Levítico

22 Naashajaaka Jehová nüchikuaʼa nümaa Moisés sümaa nümüin nümüin: 2 «Püma nümüin Aarón otta namüin na nüchonniikana jülüjainjatüin naaʼin tü kasa wulesü naapakat tamüin na israelitakana jee kojutuinjachin taya namüin wanaapünaa sümaa tü nakatalakat tamüin. Tayasa Jehová. 3 Anuu tü püküjainjatkat namüin: ‹Oʼutunajachi aaʼin chi pülüin arütkaakai sümaa yarüttüin nia sünain tü kasa wulesü nasülajakat na israelitakana tamüin tayakai Jehová. Naaʼinrüinjatü tia na püikeyuu eejeenakana püchikumüin. Tayasa Jehová. 4 Nnojotsü niküinjatüin wanee nülüin Aarón tü kasa wulesü aapünakat tamüin kajüle nükorolo otta nünainre tü ayuulii kanüliakat lepra, waneʼereeya niküin shia wulepa nia otta nnojotsü niküinjatüin shia wanee wayuu yarüttakai sünainjee nipettüin wanee outusü jee chi eekai kawasain. 5 Nnojotsü niküinjatüin shia chi wayuu epettakai tü wüchii yarüttüsü wattakat saalii saaʼu tü mmakat otta chi eekai nipettüin wanee wayuu yarüttakai saaʼujee wanee kasa yarütteechika anainjee nia. 6 Yarütteechi chi wayuu epettakai eekai müin aka saaʼin tia kasa yarüttüsükat, waneʼereeya wulein nia motsopa kaʼikat. Nnojotsü niküinjatüin tü kasa wulesü asülajünakat tamüin, waneʼereeya noʼoojopa. 7 Wuleechi nia motsopa kaʼikat, nika nümeeria tü kasa wulesükat süka niküüin shia. 8 Nnojotsü niküinjatüin shiʼiruku wanee mürüt antuushika anain sümaa outuin shia jee eekai süpütaalain wüchii jashichi süka yarütteechin nia sünainjee. Tayasa Jehová.

9 »›Naaʼinrajatü na nüikeyuukana Aarón tü aluwataanakalü anain suulia kaainjalain naya saaʼujee nnojoliin noonooin jee nnojoleenaka naya outuin saaʼujee mojutuin namüin tü kasa wulekat. Tayasa Jehová chi wulekai atuma nakuwaʼipa.

10 »›Nnojotsü neküinjatüin tü kasa wulesükat na nnojoliikana napüshin na israelitakana otta müshiʼiya na wayuu naatakana oumain neʼiyouka na sacerdotekana nümaʼaleeya wanee wayuu aʼyateʼennakai saaʼu nneerü. 11 Nia eeka süpüla eküin tü eküütkat wanee wayuu ayaʼlajuushikai nutuma chi sacerdotekai süpüla nüchepchiainjachin nia. Eesiaʼaya süpüla neküin tia na achepchiee joʼuukana nipialuʼu chi sacerdotekai. 12 Nnojotsü shiküinjatüin nüchon chi sacerdotekai tü kasa wulesü aapünakat tamüin kasaarüle shia nümaa wanee eekai nnojolin sacerdotein. 13 Outule suʼwayuuse nüchon wanee sacerdote, suuʼulaaushire jee machonle shia, süleʼejaale nipialuʼumüin chi süshikai maʼakaapuʼu paala majayülüiwaʼaya shia, eesü süpüla shiküin tü eküülü aapünakat nümüin chi süshikai. Nnojotsü niküinjatüin tia eküütkat wanee wayuu nnojorüle saapünüin shikii nümüin.

14 »›Eere wanee wayuu ekakai tü kasa wulekat sümaa nnojolin naaʼinjeein shia, niiteʼerüinjatü shia süchikuaʼa nümüin chi sacerdotekai sümaa naapüin wanee sooʼomüin.* 15 Nnojotsü mojutuinjatüin namüin na sacerdotekana tü kasa wulesü nasülajakat na israelitakana tamüin tayakai Jehová. 16 Nnojoishii kaainjalainjanain na israelitakana natuma na sacerdotekana saaʼujee neküin tü kasa wulesükat süka tayain tayakai Jehová chi wulekai atuma jukuwaʼipa›».

