Chiiruaajatka karaloʼuta Samuel

3 Kakaliashii paʼünüüwajiraain nümaa David na wayuu paaʼinwakana namaa na nüpüshikana Saúl. Akooʼomüinraashii maʼin na wayuu paaʼinwakana nümaa David, apaliʼirajapejeʼe na wayuu paaʼinwakana namaa na nüpüshikana Saúl.

2 Wainma na nüchooinkana David soʼu chajachin nia suluʼu tü mmakat Hebrón. Amnón nünülia chi palajachikai nüchon, nüchon nia sümüin Ahinoam, tü chejeʼewatkat Jezreel. 3 Kileab nünülia chi wane nüchonkai David, nüchon nia sümüin Abigaíl, Nabal nünülia chi suʼwayuusepuʼukai, outushi nia, chejeʼewai nia suluʼujee tü mmakat Carmelo. Absalón nünülia chi wane nüchonkai, nüchon nia sümüin Maacá, tü nüchonkat Talmái, chi aluwataakai saaʼu tü mmakat Guesur. 4 Adonías nünülia chi wane nüchonkai David, nüchon nia sümüin Haguit. Sefatías nünülia chi wane, nüchon nia sümüin Abital. 5 Itream nünülia chi wane nüchonkai David, nüchon nia sümüin Eglá. Nüchooin David naya makana suluʼu tü mmakat Hebrón.

6 Ayatüshiʼiya paʼünüüwaain nümaa David na wayuu paaʼinwakana namaa na nüpüshikana Saúl, aʼwainmalaapejeʼe maʼin na nüpüshi Saúl wanaawakana aaʼin nümaa Abner. 7 Eejatkalaka wanee wayuu kanüliakat Rizpá, suwalaʼata nuʼwayuuse Saúl, nüchon shia Ayá. Shiasaʼa soʼu wanee kaʼi, «¿Jamüshi püinkaakaʼa sümaa suwalaʼata nuʼwayuuse chi tashikai?», nümakalaka Is-Bóset nümüin Abner. 8 Naashichijaakalaka Abner saalinjee tü nümakat Is-Bóset nümüin jee nümakalaka: «Erüyaakajasaʼa* taya paaʼinruʼu maʼaka saaʼin tü erü eekat Judá. Ayatayüiya taya kamaneein namüin na wayuu paaʼinwakana namaa nüpüshi chi püshikai, namaa na nuwalayuukana jee namaa naʼaleewainyuu. Eetaayaai taapüin pikii nümüin David, jashichipejeʼe neʼe pia tamüin saalinjee tainkaain sümaa wanee wayuu. 9 Anashi süsarale taya nutuma Maleiwa nnojorüle taaʼinrüin nüpüleerua David tü nüküjatüjütkalia achiki Jehová nümüin, 10 nüneeküin David süpüla nooʼulaainjanain suulia aluwatawaa na nüpüshikana Saúl. Nüneeküin David süpüla niainjachin aluwataain naaʼu na israelitakana jee naaʼu na wayuu chajanakana Judá, suluʼujee tü mmakat Dan sünainmüinreʼeya Beer-Seba». 11 Koʼutakalaka neʼe Is-Bóset nuulia Abner süka mmoluin maʼin nia neema.

12 Nuluwataamaataka nünüiki Abner nümüin David jee nümakalaka nümüin: «¿Aashin piayaain laülaain saaʼu mmakat tüü? Anashi püpansaajüle pünüiki tamüin, tachajaajeetkalaka sukuwaʼipa süpüla paaʼinwainjanain napüshuaʼa na israelitakana pümaa». 13 Anuujeseʼe nünüiki David nümüin: «Anakajaʼa, tapansaajeerü tanüiki pümüin, püntirüinjatpejeʼe tamüin Mical, tü nüchonkat Saúl». 14 Nuluwataakalaka David nünüiki nümüin Is-Bóset, chi nüchonkai Saúl jee nümakalaka nümüin: «Anasü piiteʼerüle tamüin Mical, tü taʼwayuusekat. Aapünüsü shia tamüin saaʼu toʼutüin naaʼin poloo nekii filisteo jee saaʼujee tantirüin süta nakorolo». 15 Nüsütirüinjeseʼe Is-Bóset Mical nuulia Paltiel, chi nüchonkai Lais. 16 Nuʼunakalaka chi suʼwayuusekai sümaa. Aʼyalajüshi maʼin nia süchiirua suluʼumüinreʼeya tü mmakat Bahurim. «Anashi piitaale püchikuaʼa», nümakalaka Abner nümüin. Niitaakalaka nipialuʼumüin.

