Tü nüshajalakat Mateo
14 Naapakalaka Herodes chi aluwataakai saaʼu tü mmakat Galilea tü sümakat wayuu nüchiki Jesús. 2 Nümaka Herodes namüin na nüchepchiakana: «Nia Juan chi Awoutisaajüikai, asoʼiraasüjaʼa naaʼin süchikijee outaa, müshijeseʼe eein süpüla naaʼinrüin kasa pülasü». 3 Püreesashi Juan otta kaleenaluʼushi nia nutuma Herodes süka sootuin nia Herodías tü nuʼwayuusekat Filipo, chi nuwalakai Herodes. 4 Süka nümapuʼuin Juan nümüin: «Nnojotsü anain puʼwayuusere tia wayuukat». 5 Mayaainjeʼe nuʼutuneein aaʼin Juan nutuma Herodes, nnojotsü naaʼinrüin tia süka nünüikimaajachin Maleiwa Juan naashin na wayuukana. 6 Eeka wanee miʼiraa nutuma Herodes shikiira shikeraajüin nuuyase, shiyonnojoko tü süchonkat Herodías. Talataka maʼin naaʼin Herodes sümaa. 7 Pansaaka nünüiki sümaa naapajatüin sümüin tü suchuntakat nümüin. 8 Süka süpüleeruaanüin aaʼin sutuma tü shiikat, müsü shia nümüin Herodes: «Paapa tamüin suluʼu wanee pülaata nikii Juan chi Awoutisaajüikai». 9 Mojusiaajeʼe naaʼin chi aluwataashikai, nüsaajitpejeʼe sümüin tü suchuntakat nümüin süka pansaatüjülüin nünüiki sümüin jee naaʼujee na yalajanakana nümaa. 10 Nüshottirakalaka nunut Juan chaa eejachire süttüin nia nutuma. 11 Süntinnakalaka nikii Juan suluʼu wanee pülaata miyoʼu, saapünaka sümüin tü majayütkat, shiʼikajaakalaka shia sümüin tü shiikat. 12 Nüsaajünaka Juan natuma na nikirajüinkana süpüla neʼikajachin nia, shiasaʼa süchikijee tia, naapinnakalaka Jesús natuma. 13 Naapaiwaʼaya Jesús süchiki tü alatakat nümüin Juan, anuwaluʼushi nia suluʼumüin wanee mma wattasü yalejee süpüla nümüiwaʼainjachin nia. Shiasaʼa sütüjaapa wayuu saaʼu tia, oʼunusü shia suuʼuika nüchiirua suluʼujee tü pueulokot.
14 Shiasaʼa nüntapa Jesús waneemüin saʼata palaakat, niʼrüin watta saalii wayuu. Sümülialaakalaka naaʼin saalinjee, anakalaka nutuma eekai ayuulin. 15 Motsopa kaʼikat, müshii na nikirajüinkana Jesús nümüin: «Wattasü tü mmakat otta motsosü kaʼi naaʼu na wayuukana. Anashii püjütüle naya noʼunaiwa chaa pueulopaʼamüin nayaʼlajaiwa kasa nayaaluʼu». 16 Nusoutaka Jesús namüin: «Anashii makatüle naya, jüchajaa wanee kasa nayaaluʼu». 17 Anuujeseʼe nanüiki na nikirajüinkana: «Jaʼraisaʼala neʼe pan eeka wamaʼana otta piamasü jime». 18 «Jüsaaja shia tamüin», nümakalaka namüin. 19 Naikaajaaka na wayuukana saaʼu tü alamakat süka nuluwataain naya Jesús sünain tia. Naapaaka Jesús tü jaʼraisükat pan jee tü piamasükat jime, nuʼuraajaka nümüin Maleiwa sümaa niirakaain iipünaamüin. Nüshanaajakalaka tü pankat jee naapaka shia namüin na nikirajüinkana süpüla neitajüin shia namüin na wayuukana. 20 Emirakalaka napüshuaʼa na wayuukana, sukotchojunaka poloo piamamüin kanaasüta tü eküülü apütaasükat. 21 Eeshii maʼaka naaʼin 5.000 tooloyuu ekakana soʼu tia, katata noulia na jieyuu jee na tepichi eejanakana namaa. 22 Nüjütamaatakalaka Jesús na nikirajüinkana süpüla noʼunajanain nüpüleerua suluʼu anuwa waneemüin saʼata tü palaakat, sümaʼainruʼu naʼatapajüin noʼunuin na wayuukana.
23 Nüjütapa Jesús na wayuukana, oʼunushi nia saaʼumüin tü uuchikat süpüla nuʼuraajüin nümüin Maleiwa, aipaʼawaka naaʼu yalaʼaya. 24 Wattasü tü anuwakat pasanain sünain palaa namaa na nikirajüinkana Jesús. Aʼyaatuusü maʼin tü anuwakat namaa sutuma tü sümünakat* palaa süka napanapajeein tü joutaikat. 25 Antüshi Jesús nanainmüin na nikirajüinkana sümaa waraittüin nia sooʼopünaa tü palaakat, eeiwajatü aikat* tia makat. 26 Neimmolojooka na nikirajüinkana neʼraiwaʼaya nia waraittüin sooʼopünaa tü palaakat. «¡Yolujaanee!» namaka nekiiseruʼu süka mmoluin maʼin naya. 27 Nusoutakalaka Jesús namüin: «Nnojo mmoluin jia, tayan», nümaka namüin. 28 Nusoutakalaka Pedro nümüin: «Señotkalee, pialejeʼe maʼin weʼrüin, anashi puunejüle taya pünainmüin süpüla waraittajachin taya sooʼopünaa tü palaakat». 29 «Jalaichi pümaala», nümaka Jesús nümüin. Nüshakataka Pedro suluʼujee tü anuwakat sümaa waraittüin nia sooʼopünaa tü palaakat nünainmüin Jesús. 30 Niimolojooka Pedro niʼraiwaʼaya katchin maʼin tü joutaikat, nimerolo nimerolo nümaka. «¡Kaalin taya Señotkalee!», nümaka nikiiseruʼu. 31 Nujuupataka Jesús najapü Pedro, nümaka nümüin: «Manoulakaiche maʼin pia, ¿jamüsü wainmajaka paaʼin?». 32 Shiimalaʼalaa sümaka tü joutaikat yalapa naya suluʼu tü anuwakat. 33 Nayasaʼa na wayuu anuwaluʼujanakana, neeʼiyatüin nujutu Jesús nümüin jee namakalaka: «Shiimainjaʼaya maʼin Nüchoin pia Maleiwa». 34 Nalataka waneemüin saʼata tü palaakat, nantaka suluʼumüin tü mmakat Genesaret.
35 Niyaawatünapa Jesús natuma na wayuu nepiajanakana, aʼwalakajaasü nüchiki sainküinpünaa tia mmakat jee süntinnakalaka nümüin wayuu eekai ayuulin. 36 Nayasaʼa na wayuukana nachuntuin nümüin Jesús shiiʼiree nepettüin soluyaakaijeʼe nüsheʼin, anaka napüshuaʼa na wayuu epettakana nia.