakana jüʼütpünaa jee müshiʼiya jaʼaleewainyuu›». 28 Naaʼinrakalaka na levitakana tü nümakat Moisés namüin. Outakalaka soʼu kaʼikat tia 3.000 wayuu. 29 Anuukalaka tü nuluwataakalü anain naya Moisés: «Anashii jükatalaale soʼukai süpüla jiʼyataainjanain nümüin Jehová, atkaashii jia namaa jüchonnii jee namaa juwalayuu, aneerü jukuwaʼipa soʼukai nutuma Maleiwa sünainjee tü kasa jaaʼinrakat».
30 Anuukalaka nünüiki Moisés namüin na israelitakana waneemüin kaʼi: «Mojusü maʼin tü kasa jaaʼinrakat, aliikajaainjachi taya saaʼu tü uuchikat süpüla taashajaain nümaa Jehová, nülatittaajeetka sooʼopünaa naaʼin tü kasa mojusü jaainjakat». 31 Nüliikajaakalaka Moisés nüchikuaʼa saaʼumüin tü uuchikat, anuuka nünüiki nümüin Jehová: «Mojusü maʼin tü kasa naaʼinrakat na israelitakana, aainjashii naya wanee shiyaakua maleiwayaasü süka ooro. 32 Anakajaʼa motule paaʼin naainjala anashiirejeʼeya shia saaʼin pümüin. Nnojorülejeʼeya anashiin shia saaʼin pümüin anakajaʼa püsünneʼerüle maa tanülia suluʼujee tü karaloʼuta püshajakat». 33 Anuupejeʼe nünüiki Jehová nümüin Moisés: «Nieechi tasünneʼeraka anülia suluʼujee tü karaloʼuta tashajakat chi eekai aainjain wanee kasa mojuka tamüin. 34 Anakajaʼa puʼunule, pümaa na israelitakana suluʼumüin tü mma taküjakalü achiki pümüin. Oʼuneechi püpüleerua chi aapiee tamaʼanajeejachikai, süsaleena naainjala na israelitakana tatuma soʼu tü kaʼi nasoutuinjatkalü oʼu tamüin saaʼu naainjala». 35 Süsalaka naainjala na israelitakana nutuma Jehová saaʼujee nachuntuin nümüin Aarón naainjain niyaakua chi paaʼachon naʼwaajakai.