Génesis

47 Nuʼunakalaka José nümaʼanamüin faraón sümaa müin nünüiki nümüin: «Antüshi chi tashikai namaʼaleeya na tawalayuukana suluʼujee tü mmakat Canaán. Antüshii naya sümaa naʼanneetse, napaaʼase jee sümaa süpüshuaʼa tü kasa eekat namaʼana, chashii naya suluʼu tü mmakat Gosén». 2 Nüneekaka José jaʼraishii nuwalayuu jee nümaakalaka naya nümaʼanamüin faraón süpüla niʼraajirüinjanain naya.

3 Anuu tü nüsakirakalü anain faraón na nuwalayuukana José: «¿Kasa jütüjaka apüleerua?». «Waya püchepchiakana, arüleejülii waya anneerü, mapuʼusia nakuwaʼipa na watuushinuukana wapüleerua», namakalaka nümüin. 4 Anuuta joo nanüiki nümüin faraón: «Oʼonooshii waya suluʼu mmakat tüü süka alin maʼin tü jamükat suluʼu tü mmakat Canaán, nnojotsü eein alama shiküinjatka wamüʼlüin. Laülaashikalee paapa maa wamüin tü mmakat Gosén süpüla kepiainjanain waya suluʼu». 5 Anuuka nünüiki faraón nümüin José: «Antüshi chi püshikai jee na puwalayuukana süpüla kepiainjanain naya pümaa. 6 Laülaashi pia suluʼu tü mmakalü Egipto, anashi kepiale chi püshikai namaa na puwalayuukana eere anain maʼin, kepiainjana naya suluʼu tü mmakat Gosén. Paapüle nachiki eein naʼaka wayuu eekai yalayalain aaʼin sünain aʼyatawaa, piʼitaa naya süpüla jülüjain naaʼin tü tamüʼlüinkat».

7 Nümaaka José Jacob chi nüshikai nümaʼanamüin faraón süpüla niʼraajirüin nia, nuchuntaka Jacob anaa nüpüleerua faraón. 8 Nüsakiraka faraón Jacob: «¿Jeʼraichi juya pia?». 9 «Ciento treinta juya taya sünain oʼonookuʼu maa. Watta saalii kasa alataka tamüin soʼunnaa tia, paliʼitpejeʼe touyase suulia nouyase na tatuushinuukana sünain noʼonookuʼu namüin», nümaka Jacob nümüin faraón. 10 Nuchuntaka Jacob anaa nüpüleerua faraón süchikijee tia jee nuʼunaka nümaʼanajee.

11 Naapaka José nipia chi nüshikai jee na nuwalayuukana suluʼu tü mmakalü Egipto, shia naapaka tü mma anakat maʼin chaa suluʼu tü mmakat Ramesés. Naaʼinrüin tia wanaapünaa sümaa tü nuluwataakalü anain faraón. 12 Nülatirawalin José nümüin chi nüshikai, namüin na nuwalayuukana jee sümüin nüpüshi chi nüshikai tü neküinjatkat, naaʼinrüin tia wanaapünaa sümaa jeʼrain nachonnii.

13 Nnojotsü eein eküülü suluʼu tü mmakalü Egipto jee suluʼu tü mmakat Canaán süka alin maʼin tü jamükat. Müliakalaka maʼin wayuu sutuma tü jamükat suluʼu tia mmakat. 14 Nukotchojawalin José tü nneerü naapakat na wayuu kepiakana suluʼu tü mmakalü Egipto jee suluʼu tü mmakat Canaán saaʼu tü eküülü* nayaʼlajakat, niʼikajaa nümüsia tia nneetkat eere nünaajaain faraón nuwashirüin. 15 Sajaʼttaka nanneetse na wayuu kepiakana suluʼu tü mmakalü Egipto jee na kepiakana suluʼu tü mmakat Canaán. Noʼunakalaka na egipciokana nümaʼanamüin José sümaa müin nanüiki nümüin: «Paapa sooʼomüin weküin. ¿Puuʼulaajeenache outuin waya saaʼu manneetsein waya?». 16 Anuujeseʼe nünüiki José namüin: «Süka manneetsein jia jüntira tamüin tü jümüʼlüinkat, taapetka jümüin eküülü saaʼu». 17 Neʼikajaa namüsüjaʼa tü namüʼlüinkat nümüin, naapaka José eküülü namüin saaʼu naʼamain, naʼanneetse, nakaʼulain, napaaʼase jee napüliiküse. Naapüin José eküülü namüin soʼu juyakat tia shiiʼiraka tü namüʼlüinkat.