17 Ayatakalaka naashajaain Jehová nümaa Moisés sümaa nümüin nümüin: 18 «Paashajaa nümaa Aarón, namaa na nüchonniikana jee namaa napüshuaʼa na israelitakana sümaa pümüin namüin: ‹Nüsülajeepa wanee israelita jee niale wanee nnojoikai israelitain wanee kasa aʼajünajatka tamüin tayakai Jehová süpüla nikeraajüin tü nünüiki naapakat paala jee shiale naapüinjatüin wanee kasa süka naaʼin nümüiwaʼa, 19 aapajachi nia wanee paaʼa eekai mamojulain, niale wanee anneetchon jee shiale wanee kaaʼula süpüla talatüinjachin taya nümaa. 20 Nnojotsü jüsülajüinjatüin wanee kasa eekai kamojulain, nnojoleetsa kasain saamüin jümüin tia süpüla talatüinjachin taya jümaa.

21 »›Nüsülajüinjachire wanee wayuu mürüt tamüin tayakai Jehová süpüla anajiraainjachin nia tamaa jee shiale süpüla nikeraajüin tü nümakat jee nüsülajüle neʼe shia süka naaʼin nümüiwaʼa, nnojoluinjatü ayuulin tü paaʼa nüsülajakat jee shiale tü anneetkat jee tü kaaʼulakat süpüla talatüinjachin taya sümaa tü nüsülajakat. Nnojoluinjatü kamojulain. 22 Nnojotsü nüsülajüinjatüin wanee mürüt eekai moʼupaʼain, yülüin shiipüse, shiʼyotoonuin ata, eekai sukumajaain siʼirü sünain süta, eekai yoolin süta sümaa sukumajaain süta tü sülioʼukat. Nnojotsü nüsülajüinjatüin tamüin tayakai Jehová eekai müin aka saaʼin tia jee nnojotsü oʼutunuinjatüin saaʼin jee saʼajünüin tamüin tayakai Jehová saaʼu tü aʼajüleekat. 23 Eeshii süpüla jüsülajüin süka jaaʼin jümüiwaʼa wanee paaʼa jee shiale wanee anneerü, jaʼitairü miyoʼuwalaʼatain süsaʼa jee joʼuuchonwalaʼatain süsaʼa, nnojotpejeʼe jaapajatüin shia saaʼu jaapüin jünüiki. 24 Nnojotsü jaapüinjatüin tamüin tayakai Jehová wanee mürüt eekai seewaain süshüʼü, eekai süchotouushin süshüʼü jee eekai sükapajuushin. Nnojotsü jaapüinjatüin tia mürütkalüirua juumainpaʼa. 25 Nnojoleerü jaapaain tia mürütkalüirua naapajarale shia wanee wayuu nnojoikai israelitain süpüla süsülajünüinjatüin tamüin tayakai Maleiwa maʼaka saaʼin eküülü asülajuushi, kamojulasü tia mürütkalüirua. Nnojoleerü tacheküin shia›».

26 Naashajaakalaka nüchikuaʼa Jehová nümüin Moisés sümaa nümüin nümüin: 27 «Joʼuupa wanee paaʼa, wanee anneerü jee wanee kaaʼula, ooʼulaanajachi nia sümaa tü niikat soʼu akaratshi kaʼi, shiasaʼa soʼu tü mekiisatkat kaʼi keraajeechi nia süpüla nüsülajünüinjachin tamüin tayakai Jehová, oʼutunajachi aaʼin sümaa naʼajünüin tamüin. 28 Nnojoishi oʼutunajachin aaʼin wanee paaʼa sümaa nüchon soʼuleʼeya wanee kaʼi otta müsia wanee anneerü sümaa süchon.

29 »Jüsülajüinjanale wanee kasa süpüla jaapüinjatüin analuʼut tamüin tayakai Jehová, anainjatü sukuwaʼipa jutuma süpüla talatajachin taya jümaa. 30 Ekünajatü shia soʼuleʼeya tia kaʼikat, nnojotsü anaajaanajatüin süpüla waneemüin kaʼi. Tayasa Jehová.

31 »Joonooinjatü amaa tü taluwataakalü anain jee jaaʼinrajatü shia. Tayasa Jehová. 32 Nnojoishi taya mojutuinjachin jutuma, kojuteechikalaka taya natuma na israelitakana. Tayasa Jehová chi wulekai atuma jukuwaʼipa. 33 Taya ayuʼlaka jia suluʼujee tü mmakalü Egipto süpüla Jümaleiwaseinjachin taya. Tayasa Jehová».