17 Nuluwataainjeseʼe Abner nünüiki namüin na laülaashiikana napüleerua na israelitakana sünain maa: «Kakaliairü maʼin suchuntaain jaaʼin niainjachin David aluwataain jaaʼu. 18 Anashi jüneeküle nia süpüla aluwatawaa jaaʼu. ‹Toʼtteʼereena na israelitakana nükajee David, toʼtteʼereena naya noulia na filisteokana jee noulia napüshuaʼa na wayuu müliakana atuma naya›, aashin shiain nüküjain tia Jehová nümüin David». 19 Naashajaakalaka Abner namaa na nüikeyuukana Benjamín, aashajaashiaʼaya nia nümaa David chaa Hebrón. Nüküjain nümüin David tü namakat na israelitakana jee tü namakat napüshuaʼa na nüikeyuukana Benjamín.

20 Piama nekii na wayuu nümaakana Abner chaa Hebrónmüin sünain anaʼlawaa nümüin David. Eekalaka ekawaa nutuma David niyaaluʼu Abner jee nayaaluʼu na wayuu nümaajanakana. 21 «Laülaashikalee, anashi püjütüle taya toutkajeʼeraiwa napüshuaʼaleʼeya na israelitakana yaa pümaʼanamüin. Puluwataajeechikalaka saaʼu tü kasa puluwataweekalü aaʼu», nümakalaka Abner nümüin David. Ajütünüshijeseʼe nia nutuma David sümaa nnojoluin jamajüin nia atumawaa.

22 Aleʼejüshi Joab wanaa sümaa tia namaʼaleeya na wayuu nümaajanakana, süchikajana naya ashutaa saaʼu wanee mma jee watta saalii tü kasa nasütakat noulia na wayuu sulujunakana tia mmakat. Oʼunakajasa Abner Hebrónjee, jama nüjütünüin nutuma David sümaa nnojolin jamajüin nia atumawaa. 23 «Yaajaisaʼa Abner, chi nüchonkai Ner, antüshi nia sünain anaʼlawaa nümüin chi aluwataashikai, ajütünapejeʼe neʼe nia nutuma David sümaa nnojolin jamajüin nia atumawaa». Shiakalaka aküjünüin tia nümüin Joab nüleʼejapa namaa napüshuaʼa na surulaatkana. 24 Nikerotokoloko Joab nümaʼanamüin chi aluwataashikai jee nümakalaka nümüin: «¿Jamüshikai pia? Yaajeeshi nünülia Abner sünain anaʼlawaa pümüin, püjütapejeʼe neʼe nia sümaa nnojolin jamajüin nia putuma, mojutaʼaleesüjaʼa tü paaʼinrakat. 25 Pütüjaa aaʼulu jamüin maʼin nukuwaʼipa Abner, chi nüchonkai Ner. Antüshi neʼe nia yaamüin süpüla nimeejüinjachin pia otta süpüla nütüjaainjachin saaʼu süpüshuaʼa tü kasa paaʼinrakat».