18 Sajaʼttaka tia juyakat, shiasaʼa waneemüin juya, oʼunushii naya nümaʼanamüin José sümaa müin nanüiki nümüin: «Nnojotsü süpüla wounjulajüin puulia laülaashikalee waapüitpain pümüin süpüshuaʼa wanneetse jee süpüshuaʼa wamüʼlüin, shiaʼala neʼe choʼujaaka waapüin pümüin laülaashikalee tü woumainkat jee püchepchiain waya. 19 ¿Puuʼulaajeenache outuin waya jee nnojoluin kasain süpaʼain woumain? Piyaʼlaja waya jee piyaʼlaja woumain sümaa paapüin eküülü wamüin saaʼu. Nüchepchieena waya faraón jee nuumainjeerü tü woumainkat. Paapa wamüin waüyee wapünajüinjatka, wekeenaka süchon suulia outajüin waya jee suulia maluʼujain woumain». 20 Niyaʼlajaka José süpüshuaʼa noumain na egipciokana süpüla nuumainjatüin shia faraón. Noiküin noumain na egipciokana süka alin maʼin tü jamükat, nuumainkalaka shia faraón.

21 Nuchuntaka mapa José namüin napüshuaʼa na wayuu kepiakana suluʼu tü mmakalü Egipto, nakolojooinjanain suluʼumüin tü pueulokalüirua. 22 Shia neʼe nnojotka niyaʼlajüin tü noumainkat na sacerdotekana. Nnojotsü noiküin noumain süka naapüin faraón tü neküinjatkat, epijaashii naya sünainjee tia. 23 Anuujeseʼe nünüiki José namüin na wayuukana: «Tayaʼlajüin jia soʼukai süpüla nüchepchiainjanain jia faraón jee nuumainjatüin tü juumainkat. Anuu taapüin jümüin waüyee süpüla jüpünajüinjatüin shia süpaʼa juumain. 24 Jükotchojüinjatpa süchon jüʼttia, jaʼraisüwalinjatü shiʼipa jutuma, jaapeetkalaka wanee shiʼipa nümüin faraón jee tü pienchisü shiʼipa apütaakat, süpülajatü jüpünajüin shia süchikuaʼa, süpüla jiküinjatüin shia namaa na jipialujunakana jee namaa na jüchonniikana». 25 Anuujeseʼe nanüiki nümüin: «Laülaashikalee, puʼtteʼerüin waya suulia outaa, anakajaʼa puuʼulaale nüchepchiain waya faraón». 26 Nüikaleʼeraka José wanee pütchi, ayatayülia kaawain shia maaʼulu chaa suluʼu tü mmakalü Egipto. Sünainjee jaʼraisü shiʼipa süchon aʼttiee, aapünüinjatü wanee shiʼipa nümüin faraón. Naya nnojoliika aaʼinrüin tia na sacerdotekana süka nnojolin nuumain faraón tü noumainkat.

27 Makataka Israel suluʼu tü mmakat Gosén chaa Egipto, kepiakalaka nia chayaa sümaa nüpüshi, kachonniika naya, wattaka maʼin naalii. 28 Kepiashi Jacob soʼu poloo akaratshi juya suluʼu tü mmakalü Egipto. 147 nuuyase nünaajaapa.

29 Anuu nünüiki Israel nümüin José chi nüchonkai nülüʼülapa süpüla outaa: «Anuu tü paaʼinrüinjatkat kamaneere pia tamüin, paapa pünüiki* tamüin pümülialaainjachin taalin jee paaʼinrüinjatüin tü pümakat. Nnojo piʼiküin taya suluʼu tü mmakalü Egipto. 30 Pülüʼüjainjachi taya yaajee Egiptojee tanaajaapa, naamakeechi taya na tatuushinuukana». Anuujeseʼe nünüiki José nümüin: «Taaʼinreeriaʼaya tü puchuntakat tamüin». 31 «Paapa pünüiki tamüin», nümaka nümüin. Naapaka nünüiki José nümüin. Nejepülaka nikii Israel soʼu joyotuin nia shikiinain tü camakat.