Génesis
15 Shiasaʼa süchikijee tia, makalaka niʼrakai saaʼin Abrán wanee kasa nutuma Jehová, sümaa nümüin nümüin: «Nnojo mmoluin pia Abrán, taaʼinmajeechi pia,* wainmeerü maʼin kasa taapaka pümüin». 2 Nusoutakalaka Abrán nümüin Maleiwa: «Señotkai Jehová, Laülaakai saaʼu kasa süpüshuaʼa, ¿kasa paapüinjatka tamüin? Nnojoiyüisaʼaya kachooin taya, apütaajeerü süpüshuaʼa tü kasa tamaʼanakat nüpüla Eliezer, chi wayuu chejeʼewaikai Damasco». 3 Ayatakalaka naashajaain Abrán sünain maa: «Nnojoiyüisaʼaya taya kaikeyuuin putuma, nieechi neʼe teʼipünaaka apüla tü kasa tamaʼanakat wanee tachepchia». 4 Anuukalaka joo nünüiki Jehová nümüin: «Nnojoleechi niain piʼipünaain apüla tü kasa pümaʼanakat chia wayuukai, nieechi piʼipünaaka apüla shia chi püchonkai».
5 Nümaanakalaka anooipaʼamüin Abrán nutuma Maleiwa jee nümaka nümüin: «Piirakaa iipünaamüin, piyaawaja tü shüliwalakat müleka eerejeʼe süpüla piyaawajüin shia». «Watteeria saalii püikeyuu tatuma maʼaka wattain saalii tü shüliwalakat» nümakalaka nümüin. 6 Kanoulashi Abrán nünain Jehová, lotuitkalaka nukuwaʼipa noʼuluʼu Maleiwa. 7 Anuukalaka nünüiki Maleiwa: «Taya chi Jehovákai anülia, chi ojuʼitirakai pia suluʼujee tü mmakalü Ur, tü suumainkat wayuu caldeo, tojuʼitirüin pia süpüla taapajatüin pümüin mmakat tüü». 8 Nüsakinnakalaka Maleiwa nutuma Abrán sünain müin nünüiki nümüin: «Señotkai Jehová, Laülaakai saaʼu kasa süpüshuaʼa, ¿kasa tayaawateetka akajee shiimainjeerüin toumain tia mmakat?». 9 Nusoutakalaka Maleiwa nümüin: «Püchajaa tamüin wanee paaʼa eekai apünüinrüin juya, wanee kaaʼula eekai apünüinrüin juya, wanee anneerü eekai apünüinchin juya, wanee wawaachi otta müsia wanee toomasüchon». 10 Nüchajaakalakajaʼaya Abrán tia mürütkalüirua, nuʼutaka saaʼin jee nuwaʼlaka shia pasanainpünaa, nnojotpejeʼe nuwaʼlüin tü wüchiikalüirua, nuwayatkalaka shia sümaa paʼataain shia nutuma. 11 Süntakalaka wüchii miyoʼuyuu sünainmüin shiʼiruku tü mürütkalüirua, naʼatajakalaka Abrán tü wüchiikalüirua suulia.
12 Shiasaʼa motsopa kaʼikat, saapaakalaka Abrán wanee lapü kaʼlesü maʼin naaʼu jee kojokalaka maʼin tü piʼyuushikat naaʼu. 13 Anuukalaka joo nünüiki Maleiwa nümüin Abrán: «Pütüjaa saaʼu noʼonoojeenain na püikeyuukana suluʼu wanee mma naatajatü, achepchieejeena naya natuma na wayuu kepiakana suluʼu tia mmakat, mülieena naya natuma naya wayuukana soʼu 400 juya. 14 Kasalajaneerü namüin naya wayuukana nachepchiain na püikeyuukana. Wainmeeria nawashirüin na püikeyuukana noʼunapa suluʼujee tia mmakat. 15 Naamakeechi pia putuushinuu, anaajaweechi pia laülaapa pia sümaa anain paaʼin. 16 Nayeenapejeʼe aleʼejüin nachonnii na püikeyuukana, jama nnojoliiyüliʼinña keraain süpüla süsalain naainjala na wayuu kanüliakana amorreo».
17 Shiasaʼa nikerotapa chi kaʼikai wanaa sümaa piʼyuushin maʼin, eejaʼalaa sümaka wanee «horno» kaitaka amüsain jee müsia wanee sikoʼu chuwataka maʼin, alataka saʼakapünaa shiʼiruku tü mürütkalüirua. 18 Nüpansaajakalaka joo nünüiki Jehová nümüin Abrán soʼuleʼeya kaʼikat tia, anuu nünüiki nümüin: «Taapeerü mmakat tüü namüin na püikeyuukana, eejeereʼeya tü süchi chakalü Egipto sünainmüinreʼeya tü süchi miyoʼu kanüliakalü Éufrates. 19 Taapeerü namüin noumain na quenitakana, noumain na quenizitakana, noumain na cadmonitakana, 20 noumain na hititakana, noumain na perizitakana, noumain na refaímkana, 21 noumain na amorreokana, noumain na cananeokana, noumain na guirgaseokana jee müsia noumain na jebuseokana».