Naʼyataain na Aluwataaushikana
24 Jaʼrai kaʼi süchikijee tia, antüshi Ananías Cesareamüin, nia chi laülaashikai napüleerua na sacerdotekana. Eejanajaʼaya nümaa waneinnua laülaashii jee wanee pütchipüʼü kanüliashi Tértulo. Oʼunushii naya nümaʼanamüin chi laülaashikai Félix süpüla naküjainjanain nümüin tü nalirajakalü aaʼujee Pablo. 2 Ounejinnüshijeseʼe Tértulo süpüla nüküjainjatüin kasain naainjalain Pablo, anuujeseʼe suʼttia nünüiki:
«Watüjaa aaʼu eein jimataa aaʼin suluʼu mmakat tüü putuma otta punoutuin sukuwaʼipa wanee kasa süka pütüjaatüjülüin saaʼu choʼujaain shia. 3 Félix, laülaashikalee, kojutushi pia sutuma wayuu, waapüin pümüin analuʼutkat waneepia saaʼu süpüshuaʼa tü kasa paainjakat suluʼupünaa tü mma puluwataakalü aaʼu. 4 Kamanee maa pia wamüin, paapaja wanüiki motsomüin, nnojoleechi kamaʼain pia watuma. 5 Eekajasaʼa wayuukai chii, mojulaashi sümüin wayuu, müshi aka saaʼin wanee wanülüü outasiroʼu. Nootuin napüshuaʼa na judíokana süpüla neʼrüinjanain wayumüin nümüin chi sülaülashikai mma. Nekiipüʼü nia na kanüliakana ‹Nazarenos›. 6 Nuuʼulaküin naaʼinrüin wanee kasa mojutuinjatka akajee nutuma tü aʼwaajüleekat, wataʼülaka nia. 7 * 8 Pütüjaajeerü aaʼu shiimain süpüshuaʼa tü kasa waküjakat pümüin nüchiki chira wayuukai püsakiijapa nia süchiirua tia».
9 Naküjayaa namaka napüshuaʼa na judíokana shiimain süpüshuaʼa tü nümakat Tértulo. 10 Nüliataka nikii chi aluwataashikai nümüin Pablo süpüla naashajaainjachin. Anuujese nünüiki Pablo nümüin:
«Tatüjaa aaʼu kakaliaichin pia sünain anoutaa sukuwaʼipa wanee kasa yaa suluʼu mmakat tüü, anasüjeseʼe taaʼin sünain aashajawaa pümaa süchiki tü kasa eʼitaanakalü aaʼu taya. 11 Nnojotyülia alatüin poloo piamamüin kaʼi süchikijee chejeein taya Jerusalénjee sünain aʼwaajaa Maleiwa. Eeshi süpüla püsakirüin süchiirua tia süpüla pütüjaain saaʼu shiimainre tü tamakat pümüin. 12 Nnojoishi taya aʼülüjiraain napüla sümaa wayuu suluʼu tü aʼwaajüleekat, nnojoishi taya ashükajüin wayuu suluʼu tü ekirajüleekat nüchiki Maleiwa jee suluʼupünaa tü pueulokot. 13 Nnojotsü süpüla naküjain jaralin eʼrüin taya sünain aaʼinraa tü kasa neʼitaakalü aaʼu taya. 14 Nnojotsü tounjulajüin puulia namaain taya na wayuu ‹Nazarenos› namakana amüin nala wayuukana. Nia taʼyataaka amüin chi Maleiwakai, chi Namaleiwasekai na tatuushinuukana. Tanouja anainrü tü sümakat tü Pütchi Aapünakat nümüin Moisés otta tü namakat na Nünüikimaajanakana Maleiwa. 15 Tü kasa taʼatapajakat nutuma Maleiwa shiaʼaya neʼe tü kasa naʼatapajakat nala wayuukana. Shia taʼatapajaka nasoʼireʼennüin aaʼin süchikijee outaa na wayuu lotokana akuwaʼipa otta na wayuu nnojoliikana lotuin akuwaʼipa. 16 Müshijeseʼe taʼyataain maʼin waneepia süchiirua wuleinjatüin taaʼin* nuʼupala Maleiwa otta suʼupala wayuu. 17 Süchikijee kojuya juya, aleʼejüshi taya tachikuaʼa süpüla tasülajüinjachin namüin na wayuu toumainpaʼajeʼewaliikana otta müsia süpüla tasülajüinjachin nümüin chi Maleiwakai. 18 Wanaa sümaa chajachin taya suluʼu tü aʼwaajüleekat sünain aaʼinraa tia, wulesü takuwaʼipa maʼakaapuʼu wulein nakuwaʼipa na judíokana. Nnojoishii wainmain na wayuu eejanakana tamaa jee nnojoishi taya ashükajüin wayuu. Eejanapejeʼe waneinnua wayuu judío chejeʼewaliikana suluʼujee tü mmakat Asia* 19 yaainjanakana aküjain pümüin kasain nalirajüin aaʼujee taya, müleka shiimainrejeʼe tü nalirajakalü aaʼujee taya. 20 Jee nayalejeʼeya aküjain pümüin na wayuu yaakana müinmaʼa yaa kasain taainjalain soʼu chajachin taya namaʼana na sulujunakana tü kanüliakat Sanedrín. 21 Aluʼu taküjainjaʼa wanee pütchi sünain maa: ‹Süsalashi taya soʼukai juʼupala saaʼu tanoujain nasoʼiraainjanain aaʼin na wayuu outushiikana›».
22 Niʼraajüin maʼin Félix nakuwaʼipa na wayuu sulujunakana tü kanüliakat «Wopu», niiʼiratüinjeseʼe tü kaʼi nüneeküinjatkalü oʼu tü naainjüinjatkat jee anuujeseʼe nünüiki namüin na wayuu yalajanakana: «Taküjeerü jümüin kasainjatüin taneeküin nüntapeena Lisias, chi sülaülashikai surulaat». 23 Nüküjain Félix nümüin chi sülaülashikai surulaat nüsürülüinjachin Pablo sümaa jutatüinjatüin nukuwaʼipa nutuma süpüla naaʼinrüinjatüin waneirua kasa jee nüküjain nümüin nuuʼulaainjachin Pablo süpüla nükaalinjünüinjachin natuma waneinnua nuwalayuu.
24 Maʼaka jeʼra kaʼi süchikijee tia, nüntakalaka Félix sümaa tü nuʼwayuusekat, Drusila sünülia, wayuu judío shia. Nuunejiraka Pablo, naapajaka nünüiki süchiki tü nunoulakat nünain Cristo Jesús. 25 Wanaa sümaa naashajaain Pablo süchiki tü lotookalü akuwaʼipaa, nüchecherüinjachin naaʼin wanee wayuu jee kasalajanainjatüin saainjala wayuu nutuma Maleiwa, mmotkalaka Félix jee nümakalaka nümüin: «Anashi puʼunule, teenajireechi pia püchikuaʼa eepa kaʼi tapüla». 26 Eesü naaʼin Félix shiiʼiree naapüinjachin Pablo nneerü nümüin, müshijeseʼe neenajirüin nia pejeewa süpüla naashajaainjachin nümaa. 27 Sülatapa piama juya süchikijee tia, niakalaka aikalaain Porcio Festo nüchikumüin Félix. Nuuʼulaain Félix püreesain Pablo suluʼu tü kaatsetkat shiiʼiree talatüinjanain neʼe na judíokana nümaa.