26 Nuʼunakalaka Joab nümaʼanajee David, nüjütirüinjeseʼe wayuu nüchiirua Abner. Nüsaʼwajaanaka Abner natuma naya wayuukana eekai tü ishi chakat Sirá. Namaashijeseʼe nia nümaʼanamüin Joab, naainjapejeʼe tia Joab nujuuna David. 27 Nümaanaka Abner nutuma Joab nüntapa Hebrón, amaanüshi nia nutuma suluʼupünaa soʼu tü pueulokot süpüla naashajaainjachin nümaa nümüiwaʼa. Shiasaʼa namüiwaʼapa naya nütkaka Joab nüleʼepaʼanain Abner, outaka nia. Pasalaashi Joab naaʼu Asahel. 28 Anuujeseʼe nünüiki David naapapa süchiki tia: «Nütüjaa aaʼulu Jehová maainjalain taya jee maainjalain na wayuu taluwataakana aaʼu. Nnojoishii wayain oʼutuin naaʼin Abner, chi nüchonkai Ner. 29 Anashi niale süsalain Joab outuin Abner, anashii nayale süsalain nüpüshi chi nüshikai. Eeʼewalinjachi wanee wayuu naʼakajee nüpüshi Joab eekai amülain amüin wanee kasa suluʼupünaa nükorolo, eeinjachi wanee wayuu naʼakajee na nüpüshikana eekai kanain tü ayuulii kanüliakat lepra, eekai nusuttajüin, wanee eekai nuʼutunuin aaʼin süka chajaruuta otta chira eekai müliain maʼin sutuma jamü». 30 Nuʼutunakalaka aaʼin Abner nutuma Joab nümaa Abisái, pasalaashii naya naaʼu Asahel, jama nuʼutunuin aaʼin Asahel nutuma Abner sünain tü atkawaa eejatkat suluʼu tü mmakat Gabaón.

31 «Anashii jüchatajaale jüsheʼin, jaʼata jünain tü kuluulu shiyaawasekat mojuu aaʼin jee jiʼyalaja naalinjee Abner», nümakalaka David nümüin Joab jee namüin na wayuu nümaajanakana. Oʼunushiaʼaya David nachiirua na wayuu alüʼüjakana Abner. 32 Niʼikünakalaka Abner chaa Hebrón, aʼyalajüshi maʼin David naalin Abner, emetutsü maʼin niʼira David süʼütpaʼa eejachire niʼitaanüin Abner. Aʼyalajüshiʼiya napüshuaʼaleʼeya naya wayuukana naalinjee Abner. 33 Niiʼirajakalaka David wanee jayeechi nüchiki Abner sünain maa:

«¿Jamüshi nuʼutunakaʼa aaʼin Abner maʼaka naaʼin wanee wayuu eekai mojutuin atumawaa?

Müshi pia maʼaka naaʼin wanee wayuu oʼutunakai aaʼin sutuma wayuu mojulaasü».

Naʼyalajayaa namaka nachikuaʼa naya wayuukana nüchiirua Abner.

35 Noʼunakalaka napüshuaʼa na wayuukana sünain eʼikajawaa pan niküin David süpüla namülialajatüin naaʼin, naaʼinrüin tia süpülapünaa nikerotüin chi kaʼikai. Anuujeseʼe nünüiki David: «Anashi süsalale taya nutuma Maleiwa teküle pan jee teküle wanee kasa nnojoliiwaʼaya nikeroluin chi kaʼikai». 36 Anashiikalaka namüin na wayuukana tü nümakat David jee anashiisiaʼaya namüin süpüshuaʼa tü naaʼinrakat. 37 Nayaawatakalaka saaʼu napüshuaʼa naya wayuukana jee nayaawata aaʼuliaʼaya napüshuaʼa na israelitakana nnojolin niain David oʼutuin naaʼin Abner, chi nüchonkai Ner. 38 Anuujeseʼe nünüiki David namüin na aʼyataashiikana nümüin: «Jütüjaa aaʼu outuin soʼukai yaa Israel wanee shikiipüʼü wayuu, wanee wayuu kojutukai maʼin atumawaa. 39 Mayaainjeʼe taneekünüin süpüla aluwatawaa, nnojotsü wanaawain tatsüin soʼukai namaa na süchooinkana Zeruyá, mojulaashii maʼin naya wayuukana. Anasü kasalajanale nutuma Jehová wanee kasa mojusü naaʼinraka wanee wayuu».