Éxodo
24 Anuujeseʼe nünüiki Jehová nümüin Moisés: «Püʼliikajaa saaʼumüin tü uuchikat nümaa Aarón, Nadab, Abihú jee müshiʼiya akaratshishii nekii na laülaashiikana napüleerua na israelitakana, jejepülaajeenaka kaʼyatajee sümaa juʼwaajüin taya. 2 Piainjachi neʼe piakai Moisés arütkaaka tanainmüin tayakai Jehová. Nnojoishii arütkaainjanain tanainmüin na pümaajanakana jee nnojoishii aʼliikajaainjanain na israelitakana pümaa saaʼumüin tü uuchikat».
3 Nüküjakalaka Moisés namüin na israelitakana süpüshuaʼa tü nümakat Jehová jee süpüshuaʼa tü nuluwataakalü anain. Anuujeseʼe nanüiki napüshuaʼa na israelitakana nümüin: «Woonoojeeria amaa süpüshuaʼa tü nümakat wamüin Jehová». 4 Nüshajaka Moisés süpüshuaʼa tü nümakat Jehová nümüin. Shiasaʼa süchikijee tia, nütamaaka wattachon maalü nuʼunaka süʼütpaʼamüin tü uuchikat, nukumajaka chayaa wanee aʼajülee nümüin Maleiwa. Nüpaʼawajaakalaka ipa, poloosü piamamüin shia nutuma shiyaawase tü poloosükat piamamüin neʼiruku na israelitakana. 5 Shiasaʼa mapa, nüneekaka Moisés jimaʼalii naʼakajee na israelitakana, noʼutakalaka saaʼin mürüt na jimaʼaliikana süpüla naʼajüin shia nümüin Maleiwa, oʼutushiʼiya naya saaʼin paaʼa tooloyuu nümüin Jehová anajiraainjatka aaʼujee naya nümaa. 6 Niʼyotoko Moisés süpüshi süsha tü mürütkat suluʼu waneirua iita, nütülüittiraka tü wane süpüshikat tü ishakat saaʼu tü aʼajüleekat. 7 Naapaakalaka Moisés tü karaloʼuta sümaajatkat tü pütchi apansaajünakat, naashajeʼeraka shia sümaa emetuluin nünüiki namüin na israelitakana. Anuujeseʼe nanüiki na israelitakana nümüin: «Waaʼinreeriaʼaya süpüshuaʼa tü nümakat wamüin Jehová jee woonoojeerü amaa shia». 8 Nütülüittiraka Moisés tü ishakat naaʼu na israelitakana sümaa nümüin namüin: «Ishakat tüü, süikaleʼeria tü pütchi nüpansaajakat Jehová jümaa, wanaapünaa sümaa tü pütchi suluʼukat tü karaloʼuta taashajeʼerakat jümüin».
9 Nüʼliikajaaka Moisés saaʼumüin tü uuchikat nümaa Aarón, Nadab, Abihú jee müshiʼiya akaratshishii nekii na laülaashiikana napüleerua na israelitakana. 10 Neʼrakalaka tü nüpülainkat Maleiwa, müsü aka saaʼin «zafiro» tü eekat suupünaa nuuʼui, warattüsü maʼin shia maʼaka saaʼin jutatuuire tü sirumatuʼukat. 11 Nnojoliikalaka jamajüin nutuma naya wayuu kaawainkana maʼin naʼakajee na israelitakana. Müshi neʼrakai naaʼin chi shiimainshikai suluʼu Maleiwain, ekaashiijeseʼe naya.
12 Anuujeseʼe nünüiki Jehová nümüin Moisés: «Püʼliikajaa saaʼumüin tü uuchikalü eere taya, cheechika pia. Taapeerü pümüin waneirua ipa tashajüinjatka anain tü taluwataainjatkalü anain na israelitakana». 13 Yapajakalaka Moisés nümaa Josué chi niʼipajachikai. Nuʼunakalaka Moisés saaʼumüin tü uuchikalü eere chi shiimainshikai suluʼu Maleiwain. 14 Anuu tü nümatüjütkalia Moisés namüin na laülaashiikana napüleerua na israelitakana: «Jaʼatapajeena waya yaʼayaa, yaajeechi jümaa Aarón jee müshia Hur. Mojujiraale wayuu süchiirua wanee kasa, arütkaainjana naya nünainmüin Aarón nümaa Hur süpüla nanoutuin tü mojujirawaakat». 15 Nüʼliikajaakalaka Moisés saaʼumüin tü uuchikat, süshakataka tü sirumakat saaʼumüin tü uuchikat.
16 Chuwatuuikalaka saaʼu tü uuchikat Sinaí nutuma Jehová süka eejachin nia saaʼu, ayatüsia tü sirumakat saaʼu soʼunnaa aipirua kaʼi. Shiasaʼa soʼu tü akaratshikat kaʼi nuunejünakalaka Moisés saʼakajee tü sirumakat nutuma Maleiwa. 17 Tü chuwatuuitkat saaʼu tü uuchikat nutuma Jehová mataasü aka saaʼin wanee siki chuwataka saaʼin namüin na israelitakana ajaʼttiraka wanee kasa sooʼopünaa tü uuchikat. 18 Nikerotakalaka Moisés saʼakapünaa tü sirumakat sümaa nüʼliikajaain saaʼu tü uuchikat, chajachika nia soʼu pienchi shikii kaʼi jee pienchi shikii ai.