Naʼyataain na Aluwataaushikana
6 Soʼunnaa tia, akooʼomüinraashii maʼin na nikirajüinkana Jesús. Nayasaʼa na judío aashajaakana griego, aʼyounalaashii nooʼomüin na judío aashajaakana hebreo, jama nnojoluin saapünawalin namüin weinshi neküin na neiyeyuuse outakana aʼwayuuse. 2 Noutkajeʼennakalaka napüshuaʼa na nikirajüinkana Jesús natuma na Polookana Piamamüin aluwataaushi jee namakalaka namüin: «Nnojotsü anain wooʼulaale suulia ekirajaa nünüiki Maleiwa süpüleerua weitajüin eküülü sümüin wayuu. 3 Wawalayuu, anashii jüneeküle akaratshishii wayuu jaʼakajee eekai anain pütchi nachiki, eekai kaaʼuin tü nüpülainkat Maleiwa jee eekai kekiin maʼin. Weʼitaajeetkalaka najapuluʼu tia aʼyatawaakat, jama choʼujaain maʼin shia. 4 Shieetkalaka jülüjain waaʼin tü oʼuraajaakat sümaʼaleeya tü waʼyataainkat sünain aküjaa nünüiki Maleiwa». 5 Anashiikalaka tia namüin napüshuaʼa na nikirajüinkana Jesús. Naneeküinjeseʼe Esteban, wanee wayuu kanoulashi maʼin jee eesü naaʼu tü nüpülainkat Maleiwa. Naneeküin Felipe, Prócoro, Nicanor, Timón, Parmenas otta müshia Nicolás, wanee wayuu napüshi na nnojoliikana judíoin ekerotokana naʼakamüin na judíokana sünain anoujaa. Chejeʼewai nia Antioquía. 6 Neʼikajaanakalaka naya wayuukana eemüin na aluwataaushikana. Nayasaʼa na aluwataaushikana, oʼuraajüshii jee süchikijee tia, neʼitaakalaka najapü naaʼu.
7 Suluʼujee tia, suʼwalakajaakalaka süchiki nünüiki Maleiwa jee akooʼomüinraashii maʼin na nikirajüinkana Jesús chaa Jerusalén otta kojuyashii na sacerdote anoujakana.
8 Niasaʼa Esteban, anasü nukuwaʼipa noʼuluʼu Maleiwa jee eesü tü nüpülainkat Maleiwa naaʼu. Naainjakalaka watta saalii kasa pülasü noʼupala na wayuukana. 9 Eepejeʼe waneinnua wayuu oʼunakana sünain aaʼayajirawaa nümaa Esteban, eejana na kanüliakana Libertos, eejana waneinnua wayuu chejeʼewalii Cirene, Alejandría, Cilicia jee müsia Asia.* 10 Nnojoliipejeʼe naya eejiraain nümaa Esteban, jama kekiin maʼin nia sünain aashajawaa jee atüjashi nia süpüleerua nünüiki süka nükaalinjünüin nutuma Maleiwa sükajee tü nüpülainkat. 11 Nasakajaka ojuunaa waneinnua wayuu süpüla müinjatüin nanüiki mayaa: «Waapüinsaʼa nünüiki wayuukai chii sünain mojutuin Moisés nümüin jee mojutusai Maleiwa nümüinya». 12 Suluʼujee tia, nashükajakalaka wayuu nooʼomüin Esteban namaʼaleeya na laülaashiikana otta na karaloʼutamaajanakana. Antamaatüshiijeseʼe naya nümaʼanamüin Esteban, nataʼülakalaka nia sümaa namaain nia namaʼanamüin na suluʼukana tü kanüliakat Sanedrín. 13 Nantitkalaka waneinnua wayuu aküjakana naʼalain nüchiki Esteban sünain maa: «Eekajasaʼa wayuukai chii, nnojoishi ooʼulaain suulia mojuin nünüiki süchiki tü aʼwaajüleekat Maleiwa jee süchiki tü Pütchi Aapünakat nümüin Moisés. 14 Jamüshijaʼa nia, nüküjain woʼupala nujuichijeʼerüinjatüin Jesús, chi Nazaretjeʼewaikai tü aʼwaajüleekat Maleiwa otta nuʼwanajaainjatüin tü akuwaʼipaa eʼitaanakalü ekii wapüleerua nükajee Moisés».
15 Neirakaaka nümüin Esteban napüshuaʼa na eejanakana joyojoyoluin suluʼu tü kanüliakat Sanedrín. Neʼrakalaka müin tü nuʼupünaakat maʼaka saaʼin nuʼupünaa wanee aapiee nümaʼanajeejachi Maleiwa.